တၢ်မၤလိ ၄
ယ့ၣ်ၡူးခရံာ်မ့ၢ် မတၤလဲၣ်
၁. ယ့ၣ်ၡူးအတၢ်အိၣ်မူ စးထီၣ်အသးဒ်လဲၣ်.
တချုးယ့ၣ်ၡူးဟဲအိၣ်ဖျဲၣ်ထီၣ်လၢ ဟီၣ်ခိၣ်အခါ အဝဲအိၣ်လၢမူခိၣ် ဒ်ပှၤနီၢ်သးတဂၤအသိးလီၤ. လၢတၢ်န့ၣ်အဃိ အဝဲတလီၤဂာ်ဒ်သိးဒီး ပှၤဟီၣ်ခိၣ်ဖိအဂၤဘၣ်. (ယိၤဟၣ် ၈:၂၃) အဝဲမ့ၢ် ယွၤအတၢ်ဘၣ်တ့အဆိကတၢၢ်, ဒီးဖဲယွၤတ့လီၤတၢ်အဂၤတဖၣ်အခါ အဝဲမၤစၢၤဝဲလီၤ. ပှၤလၢယဟိဝၤယွၤတ့လီၤအီၤလၢ အနီၢ်ကစၢ်ဒၣ်ဝဲန့ၣ် အိၣ်ထဲယ့ၣ်ၡူးတဂၤဧိၤလီၤ. လၢတၢ်န့ၣ်အဃိ ဘၣ်တၢ်ကိးအီၤလၢ ယွၤအဖိခွါ “တဂၤဃီ” န့ၣ်ကြၢးဝဲဘၣ်ဝဲလီၤ. (ယိၤဟၣ် ၁:၁၄) ယ့ၣ်ၡူးမၤတၢ်ဒ် ပှၤကတိၤခၢၣ်စးတၢ်လၢယွၤအဂီၢ်လီၤ. လၢတၢ်န့ၣ်အဃိ အဝဲဘၣ်တၢ်ကိးစ့ၢ်ကီးအီၤလၢ “တၢ်ကလုၢ်” န့ၣ်လီၤ.—ဖး ကတိၤဒိ ၈:၂၂, ၂၃, ၃၀; ကလီးစဲ ၁:၁၅, ၁၆ တက့ၢ်.
၂. ဘၣ်မနုၤအဃိ ယ့ၣ်ၡူးဟဲလီၤလၢ ဟီၣ်ခိၣ်ချၢလဲၣ်.
ယွၤဆှၢလီၤအဖိခွါဆူ ဟီၣ်ခိၣ်ချၢခီဖျိ သုးဝဲအဖိခွါအသးသမူဆူ ပှၤယူဒၤဖိမုၣ်ကနီၤတဂၤ လၢအမံၤမ့ၢ် နီၢ်မၤရံအဒၢလီၢ်ပူၤလီၤ. လၢတၢ်န့ၣ်အဃိ ယ့ၣ်ၡူးအပၢ်န့ၣ် တမ့ၢ်ပှၤဟီၣ်ခိၣ်ဖိဘၣ်. (လူၤကၣ် ၁:၃၀-၃၅) ယ့ၣ်ၡူးဟဲလီၤလၢ ဟီၣ်ခိၣ်ချၢဒ်သိး (၁) ကသိၣ်လိတၢ်မ့ၢ်တၢ်တီဘၣ်ဃးဒီးယွၤ, (၂) ကပာ်လီၤတၢ်အဒိအတဲာ်လၢ ပမ့ၢ်ကွၢ်ဆၢၣ်မဲာ်ဘၣ်တၢ်ကီတၢ်ခဲတဖၣ်ဒၣ်လဲာ် ပမၤယွၤအတၢ်ဘၣ်သး ကသ့ဒ်လဲၣ်အဂ့ၢ် ဒီး (၃) ကဟ့ၣ်လုၢ်ထီၣ်အသးသမူအလၢအပှဲၤ ဒ် ‘တၢ်ပှ့ၤက့ၤ’ အသိးန့ၣ်လီၤ.—ဖး မးသဲ ၂၀:၂၈ တက့ၢ်.
၃. ဘၣ်မနုၤအဃိ ပလိၣ်ဘၣ် တၢ်ပှ့ၤက့ၤလဲၣ်.
တၢ်ပှ့ၤက့ၤန့ၣ်မ့ၢ် တၢ်ဟ့ၣ်က့ၤတၢ်အပှ့ၤဒ်သိး ပှၤတဂၤကထူၣ်ဖျဲးထီၣ်လၢ တၢ်သံအဂီၢ်န့ၣ်လီၤ. (၂ မိၤၡ့ ၂၁:၂၉, ၃၀) လၢအခီၣ်ထံးန့ၣ် ယွၤတတိာ်ပာ်ဝဲ လၢပှၤဟီၣ်ခိၣ်ဖိတဖၣ်ကဘၣ်သံဘၣ်ပှၢ်ဝဲဘၣ်. ပသ့ၣ်ညါဘၣ်ဒ်လဲၣ်. ယွၤစံးဘၣ်ပှၤဟီၣ်ခိၣ်ဖိအဆိကတၢၢ်တဂၤလၢအမ့ၢ် စီၤအၤဒၣ်န့ၣ် အဝဲမ့ၢ်မၤတၢ်လၢ လံာ်စီဆှံကိးဝဲလၢ “တၢ်ဒဲးဘး” န့ၣ်ကဘၣ်သံဝဲလီၤ. လၢတၢ်န့ၣ်အဃိ, စီၤအၤဒၣ်မ့ၢ်တမၤတၢ်ဒဲးဘးန့ၣ် အဝဲတသံဘၣ်ဝဲဘၣ်. (၁ မိၤၡ့ ၂:၁၆, ၁၇; ၅:၅) ဒ်လံာ်စီဆှံစံးဝဲအသိး, တၢ်သံ “ဟဲနုာ်” ဆူဟီၣ်ခိၣ်ချၢလၢ စီၤအၤဒၣ်အဃိလီၤ. လၢတၢ်န့ၣ်အဃိ, စီၤအၤဒၣ်ဟ့ၣ်လီၤအစၢၤအသွဲၣ်ခဲလၢာ်လၢ တၢ်ဒဲးဘးဒီး တၢ်ဒဲးဘးအဘူးအလဲ လၢအမ့ၢ်တၢ်သံလီၤ. ပလိၣ်ဘၣ်တၢ်ပှ့ၤက့ၤဒ်သိး ကမၤထူၣ် ဖျဲးထီၣ်ပှၤလၢ တၢ်သံလၢ ပန့ၢ်သါဘၣ်လၢစီၤအၤဒၣ်အအိၣ်န့ၣ်လီၤ.—ဖး ရိမ့ၤ ၅:၁၂; ၆:၂၃ တက့ၢ်.
ဒ်သိးပကထူၣ်ဖျဲးထီၣ်လၢတၢ်သံအဂီၢ်န့ၣ် မတၤဟ့ၣ်တၢ်ပှ့ၤက့ၤကသ့လဲၣ်. ဖဲပသံအခါ ပဟ့ၣ်က့ၤတၢ်အဘူးအလဲလၢ ပနီၢ်ကစၢ်အတၢ်ဒဲးဘးအဂီၢ်လီၤ. မ့ၢ်လၢပှၤကညီတလၢတပှဲၤနီတဂၤဘၣ်အဃိ ဟ့ၣ်တၢ်ပှ့ၤက့ၤလၢ ပှၤဂၤအတၢ်ဒဲးဘးအဂီၢ်တန့ၢ်ဝဲဘၣ်.—ဖး စံးထီၣ်ပတြၢၤ ၄၉:၇-၉ တက့ၢ်.
၄. ဘၣ်မနုၤအဃိ ယ့ၣ်ၡူးတူၢ်သံအသးလဲၣ်.
ယ့ၣ်ၡူးမ့ၢ်ပှၤလၢပှၤပှဲၤတဂၤ အဃိအဝဲတလီၤဂာ်ဒီး ပှၤဟီၣ်ခိၣ်ဖိသ့ၣ်တဖၣ်ဘၣ်. မ့ၢ်လၢအဝဲတမၤတၢ် ကမၣ်နီတမံၤဘၣ်အဃိ တလိၣ်သံဝဲလၢ အတၢ်ဒဲးဘးအဂီၢ်ဘၣ်. လၢတၢ်န့ၣ်အလီၢ်, ယ့ၣ်ၡူးတူၢ်သံအသးလၢ ပှၤဂၤအတၢ်ဒဲးဘးအဂီၢ်လီၤ. ကစၢ်ယွၤပာ်ဖျါထီၣ် တၢ်အဲၣ်အဒိၣ်အမုၢ်လၢ ပှၤဟီၣ်ခိၣ်ဖိအဂီၢ်ခီဖျိ ဟ့ၣ်လီၤဝဲအဖိခွါလၢ ကတူၢ်သံအသးလၢ ပဂီၢ်လီၤ. ယ့ၣ်ၡူးစ့ၢ်ကီး ပာ်ဖျါထီၣ်အတၢ်အဲၣ်ပှၤခီဖျိ ဒိကနၣ်ဝဲအပၢ်အကလုၢ်ဒီး ဟ့ၣ်လီၤအသးသမူလၢ ပတၢ်ဒဲးဘးအဂီၢ်လီၤ.—ဖး ယိၤဟၣ် ၃:၁၆; ရိမ့ၤ ၅:၁၈, ၁၉ တက့ၢ်.
ကွၢ်တၢ်ဂီၤမူလၢအမ့ၢ် ဘၣ်မနုၤအဃိ ယ့ၣ်ၡူးတူၢ်သံအသးလဲၣ်
၅. ခဲအံၤယ့ၣ်ၡူး မၤတၢ်မနုၤလဲၣ်.
ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ, မၤဘျါက့ၤပှၤဆါ, မၤမူထီၣ်က့ၤပှၤသံ, ဒီးမၤပူၤဖျဲး ပှၤလၢတၢ်ကီတၢ်ခဲအပူၤလီၤ. လၢတၢ်န့ၣ်အဃိ ပာ်ဖျါထီၣ်ဝဲတၢ်လၢအဝဲကမၤဝဲ ခါဆူညါလၢ ပှၤဟီၣ်ခိၣ်ဖိတဖၣ်အဂီၢ်န့ၣ်လီၤ. (မးသဲ ၁၅:၃၀, ၃၁; ယိၤဟၣ် ၅:၂၈) ယ့ၣ်ၡူးသံဝံၤအလီၢ်ခံ ယွၤမၤမူထီၣ်က့ၤအီၤ ဒ်ပှၤနီၢ်သးတဂၤအသိးလီၤ. (၁ ပ့းတရူး ၃:၁၈) လၢခံန့ၣ် ယ့ၣ်ၡူးအိၣ်ခိးတၢ်လၢ ယွၤအစုထွဲတခီ တုၤလၢယဟိဝၤယွၤ ဟ့ၣ်အီၤတၢ်စိတၢ်ကမီၤလၢ ကပၢဝဲဟီၣ်ခိၣ်ဒီဘ့ၣ်ဒ်စီၤပၤအသိးန့ၣ်လီၤ. (ဧ့ၤဘြံၤ ၁၀:၁၂, ၁၃) ခဲအံၤယ့ၣ်ၡူးပၢတၢ် လၢမူခိၣ်ဒ် စီၤပၤတဂၤအသိး, ဒီးအပျဲၢ်အဘီၣ်တဖၣ် ဘိးဘၣ်သ့ၣ်ညါဝဲ တၢ်သးခုကစီၣ်အံၤလၢ ဟီၣ်ခိၣ်ဒီဘ့ၣ်ညါလီၤ.—ဖး ဒၤနံးယ့လး ၇:၁၃, ၁၄; မးသဲ ၂၄:၁၄ တက့ၢ်.
တယံာ်လၢၤဘၣ်န့ၣ် ဒ်ယ့ၣ်ၡူးမ့ၢ်စီၤပၤတဂၤအသိး ကသူဝဲအတၢ်စိတၢ်ကမီၤဒီး ကမၤကတၢၢ်ကွံာ်ဝဲ တၢ်နးတၢ်ဖှီၣ်ခဲလၢာ် ဃုာ်ဒီးပှၤလၢအဒုးအိၣ်ထီၣ်ဝဲ တၢ်သ့ၣ်တဖၣ်အံၤလီၤ. ပှၤလၢအစူၢ်က့ၤနာ်က့ၤ ယ့ၣ်ၡူးဒီးဒိကနၣ်အကလုၢ် ကိးဂၤဒဲးန့ၣ် ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤပှဲၤဒီးတၢ်သးခုန့ၣ်လီၤ.—ဖး စံးထီၣ်ပတြၢၤ ၃၇:၉-၁၁ တက့ၢ်.