ယွၤ​အဘီ​အမုၢ်​န့ၣ်​မ့ၢ် တၢ်ပၢ​တၢ်ပြး​လၢ မူခိၣ်​လီၤ. တၢ်ပၢ​တၢ်ပြး​အံၤ​က မၤ​ဟါမၢ်ကွံာ်ဝဲ ဟီၣ်ခိၣ်​အ​တၢ်ပၢ​တၢ်ပြး​ခဲလၢာ် ဒီး​ကစၢ်​ကသူ​အီၤ​လၢ က​မၤ​လၢပှဲၤ​ထီၣ် အ​တၢ်​ဘၣ်သး​လၢ​ဟီၣ်ခိၣ်​ချၢ ဒ်​လၢ​မူခိၣ်​အသိး​န့ၣ်​လီၤ. တၢ်အံၤ​မ့ၢ်​တၢ်သးခု​ကစီၣ်​လီၤ. ပှၤ​ဟီၣ်ခိၣ်​ဖိ​တဖၣ်​လိၣ်ဘၣ်​ဝဲ တၢ်ပၢ​တၢ်ပြး​လၢ​အဂ့ၤ​န့ၣ်​လီၤ. ဒီး​တ​ယံာ်လၢၤဘၣ်​န့ၣ် ယွၤ​အဘီ​အမုၢ်​က​မၤ​လၢပှဲၤဝဲ တၢ်လိၣ်ဘၣ်​အံၤ​လီၤ. တၢ်ပၢ​တၢ်ပြး​အံၤ​က​မၤဃူမၤဖိး​ဝဲ ပှၤ​ဟီၣ်ခိၣ်​ဖိ​ကိးဂၤ​ဒဲး​န့ၣ်​လီၤ.—ဖး ဒၤနံးယ့လး ၂:၄၄; မးသဲ ၆:၉, ၁၀; ၂၄:၁၄ တက့ၢ်.

 တၢ်​လၢ​ဘီမုၢ်​န့ၣ် က​ဘၣ်​အိၣ်ဒီး​စီၤပၤ​တဂၤ​လီၤ. ယဟိဝၤ​ယွၤ ဃုထၢ​ထီၣ် အ​ဖိခွါ​ယ့ၣ်ၡူး​ခရံာ်​လၢ က​ကဲထီၣ်​ဘီမုၢ်​အ​စီၤပၤ​န့ၣ်​လီၤ.—ဖး လီၣ်ဖျါ ၁၁:၁၅ တက့ၢ်.

 ကွၢ်​တၢ်ဂီၤမူ​လၢ​အမ့ၢ် ယွၤ​အဘီ​အမုၢ်​န့ၣ်​မ့ၢ်​မနုၤ​လဲၣ်

 ယွၤ​အ​ဖိခွါ​မ့ၢ်​ပှၤလၢ အ​သူၣ်ဂ့ၤ​သးဝါ​ဒီး အဲၣ်​တၢ်တီ​တၢ်လိၤ​အဃိ အဝဲ​မ့ၢ်​စီၤပၤ​လၢ​အဂ့ၤ​ကတၢၢ်​လီၤ. (မးသဲ ၁၁:၂၈-၃၀) ယ့ၣ်ၡူး​န့ၣ်​အိၣ်ဒီး​တၢ်စိ​တၢ်ကမီၤ​လၢ​လၢပှဲၤပှဲၤ​လၢ က​မၤစၢၤ​ပှၤ​ဟီၣ်ခိၣ်​ဖိ​တဖၣ်​အဂီၢ်​လီၤ. မ့ၢ်​လၢ​အဝဲ​အိၣ်​လၢ​မူခိၣ်​ဒီး က​ပၢဝဲ​ဟီၣ်ခိၣ်​ဒီဘ့ၣ်​အဃိ​လီၤ. ယ့ၣ်ၡူး​ဂဲၤဆၢထၢၣ်​သမူထီၣ်​က့ၤ​ဝံၤ​အလီၢ်​ခံ က့ၤထီၣ်ဝဲ​ဆူ​မူခိၣ် ဒီး​ဆ့ၣ်နီၤ​ခိး​တၢ်​ဖဲ ယဟိဝၤ​ယွၤ​အ​စုထွဲ​တခီ​လီၤ. (ဧ့ၤဘြံၤ ၁၀:၁၂, ၁၃) လၢခံ​န့ၣ် ယွၤ​ဟ့ၣ်​အီၤ တၢ်စိ​တၢ်ကမီၤ​လၢ က​ပၢတၢ်​အဂီၢ်​န့ၣ်​လီၤ.—ဖး ဒၤနံးယ့လး ၇:၁၃, ၁၄ တက့ၢ်.

 ပှၤ​တ​ကရူၢ်​လၢ ဘၣ်​တၢ်​ကိး​အီၤ​လၢ “ပှၤ​စီဆှံ​တဖၣ်” န့ၣ်​က​ပၢ​ဃုာ်​တၢ်​ဒီး​ယ့ၣ်ၡူး​လၢ​မူခိၣ်​လီၤ. (ဒၤနံးယ့လး ၇:၂၇) ပှၤ​စီဆှံ​လၢ ဘၣ်​တၢ်​ဃုထၢ​ထီၣ်​အီၤ​အဆိ​ကတၢၢ် န့ၣ်​မ့ၢ်​ယ့ၣ်ၡူး​အ​တၢ်မၢဖိ​လၢ အတီ​အလိၤ​တဖၣ်​လီၤ. စးထီၣ်​ဖဲ​န့ၣ်​ဒီး​တုၤ​လီၤ​လၢ​ပစိၤ​ခဲအံၤ ယဟိဝၤ​ယွၤ​ဃုထၢ​ထီၣ်​စ့ၢ်ကီး​ဝဲ ပိာ်မုၣ်​ဒီး​ပိာ်ခွါ​လၢ​အတီ​အလိၤ​အဂၤ​တဖၣ် ဒ်​ပှၤ​စီဆှံ​အသိး​န့ၣ်​လီၤ. အဝဲသ့ၣ်​စ့ၢ်ကီး က​ဂဲၤဆၢထၢၣ်​သမူထီၣ်​က့ၤ​လၢ​နီၢ်သး ဒ်​ယ့ၣ်ၡူး အသိး​လီၤ.—ဖး ယိၤဟၣ် ၁၄:၁-၃; ၁ ကရံၣ်သူး ၁၅:၄၂-၄၄ တက့ၢ်.

  ပှၤ​က​လဲၤထီၣ်​ဆူ​မူခိၣ် ပှဲၤ​ဂၤ​လဲၣ်. အဝဲသ့ၣ် အ​နီၢ်​ဂံၢ်​အိၣ် ၁၄၄,၀၀၀ လီၤ. ယ့ၣ်ၡူး​ကိး​အဝဲသ့ၣ်​လၢ “သိ​လၢ​အ​စှၤ​တဖု” လီၤ. (လူၤကၣ် ၁၂:၃၂) အဝဲသ့ၣ်​က​ပၢ​ဃုာ်​တၢ်​ဒီး​ယ့ၣ်ၡူး​လီၤ.—ဖး လီၣ်ဖျါ ၁၄:၁ တက့ၢ်.

 ယွၤ​အဘီ​အမုၢ် စးထီၣ်​ပၢတၢ်​ဖဲ ၁၉၁၄ နံၣ်​လီၤ. a ဖဲ​ယ့ၣ်ၡူး​ကဲထီၣ်​စီၤပၤ​အခါ အဆိ​ကတၢၢ်​န့ၣ် ကစၢ်​တ့ၢ်လီၤ​ဝဲ​မုၣ်ကီၤလံၢ်​ဒီး အ​တၢ်နါ​တဖၣ်​လၢ ဟီၣ်ခိၣ်​ချၢ​န့ၣ်​လီၤ. မုၣ်ကီၤလံၢ်​အသး​ဒိၣ်ထီၣ် နးနး​ကလဲာ်​ဒီး ဒုးအိၣ်​ထီၣ်ဝဲ​တၢ်​သဘံၣ်​သဘုၣ်​လၢ ဟီၣ်ခိၣ်​ချၢ​န့ၣ်​လီၤ. (လီၣ်ဖျါ ၁၂:၇-၁၀, ၁၂) စးထီၣ်​ဖဲ​န့ၣ် တၢ်နး​တၢ်ဖှီၣ် အါထီၣ်​ဝဲ​ကွ့ၢ်ကွ့ၢ်​လီၤ. တၢ်ဒုး​တၢ်ယၤ, တၢ်​သၣ်​ဝံၤ​လီၤဒိ, တၢ်ဆါ​သံသတြိာ်, ဒီး​ဟီၣ်ခိၣ်​ဟူးဝး​တဖၣ်​န့ၣ် မ့ၢ် “တၢ်​ပနီၣ်” အ​သနၢၣ်​တဖၣ်​လၢ​ပာ်ဖျါ​ထီၣ်ဝဲ လၢ​တ​ယံာ်လၢၤဘၣ် ယွၤ​အဘီ​အမုၢ် က​စးထီၣ်​ပၢဝဲ​ဟီၣ်ခိၣ်​ဒီဘ့ၣ်​န့ၣ်​လီၤ.—ဖး လူၤကၣ် ၂၁:၇, ၁၀, ၁၁, ၃၁ တက့ၢ်.

 ခီဖျိ​လၢ​ဟီၣ်ခိၣ်​ဒီဘ့ၣ် တၢ်​စံၣ်တဲၤ​တဲလီၤ​တၢ်မၤ​အဃိ ယွၤ​အဘီ​အမုၢ်​န့ၣ် မၤဃူမၤဖိး​ဝဲ ပှၤ​ဂီၢ်မုၢ်​ဖးဒိၣ်​လၢ ဘၣ်​တၢ်​ပာ်ဖှိၣ်​ထီၣ်​အီၤ​လၢ ကယဲၢ်​ပှၤ​ကိး​ကလုာ်​ဒဲး​အကျါ​န့ၣ်​လီၤ. ပှၤ​အ​ကကွဲၢ်​တဖၣ် လၢ​အိၣ်ဒီး​တၢ်ဆီၣ်​လီၤသး​န့ၣ် ဒိးပၢ​အသး​လၢ ယ့ၣ်ၡူး​အ​တၢ်ပၢ​အ​ဖီလာ်​လံ. ယွၤ​အဘီ​အမုၢ် က​ဒီသဒၢ​အဝဲသ့ၣ်​ဖဲ ဟီၣ်ခိၣ်​တၢ်ရဲၣ်​တၢ်ကျဲၤ အအၢ​အသီ​အံၤ​က​ဘၣ်​တၢ်မၤ​ဟးဂီၤ​ကွံာ်​အီၤ​အခါ​န့ၣ်​လီၤ. လၢတၢ်န့ၣ်​အဃိ ပှၤလၢ​အဲၣ်ဒိး​မၤန့ၢ် တၢ်​အဘျုး​လၢ ယွၤ​အဘီ​အမုၢ်​န့ၣ် ကြၢး​ဂုာ်ကျဲးစၢး​ဝဲ​ဒ်သိး​က​ကဲထီၣ် ပှၤလၢ​အ​ဒိးပၢ​အသး​လၢ​ယ့ၣ်ၡူး​အ​ဖီလာ်​န့ၣ်​လီၤ.—ဖး လီၣ်ဖျါ ၇:၉, ၁၄, ၁၆, ၁၇ တက့ၢ်.

 ဖဲ​အ​နံၣ် ၁,၀၀၀ အတီၢ်ပူၤ​န့ၣ် ဘီမုၢ်​အံၤ​က​မၤ​လၢပှဲၤ​ထီၣ်ဝဲ ယွၤ​အ​တၢ်တိာ်ပာ်​လၢ​အ​ခီၣ်ထံး​လၢ ပှၤ​ဟီၣ်ခိၣ်​ဖိ​အဂီၢ်​န့ၣ်​လီၤ. ဟီၣ်ခိၣ်​ဒီဘ့ၣ်​က​ကဲထီၣ် ပၤရဒံစူး​လီၤ. လၢခံကတၢၢ်​န့ၣ် ယ့ၣ်ၡူး​က​ဟ့ၣ်က့ၤ ဘီမုၢ်​လၢ​အ​ပၢ်​အစုပူၤ​လီၤ. (၁ ကရံၣ်သူး ၁၅:၂၄-၂၆) မ့ၢ်​န​သ့ၣ်ညါ ပှၤ​တဂၤဂၤ​လၢ န​အဲၣ်ဒိး​တဲဘၣ်​အီၤ​လၢ​ယွၤ​အဘီ​အမုၢ်​အဂ့ၢ်​ဧါ.—ဖး စံးထီၣ်​ပတြၢၤ ၃၇:၁၀, ၁၁, ၂၉ တက့ၢ်.