yuhanna ke mutabik khushkhabri 1:1-51
1 shurooat mein vachan tha+ aur vachan parmeshvar ke saath tha+ aur vachan ek ishvar* tha.+
2 yahi shurooat mein parmeshvar ke saath tha.
3 saari cheezen usi ke zariye vajood mein aayin+ aur ek bhi cheez aisi nahin jo uske bina vajood mein aayi ho.
4 uske zariye jeevan vajood mein aaya aur jeevan insanon ke liye raushni tha.+
5 yah raushni andhere mein chamak rahi hai,+ lekin andhera us par haavi nahin ho saka.
6 parmeshvar ki taraf se bheja hua ek aadmi aaya, uska naam yuhanna tha.+
7 yah aadmi gavah bankar aaya taaki us raushni ke baare mein gavahi de+ aur is tarah uske zariye sab kism ke log yakeen karein.
8 yah aadmi khud woh raushni nahin tha,+ magar us raushni ki gavahi dene aaya tha.
9 woh sachchi raushni jo sab kism ke insanon ko raushni deti hai, bahot jald duniya mein aanevali thi.+
10 woh* duniya mein tha+ aur duniya uske zariye vajood mein aayi+ magar duniya ne use nahin jaana.
11 woh apne ghar aaya magar uske apne hi logon ne use sweekar nahin kiya.
12 magar jitnon ne use sweekar kiya, un sabko usne parmeshvar ke bachche banne ka adhikar diya,+ kyonki unhonne uske naam par vishvas kiya.+
13 woh na to khoon se, na shareer ki ichha se, na hi kisi insan ki marzee se balki parmeshvar ki marzee se paida huye.+
14 vachan insan bana+ aur hamare beech raha aur hamne uska tej dekha, aisa tej jaisa ek pita ke iklaute bete+ ka hota hai aur woh parmeshvar ki kripa* aur sachchai se bharpoor tha.
15 (yuhanna ne uske baare mein gavahi di, haan usne chillakar kaha, “yah vahi hai jiske baare mein mainne kaha tha, ‘jo mere baad aaya woh mujhse aage nikaal gaya kyonki woh mujhse pehale se vajood mein tha.’”)+
16 hum sabne usse bharpoor maha-kripa paayi jo khud maha-kripa se bharpoor hai.
17 kyonki moosa ke zariye hamein kaanoon mila tha,+ magar maha-kripa+ aur sachchai hamein yeeshu maseeh ke zariye mili.+
18 kisi insan ne parmeshvar ko kabhi nahin dekha.+ iklaute bete ne hi hamein pita ke baare mein samjhaya,+ jo ek ishvar hai+ aur pita ke bilkul paas* hai.+
19 yuhanna ne yah gavahi tab di jab yahoodiyon ne yarooshalem se yaajkon aur leviyon ko uske paas yah poochhne ke liye bheja ki “tu kaun hai?”+
20 usne javab dene se inkar nahin kiya balki kaha, “main maseeh nahin hoon.”
21 fir unhonne poochha, “to kya tu eliyah hai?”+ usne kaha, “nahin.” “kya tu vahi bhavishyavakta hai jise aana tha?”+ usne kaha, “nahin!”
22 tab unhonne poochha, “fir tu kaun hai? hamein bata taaki hum apne bhejnevalon ko javab de sakein. tu apne baare mein kya kehta hai?”
23 yuhanna ne kaha, “main woh aavaz hoon jo veerane mein pukar rahi hai, ‘yahova* ka raasta seedha karo,’+ theek jaisa bhavishyavakta yashayah ne kaha tha.”+
24 yuhanna ke paas aaye in logon ko fareesiyon ne bheja tha.
25 unhonne saval kiya, “agar tu maseeh nahin hai, na hi eliyah hai, na hi woh bhavishyavakta hai, to fir tu baptisma kyon deta hai?”
26 yuhanna ne javab diya, “main paani mein baptisma deta hoon. magar tumhare beech woh khada hai jise tum nahin jaante.
27 woh mere baad aa raha hai aur main uski jootiyon ke feete kholne ke bhi laayak nahin.”+
28 yah sab yardan ke paar baitniyah mein hua, jahaan yuhanna baptisma deta tha.+
29 agle din jab usne yeeshu ko apni taraf aate dekha, to kaha, “dekho, parmeshvar ka memna+ jo duniya ka paap door le jaata hai!+
30 yah vahi hai jiske baare mein mainne kaha tha, jo mere baad aa raha hai woh mujhse aage nikaal gaya hai kyonki woh mujhse pehale se vajood mein tha.+
31 main bhi uske baare mein nahin jaanta tha. magar main isliye paani mein baptisma de raha hoon taaki woh israel par zahir ho sake.”+
32 yuhanna ne yah gavahi bhi di, “mainne pavitra shakti ko kabootar ke roop mein aakash se utarte dekha aur woh us par thahar gayi.+
33 main bhi uske baare mein nahin jaanta tha magar jisne mujhe paani mein baptisma dene ke liye bheja usi ne mujhe bataya, ‘jis kisi par tu pavitra shakti ko utarte aur thaharte dekhe,+ vahi hai jo pavitra shakti se baptisma dega.’+
34 mainne yah dekha hai aur mainne gavahi di hai ki yahi parmeshvar ka beta hai.”+
35 agle din fir yuhanna apne do chelon ke saath khada tha.
36 jab usne yeeshu ko vahaan se jaate dekha to kaha, “dekho parmeshvar ka memna!”+
37 uski yah baat sunkar donon chele yeeshu ke peechhe-peechhe gaye.
38 tab yeeshu ne mudkar unhein peechhe aate dekha aur unse poochha, “tum kya chahte ho?” unhonne kaha, “rabbi, (jiska matlab hai, “guru”) tu kahaan thehra hua hai?”
39 yeeshu ne unse kaha, “aao aur chalkar dekh lo.” tab woh uske saath gaye aur dekha ki woh kahaan thehra hua hai aur us din woh usi ke saath thahre. yah din ka kareeb dasvaan ghanta* tha.
40 yuhanna ki baat sunkar yeeshu ke peechhe jaanevale in do janon mein se ek ka naam andriyas+ tha jo shamaun patras ka bhaai tha.
41 andriyas sabse pehale apne sage bhaai shamaun se mila aur usse kaha, “hamein maseeha+ mil gaya hai.” (maseeha ka matlab hai, “abhishikt jan.”)
42 andriyas use yeeshu ke paas le gaya. yeeshu ne shamaun ko dekhkar kaha, “tu yuhanna ka beta shamaun+ hai. tu kaifa kehlayega” (yoonani mein kaifa ka anuvad “patras”+ kiya jaata hai).
43 agle din yeeshu galeel jaana chahta tha. jab woh filippus+ se mila to usne kaha, “mera chela ban jaa.”
44 filippus baitsaida shehar ka rehnevala tha, andriyas aur patras bhi vahin se the.
45 jab filippus, natanael+ se mila to usne kaha, “hamein woh mil gaya hai jiske baare mein moosa ne kaanoon mein aur bhavishyavaktaon ne likha tha. woh naasrat ka rehnevala yeeshu hai, jo yoosuf ka beta hai.”+
46 magar natanael ne usse kaha, “bhala naasrat se bhi kuch achha nikaal sakta hai?” filippus ne kaha, “chalkar dekh le.”
47 yeeshu ne natanael ko apni taraf aate dekha aur uske baare mein kaha, “dekho, yah ek sachcha israeli hai jismein koi kapat nahin.”+
48 tab natanael ne usse kaha, “tu mujhe kaise jaanta hai?” yeeshu ne kaha, “filippus ke bulane se bhi pehale jab tu anjeer ke ped ke neeche tha, mainne tujhe dekha tha.”
49 tab natanael ne usse kaha, “guru, tu parmeshvar ka beta hai, israel ka raja hai.”+
50 yeeshu ne kaha, “kya toone isliye yakeen kiya kyonki mainne tujhse kaha ki mainne tujhe anjeer ke ped ke neeche dekha tha? tu isse bhi bade-bade kaam dekhega.”
51 fir yeeshu ne usse kaha, “main tum logon se sach-sach kehta hoon, tum swarg ko khula hua aur parmeshvar ke swargdooton ko insan ke bete ke paas neeche aate aur oopar jaate dekhoge.”+
kai footnote
^ ya “ishvar jaisa.”
^ yaani vachan.
^ ya “maha-kripa.”
^ ya “seene ke paas.” yah dikhata hai ki woh pita ke liye sabse khaas hai.
^ yaani shaam kareeb 4 baje.
