Ũhoro ũrĩa mwega uumaga kũrĩ Jehova, Ngai ũrĩa mũkeni, o we wendaga famĩlĩ ikorũo na gĩkeno. (1 Timotheo 1:11) Nĩwe waambĩrĩirie kĩhiko. Kĩhiko kĩrĩa gĩkĩtwo kũringana na watho nĩ kĩa bata harĩ gĩkeno kĩa famĩlĩ tondũ ciana nĩ ireragwo na ũgitĩri. Akristiano nĩ magĩrĩirũo gũtĩa mawatho ma kwao megiĩ kwandĩkithia kĩhiko.​—Thoma Luka 2:1, 4, 5.

Ngai onaga kĩhiko atĩa? Endaga gĩkorũo kĩrĩ ũrũmwe wa gũtũũra gatagatĩ ka mũthuri na mũtumia. Jehova endaga mũthuri na mũtumia wake makorũo mehokanĩte. (Ahibirania 13:4) Nĩ athũire ndigano. (Malaki 2:16) Ĩndĩ nĩ etĩkĩrĩtie Akristiano matigane, na mũndũ ahike kana ahikanie rĩngĩ, angĩkorũo ũrĩa mahikanĩtie nake nĩ atharĩtie.​—Thoma Mathayo 19:3-6, 9.

Jehova oombire athuri na atumia mateithanagie kĩhiko-inĩ. (Kĩambĩrĩria 2:18) Arĩ mũtwe wa famĩlĩ, mũthuri nĩwe wĩhokeirũo wĩra wa kũhe famĩlĩ yake mabataro ma kĩĩmwĩrĩ na kũmathomithia ũhoro wa Ngai. Agĩrĩirũo kuonia mũtumia wake wendo wa kwĩima. Athuri na atumia ao magĩrĩirũo kuonanagia wendo na kũheanaga gĩtĩo. Tondũ athuri na atumia ti akinyanĩru, kwĩruta kuohanagĩra nĩ hitho ya gĩkeno kĩa famĩlĩ.​—Thoma Aefeso 4:31, 32; 5:22-25, 33; 1 Petero 3:7.

Kĩhiko kĩanyu kĩngĩgĩa na mathĩna, inyuerĩ mwagĩrĩirũo kwĩrutanĩria kuonania wendo. (1 Akorintho 13:4, 5)  Kiugo kĩa Ngai gĩtiugĩte atĩ kweheranĩra nĩyo njĩra ya kũniina mathĩna marĩa kaingĩ makoragwo kĩhiko-inĩ.​—Thoma 1 Akorintho 7:10-13.

Jehova endaga mũkorũo na gĩkeno. Amũheaga ũtaaro ũrĩa mwega mũno wĩgiĩ ũrĩa mũngĩkenera ũnyinyi wanyu. Endaga mũgunĩke nĩ ũũgĩ na ũmenyeru wa aciari anyu. (Akolosai 3:20) Ningĩ, Jehova nĩ endaga mũgĩe na gĩkeno kĩrĩa kiumanaga na gwĩka wendi wa Mũũmbi wanyu na Mũrũ wake.​—Thoma Kohelethu 11:9–12:1; Mathayo 19:13-15; 21:15, 16.

Wagĩrĩirũo kũruta wĩra na kĩyo nĩguo ũheage ciana ciaku irio, ũikaro, na nguo. (1 Timotheo 5:8) No nĩguo ciana ciaku igĩe na gĩkeno, nĩ ũkũbatara gũciruta kwenda Ngai na ciĩrute nake. (Aefeso 6:4) Kĩonereria gĩaku gĩa kwenda Ngai no kĩhutie mũno ngoro ya mwana waku. Ũngĩhũthĩra Kiugo kĩa Ngai, ũrutani waku no ũteithie mwana waku kũgĩa na mwĩcirĩrie ũrĩa wagĩrĩire. ​—Thoma Gũcokerithia Maathani 6:4-7; Thimo 22:6.

Ciana nĩ igunĩkaga rĩrĩa ũraciĩkĩra ngoro na ũgacigaathĩrĩria. Ningĩ nĩ ibataraga kũrũngwo na kũrũithio. Gũciruta na njĩra ĩyo gũcigitagĩra harĩ mĩtugo ĩrĩa ĩngĩtũma ciage gĩkeno. (Thimo 22:15) O na kũrĩ ũguo, ciana itiagĩrĩirũo kũrũithio na njĩra ya ũhinya.​—Thoma Akolosai 3:21.

Aira a Jehova nĩ macabĩte mabuku maigana ũna marĩa makoragwo marongoreirio makĩria gũteithia aciari na ciana. Mabuku macio makoragwo na ũhoro uumĩte thĩinĩ wa Bibilia.​—Thoma Thaburi 19:7, 11.