Keɣa 55:1-23
Hendu teyaa ñʋʋdʋ: Petee-tʋ nɛ cɩmʋʋ wondu ndʋ tɩ-yɔɔ wɛ nimasɩ yɔ. Masɩkili.* Daviid hendu.
55 Hayɩ Ɛsɔ, welisi ma-adɩma,+Nɛ mantɩmɩɣ se ŋna man-pʋtɔdɩyɛ lɛ, taasu tamɩyɛ.*+
2 Kemsini-m nɛ ŋcosi-m.+
Ma-nɩɣzɛ yeba nɛ menpeendiɣ yem,+Nɛ ma-lɩmaɣza taa sidaa
3 Tɔm ndʋ koyindu yɔɔdʋʋ yɔ tɩ-yɔɔ,Nɛ nazɩm mbʋ kañatʋ tʋ kɔŋnɩ mɔ-yɔɔ yɔ pɩ-yɔɔ.
Mbʋ pʋyɔɔ yɔ pakpazɩ kʋñɔmɩŋ huuye mɔ-yɔɔ,Nɛ pa-pana taa, paanaɣ-m nɛ ɛsɩyɛ.+
4 Ma-laŋɩyɛ nɩɣ wɩzasɩ man-taa,+Nɛ sɩm sɔɔndʋ hu mɔ-yɔɔ.+
5 Sɔɔndʋ kpaɣ-m, menseliɣ yem,Nɛ mɔn-tɔnʋʋ paɣ mɔ-yɔɔ.
6 Mɔyɔɔdʋʋ tam se: «Ɛbɛ kaalaba se mɛwɛnɩ keŋ ɛzɩ ehooye yɔ!
Maakʋyaa nɛ mowolo mancaɣ ɖenɖe kaɖɛ naɖɩyɛ ɛɛpɩzɩɣ nɛ ɖɩtalɩ-m yɔ.
7 Ɩna! Maasewa nɛ mɛnɖɛɛ poliŋ.+
Maawoba nɛ mancaɣ kañɩmbusuu taa.+ (Sɛɛla)
8 Maasewa nɛ mowolo ɖɩjɔzɩyɛ naɖɩyɛ taa,Maaposi man-tɩ nɛ helim ɖoŋ ñɩmbʋ, maaposi man-tɩ nɛ tɛʋ ŋgʋ kɩnɩɣnɩ helim sɔsɔm yɔ.»
9 Oo Yehowa, sidi-wɛ, wɛɛkɩ pa-ɖʋtʋ,*+Mbʋ pʋyɔɔ yɔ mana puuyaɣ lakasɩ nɛ you tɛtʋ taa.
10 Pɔcɔʋ* ti-kolonzi yɔɔ wɩsɩ nɛ ɖoo;Kañatʋ lakasɩ nɛ kʋñɔŋ wɛnɩ tɩ-taa.+
11 Ðɩzʋʋ wɛ tɩ-taa;Nazɩm nɛ cɛtɩm wɛ tɩ-kadaɣ taa tam.+
12 Mbʋ pʋyɔɔ yɔ pɩtɩkɛ koyindu nɔɔyʋ tʋʋnɩ-m;+Pɩɩkɛ mbʋ yɔ maaɖɔkɩ man-tɩ.
Pɩtɩkɛ weyi ɛkaɖɩɣnɩ-m yɔ ɛnʋ kʋyɩnɩ mɔ-yɔɔ;Pɩɩkɛ mbʋ yɔ maamɛlɩ-ɩ.
13 Ɛlɛ ñalabɩnɩ mbʋ, ña weyi ŋkɛ ɛyʋ ɛzɩ ma yɔ,*+Man-taabalʋ maɣmaɣ weyi mansɩm camɩyɛ yɔ.+
14 Ðɩɩkɛ taabalaa kɩbama siŋŋ;Ða nɛ samaɣ ɖɩɖɔŋaɣ nɛ ɖiwoki Ɛsɔ ɖɩɣa taa.
15 Ðɩzʋʋ etudi-wɛ!+
Petii Pɩlaʋ* taa nɛ pɛ-ɛsa;Mbʋ pʋyɔɔ yɔ kɩdɛkɛdɩm wɛ pɛ-hɛkʋ taa nɛ pɩtɛ pɩwɛɛ pa-taa.
16 Ɛlɛ ma lɛ, Ɛsɔ mankaɣ yaʋ,Nɛ Yehowa kaɣ yabʋ ma-ñʋʋ.+
17 Ðanaɣ yɔɔ, tanaŋ tɛɛ nɛ wɩsɩ taa, pisidiɣ ma-lɩmaɣza taa nɛ mɔmɔlʋʋ,*+Nɛ ɛnɩɣ mɔ-nɔɔ.+
18 Ɛkaɣ-m holuu* nɛ mɛhɛzɩnɩ* mba poyouni-m yɔ,Mbʋ pʋyɔɔ yɔ ɛyaa samaɣ kɔm ma-wayɩ.+
19 Ɛsɔ kaɣ nɩʋ nɛ ecosi-wɛ,+Ɛnʋ weyi ɛcaɣ kewiyaɣ kpelaɣ yɔɔ ɖooo lɔŋ yɔ.+ (Sɛɛla)
Mba paaseɣ Ɛsɔ sɔɔndʋ yɔ,+Paakaɣ tisuu se pɛlɛɣzɩ.
20 Eyoni* mba laŋhɛzɩyɛ kaawɛ ɛ nɛ wɛ pɛ-hɛkʋ taa yɔ;+Ɛmanɩ ɛ-ɛgbɛyɛ ɖʋʋ paɣtʋ yɔɔ.+
21 Ɛ-tɔm pee wɛ lɛzɛ lɛzɛ nɛ pɩkɩlɩ naanum,+Ɛlɛ you wɛnɩ ɛ-laŋɩyɛ taa.
Ɛ-tɔm pee lozuu nɛ pɩkɩlɩɣ num,Ɛlɛ akɛ laɣla wena pɛkpɛwa yɔ.+
22 Pɛɖɩ ña-sʋʋtʋ Yehowa yɔɔ,+Nɛ ɛkaɣ-ŋ sɩnʋʋ.*+
Ɛɛkaɣ yebu kpa se siɣsiɣ tʋ ɛtɔlɩ.*+
23 Ɛlɛ ña lɛ, Oo Ɛsɔ, ŋkaɣ-wɛ tisuu pɔʋ ŋgʋ kɩkɩlɩ cukaŋ yɔ kɩ-taa.+
Mba pɛkɛ calɩm kpɛdɩyaa* nɛ cɛtɩyaa yɔ, paatayɩɣ pe-wezuu caɣʋ avema kɩmaŋ pʋcɔ nɛ pasɩ.+
Ɛlɛ ma lɛ, mankaɣ-ŋ taʋ liu.
Pɩ-tɛɛ tɔm
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «Nɛ taamɛsɩ ña-tɩ alɩwaatʋ ndʋ mantɩmɩɣ se ŋsɩnɩ-m yɔ.»
^ Piye piye, «tayɩ pa-nzʋlʋmɩyɛ.»
^ Pʋtɔma yɔ puuyaɣ lakasɩ nɛ you tɔm pɔyɔɔdʋʋ.
^ Yaa «ña weyi ŋkɛ ɛyʋ yɔ, man-ɖaɣʋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «menpeendiɣ.»
^ Piye piye, «Ɛkaɣ ma-ñʋʋ yabʋ.»
^ Yaa «man-kalɩzaɣ hɛzɩnɩ.»
^ Taabalʋ kɩbɩnʋ weyi ɛ-tɔm pɔyɔɔdɩ kalɩtʋ 13 nɛ 14 taa yɔ, ɛnʋ pɔtɔŋ.
^ Yaa «tɩlʋʋ.»
^ Yaa «pɩcɛŋɛsɩ siɣsiɣ tʋ.»
^ Yaa «pɔɖɔ calɩm kpɛdʋʋ wɛɛ.»