1-3. Petrus okwa li a mona shike mefiku loiningwanima, nonguloshi oyo oya li ya tya ngahelipi kuye?

PETRUS okwa li ta longo neenghono mokukwafela okushinga owato oufiku. Mbela ouyelele oo a li a mona koushilo owa li edidiliko leluwa tali tende? Molwaashi okwa kala ta shingi owato eevili dihapu, okwa li ta ehama ombuda nomapepe. Omhepo oyo ya li tai pepe eexwiki daye oya li ya pindjalifa efuta laGalilea. Omakufikufi okwa kala taa denge owato, naPetrus okwa li a tuta komeva matalala oo a li tae lidenge muye. Okwa twikila okushinga ta tavakana efuta.

² Petrus navakwao ova li va fiya Jesus langhele komunghulofuta. Efiku olo ova li va mona nghee Jesus a li a kutifa ovanhu omayovi ovo va li va fya ondjala, nomingome dinini nosho yo eeshi. Omolwoshiningwanima osho, ovanhu ova li va hala okuninga Jesus ohamba, ashike ka li a hala okukufa ombinga mopolotika. Okwa li yo a hala okuhonga ovashikuli vaye vaha kufe ombinga moinima yopapolotika. Opo a henuke ongudu oyo, okwa li a ladipika ovahongwa vaye va shinge owato va yuka komunghulo wokombinga inya yefuta, ofimbo ye ta i aeke keemhunda a ka ilikane. — Mark. 6:35-45; Lesha Johannes 6:14-17.

³ Eshi ovahongwa va hovela okushinga, omwedi owa li pokati keulu fiyo osheshi wa enda tau ningine kanini nakanini. Ova li ashike va enda oule weekilometa donhumba. Molwaashi ova li tava shingi owato noudjuu omolwomhepo nomakufikufi, ovahongwa ovo otashi dulika kava li tava dulu okukundafana. Petrus otashi dulika a li e na omalipulo mahapu.

4. Ongahelipi Petrus e tu tulila po oshihopaenenwa osho hatu dulu okushikula?

⁴ Ka li tuu e na shihapu osho a li te lipula nasho! Tete Petrus okwa li a shakena naJesus Omunasaret konima yomido mbali doiningwanima.  Okwa li e lihonga shihapu, ashike natango okwa li te ke lihonga shihapu shi dulife opo. Petrus okwa li e na ehalo okukondjifa omaunghundi, ngaashi omalimbililo noumbada, nokungaho okwe tu tulila po oshihopaenenwa osho hatu dulu okushikula. Natu ka taleni kutya omolwashike.

5, 6. Onghalamwenyo yaPetrus oya li ya tya ngahelipi?

⁵ Petrus ka li ta ka dimbwa efiku olo a li a shakena naJesus. Omumwaina Andreas okwa li e mu etela onghundana itunhula a ti: “Fye otwa mona Messias.” Onghalamwenyo yaPetrus oya li ya lunduluka omolweendjovo odo. Kaya li vali tai ka kala ngaashi ya li nale. — Joh. 1:41.

⁶ Petrus okwa kala muKapernaum, oshilando osho shi li kolundume lomunghulo wetale olo li na omeva mayela hali ifanwa Efuta laGalilea. Ye naAndreas ova li hava longo pamwe naJakob naJohannes, ovana vaSebedeus, mongeshefa yokulandifa eeshi. Moukwaneumbo waye omwa li omukulukadi waye, inamweno nosho yo omumwaina Andreas. Opo a wanife po eemhumbwe doukwaneumbo waye mokuyula eeshi, okwa li tashi pula eenghono, ounghulungu nosho yo okulonga noudiinini. Diladila ashike shi na sha nomaufiku mahapu oo va li hava longo eshi tava umbile eenete momeva pokati keewato mbali noku di nanena mowato opo va kufe mo keshe tuu osho va yula. Ohatu dulu yo okudiladila shi na sha nomafiku oo hava kala moilonga idjuu yokuyoolola eeshi noku di landifa nosho yo okuwapaleka nokuhondja eenete.

7. Petrus okwa li a uda shike kombinga yaJesus, nomolwashike onghundana oyo ya li itunhula?

⁷ Ombibeli oya popya kutya Andreas okwa li omuhongwa waJohannes Omuninginifi. Nopehe na omalimbililo, Petrus okwa li a pwilikina nelitulemo komumwaina eshi ta hokolola shi na sha netumwalaka laJohannes. Efiku limwe, Andreas okwa li a mona Johannes eshi ta ulike kuJesus Omunasaret ndele ta ti: “Tala, Odjona yaKalunga.” Andreas okwa li a ninga diva omushikuli waJesus nokwa li a lombwela Petrus onghundana itunhula eshi a ti: Messias okwe uya. (Joh. 1:35-40) Konima younashibofa muEden omido 4 000 lwaapo da pita, Jehova Kalunga okwa li a udaneka kutya ota ku ke uya umwe e likalekelwa oo ta ka etela ovanhu aveshe eteelelo lashili. (Gen. 3:15) Andreas okwa li a shakeneka Messias oo ta ka xupifa ovanhu. Petrus naye okwa ya yo meendelelo a ka shakeneke Jesus.

8. Edina olo Jesus a li a luka Petrus otali ti shike, nomolwashike ovanhu vamwe va limbililwa eshi Jesus e mu luka edina olo?

⁸ Fiyo okefiku olo, Petrus okwa kala a shiivika nedina Simon. “Jesus okwe mu tala ndee ta ti: ‘Oove Simon omona waJohannes; oto ka ifanwa Kefas’, otali ti: Petrus.” (Joh. 1:42) “Kefas” otali ti “emanya.” Osha yela kutya eendjovo daJesus oda li dopaxunganeko. Okwa mona  kutya Petrus ota ka kala a fa emanya, omudiinini, a pama nota ka kala e na enwefemo liwa mokati kovashikuli vaYe. Mbela Petrus naye osho a li e litala ko ngaho? Otashi dulika ka li ta diladila kutya oku na eitavelo la kola. Novanhu vamwe kunena ovo hava lesha omavangeli ohava diladila kutya Petrus ka li a pama ngaashi emanya. Vamwe ohava ti kutya omaukwatya aye ngaashi a tumbulwa mOmbibeli otaa ulike a fa ha tengauka, ehe fi omudiinini noke na omakanghameno.

9. Oshike osho Jehova nOmona hava tale movanhu, nomolwashike tu na okulineekela etaleko lavo?

⁹ Petrus okwa li e na omaunghundi, naJesus okwa li e shi shii. Ndele Jesus oo a fa Xe, Jehova, okwa li ha tale alushe komaukwatya mawa ovanhu. Jesus okwa li a mona kutya Petrus okwa li e na omaukwatya mahapu mawa, onghee hano, okwa li a hala oku mu kwafela opo e a ulike monghedi ya denga mbada. Nokunena, Jehova nOmona ohava tale komaukwatya etu oo mawa. Otashi dulika tu kale tuu udite kutya mufye kamu na oukwatya muwa oo tava dulu oku mona mo. Ndele otwa pumbwa okulineekela etaleko lavo noku ulika kutya otwa hala okudeulwa nokuvyulwa ngaashi Petrus. — Lesha 1 Johannes 3:19, 20.

10. Petrus kwa li a mona shike nokwa li a shuna koshike?

¹⁰ Otashi dulika Petrus a li a ya pamwe naJesus molweendo lokuudifa oshikando sha ka landula, notashi dulika a li a mona eshi Jesus ta longo oshikumwifilonga shaye shotete, eshi a li a shitukifa omeva omaviinyu moshivilohombolo osho sha li mu Kaana. Okwa li yo a uda etumwalaka laJesus likumwifi leteelelo li na sha nOuhamba waKalunga. Nonande okwa li a uda nokwa mona oikumwifilonga aishe oyo Jesus a longa, okwa li a shuna kongeshefa yeeshi. Konima yeemwedi donhumba, Petrus okwa li a shakena vali naJesus, pomhito oyo Jesus okwa li e mu shiva opo va ka longe pamwe naye moilonga yokuudifa yefimbo liyadi.

11, 12. (a) Petrus okwa li a longa oilonga ya tya ngahelipi onguloshi imwe? (b) Petrus otashi dulika a li ta diladila shike eshi a li ta pwilikine kehongo laJesus?

¹¹ Petrus okwa li a teka omukumo omolwoilonga yonguloshi oyo eshi va kala noku umbila oiyulifo yavo momeva noku i shila mo ndele inava yula mo sha. Nopehe na omalimbililo, Petrus okwa li a longifa eshiivo nounghulungu waye aushe nokukendabala peenhele di lili noku lili mefuta, eshi ta kongo eeshi. Ngaashi ashike ovayuli veeshi vahapu, omafimbo amwe okwa li ha kala a hala ngeno okwa li ta dulu okutala koshi yomeva opo a mone opo pe na ongudu yeeshi noku di yule noshiyulifo shaye. Ndele omadiladilo a tya ngaho okwa li ashike tae mu nyemateke neenghono. Petrus ka li ha ka yula eeshi omolwomalihafifo, ndele oukwaneumbo waye owa li hauxupu meeshi odo ha kwata. Lwanima, okwe ke uya komutunda ehe na nande oshi, oko a ka hangwa kuJesus e lipyakidila nokuwapaleka oiyulifo yaye.

¹² Opa li eemhunga dovanhu odo da li da halelela okupwilikina  kwaasho Jesus a li ta popi. Onghee hano, okwa londa mowato yaPetrus ndele te mu pula e i ehenife kanini mefuta. Ondaka yaJesus oya li tai udika nawa kombada yomeva nokwa li a honga eengudu dovanhu. Petrus okwa li a pwilikina nelitulemo ngaashi ashike ovo vali komutunda. Ka li a loloka okupwilikina kuJesus eshi a li ta udifa shi na sha nOuhamba waKalunga oo wa li enenediladilo letumwalaka laye. Itashi ka kala tuu oufembanghenda munene okukwafela Kristus mokutandavelifa etumwalaka olo leteelelo mounyuni aushe! Ndele mbela oshi li ngoo pandunge okudiladila ngaho? Oukwaneumbo waye ote ke u palula ngahelipi? Petrus otashi dulika a li ta diladila vali shi na sha nonguloshi ya dja ko oyo a li a longa noudiinini ndele ina likola sha. — Luk. 5:1-3.

13, 14. Jesus okwa li a longa oshikumwifilonga shilipi, naPetrus okwa li e linyenga ngahelipi?

¹³ Eshi Jesus a mana okupopya okwa li a lombwela Petrus a ti: “Ehena mokati kefuta mu ka lukile oiyulifo yeni.” Petrus okwa li a limbililwa, nomolwaasho e mu nyamukula a ti: “Omuhongi, oufiku aushe twa longa, fye inatu kwata mo sha, ndele oiyulifo ohandi i lukile molweendjovo doye.” Okwa hangwa ashike opo a wapaleke oiyulifo. Eendjovo daye ota di ulike kutya ka li vali a hala okulukila oiyulifo, unene tuu pefimbo opo eeshi da li itadi nyange. Ndele nande ongaho, okwa li a ninga ngaashi a lombwelwa, tashi dulika a li a lapa vakwao ovo va li mowato ikwao opo ve mu shikule. — Luk. 5:4, 5.

¹⁴ Eshi Petrus a hovela okunana mo oiyulifo momeva, oya li ya djuupala unene. Okwa li a nana neenghono, nokwa mona eeshi dihapu tadi nukauka moiyulifo. Okwa lapa diva ovo ve li mowato ikwao opo ve uye ve va kwafele. Eshi ve uya, ova mona kutya eeshi odo itadi wana mowato imwe aike. Ova li va yadeka eewato adishe mbali, ndele omolwouhapu nondjudo yeeshi, eewato oda li tadi hale okuningina. Osho osha li sha kumwifa Petrus neenghono. Okwa li a mona nale oilonganghono yaKristus, ashike oshimoniwa osho osha li she mu etela ouwa pauhandimwe nosho yo oukwaneumbo waye. Mepingafano naPetrus, Jesus okwa li e na eenghono dokuningifa eeshi di ye moiyulifo. Petrus okwa li a kwatwa koumbada. Okwa twa eengolo ndee ta ti: ‘Omwene, dja po pwaame, osheshi aame omulunde.’ Ongahelipi ta dulu okukala a wana okupanga oukaume naao e na oufemba wokulongifa eenghono daKalunga monghedi ya tya ngaho? — Lesha Lukas 5:6-9.

15. Ongahelipi Jesus a li a honga Petrus kutya okukala kwaye nomalimbililo noumbada kaku na ekanghameno?

¹⁵ Jesus okwe mu lombwela pahole a ti: “Ino tila, okonena tuu eli oto ningi omuyuli wovanhu.” (Luk. 5:10, 11) Olo kala li efimbo lokukala  nomalimbililo ile noumbada. Petrus okwa li e na okuyandja elitulemo koilonga yafimana yokuudifa ponhele yokukala a limbililwa kutya ongahelipi ta dulu okufila oshisho oukwaneumbo waye nokukala e udite ina wana okulonga oilonga yokuudifa. Jesus okwa li e na oilonga ya fimana yokuudifa oyo ya li tai ka kuma onakwiiwa yovanhu aveshe. Oha longele Kalunga ou ta ka ‘dima po omatimba mahapu.’ (Jes. 55:7) Jehova ota ka fila Petrus oshisho palutu nopamhepo. — Mat. 6:33.

16. Petrus, Jakob naJohannes ova li ve linyenga ngahelipi keshivo laJesus, nomolwashike va li va ninga etokolo la denga mbada?

¹⁶ Petrus naye okwa li a dulika diva ngaashi Jakob naJohannes. ‘Ova eta eewato davo komunghulo, va fiya po aishe, ndele tave mu shikula.’ (Luk. 5:11) Kungaho, Petrus okwa li a ulika eitavelo muJesus nosho yo muJehova. Ka li tuu a ninga etokolo la denga mbada! Kunena, Ovakriste ovo va finda omalimbililo noumbada opo va longele Kalunga,  navo ova ulika eitavelo. Jehova oha file oshisho alushe ovo ve mu lineekela. — Eps. 22:5, 6.

17. Petrus okwa kala te lipula nashike osho sha li sha ningwa konima yomido mbali eshi a li a shakena naJesus?

¹⁷ Konima yomido mbali lwaapo eshi Petrus a li a shakena naJesus, okwa li a shinga owato mefuta laGalilea moufiku oo wa li omhepo inene ngaashi sha popiwa pehovelo letukulwa eli. Oshoshili kutya itatu dulu okushiiva kutya Petrus okwa li ta diladila shike. Otashi dulika pa li oinima ihapu oyo a li ta diladila kuyo. Jesus okwa li a velula inamweno yaPetrus, nokwa li a yandja oshipopiwa shaye shokOmhunda. Okupitila mehongo laye nosho yo moilonganghono, okwa li a ulika kutya oye a li Messias, Omuhoololwa waJehova. Mokweendelako kwefimbo, Petrus okwa li e lihonga okupangela oikala youmbada nomalimbililo. Jesus okwa li nokuli e mu hoolola a ninge umwe womovayapostoli 12. Petrus okwa ka mona kutya natango oku na oikala youmbada nomalimbililo.

18, 19. (a) Hokolola osho Petrus a li a mona mefuta laGalilea. (b) Jesus okwa li a wanifila po ngahelipi Petrus osho a li a pula?

¹⁸ Pefimbo etine longuloshi oyo ile lwoponhatu yongula fiyo osheshi etango tali piti, Petrus okwa li a kangheka owato ombaadilila ndele ta kala omutumba. Okwa li a mona oshinima tashi linyenge momakufikufi. Mbela osha li omakufikufi taa taima keenhe domwedi? Ahowe, oshinima osho osha li sha fikama sha yukilila. Osha li omulumenhu, nokwa li ta ende kombada yomeva. Eshi a li ta ehene popepi, okwa li ta monika a fa te va piti pomunghulo. Ovahongwa ova li va tila nova li tave lipula kutya pamwe oshilulu. Omulumenhu oo okwa li a popya a ti: ‘Kaleni nomwenyo muwa, Aame, inamu tila.’ Omulumenhu oo okwa li Jesus. — Mat. 14:25-28.

¹⁹ Petrus okwa li a nyamukula a ti: ‘Omwene, ngeenge oove, lombwele nge ndi uye kwoove handi ende kombada yomeva.’ Pehovelo Petrus okwa li a katuka nouladi. Okwa li a shambukwa eshi a mona oshikumwifilonga osho she likalekelwa a li e wete eitavelo laye la pamekwa nokwa li a hala okukufa ombinga musho. Jesus okwa li e mu lombwela pahole e uye kuye. Petrus okwa li a londa komunghulo wowato ndele ta nhukile kombada yomeva oo a li a mwena nawa. Diladila nee nghee Petrus a li a tunhukwa eshi a li e udite eemhadi daye da lyata koshinima shikukutu nokufikama kombada yomeva. Oku na okukala a li a kumwa eshi a li ta ende kombada yomeva a yuka kuJesus. Ombadilila muye omwa tukuluka vali ediladilo limwe. — Lesha Mateus 14:29.

20. (a) Ongahelipi Petrus a li a dopa okuyandja elitulemo, noshidjemo osha li shike? (b) Oshilihongomwa sha fimana shilipi Jesus a li a honga Petrus?

²⁰ Petrus okwa li a pumbwa okuyandja elitulemo kuJesus, molwaashi oye a li ta longifa eenghono daJehova, opo e mu endife kombada  yomeva. Osho okwe shi ninga molwaashi Petrus okwa li a ulika eitavelo muye. Petrus okwa li a dopa okukala ta yandje elitulemo kuJesus. Ombibeli oya ti: “Eshi a mona omhepo inene, okwa tila.” Petrus okwa li a tala komakufikufi oo a li tae lidenge mowato, taa ndwafauka nokuninga etutu komhepo, ndele ta lyalyakana. Otashi dulika a li a fa e liwete ta ningine nota fi omeva. Eshi oumbada waye tau hapupala osho ngoo ta kanifa eitavelo. Omulumenhu oo a pewa edina Emanya molwoudiinini waye, okwa li a hovela okuningina meendelelo ngaashi emanya omolweitavelo laye olo la li tali tengauka. Petrus okwa li e shii nawa okuyowa, ashike pomhito oyo ka li e lineekela mowino wa tya ngaho. Okwa li a ingida a ti: “Omwene, xupife nge!” Jesus okwe mu kwata meke ndele te mu nane mo. Ofimbo a li natango kombada yomeva, okwa li a honga Petrus oshilihongomwa sha fimana eshi a ti: ‘Omuneitavelo linini ove, omolwashike wa limbililwa?’ — Mat. 14:30, 31.

21. Omolwashike omalimbililo a nyika oshiponga, nongahelipi hatu dulu oku a kondjifa?

²¹ Jesus ka li tuu a longifa outumbulilo wa yeleka eshi a ti “wa limbililwa!” Omalimbililo otaa dulu okukala e na eenghono nohaa teya ovanhu omukumo. Ngeenge otwa kala nomalimbililo, eitavelo letu otali dulu okunghundipala kanini nakanini fiyo twe li kanifa nokuli. Otwa pumbwa okukondjifa eamo lokukala nomalimbililo. Ngahelipi mbela? Omokuyandja elitulemo koinima oyo ya yuka. Ngeenge otwa kala hatu lipula noinima oyo tai tu tilifa, tai tu teya omukumo notai tu imbi tu yandje elitulemo kuJehova nOmona, otashi ke tu tula momalimbililo. Ngeenge otwa yandje elitulemo kuJehova nOmona, kwaasho va ninga, kwaasho tava ningi notava ka ningila ovo ve va hole, ohatu ka dula okukondjifa omalimbililo oo taa dulu okunyona po eitavelo letu.

22. Omolwashike eitavelo laPetrus la wana okuhopaenenwa?

²² Eshi Petrus a shikula Jesus mowato, okwa li a mona nghee oshikungulu sha lota. Konima yaasho, Efuta laGalilea ola li la mwena. Petrus okwa li a waimina ovahongwa vakwao eshi va popya va ti: “Oove shili Omona waKalunga.” (Mat. 14:33) Eshi eluwa tali tende, Petrus oku na okukala a li e na olupandu linene. Okwa li e lihonga okufinda oumbada nosho yo omalimbililo. Oshoshili kutya okwa li e na okuninga omalunduluko mahapu opo a kale Omukriste a pama a fa emanya, ngaashi Jesus a li a xunganeka. Ashike, okwa li a tokolatoko okuninga eenghendabala nokuninga exumo komesho. Mbela naave ou na ngoo elalakano la tya ngaho? Oto ka mona kutya eitavelo laPetrus ola wana shili okuhopaenenwa.