yuhanna ke mutabik khushkhabri 6:1-71
6 iske baad, yeeshu galeel jheel yaani tibiriyas jheel ke us paar chala gaya.+
2 magar ek badi bheed uske peechhe-peechhe gayi,+ kyonki unhonne dekha tha ki woh kaise chamatkar karke beemaron ko theek kar raha tha.+
3 fir yeeshu apne chelon ke saath ek pahad par chadha aur vahaan baith gaya.
4 yahoodiyon ka fasah ka tyohar paas tha.+
5 jab yeeshu ne nazar uthakar dekha ki ek badi bheed uski taraf chali aa rahi hai, to usne filippus se kaha, “hum inke khaane ke liye rotiyaan kahaan se khareedein?”+
6 magar woh use parakhne ke liye yah baat kah raha tha kyonki woh jaanta tha ki woh khud kya karne jaa raha hai.
7 filippus ne use javab diya, “do sau deenar* ki rotiyaan bhi in sabke liye poori nahin padeingi ki harek ko thoda-thoda bhi mil sake.”
8 tab yeeshu ke ek chele, andriyas ne jo shamaun patras ka bhaai tha, usse kaha,
9 “yahaan ek ladka hai, jiske paas jau ki paanch rotiyaan aur do chhoti machhliyaan hain. magar itni badi bheed ke liye isse kya hoga?”+
10 yeeshu ne kaha, “logon ko khaane ke liye bitha do.” us jagah bahot ghaas thi, isliye log vahaan aaram se baith gaye. inmein aadmiyon ki ginti kareeb 5,000 thi.+
11 tab yeeshu ne woh rotiyaan lin aur prarthna mein dhanyavad dene ke baad logon mein baant di. fir usne chhoti machhliyaan bhi baant di, jise jitni chahiye thi utni de di.
12 jab unhonne bharpet khaa liya, to usne chelon se kaha, “bache huye tukde ikattha kar lo taaki kuch bhi bekar na ho.”
13 isliye jau ki paanch rotiyon mein se jab sab log khaa chuke, to bache huye tukde ikatthe kiye gaye jinse 12 tokriyaan bhar gayin.
14 jab logon ne uska chamatkar dekha to woh kehne lage, “yah zaroor vahi bhavishyavakta hai jise duniya mein aana tha.”+
15 fir yeeshu jaan gaya ki woh use pakadkar raja banane aa rahe hain,+ isliye woh akele pahad par chala gaya.+
16 jab shaam hui to uske chele jheel ke kinare gaye.+
17 woh ek naav par chadhkar jheel ke us paar kafarnahoom ke liye ravana ho gaye. andhera ho gaya tha aur yeeshu ab tak unke paas nahin pahuncha tha.+
18 aur aandhi ki vajah se jheel mein unchi-unchi lehrein uthne lagin.+
19 lekin jab chele kareeb paanch-chche kilometer* tak naav khe chuke the, to unhonne yeeshu ko jheel par chalte huye naav ki taraf aate dekha aur woh dar ke maare thartharane lage.
20 magar yeeshu ne unse kaha, “daro mat, main hi hoon!”+
21 tab woh use naav mein chadhane ke liye taiyar ho gaye aur jald hi naav us jagah kinare jaa lagi jahaan woh jaa rahe the.+
22 agle din bheed ne, jo jheel ke us paar reh gayi thi, dekha ki jo chhoti naav kinare par thi woh nahin hai. bheed ko pata chala ki us naav mein chele baithkar chale gaye, magar yeeshu unke saath nahin gaya.
23 fir tibiriyas se kuch naav us jagah ke paas aayin, jahaan unhonne woh rotiyaan khaayi thi jo prabhu ne prarthna mein dhanyavad dene ke baad unhein di thi.
24 jab bheed ne dekha ki yahaan na to yeeshu hai, na hi uske chele, to woh un naavon mein chadh gaye aur yeeshu ko dhoondhne kafarnahoom chal diye.
25 jheel ke is paar jab unhonne use dekha to poochha, “guru,+ tu yahaan kab aaya?”
26 yeeshu ne unse kaha, “main tumse sach-sach kehta hoon ki tum mujhe isliye nahin dhoondh rahe ho ki tumne chamatkar dekhe the, balki isliye ki tumne ji-bharkar rotiyaan khaayi thi.+
27 us khaane ke liye kaam mat karo jo nasht ho jaata hai, balki us khaane ke liye kaam karo jo nasht nahin hota aur hamesha ki zindagi deta hai,+ vahi khaana jo tumhein insan ka beta dega. kyonki pita yaani parmeshvar ne khud usi bete par apni manzoori ki muhar lagayi hai.”+
28 tab unhonne usse poochha, “parmeshvar ki manzoori paane ke liye hamein kaun-saa kaam karna hoga?”
29 yeeshu ne unhein javab diya, “parmeshvar ki manzoori paane ke liye tum us par vishvas karo jise usne bheja hai.”+
30 tab unhonne kaha, “fir tu hamein kya chamatkar dikhanevala hai+ ki hum use dekhkar tera yakeen karein? tu kaun-saa kaam karne jaa raha hai?
31 hamare purkhon ne to veerane mein manna khaaya tha,+ theek jaisa likha hai, ‘usne unhein khaane ke liye swarg se roti di.’”+
32 yeeshu ne unse kaha, “main tumse sach-sach kehta hoon ki moosa ne tumhein swarg se roti nahin di thi, magar mera pita tumhein swarg se sachchi roti deta hai.
33 isliye ki jo swarg se neeche aaya hai vahi parmeshvar ki roti hai aur duniya ko jeevan deti hai.”
34 tab logon ne kaha, “prabhu, hamein yah roti hamesha diya kar.”
35 yeeshu ne unse kaha, “main jeevan denevali roti hoon. jo mere paas aata hai woh fir kabhi bhookha nahin hoga aur jo mujh par vishvas karta hai woh fir kabhi pyasa nahin hoga.+
36 magar jaisa mainne tumse kaha tha, tum mujhe dekhkar bhi mera yakeen nahin karte.+
37 woh sabhi jinhein pita ne mujhe diya hai, mere paas aayenge aur jo koi mere paas aayega use main khud se kabhi door nahin karoonga.+
38 kyonki main apni marzee nahin, balki apne bhejnevale ki marzee poori karne+ ke liye swarg se neeche aaya hoon.+
39 mujhe bhejnevale ki yahi marzee hai ki usne jitnon ko mujhe diya hai, unmein se main ek ko bhi na khoun, balki aakhiri din unhein zinda karoon.+
40 mere pita ki marzee yah hai ki jo koi bete ko sweekar karta hai aur us par vishvas karta hai, use hamesha ki zindagi mile+ aur main use aakhiri din zinda karoonga.”+
41 tab yahoodi kudkudane lage kyonki usne kaha tha, “main woh roti hoon jo swarg se neeche utri hai.”+
42 woh kehne lage, “kya yah yoosuf ka beta yeeshu nahin jiske maata-pita ko hum jaante hain?+ to fir yah kaise kah sakta hai ki ‘main swarg se neeche aaya hoon’?”
43 yeeshu ne unse kaha, “aapas mein mat kudkudao.
44 koi bhi insan mere paas tab tak nahin aa sakta jab tak ki pita jisne mujhe bheja hai, use mere paas khinch na laaye.+ aur main use aakhiri din zinda karoonga.+
45 bhavishyavaktaon ne likha hai, ‘woh sab yahova* ke sikhaye huye honge.’+ har koi jisne pita se suna hai aur seekha hai, woh mere paas aata hai.
46 kisi insan ne pita ko kabhi nahin dekha+ siva uske jo parmeshvar ki taraf se hai. usi ne pita ko dekha hai.+
47 main tumse sach-sach kehta hoon ki jo koi yakeen karta hai, woh hamesha ki zindagi paayega.+
48 main jeevan denevali roti hoon.+
49 tumhare purkhon ne veerane mein manna khaaya tha, fir bhi woh mar gaye.+
50 magar jo koi is roti mein se khaata hai jo swarg se utri hai, woh nahin marega.
51 main woh jeevit roti hoon jo swarg se utri hai. agar koi is roti mein se khaata hai to woh hamesha zinda rahega. darasal jo roti main doonga, woh mera shareer hai jo main insanon ki khaatir doonga taaki woh jeevan paayen.”+
52 tab yahoodi ek-doosre se behas karne lage, “bhala yah aadmi kaise apna shareer hamein khaane ke liye de sakta hai?”
53 tab yeeshu ne unse kaha, “main tumse sach-sach kehta hoon ki jab tak tum insan ke bete ka maans na khaao aur uska khoon na peeo, tummein jeevan nahin.+
54 jo mere shareer mein se khaata hai aur mere khoon mein se peeta hai, woh hamesha ki zindagi paayega aur main aakhiri din use zinda karoonga.+
55 isliye ki mera shareer asli khaana hai aur mera khoon peene ki asli cheez hai.
56 jo mere shareer mein se khaata hai aur mere khoon mein se peeta hai, woh mere saath ekta mein bana rehta hai aur main uske saath ekta mein bana rehta hoon.+
57 theek jaise jeevit pita ne mujhe bheja hai aur main pita ki vajah se jeevit hoon, vaise hi jo mujhmein se khaata hai woh bhi meri vajah se jeevit rahega.+
58 yah woh roti hai jo swarg se neeche utri hai. yah vaisi nahin jaisi tumhare purkhon ne khaayi, fir bhi mar gaye. jo is roti mein se khaata hai, woh hamesha zinda rahega.”+
59 ye baatein usne kafarnahoom mein us vakt kahi thi jab woh ek sabha-ghar* mein sikha raha tha.
60 jab uske kai chelon ne yah baat suni to woh kehne lage, “yah kaisi ghinauni baat hai, kaun ise sunega?”
61 magar yeeshu ne man mein yah jaante huye ki uske chele is baare mein kudkuda rahe hain, unse kaha, “kya is baat se tumhara vishvas dagmaga raha hai?*
62 to fir tab kya hoga jab tum insan ke bete ko oopar jaata dekhoge jahaan woh pehale tha?+
63 parmeshvar ki pavitra shakti se hi jeevan milta hai,+ shareer kisi kaam ka nahin. jo baatein mainne tumse kahi hain, woh parmeshvar ki pavitra shakti ke mutabik hain aur jeevan deti hain.+
64 magar tummein se kuch aise hain jo meri baat par yakeen nahin karte.” yeeshu shuroo se jaanta tha ki woh kaun hain jo yakeen nahin karte aur woh kaun hai jo uske saath vishvasghat karega.+
65 woh unse kehne laga, “iseeliye mainne tumse kaha tha ki koi bhi tab tak mere paas nahin aa sakta jab tak ki pita use ijazat na de.”+
66 is vajah se uske bahot-se chelon ne uske peechhe chalna chhod diya aur vaapas un kaamon mein lag gaye jinhein woh chhod aaye the.+
67 tab yeeshu ne apne 12 chelon se kaha, “kya tum bhi chale jaana chahte ho?”
68 shamaun patras ne javab diya, “prabhu, hum kiske paas jaayen?+ hamesha ki zindagi ki baatein to tere hi paas hain.+
69 hamne yakeen kiya hai aur hum jaan gaye hain ki tu parmeshvar ka pavitra jan hai.”+
70 yeeshu ne unse kaha, “mainne tum baarahon ko chuna tha na?+ magar tummein se ek badnam karnevala* hai.”+
71 darasal woh shamaun iskariyoti ke bete yahooda ki baat kar raha tha, kyonki vahi tha jo un baarahon mein se ek hote huye bhi use pakadvanevala tha.+
