Nzambi obokelanga wantu a zula yawonso bamfinama muna sambu. (Nkunga 65:2) Kansi, ke wanga yovo tonda sambu yawonso ko. Kasikil’owu, e sambu ya yakala obangikanga nkaz’andi ilenda kakilwa. (1 Petelo 3:7) Vana ntandu, vava Aneyisaele bakwamanana vanga oma mambi, Nzambi kazola wá sambu yau ko. Kieleka, o samba kwa Nzambi elau diampwena kikilu. Nzambi owanga e sambu kana nkutu yawana bevanganga masumu mampwena avo bavilukidi o ntima.—Tanga Yesaya 1:15; 55:7.

Tala e video Será que Deus escuta todas as orações?

E sambu dimosi muna mambu melombwanga muna nsambil’eto. Muna kuma kiaki, tufwete sambanga kaka kwa Yave wa Mvangi eto. (Matai 4:10; 6:9) Yave ke zolanga ko vo twalombololanga e sambu yovo tanga yo muna nkanda. Ozolanga vo vava tusambanga twavovanga mana mena muna ntima mieto.—Tanga Matai 6:7; Filipi 4:6, 7.

O Mvangi eto olenda wá kana nkutu sambu ya nsi a ntima. (1 Samuele 1:12, 13) Okutuvovesanga vo twasambanga konso ntangwa, nze kuna lubantiku ye kuna mfoko a lumbu, muna ntangw’a dia ye vava tunwananga ye mambu mampasi.—Tanga Nkunga 55:22; Matai 15:36.

O kala ye ngwizani ambote yo Nzambi ke diambu diakete ko, kadi tuzinganga vamosi ye wantu ke bekwikilanga mu Nzambi ko yo veza nsilu andi wa twasa luvuvamu ova ntoto. (2 Timoteo 3:1, 4; 2 Petelo 3:3, 13) Muna kuma kiaki, lukasakeso lwa mpangi zeto tuvwidi o mfunu, oyau mpe lukasakeso lweto bavwidi o mfunu.—Tanga Ayibere 10:24, 25.

 O kutakana vamosi y’awana bezolanga Nzambi dikutusadisanga mu finama Nzambi. Tukutakanu twa Mbangi za Yave tuvananga wantu elau dia kasakesa lukwikilu lwa muntu yo nkw’andi.—Tanga Roma 1:11, 12.

Olenda finama Yave muna badikanga mana tulongokanga muna Diambu diandi. Badika dina lenda longoka muna salu yandi, luludiku lwandi ye nsilu miandi. O badika yo samba dikutusadisanga mu wokesa luyangalalu lweto muna zola ye ngangu za Nzambi.—Tanga Yosua 1:8; Nkunga 1:1-3.

Olenda finama Nzambi kele vo umbundidi e vuvu yo kwikila muna yandi. Kansi, lukwikilu luna nze lekwa kiamoyo kivavanga dikilwa. Muna kuma kiaki, ofwete dikilanga lukwikilu lwaku muna badikanga e kuma kia mana okwikilanga.—Tanga Matai 4:4; Ayibere 11:1, 6.

Yave olunga-lunganga awana bekunzolanga. Olenda kubatanina muna mawonso malenda fwasa lukwikilu lwau ye vuvu kiau kia vwa moyo a mvu ya mvu. (Nkunga 91:1, 2, 7-10) Okutulukisanga twavenga e mpil’a zingu kilenda sia vimpi weto mu vonza yo kulula kiese kieto. Yave okutulonganga e mpil’a zingu kisundidi o wete.—Tanga Nkunga 73:27, 28; Yakobo 4:4, 8.