Marũa Kũrĩ Akolosai 3:1-25
3 No rĩrĩ, angĩkorũo nĩ mwariũkirio hamwe na Kristo-rĩ,+ thiĩi na mbere gũcaria maũndũ marĩa marĩ igũrũ, kũrĩa Kristo aikarĩte thĩ guoko-inĩ kwa ũrĩo kwa Ngai.+
2 Igagai meciria manyu harĩ maũndũ marĩa marĩ igũrũ,+ no ti harĩ maũndũ marĩa marĩ gũkũ thĩ.+
3 Nĩ gũkorũo nĩ mwakuire, na muoyo wanyu ũhithĩtwo hamwe na Kristo kũringana na wendi wa Ngai.
4 Hĩndĩ ĩrĩa Kristo, o we muoyo witũ+ akaaguũrio-rĩ, o na inyuĩ nĩ mũkaaguũrio hamwe nake mũrĩ na riri.+
5 Nĩ ũndũ ũcio-rĩ, ũragai ciĩga cia mĩĩrĩ yanyu+ iria irĩ gũkũ thĩ ũhoro-inĩ wĩgiĩ ngomanio itagĩrĩire,* maũndũ matarĩ matheru, merirĩria moru ma ngomanio, merirĩria mathũku,+ na ũkoroku, o guo ũhoi mĩhianano.
6 Nĩ ũndũ wa maũndũ macio, mang’ũrĩ ma Ngai nĩ maroka.
7 Ũguo nĩguo o na inyuĩ mwekaga* mũtũũrĩre-inĩ wanyu wa hau kabere.*+
8 No rĩu no mũhaka mũmeherie mothe harĩ inyuĩ: mang’ũrĩ, marakara, ũũru,+ irumi,+ na mĩario ya ũũra-thoni+ kuuma tũnua-inĩ twanyu.
9 Mũtikaheenanagie mũndũ na ũrĩa ũngĩ.+ Mwĩyaũrei ũmũndũ* ũrĩa wa tene+ o hamwe na mĩtugo yaguo,
10 na mwĩhumbe ũmũndũ mwerũ,+ ũrĩa ũratuwo mwerũ kũgerera ũmenyo wa ma kũringana na mũhianĩre wa Ũrĩa waũmbire,+
11 na ũhoro-inĩ ũcio gũtirĩ Mũngiriki kana Mũyahudi, mũndũ mũruu kana ũtarĩ mũruu, mũndũ wa kũngĩ, Mũsikuthi,* ngombo, kana mũndũ ũrĩ na wĩyathi; ĩndĩ Kristo nĩwe maũndũ mothe harĩ andũ othe.+
12 Nĩ ũndũ ũcio, tondũ mũrĩ andũ mathuurĩtwo nĩ Ngai,+ aamũre na mendetwo-rĩ, mwĩhumbei wendo muororo ũrĩ na ũcayanĩri,+ ũtugi, wĩnyihia,*+ ũhooreri,+ na wetereri.+
13 Thiĩi na mbere gũkiranagĩrĩria mũndũ na ũrĩa ũngĩ na kuohanagĩra mwĩyendeire+ o na angĩkorũo mũndũ arĩ na gĩtũmi gĩa gũteta nĩ ũndũ wa mũndũ ũrĩa ũngĩ.+ O ta ũrĩa Jehova* aamuoheire inyuĩ eyendeire, no mũhaka mwĩkage o ũguo.+
14 No makĩria ma maũndũ macio mothe-rĩ, mwĩhumbei wendo,+ nĩ gũkorũo wohithanagia andũ na njĩra nginyanĩru.+
15 Ningĩ-rĩ, rekei thayũ wa Kristo wathanage ngoro-inĩ cianyu,*+ tondũ mwetirũo harĩ thayũ ũcio thĩinĩ wa mwĩrĩ ũmwe. Na muonanagie atĩ mũrĩ na ngatho.
16 Rekei kiugo gĩa Kristo gĩikarage thĩinĩ wanyu na njĩra nene na ũũgĩ wothe. Thiĩi na mbere kũrutana na gwĩkĩrana ngoro* na thaburi,+ nyĩmbo cia kũgooca Ngai, nyĩmbo cia kĩĩroho iria ciinagwo na ngatho,* mũkĩinagĩra Jehova* ngoro-inĩ cianyu.+
17 Ũndũ o wothe ũrĩa mũrĩkaga na ciugo kana ciĩko, ĩkagai maũndũ mothe thĩinĩ wa rĩĩtwa rĩa Mwathani Jesu, mũgĩcokagĩria Ngai ngatho o we Ithe witũ kũgerera harĩ we.+
18 Inyuĩ atumia-rĩ, mwĩnyihagĩriei athuri anyu,+ nĩ gũkorũo ũndũ ũcio nĩ mwagĩrĩru harĩ Mwathani.
19 Inyuĩ athuri-rĩ, thiĩi na mbere kwenda atumia anyu+ na mũtikamarakaragĩre mũrĩ na marũrũ.+
20 Inyuĩ ciana, athĩkagĩrai aciari anyu maũndũ-inĩ mothe,+ nĩ gũkorũo ũndũ ũcio nĩ ũkenagia Mwathani.
21 Inyuĩ maithe, mũtikarakaragie* ciana cianyu,+ nĩguo itigakue ngoro.
22 Inyuĩ ngombo, athĩkagĩrai athani anyu a gũkũ thĩ*+ maũndũ-inĩ mothe, to hĩndĩ ĩrĩa maramũrora nogetha mũkenie andũ,* ĩndĩ mũrĩ na ngoro theru, mũgĩĩtigagĩra Jehova.*
23 Ũndũ o wothe ũrĩa mũrĩkaga, wĩkagei na ngoro* yothe ta arĩ Jehova*+ mũrekĩra no ti andũ,
24 nĩ gũkorũo nĩ mũĩ atĩ nĩ kuuma kũrĩ Jehova* mũkaamũkĩra igai rĩrĩ kĩheo.+ Tuĩkai ngombo cia Mwathani, nĩwe Kristo.
25 Hatarĩ nganja, ũrĩa wĩkaga ũũru nĩ akaarĩhwo nĩ ũndũ wa ũũru ũrĩa ekĩte,+ na gũtirĩ mũthutũkanio.+
Tũũhoro twa magũrũ-inĩ
^ Kĩngiriki, por·neiʹa. Rora Ũthathaũri wa Ciugo.
^ Kana “mwathiaga.”
^ Kana “rĩrĩa mwatũũraga ũguo.”
^ Ũkk., “mũndũ.”
^ “Mũsikuthi” nĩ mũndũ ũrĩa woonagwo ta atarĩ mũthomu.
^ Kana “wĩnyihia wa meciria.”
^ Rora Ũhoro Muongerere A5.
^ Kana “ũtongoragie ngoro cianyu.”
^ Kana “gũtaarana.”
^ Kana “ũtugi.”
^ Rora Ũhoro Muongerere A5.
^ Kana “mũtigatuurithagie.”
^ Ũkk., “kĩĩmwĩrĩ.”
^ Ũkk., “ti na ciĩko cia ũtungata wa maitho ta mũrakenia andũ.”
^ Rora Ũhoro Muongerere A5.
^ Kĩngiriki, psy·kheʹ. Rora Ũthathaũri wa Ciugo.
^ Rora Ũhoro Muongerere A5.
^ Rora Ũhoro Muongerere A5.
