ហេតុអ្វីសាក្សីព្រះយេហូវ៉ាមិនហៅកន្លែងប្រជុំថាវិហារ?

លេង

ក្នុងគម្ពីរ ពេលខ្លះពាក្យជាភាសាក្រិចដែលបានត្រូវបកប្រែថា«វិហារ»សំដៅទៅអ្នកគោរពប្រណិប័តន៍មួយក្រុម មិនសំដៅទៅអគារដែលពួកគាត់ប្រជុំគ្នានោះទេ។

សូមពិនិត្យមើលឧទាហរណ៍នេះ: ពេលសាវ័កប៉ូលសរសេរសំបុត្រទៅកាន់គ្រិស្តសាសនិកនៅក្រុងរ៉ូម គាត់បានផ្ដាំផ្ញើសួរសុខទុក្ខចំពោះប្ដីប្រពន្ធមួយគូឈ្មោះអាគីឡានិងព្រីស៊ីល ហើយបានបន្ថែមថា៖«ផ្ដាំសួរសុខទុក្ខក្រុមជំនុំដែលជួបជុំគ្នានៅផ្ទះរបស់ពួកគាត់»។ (រ៉ូម ១៦:៥, សេចក្ដីបកប្រែពិភពលោកថ្មី) ប៉ូលគ្មានបំណងសួរសុខទុក្ខអគារទេ។ ផ្ទុយទៅវិញ គាត់បានផ្ដាំផ្ញើសួរសុខទុក្ខមនុស្ស ពោលគឺបងប្អូនក្រុមជំនុំដែលបានជួបជុំគ្នានៅក្នុងផ្ទះនោះ។ a

ដូច្នេះ ជាជាងហៅកន្លែងដែលយើងគោរពប្រណិប័តន៍ថាវិហារ យើងហៅថា«សាលប្រជុំ»វិញ។

ហេតុអ្វីហៅថា«សាលប្រជុំនៃសាក្សីព្រះយេហូវ៉ា»?

មានមូលហេតុមួយចំនួនដែលសមរម្យនឹងពាក្យនេះ:

អគារគឺជាសាល ឬជាកន្លែងសម្រាប់ប្រជុំ។
យើងជួបជុំគ្នាដើម្បីគោរពប្រណិប័តន៍ព្រះយេហូវ៉ា ជាព្រះនៃគម្ពីរបរិសុទ្ធ ហើយដើម្បីធ្វើសាក្សីបញ្ជាក់អំពីលោក។—ទំនុកតម្កើង ៨៣:១៨; អេសាយ ៤៣:១២
យើងក៏ជួបជុំគ្នាដើម្បីរៀនអំពីរាជាណាចក្ររបស់ព្រះ ជារាជាណាចក្រដែលលោកយេស៊ូតែងតែលើកមកនិយាយ។—ម៉ាថាយ ៦:៩, ១០; ២៤:១៤; លូកា ៤:៤៣

សូមអញ្ជើញលោកអ្នកមកលេងសាលប្រជុំដែលនៅជិតលោកអ្នក ហើយលោកអ្នកនឹងឃើញដោយផ្ទាល់ពីរបៀបដែលសាក្សីព្រះយេហូវ៉ាដឹកនាំកិច្ចប្រជុំ។

a យើងឃើញមានពាក្យពេចន៍ស្រដៀងគ្នានេះនៅកូរិនថូសទី១ ១៦:១៩; កូឡុស ៤:១៥ និងភីលេម៉ូន ២។