Zasoneka Matai 6:1-34
6 “Nukeba nualembi vangila mambu mansongi vana meso ma wantu kimana nuamoneka kwa yau;+ avo nuvangidi wo, ke nutambula nsendo ko kwa Se dieno wina kuna zulu.
2 Dianu vo, avo se vana lukau lwa nkenda,* kusiki mpungi ko nze una uvanganga akwa kivunina muna masambilu ye muna nzila, kimana basanisinua kwa wantu. Kieleka inuvovese wo vo, batambwidi kala o nsendo au.
3 Kansi ongeye, avo se vana lukau lwa nkenda, kuyambula ko vo o koko kwaku kwalumonso kwazaya dina divanganga o koko kwalunene,
4 kimana lukau lwaku lwa nkenda lwakala lwansweki. I bosi, o Se diaku ona omwenanga kuna kinsweki, okusenda.+
5 “Diau dimosi mpe, avo se nusamba, ke nukadi nze ampuki ko,+ kadi bezolanga telama muna masambilu ye muna mpambu za nzila zampwena, kimana bamoneka kwa wantu.+ Kieleka inuvovese wo vo, batambwidi kala o nsendo au.
6 Kansi ongeye, avo se samba, kota muna suku diaku, zika e kielo yo samba kwa Se diaku ona wina kuna kinsweki.+ O Se diaku ona omwenanga kuna kinsweki, okusenda.
7 Vava osambanga, kuvutukilanga mambu mau mamosi ko nze una bevanganga esi zula yankaka, kadi edi beyindulanga vo Nzambi okubawa muna sambanga e sambu yandá.
8 I kuma vo, ke nukadi nze yau ko, kadi o Se dieno ozeye mana nuvuidi o mfunu+ una nkutu ke nuanlombele ko.
9 “I wau wuwu nufwete sambila:+
“‘E Se dieto koko zulu, yambula e nkumbu aku+ yazitiswa.*+
10 E Kintinu kiaku kiza.+ O luzolo lwaku+ lwavangama ova ntoto nze koko zulu.+
11 Utuvana o dia kweto kwa* unu,+
12 utuyambulwila e mfuka zeto, nze una tuyambulwilanga ana bena ye mfuka zeto.+
13 Kutuyambula ko twabwa muna lutonto,+ kansi utuvuluza muna ndiona wambi.’+
14 “Kadi avo nulolokele wantu o makuzuka mau, o Se dieno kuna zulu okunuloloka mpe;+
15 diau dimosi, avo ke nulolokele wantu makuzuka mau ko, o Se dieno mpe ke loloka makuzuka meno ko.+
16 “Avo se nufionkonona,*+ nuyambula kendalala nze akwa kivunina, kadi besobanga ndose zau* kimana bamoneka kwa wantu vo fionkonona befionkononanga.+ Kieleka inuvovese wo vo, batambwidi kala o nsendo au.
17 Kansi ongeye, avo se fionkonona,* kusa o mazi kuna ntu aku yo sukula e ndose aku,
18 kimana walembi moneka kwa wantu vo fionkonona ofionkononanga,* kansi wamoneka kwa Se diaku ona wina kuna nsweki. O Se diaku ona omwenanga kuna kinsweki, okusenda.
19 “Nuyambula lundila lusalu lweno ova nza,+ vana vefwasilanga nselele ye mbumbu, e mivi bebangula yo yiya.
20 Kansi, nulundila lusalu lweno kuna zulu,+ kuna ke lulendi fwasilwa kwa nselele ko yovo mbumbu,+ ngatu mivi babangula yo yiya.
21 Kadi kuna kwina lusalu lwaku, i kuna mpe kukala o ntim’aku.
22 “O mwinda a nitu i disu.+ Avo disu diaku dialungalala,* e nitu aku yawonso mpe itemokene.
23 Kansi, avo disu diaku diakimpala,*+ e nitu aku yawonso ibukama e tombe. Avo ntemo wina omo ngeye i tombe, ekwe tombe kianene kina omo ngeye!
24 “Ke vena ntaudi ko olenda sadila mfumu zole; kadi omenga mosi yo zola wankaka,+ yovo otatidila mosi yo bembola wankaka. Ke nulendi kala ntaudi za Nzambi ye Kimvuama ko.+
25 “Muna kuma kiaki, inuvovese wo vo: Nuyambula tokana kwayingi+ mu kuma kia mioyo mieno, kana nki nudia yovo nki nunua yovo nki nuvuata.+ Nga o moyo ke usundidi madia ko e? E nitu ke isundidi mvuatu ko e?+
26 Nutoma tala e nuni za zulu;+ ke zikunanga ko yovo vela ngatu kutika madia muna malundilu, kansi o Se dieno kuna zulu odikilanga zo. Nga yeno ke nubasundidi o mfunu ko e?
27 Nani vovo nuina muna tokana kwayingi olenda kudikila kana nkutu miniti mosi muna zingu kiandi?+
28 Diau dimosi mpe, ekuma nutokanenanga mu kuma kia mvuatu? Nutoma badika una e mvuma za mfuta zikudilanga; ke zifuntukanga ko ngatu tunga nlele;
29 kansi inuvovese wo vo, kana nkutu Solomo+ muna nkembo andi wawonso, kasidi vuatila nze imosi muna mvuma zazi ko.
30 Avo Nzambi ovuikanga e titi ya mfuta, eyi ina o unu, o mbazi iyokelo vana tiya, nga keluta kunuvuika ko, oyeno akwa filukwikilu e?
31 I kuma vo, ke nutokani ko+ yo vova vo: ‘Nki tudia?,’ ‘Nki tunua?’ yovo ‘Nki tuvuata?’+
32 Kadi yawonso yayi i yau befuntukinanga o wantu a nza. O Se dieno kuna zulu ozeye wo vo lekwa yayi yawonso nuvuidi o mfunu.
33 “Ozevo, nuvavanga ntete Kintinu ye unsongi wa Nzambi, e lekwa yayi yawonso ikunukudikilwa.+
34 I kuma vo, ke nutokani ko mu kuma kia mbazi,+ kadi e lumbu kia mbazi kikala ye ntokani zandi. Konso lumbu kina ye ntokani zandi.
Mvovo vana yand'a lukaya
^ Yovo “tukau twa asukami.” Tala Nsas’a Mvovo.
^ Yovo “yavaulwa; yaveleleswa.”
^ Mvovo wa sina: “mbolo eto a.”
^ Yovo “beyambulanga lunga-lunga e mpwa zau.”
^ Yovo “numina nsoki.”
^ Yovo “mina nsoki.”
^ Yovo “mina nsoki.”
^ Yovo “diakiá.” Mvovo wa sina: “diakumosi.”
^ Mvovo wa sina: “diambi; dia umpumbulu.”
