Marũa Kũrĩ Aefeso 4:1-32
4 Kwoguo, o niĩ njohetwo+ ndĩ thĩinĩ wa Mwathani-rĩ, ndĩramũthaitha mũthiage na mĩthiĩre ĩrĩa yaganĩrĩire+ na gwĩtwo kũrĩa mwetirũo,
2 mũrĩ na wĩnyihia wothe*+ na ũhooreri, mũrĩ na wetereri,+ mũgĩkiranagĩrĩria o mũndũ na ũrĩa ũngĩ mũrĩ na wendo,+
3 o mũkĩĩrutanagĩria biũ gũtũũria ũrũmwe wa roho thĩinĩ wa thayũ ũrĩa ũmũnyitithanagia.+
4 Gũkoragwo na mwĩrĩ ũmwe,+ na roho ũmwe,+ o ta ũrĩa mwetirũo harĩ kĩĩrĩgĩrĩro kĩmwe+ kĩrĩa mwetĩirũo;
5 Mwathani ũmwe,+ wĩtĩkio ũmwe, ũbatithio ũmwe;
6 Ngai ũmwe na nĩwe Ithe wa andũ othe, o we ũrĩ igũrũ rĩa andũ othe na arutaga wĩra kũgerera andũ othe na kũrĩ andũ othe.
7 Rĩu-rĩ, o ũmwe witũ nĩ aaheirũo ũtugi mũnene kũringana na ũrĩa Kristo aathimire kĩheo kĩu kĩheanagwo o ũguo tũhũ.+
8 Nĩ gũkorũo rĩandĩko riugaga ũũ: “Hĩndĩ ĩrĩa aambatire igũrũ, nĩ aakuuire mĩgwate; akĩheana arũme marĩ ta iheo.”+
9 Kaĩ kiugo “aambatire” kiugĩte atĩa tiga atĩ ningĩ nĩ aaikũrũkire icigo-inĩ cia kĩanda, ũguo nĩ kuuga gũkũ thĩ?
10 O ũcio waikũrũkire ningĩ nowe waambatire igũrũ+ mũno gũkĩra igũrũ rĩothe,+ nĩgetha atũme indo ciothe igĩe na ũiyũru.
11 Akĩheana amwe marĩ atũmwo,+ angĩ marĩ anabii,+ angĩ marĩ ahunjia,*+ angĩ marĩ arĩithi na arutani,+
12 nĩ ũndũ wa kũrũnga* arĩa aamũre, kũruta wĩra wa gũtungata, na gwaka mwĩrĩ wa Kristo,+
13 o nginya ithuothe tũkinyĩre ũrũmwe wa wĩtĩkio na wa ũmenyo wa ma wĩgiĩ Mũrũ wa Ngai, tũtuĩke mũndũ mũgima biũ,+ tũkinyĩre gĩthimi kĩa ũgima kĩa ũiyũru wa Kristo.
14 Kwoguo-rĩ, tũtiagĩrĩirũo gũthiĩ na mbere gũkorũo tũrĩ ciana, ta tũracũgio nĩ makũmbĩ tũgĩtwaragwo mwena na mwena nĩ rũhuho o ruothe rwa morutani+ kũgerera wara wa andũ, kũgerera maheeni marĩa mabangĩtwo na wara.
15 No o tũkĩaragia ũhoro wa ma-rĩ, nĩ tũkũrei tũrĩ na wendo maũndũ-inĩ mothe kwerekera Kristo, o we mũtwe witũ.+
16 Kuuma harĩ we, mwĩrĩ wothe+ nĩ ũnyitithanĩtio wega na ũgateithio ũnyitanĩre na irũngo ciothe iria iheanaga kĩrĩa kĩrabatarania. Rĩrĩa o kĩĩga kĩaruta wĩra ũrĩa kwagĩrĩire-rĩ, mwĩrĩ nĩ ũkũraga o ũgĩthiaga na mbere kwĩyaka guo mwene thĩinĩ wa wendo.+
17 Ũndũ ũyũ nĩguo nguuga na ngaruta ũira waguo thĩinĩ wa Mwathani, atĩ mũtiagĩrĩirũo rĩngĩ gũthiaga ta ũrĩa ndũrĩrĩ o nacio ithiaga,+ na mwĩcirĩrie wa tũhũ.+
18 Andũ acio marĩ nduma-inĩ kĩĩmeciria na nĩ mamũranĩtio na muoyo ũrĩa Ngai aheanaga, nĩ ũndũ wa ũrimũ ũrĩa ũrĩ thĩinĩ wao, nĩ ũndũ wa ũrĩa ngoro ciao ciũmĩte.
19 Tondũ wao kwaga thoni o na hanini, meeheanire harĩ mĩtugo ya rũtũrĩko*+ mekage maũndũ matarĩ matheru ma mĩthemba yothe marĩ na ũkoroku.
20 No inyuĩ mũtierutire atĩ ũguo nĩguo Kristo ahaana,
21 angĩkorũo na ma nĩ mwamũiguire na mũkĩrutwo kũgerera harĩ we, o ta ũrĩa ũhoro wa ma ũrĩ thĩinĩ wa Jesu.
22 Mwarutirũo kwĩyaũra ũmũndũ ũrĩa wa tene+ ũringaine na mĩthiĩre yanyu ya hau kabere na ũrĩa ũrathũkio nĩ merirĩria maguo ma maheeni.+
23 Na mwagĩrĩirũo gũthiĩ na mbere kwerũhio mwerekera ũrĩa ũtongoragia meciria manyu,*+
24 na nĩ mwagĩrĩirũo mwĩhumbe ũmũndũ mwerũ+ ũrĩa wombirũo kũringana na wendi wa Ngai, na ũthingu wa ma na wĩhokeku.
25 Rĩu tondũ nĩ mũrĩkĩtie kweheria maheeni, o mũndũ nĩ aragie ma na ũrĩa ũngĩ,+ nĩ gũkorũo tũrĩ ciĩga cia mũndũ na ũrĩa ũngĩ.+
26 Rĩrĩa mwarakara-rĩ, mũtikehagie;+ mũtikarekage riũa rĩthũe mũrĩ o na marakara;+
27 mũtikaheage Mũcukani kamweke.*+
28 Mũndũ ũrĩa ũiyaga nĩ atige kũiya rĩngĩ; handũ ha ũguo, nĩ arutage wĩra na kĩyo, arutage wĩra mwega na moko make,+ nĩguo akagĩaga na kĩndũ gĩa kũhe mũndũ ũrĩa ũbatarĩte.+
29 Mũtikanareke kiugo kĩbuthu kiume kanua-inĩ kanyu,+ no aragiai maũndũ o marĩa mega ma gwaka andũ arĩa angĩ kũringana na bata ũrĩa ũngĩkorũo ho, nĩguo mũgunage arĩa marĩmũiguaga.+
30 Ningĩ mũtikaiguithagie roho mũtheru wa Ngai ũũru,*+ o ũcio mwĩkĩrĩtwo mũhũũri naguo+ nĩ ũndũ wa mũthenya wa kũrekererio kũgerera ũkũũri.+
31 Eheriai kuuma harĩ inyuĩ mĩthemba yothe ya marũrũ manene,+ marakara, mang’ũrĩ, kũgũthũka, irumi,+ o hamwe na maũndũ mothe moru.+
32 No mũtuĩke atugi kwerekera mũndũ na ũrĩa ũngĩ, na mũgacayanagĩra mũrĩ na wororo,+ mũkĩohanagĩra mwĩyendeire o ta ũrĩa Ngai aamuoheire+ eyendeire kũgerera Kristo.
Tũũhoro twa magũrũ-inĩ
^ Kana “wĩnyihia wa meciria.”
^ Kana “ahunjia a ũhoro ũrĩa mwega.”
^ Kana “kũmenyeria.”
^ Kana “mĩtugo ya ũũra-thoni.” Kĩngiriki, a·selʹgei·a. Rora Ũthathaũri wa Ciugo.
^ Kana “hinya ũrĩa ũtongoragia meciria manyu.” Ũkk., “roho wa meciria manyu.”
^ Kana “o na mũtigetĩkĩrie Mũcukani one handũ.”
^ Kana “mũtigatũmage roho mũtheru wa Ngai ũgĩe na kĩeha.”
