Johannesi 4:1-54
4 Naalakkap paasigamiuk Johannesimit amerlanerusunik ilinniartitaqalernini imermullu morsutsitaqarnini farisiiarit tusarsimagaat
2 – Jiisusi nammineq imermut morsutsitsisarani ilinniartitai imermut morsutsitsisaraluartut –
3 Judiia qimallugu Galiliiamut aallaqqippoq.
4 Samaariakkoortariaqarporli.
5 Samaariami illoqarfimmut Sykarimut, narsaammut Jaakup ernerminut Juuserfimut tunniussaata eqqaanut, pivoq.
6 Jaakup puilasuliaa tassaniippoq. Jiisusi angalareerluni qasutassimagami puilasuliap eqqaani issiavoq. Ullup-qeqqata* missaaniippoq.
7 Arnaq Samaariamiu imermik qalusiartorluni aggersoq Jiisusip oqarfigaa: “Immisilaannga.”
8 (Ilinniartitaami illoqarfimmut nerisassarsiniarsimapput).
9 Arnap Samaariamiup aperaa: “Sooruna juutiullutit uannut arnamut Samaariamiumut immiseqquit?” (Juutimmi Samaariamiut ilagineq ajorpaat).
10 Jiisusip akivaa: “Nalunngikkaluarukku Guutip tunissutaa akeqanngitsoq sunaasoq kialu ima oqarfigigaatit: ‘Immisilaannga,’ imermik tuneqqullutit taanna qinnuigissagaluarpat, taassumalu imermik inuussutaasumik tunissagaluarpaatit.”
11 Arnap oqarfigaa: “Naalagaq, imermik qalusinissamut qattaqanngilatilluunniit, aamma puilasuliaq itivoq. Taava suminngaanniit imermik inuussutaasumik tamatuminnga tunisinnaagamma?
12 Siuaasatta Jaakup puilasuliaq una nammineq erninilu nersutaatinilu imerfigisartagartik uagutsinnut tunniuppaa. Isumaqarpit taassumannga annerullutit?”
13 Jiisusip akivaa: “Kinaluunniit imermik uuminnga imertoq imerusuleqqissaaq.
14 Kinaluunniit imermik uanga tunniussannik imertoq imerusuleqqinngisaannassaaq, imerli tunniussara taassumani puilasunngussaaq naassaanngitsumik inuuneqalersitsisoq.”
15 Arnap oqarfigaa: “Naalagaq, imerusuleqqinnginniassagama maangalu imertaqattaarunnaarniassagama imermik tamatuminnga tuninnga.”
16 Jiisusip oqarfigaa: “Angerlarlutit uiit aajuk.”
17 Arnaq akivoq: “Ueqanngilanga.” Jiisusip oqarfigaa: “Ueqannginneraravit ilumoorputit.
18 Tallimanimmi ueqarsimagaluarputit, massakkullu angut inooqatigisat uiginngilat. Taamaattumik ilumoortumik oqalupputit.”
19 Arnap oqarfigaa: “Naalagaq, pruffiitiusimassaatit.
20 Siuaasagut maani qaqqami guutisiortarput, ilissili juutiususi oqartarpusi Jerusalemmimi taamaallaat guutisiortoqarsinnaasoq.”
21 Jiisusip oqarfigaa: “Arnaq, ilumoorlunga oqarfigaakkit: Ulloq maani qaqqami Jerusalemmimiluunniit Ataatamik guutisiorfiginnittarunnaarfissarsi nalliukkumaarpoq.
22 Ilissi kina guutisiorfigalugu naluarsi. Juutit siulliullutik aniguisitaassammata uagut kina guutisiorfigalugu nalunngilarput.
23 Ullorli guutisiortut ilumoortut Guutip anersaavanit siulersorneqarlutik ilumoortumullu naapertuuttumik Ataatamik guutisiorfiginniffissaat nalliukkumaarpoq, aap, nalliutereerpoq. Ataatammi taamatut imminik guutisiorfiginnikkusuttut ujartarpai.
24 Guuti anersaajuvoq, aamma anersaavanit siulersorneqarluni ilumoortumullu naapertuuttumik guutisiorfigineqartariaqarpoq.”
25 Arnap oqarfigaa: “Nalunngilara Missiarsi Kristusimik taaneqartartoq tikiutissasoq. Tikiukkunilu tamanik nassuiaatissavaatigut.”
26 Jiisusip oqarfigaa: “Taannaavunga, oqaloqatigisat.”
27 Taamaalisorlu ilinniartitat takkukkamik arnamik oqaloqateqarnera tupaallaatigaat. Soorunami ima oqartoqanngilaq: “Suniarpit?” imaluunniit: “Sooq oqaloqatigaajuk?”
28 Taava arnaq imiisivini qimallugu illoqarfiliarpoq nunaqqatinilu oqarfigalugit:
29 “Qaallusi angut qanoq iliorsimaninnik tamanik uannut eqqartuisoq alakkarsiuk. Kristusiusimassava?”
30 Illoqarfimmit anillutik Jiisusi ornippaat.
31 Tamatuma nalaani ilinniartitat Jiisusi kajumissaarpaat: “Ilinniartitsisoq,* neriniarit.”
32 Oqarfigaali: “Nalusassinnik nerisassaqarpunga.”
33 Taava ilinniartitat imminnut aperipput: “Nerisassanik allanit pajunneqanngilaq, ilaa?”
34 Jiisusip oqarfigai: “Aallartitsisima piumasaatut iliornissara suliassiissutaanillu naammassinninnissara nerisassaraakka.
35 Ukiup taamaalinerani oqartarpusi karrinik katersuinissamut qaammatit sisamaannanngortut. Oqarfigaassi: Narsaatit qiviarsigit, qaqortissimapput katersuiffigeriaannanngorlutillu.
36 Katersuisoq akissarsereerlunilu inerittunik katersuilereerpoq. Inerittut tassaapput inuunermik naassaanngitsumik kingornussisussat. Tamanna pissutigalugu siaruarterisoq katersuisorlu nuannaaqatigiissapput.
37 Tassunga tunngatillugu oqariartaaseq ilumoorpoq: Ataaseq siaruarterisarpoq allalu katersuisarluni.
38 Siaruartigarinngisassinnik katersuiartoqquassi, allallu suliaat iluaqutigaasi.”
39 Samaariamiorpassuit illoqarfimmit tassanngaanneersut arnap ima oqarfigimmatik: “Qanorpiaq iliorsimaninnik oqaluttuuppaanga,” Jiisusi upperfigilerpaat.
40 Samaariamiut tikikkamikku najoqqullutik qinnuigaat, ullunilu marlunni najorpai.
41 Oqaasii pissutigalugit suli amerlanerit uppertunngorput.
42 Arnamullu oqarput: “Jiisusi nammineq tusaratsigu illit oqaatsitit uppernitsinnut kisiisa tunngavigiunnaarpagut, nalunngilarpullu angut taanna ilumut inunnik aniguisitsisuusoq.”
43 Jiisusi ullut marluk qaangiummata Galiliiamut aallarpoq,
44 naak nammineq oqarsimagaluarluni pruffiiti nunami peroriartorfimmini ataqqineqarneq ajortoq.
45 Galiliiamiulli Jerusalemmimi nalliussinermi iliuusii tamaasa takusimagamikkit Galiliiamut tikimmat tikilluaqquaat. Taakkuttaarmi nalliussiartorsimapput.
46 Taava Kaanamut Galiliiamiittumut, imermik viinninngortitsiffimminut, tikeqqippoq. Kapernaami kunngikkormiuni atorfilittap ernera napparsimavoq.
47 Atorfilittap Jiisusi Judiiamiit Galiliiamut tikissimasoq tusaramiuk ornippaa qinnuigalugulu ateqatigaluni ernini toqulersoq Kapernaamut ajorunnaarsikkiartoqqullugu.
48 Jiisusilli oqarfigaa: “Ilissi tupinnartulianik aatsaat takoqqaarlusi uppertunngorsinnaavusi.”
49 Kunngikkormiuni atorfilittap oqarfigaa: “Naalagaq, meerannguara toqutinnagu ateqatiginnga.”
50 Jiisusip oqarfigaa: “Angerlaannarit, ernerit ajorunnaarpoq.” Jiisusip oqaasii upperalugit angut ingerlavoq.
51 Aqqutaanilu inussiaataasa parsiarpaat oqarfigalugulu ernera ajorunnaarsimasoq.
52 Taava aperai qanga peqqissiartulersimanersoq. Akivaat: “Ippassaq ullukkut ataatsip* missaani kissarneqarunnaarpoq.”
53 Ataataasup nalunngilaa tamatuma nalerpiaani Jiisusip oqarfigigaani: “Ernerit ajorunnaarpoq.” Taamaattumik taanna illuaniittullu tamarmik uppertunngorput.
54 Jiisusi Judiiamiit Galiliiamut pigami taama aappassaanik tupinnartuliorpoq.
Ilanngussat
^ Nutsiinn.: “Nalunaaquttap-akunnerisa arferngata”, tassa seqerngup nuineraniit naatsorsorlugu.
^ Nutsiinn.: “Rabbi”.
^ Nutsiinn.: “nalunaaquttap-akunnerisa arfineq-aappaata”.
