လၢလံာ်စီဆှံပူၤ ယ့ၣ်ၡူးန့ၣ်​ ညီနုၢ်ဘၣ်တၢ်ကိးအီၤလၢ “ယွၤအဖိခွါ” လီၤ. (ယိၤဟၣ်​ ၁:၄၉) တၢ်ကတိၤလၢအမ့ၢ် “ယွၤအဖိခွါ” န့ၣ်ပာ်ဖျါထီၣ်ဝဲလၢ ကစၢ်ယွၤမ့ၢ်ဝဲ တၢ်ဘၣ်တ့ကစၢ်, သးသမူခဲလၢာ်အဂံၢ်ခီၣ်ထံး, အတ့လီၤယ့ၣ်ၡူး ဒီးဟ့ၣ်လီၤအီၤအသးသမူလီၤ. (စံးထီၣ်ပတြၢၤ ၃၆:၉; လီၣ်ဖျါ ၄:၁၁) လံာ်စီဆှံ တပာ်ဖျါထီၣ်ဝဲဒၣ်လၢ ကစၢ်ယွၤန့ၣ်​ မ့ၢ်ပၢ်လၢအထီၣ်ဖိထီၣ်လံၤဒ် ပှၤဟီၣ်ခိၣ်ဖိအသိးဘၣ်.

 လံာ်စီဆှံပာ်ဖျါထီၣ်ဝဲ မူခိၣ်ကလူးတဖၣ်​ ဒ်သိးဒီး “ယွၤအဖိခွါတဖၣ်” လီၤ. (ယိၤဘး ၁:၆) ဒီးပှၤဟီၣ်ခိၣ်ဖိ အဆိကတၢၢ်တဂၤလၢ အမ့ၢ်စီၤအၤဒၣ်စ့ၢ်ကီး လံာ်စီဆှံပာ်ဖျါထီၣ်ဝဲလၢ အမ့ၢ် “ယွၤအဖိခွါ” လီၤ. (လူၤကၣ်​ ၃:၃၈) ဘၣ်ဆၣ်​ ယ့ၣ်ၡူးန့ၣ်​ ကစၢ်ယွၤတ့လီၤအီၤအဆိကတၢၢ်. ထဲဒၣ်အီၤန့ၣ်​ ကစၢ်ယွၤတ့လီၤအီၤလၢ အနီၢ်ကစၢ်ဒၣ်ဝဲအဃိ လံာ်စီဆှံပာ်ဖျါထီၣ်ဝဲ ယ့ၣ်ၡူးဒ်ကစၢ်ယွၤအဖိခွါ ဝဲၢ်ကိလီၤ.

•  တချုးလၢ ယ့ၣ်ၡူးဟဲအိၣ်ဖျဲၣ်ထီၣ်လၢ ဟီၣ်ခိၣ်ဒံးဘၣ်န့ၣ်​ မ့ၢ်အအိၣ်လၢ မူခိၣ်ဧါ.

•  တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ်​ အမၤတၢ်မနုၤလဲၣ်.

 တချုးလၢ ယ့ၣ်ၡူးဟဲအိၣ်ဖျဲၣ်ထီၣ်လၢ ဟီၣ်ခိၣ်ဒံးဘၣ်န့ၣ်​ လၢညါအမ့ၢ်ဝဲ ပှၤနီၢ်သးဖိ ဒီးအအိၣ်လၢမူခိၣ်လီၤ. အဃိ ယ့ၣ်ၡူးအနီၢ်ကစၢ်ဒၣ်ဝဲ တဲဝဲလၢ “ယဟဲလီၤလၢ မူခိၣ်” လီၤ.—ယိၤဟၣ်​ ၆:၃၈; ၈:၂၃

 တချုးလၢ ကစၢ်ယွၤတ့လီၤ တၢ်နီတမံၤဒံးဘၣ်အခါန့ၣ်​ အတ့လီၤဆိဝဲ ယ့ၣ်ၡူးလီၤ. ဘၣ်ဃးဒီး ယ့ၣ်ၡူးန့ၣ်​ လံာ်စီဆှံတဲဝဲလၢ

•    “အဝဲဒၣ်န့ၣ်မ့ၢ် . . . တၢ်ဘၣ်တ့ခဲလၢာ် အပှၤဝဲၢ်ကိလီၤ.”—ကလီးစဲ ၁:၁၅.

•    ယ့ၣ်ၡူးမ့ၢ်ဝဲ “ကစၢ်ယွၤအတၢ်ဘၣ်တ့ အဆိကတၢၢ်” လီၤ.—လီၣ်ဖျါ ၃:၁၄.

 ယ့ၣ်ၡူးမၤလၢပှဲၤ ဝံအတၢ်စံးပာ်လၢ အဘၣ်ဃးဒီး “ပှၤတဂၤန့ၣ်​ ဟဲဝဲလၢပျၢၤလံၤလံၤ, လၢမုၢ်နံၤလၢ တၢ်လီၤထူလီၤယိာ်န့ၣ်လီၤ.”—မံကၤ ၅:၂; မးသဲ ၂:၄-၆.

 လၢမူခိၣ်န့ၣ်​ အအိၣ်ဒီးအလီၢ်အလၤလၢ အပတီၢ်ထီ. ယ့ၣ်ၡူးဃ့ဘါထုကဖၣ်လၢ “ပၢ်ဧၢ, ဒုးလၤဒုးကပီၤယၤလၢ . . . တၢ်လၤတၢ်ကပီၤလၢ အအိၣ်ဒီးယၤ, လၢယအိၣ်ဒီးနၤလၢ ဟီၣ်ခိၣ်​ တချုးကဲထီၣ်ဒံးဘၣ်န့ၣ်တက့ၢ်.” အဃိ ပသ့ၣ်ညါဘၣ်လၢလၢမူခိၣ်န့ၣ်​ ယ့ၣ်ၡူးအိၣ်ဒီးအလီၢ်အလၤလီၤ.—ယိၤဟၣ်​ ၁၇:၅.

 ဖဲအပၢ်တ့လီၤတၢ်ခဲလၢာ်အခါ ယ့ၣ်ၡူးမၤစၢၤအပၢ်. ဖဲန့ၣ်အဆၢကတီၢ် ယ့ၣ်ၡူးမၤသကိးတၢ်ဒီးအပၢ်ဒ် “ပှၤမၤတၢ်သ့တဂၤအသိး” လီၤ. (ကတိၤဒိ ၈:၃၀) ဘၣ်ဃးဒီး ယ့ၣ်ၡူးန့ၣ်​ လံာ်စီဆှံတဲဝဲလၢ “တၢ်အိၣ်လၢမူခိၣ်, ဒီးတၢ်အိၣ်လၢဟီၣ်ခိၣ်” ဒီး “တၢ်ခဲလၢာ်ဘၣ်တ့အသးလၢအစုပူၤ” လီၤ.—ကလီးစဲ ၁:၁၆.

 ကစၢ်ယွၤသူဝဲ ယ့ၣ်ၡူးလၢကတ့လီၤဝဲ တၢ်ဘၣ်တ့အဂၤခဲလၢာ်လီၤ. တၢ်ဘၣ်တ့သ့ၣ်တဖၣ်အံၤန့ၣ်​ ပၣ်ဃုာ်ဒီး ပှၤနီၢ်သးဖိလၢအဂၤခဲလၢာ် ဒီးတၢ်အိၣ်လၢ မူခိၣ်ဟီၣ်ခိၣ်ဒီး တၢ်လၢပထံၣ်အီၤသ့တဖၣ်လီၤ. (လီၣ်ဖျါ ၅:၁၁) ကစၢ်ယွၤမၤသကိးတၢ်ဒီး ယ့ၣ်ၡူးန့ၣ်​ လီၤဂာ်ဝဲဒ်သိးဒီး ပှၤဆွဲထီၣ်တၢ်သူၣ်ထီၣ်အဂီၤတဂၤ မၤသကိးတၢ်ဒီး ပှၤလၢအတ့ထီၣ်တၢ်သူၣ်ထီၣ်တဂၤလီၤ.

 ယ့ၣ်ၡူး မ့ၢ်ဝဲတၢ်ကလုၢ်. လံာ်စီဆှံပာ်ဖျါထီၣ်လၢ တချုးဖဲ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ်​ ယ့ၣ်ၡူးမ့ၢ် “တၢ်ကလုၢ်” လီၤ. (ယိၤဟၣ်​ ၁:၁) ကစၢ်ယွၤသူဝဲ ယ့ၣ်ၡူးလၢ ကတဲဘၣ်​ ပှၤနီၢ်သးဖိတဖၣ်​ တၢ်ကစီၣ်​ ဒီးဟံးစုနဲၣ်ကျဲ အဝဲသ့ၣ်လီၤ.

 တကးဒံးဘၣ်​ ဒ်သိးကစၢ်ယွၤကတဲတၢ်ဒီး ပှၤဟီၣ်ခိၣ်ဖိအဂီၢ် လီၤဂာ်လၢ ယ့ၣ်ၡူးတဲန့ၢ်တၢ်လၢ ကစၢ်ယွၤအခၢၣ်စးလီၤ. ဖဲကစၢ်ယွၤဟံးစုနဲၣ်ကျဲဝဲ နီၢ်အံၣ်အု ဒီးစီၤအၤဒၣ်လၢ ဧ့ၤဒ့ၣ်တၤသၣ်လီၢ်ပူၤအခါ လီၤဂာ်လၢ ယ့ၣ်ၡူးတဲန့ၢ်တၢ်လၢ အဂီၢ်တဆီလီၤ. (၁ မိၤၡ့ ၂:၁၆, ၁၇) ဒီးမူခိၣ်ကလူးလၢ အဆှၢဝဲ ပှၤအံၣ်စရ့လးဖိတဖၣ်​ လၢပှၢ်မုၢ်ကနၢ ဒီးပှၤအံၣ်စရ့လးဖိတဖၣ်​ ဘၣ်ဒိကနၣ်အကလုၢ်န့ၣ်​ ဘၣ်သ့ၣ်သ့ၣ်​ ကမ့ၢ်ဝဲဒၣ်​ ယ့ၣ်ၡူးလီၤ.—၂ မိၤၡ့ ၂၃:၂၀-၂၃. a