ITHOMO RĨA 5
Muoroto wa Ngai Harĩ Thĩ Nĩ Ũrĩkũ?
1. Ngai oombire thĩ nĩkĩ?
Ngai aaheanire thĩ kũrĩ andũ. Nĩyo mũciĩ witũ. Kwoguo, mũthuri na mũtumia wa mbere, Adamu na Hawa, matiombirũo magatũũre igũrũ—Ngai nĩ aakoretwo ombĩte araika matũũrage igũrũ. (Ayubu 38:4, 7) Ithenya rĩa ũguo, Ngai aaigire mũndũ wa mbere thĩinĩ wa paradiso thaka ĩrĩa yetagwo mũgũnda wa Edeni. (Kĩambĩrĩria 2:15-17) Jehova akĩhe Adamu na ciana iria angĩaciarire kĩĩrĩgĩrĩro gĩa gũkenera muoyo wa tene na tene gũkũ thĩ.—Thoma Thaburi 37:29; 115:16.
Kĩambĩrĩria-inĩ, mũgũnda wa Edeni noguo warĩ paradiso. Mũthuri na mũtumia wa mbere maagĩrĩirũo kũiyũria rũciaro rwao thĩinĩ wa thĩ. Thutha wa ihinda, maagĩrĩirũo gũtooria thĩ yothe na mamĩtue paradiso. (Kĩambĩrĩria 1:28) Gũtirĩ hingo thĩ ĩkaaniinwo. Ĩgũtũũra ĩrĩ mũciĩ wa andũ tene na tene.—Thoma Thaburi 104:5.
Wĩrorere video ya Ngai Oombire Thĩ Nĩkĩ?
2. Nĩkĩ ũmũthĩ thĩ ti paradiso?
Adamu na Hawa nĩ maaremeire Jehova, nĩ ũndũ ũcio akĩmeheria mũgũnda-inĩ. Paradiso ĩgĩthũka, na gũtirĩ mũndũ ũrĩ wahota kũmĩcokia. Bibilia yugaga ũũ: “Thĩ nĩ ĩneanĩtwo moko-inĩ ma ũrĩa mwaganu.”—Ayubu 9:24.—Thoma Kĩambĩrĩria 3:23, 24.
Hihi Jehova nĩ atiganĩirie muoroto ũrĩa aarĩ naguo kĩambĩrĩria-inĩ wĩgiĩ andũ? Aca! Nĩwe mwene-hinya-wothe. Gũtirĩ ũndũ ũngĩmũrema. (Isaia 45:18) Nĩ agaacokia andũ ũrĩa eendaga matũũrage.—Thoma Thaburi 37:11, 34.
3. Paradiso ĩgaacokio atĩa?
Paradiso ĩgaacokio gũkũ thĩ hĩndĩ ya wathani wa Jesu arĩ Mũthamaki mwamũre nĩ Ngai. Hĩndĩ ya mbaara ĩtagwo Hari–Magedoni, Jesu nĩ agaatongoria araika a Ngai nĩguo maniine andũ arĩa othe makararagia Ngai. Jesu agaacoka ohe Shaitani mĩaka 1,000. Andũ a Ngai nĩ makaahonoka mbaara ĩyo tondũ Jesu nĩ akaamatongoria na amagitĩre. Magaakenera muoyo wa tene na tene thĩinĩ wa Paradiso gũkũ thĩ.—Thoma Kũguũrĩrio 20:1-3; 21:3, 4.
4. Mĩnyamaro ĩgaathira rĩ?
Ngai akaaniina waganu thĩinĩ wa thĩ rĩ? Jesu nĩ aaheanire “kĩmenyithia” kĩrĩa kĩngĩonanirie atĩ mũico nĩ ũkuhĩrĩirie. Maũndũ thĩinĩ wa thĩ ũmũthĩ nĩ maronania atĩ muoyo wa mũndũ ũrĩ ũgwati-inĩ na atĩ rĩu tũratũũra “ithirĩro rĩa mũtabarĩre wa maũndũ.”—Thoma Mathayo 24:3, 7-14, 21, 22.
Hĩndĩ ya wathani wa Jesu wa mĩaka 1,000 agĩthamakĩra thĩ arĩ igũrũ, nĩ akeeheria mĩnyamaro yothe. (Isaia 9:6, 7; 11:9) Makĩria ma gũkorũo arĩ Mũthamaki, Jesu nĩ agaakorũo arĩ Mũthĩnjĩri-Ngai Mũnene na nĩ akeeheria mehia ma arĩa mendete Ngai. Nĩ ũndũ ũcio, kũgerera Jesu, Ngai nĩ akaaniina mĩrimũ, ũkũrũ, na gĩkuũ.—Thoma Isaia 25:8; 33:24.
5. Nĩa magaatũũra thĩinĩ wa Paradiso ĩrĩa ĩroka?
Thĩinĩ wa Nyũmba ya Ũthamaki, nĩ ũgũcemania na andũ mendete Ngai na makenda kwĩruta ũrĩa mangĩmũkenia
Arĩa mathĩkagĩra Ngai nĩ magaatũũra thĩinĩ wa Paradiso. (1 Johana 2:17) Jesu aatũmire arũmĩrĩri ake magacarie andũ arĩa ahooreri na mamarute ũrĩa mangĩtĩkĩrĩka nĩ Ngai. Mahinda-inĩ maya, Jehova nĩ aracokanĩrĩria andũ milioni nyingĩ nĩguo magaatũũra thĩinĩ wa Paradiso ĩrĩa ĩroka gũkũ thĩ. (Zefania 2:3) Thĩinĩ wa Nyũmba cia Ũthamaki cia Aira a Jehova, andũ marutagwo ũrĩa mangĩtuĩka athuri, atumia, na aciari ega. Aciari na ciana mathathayagia hamwe na makeruta ũrĩa mangĩgunĩka nĩ ũhoro ũrĩa mwega.—Thoma Mika 4:1-4.
