كىمدەر كوككە بارادى؟
كيەلى كىتاپتىڭ جاۋابى
قۇداي تاعالا ادال قىزمەتشىلەرىنىڭ ىشىنەن شەكتەۋلى ادامدى تاڭداپ العان. ولار قايتىس بولعان سوڭ، قايتا ٴتىرىلىپ، كوكتە ٶمىر سۇرەدى (پەتىردىڭ 1-حاتى 1:3، 4). تاڭدالعاننان كەيىن ولار كوكتەگى سيلارىنان ايىرىلىپ قالماس ٷشىن ومىرلەرىنىڭ سوڭىنا دەيىن سەنىمدەرىن بەرىك ساقتاپ، قۇدايدىڭ زاڭ-تالاپتارى بويىنشا ٶمىر سۇرۋلەرى كەرەك (ەفەستىكتەرگە 5:5؛ فىلىپىلىكتەرگە 3:12—14).
كوككە باراتىندار وندا نە ىستەيدى؟
ولار يسا ماسىحپەن بىرگە پاتشا ٵرى ٴدىني قىزمەتكەرلەر رەتىندە 1000 جىل قىزمەت ەتەدى (ايان 5:9، 10؛ 20:6). كوككە باراتىن بۇل ادامدار «جاڭا اسپاندى»، ياعني كوكتەگى ۇكىمەتتى قۇرايدى جانە «جاڭا جەردىڭ»، ياعني ادامزات قوعامىنىڭ ۇستىنەن بيلىك ەتەدى. كوكتەگى بۇل بيلەۋشىلەر جاراتۋشى و باستا نيەت ەتكەندەي، ادامزاتتى تولىق كەمەلىنە جەتكىزەدى (يشايا 65:17؛ پەتىردىڭ 2-حاتى 3:13).
كوككە قانشا ادام بارادى؟
كيەلى جازبالاردا كوكتە ٶمىر ٴسۇرۋ ٷشىن 144000 ادامنىڭ تىرىلەتىنى ايتىلعان (ايان 7:4). ايان 14:1—3 دەيىنگى تارماقتاردا ەلشى جوحاننىڭ ايان كورگەنى جازىلعان. ول ايانىندا: «سيون تاۋىندا تۇرعان توقتىنى كوردىم. قاسىندا... 144000 تۇر ەكەن»،— دەپ ايتقان. بۇل ايانداعى «توقتى» قايتا تىرىلگەن يسا ٴماسىحتى بەينەلەيدى (جوحان 1:29؛ پەتىردىڭ 1-حاتى 1:19). ال «سيون تاۋى» يسانىڭ جانە ونىمەن بىرگە كوكتە بيلىك ەتەتىن 144000 نىڭ جوعارى مارتەبەلى دارەجەسىن بىلدىرەدى (ٴزابۇر 2:6؛ ەۆرەيلەرگە 12:22).
ماسىحپەن بىرگە بيلىك ەتۋ ٷشىن «تاڭداپ الىنعاندار» كيەلى كىتاپتا «كىشكەنە وتار» دەپ اتالعان (ايان 17:14؛ لۇقا 12:32). دەمەك، ولاردىڭ سانى يسا ٴماسىحتىڭ قوي مىنەزدى قىزمەتشىلەرىنىڭ ٴبارىنىڭ سانىمەن سالىستىرعاندا از (جوحان 10:16).
كوككە باراتىندار جايلى جاڭساق پىكىرلەر
جاڭساق پىكىر. جاقسى ادامداردىڭ ٴبارى كوككە كەتەدى.
شىندىق. قۇداي جاقسى ادامداردىڭ كوبىسى جەردە ماڭگى ٶمىر سۇرەدى دەپ ۋادە ەتەدى (ٴزابۇر 37:11، 29، 34).
جەردە بولعاندا يسا: «كوككە ەشبىر ادام كوتەرىلگەن ەمەس»،— دەگەن (جوحان 3:13). وسىلاي ول وزىنە دەيىن قايتىس بولعان ىبىرايىم، مۇسا، ٵيۇپ، ٴداۋىت سياقتى ادال كىسىلەردىڭ كوككە كەتپەگەنىن كورسەتكەن (ەلشىلەردىڭ ىستەرى 2:29، 34). ولار جەر بەتىندە ٶمىر ٴسۇرۋ ٷشىن تىرىلەدى. ٶمىر بويى ولار وسى ٷمىتتى ارقالاپ وتكەن (ٵيۇپ 14:13—15).
كوكتەگى ومىرگە قايتا ٴتىرىلۋ قۇداي سوزىندە «العاشقى قايتا ٴتىرىلۋ» دەپ اتالعان (ايان 20:6). بۇل باسقا دا قايتا ٴتىرىلۋدىڭ بولاتىنىن كورسەتەدى. بۇل — جەردەگى ومىرگە قايتا ٴتىرىلۋ.
كيەلى كىتاپتا قۇداي پاتشالىعى بيلىك ەتكەن كەزدە «ەندى قايتىپ ٶلىم بولمايتىنى» ايتىلعان (ايان 21:3، 4). دەمەك، بۇل ۋادە جەردە ٶمىر سۇرەتىندەرگە قاتىستى. سەبەبى كوكتە ەشقاشان ٶلىم بولعان ەمەس.
جاڭساق پىكىر. كوكتە نە جەردە ٶمىر سۇرەتىنىن ٵر ادام تاڭدايدى.
شىندىق. قۇداي تاعالا «كوكتەگى ٶمىر سيىن» ادال قىزمەتشىلەرىنىڭ قايسىسىنا بەرەتىنىن ٶزى شەشەدى (فىلىپىلىكتەرگە 3:14). ەندەشە، كوككە بارۋعا كىم تاڭدالاتىنى ادامنىڭ قالاۋىنا يا اتاق-دارەجەنى قانشالىقتى كوكسەيتىنىنە بايلانىستى ەمەس (ماتاي 20:20—23).
جاڭساق پىكىر. كوكتە ٶمىر سۇرۋگە لايىقتى ەمەستەر عانا جەردە ماڭگى جاسايدى.
شىندىق. جاراتقان يە جەر بەتىندە ماڭگى ٶمىر سۇرەتىندەردى «حالقىم»، «تاڭداۋلىلارىم»، «ەحوبا جارىلقاعان ۇرپاق» دەپ اتايدى (يشايا 65:21—23). ولار قۇداي تاعالانىڭ ادامزاتقا قاتىستى باستاپقى وي-نيەتىن جۇزەگە اسىرۋعا اتسالىسادى. قۇدايدىڭ وسى نيەتىنە ساي، ولار كەمەلدىلىككە جەتىپ، جەر بەتىندەگى جۇماقتا ماڭگى عۇمىر كەشەدى (مۇسانىڭ 1-جازباسى 1:28؛ ٴزابۇر 115:16؛ يشايا 45:18).
جاڭساق پىكىر. ايان كىتابىنداعى 144000 دەگەن سان تۋرا ماعىنادا ەمەس، بەينەلى ماعىنادا ايتىلعان.
شىندىق. ايان كىتابىندا كەيبىر ساندار بەينەلى ماعىنادا قولدانىلعانىمەن، 144000 سانى تۋرا ماعىنادا ايتىلعان. مىسالى، وندا «توقتىنىڭ 12 ەلشىسىنىڭ ەسىمدەرى جازىلعانى» جايلى ايتىلادى (ايان 21:14). نەگە 144000 دەگەن تۋرا ماعىناداعى سان ەكەنىنىڭ ٴبىر دالەلىن قاراستىرىپ كورەيىك.
ايان 7:4 تە «بەلگى سالىنعانداردىڭ [ياعني كوكتە ٶمىر سۇرۋگە تاڭدالعانداردىڭ سانى] 144000 ەكەنى» ايتىلادى. ال ودان كەيىنگى تارماقتاردا ەكىنشى توپ جايلى، اتاپ ايتقاندا، «ەشبىر ادام بالاسى ساناي المايتىنداي ۇلى جاماعات» جايلى ٴسوز ەتىلەدى. قۇداي وسى «ۇلى جاماعاتتى» دا قۇتقارادى (ايان 7:9، 10). ەگەر 144000 سانى بەينەلى ماعىنادا بولسا، ونى سانى بەلگىسىز ەكىنشى توپپەن سالىستىرۋدىڭ ٴمانىسى بولماس ەدى a.
ونىڭ ۇستىنە، 144000 عا كىرەتىندەر كيەلى كىتاپتا «ادامدار اراسىنان العاشقى ٶنىم رەتىندە ساتىپ الىنعاندار» دەپ سيپاتتالادى (ايان 14:4). «العاشقى ٶنىم» دەگەن ٴسوز ۇلكەن نارسەنىڭ كىشكەنتاي بولىگىنە نۇسقايدى. بۇل يسا ماسىحپەن بىرگە كوكتە بولاتىندار جەر بەتىندە ٶمىر سۇرەتىن سانسىز ادامداردىڭ ۇستىنەن بيلىك جۇرگىزەتىنىن انىق كورسەتەدى (ايان 5:10).
a كيەلى كىتاپ زەرتتەۋشىسى روبەرت توماس ايان 7:4 تەگى 144000 سانىنا قاتىستى وسىعان ۇقساس وي ايتقان: «ايان 7:4 تە بەلگىلى سان ايتىلسا، ايان 7:9 دا بەلگىسىز سان ايتىلعان. ەگەر بۇل ەكەۋى دە بەينەلى ماعىنادا قولدانىلعان دەسەك، وندا ايان كىتابىنداعى بىردە-ٴبىر سان تۋرا ماعىنادا قولدانىلعان بولماي شىعادى» («ايان 1—7: An Exegetical Commentary» (اعىلشين)، 474-بەت).