LONGI DIA 5
Adieyi i Kani dia Nzambi mu Kuma kia Ntoto?
1. Ekuma Nzambi kasemena o ntoto?
Yave wavana o ntoto kwa wantu. O ntoto i fulu kieto. Muna kuma kiaki, yakala yo nkento antete, Adami yo Eva, ke basemwa ko mu lungil’ezulu, kadi Nzambi wasema ambasi mu zingila kun’ezulu. (Yobi 38:4, 7) Kansi, Nzambi wasia muntu antete muna paradiso eyi yayikilwa vo mpatu a Edene. (Etuku 2:15-17) Yave wasia o nsilu kwa muntu antete kumosi ye mbongo andi wa vwa moyo a mvu ya mvu ova ntoto.—Tanga Nkunga 37:29; 115:16.
Kuna lubantiku, mpatu a Edene kaka yakala se paradiso. Yakala yo nkento antete, badi zadisa ntoto yo wan’au. I bosi, badi lunga-lunga o ntoto wawonso yo kitula wo se paradiso. (Etuku 1:28) O ntoto ke ufwaswa ko. Uzingilwa kaka kwa wantu.—Tanga Nkunga 104:5.
Tala e video Ekuma Nzambi Kasemena o Ntoto?
2. Ekuma o ntoto ke wakitukila paradiso ko?
Adami yo Eva bakolamena Nzambi, muna kuma kiaki Yave wabavaikisa muna mpatu a Edene. E paradiso yavila, ke vakala muntu ko olenda yo vutulwisa. Nkand’a Nzambi uvovanga vo: “E nza iyekwelo vana koko kwa kimpumbulu.”—Yobi 9:24.—Tanga Etuku 3:23, 24.
Nga Yave wavilakana ekani diandi mu kuma kia wantu? Ve! Yandi i Mpungu-ngolo. Ekani diandi ke dilendi funga ko. (Yesaya 45:18) Ovutulwisa e zingu kia wantu muna mpila ina kakana.—Tanga Nkunga 37:11, 34.
3. Paradiso aweyi ivutulwisilwa?
E paradiso ivutulwiswa ova ntoto vava Yesu keyala nze Ntinu a Kintinu kia Nzambi. Muna vita iyikilwanga vo Armangedo, Yesu ofila mbasi za Nzambi yo fwasa awonso bekolamenanga Nzambi. I bosi, Yesu osia Satana muna pelezo mu 1000 dia mvu. Nkangu a Nzambi bevuluzwa kadi Yesu okubafila yo kubatanina. Beyangalela zinga yakwele mvu muna Paradiso ova ntoto.—Tanga Lusengomono 20:1-3; 21:3, 4.
4. E mpasi nkia ntangwa zifokoka?
Nkia ntangwa Nzambi kefokola e mpasi ova ntoto? Yesu wayika “sinsu” kisonga vo e mbaninu ifinamene. O mambu mevangamanga ova nza mesianga e zingu kia wantu mu vonza, mesonganga vo mu lumbu ‘yambaninu a tandu’ kiaki tuzingilanga.—Tanga Matai 24:3, 7-14, 21, 22.
Muna kolo kia 1000 dia mvu, Yesu oyala e nza tuka kun’ezulu yo fokola e mpasi zawonso. (Yesaya 9:6, 7; 11:9) Vana ntandu a sala nze Ntinu, Yesu osala nze Ngang’ambuta yo katula masumu m’awana bezolanga Nzambi. Muna kuma kiaki, Nzambi osadila Yesu mu fokola mayela, kinunu ye lufwa.—Tanga Yesaya 25:8; 33:24.
5. Nani ozingila muna Paradiso?
Muna Seka dia Kintinu, owanana yo wantu bezolanga Nzambi ye awana belongokanga una balenda kunyangidikila
Awana belemvokelanga Nzambi bezingila muna Paradiso. (1 Yoane 2:17) Yesu watuma alandi andi bavava wantu ansongi yo kubalonga una balenda vwila edienga dia Nzambi. O unu, Yave okubikanga mazunda ye mazunda ma wantu kimana bazingila muna Paradiso ova ntoto. (Sefaniya 2:3) Muna Maseka ma Kintinu ma Mbangi za Yave, wantu belongokanga una balenda kadila akala ye mase mambote, akento ye ngudi zambote. Mase yo wana belongokanga vamosi dina bafwete vanga mu vwa nluta mia nsangu zambote.—Tanga Mika 4:1-4.
