preshiton ke kaam 15:1-41
15 fir yahoodiya se kuch log antakiya aaye aur bhaaiyon ko yah sikhane lage, “jab tak tum moosa ke rivaz ke mutabik khatna nahin karvaoge,+ tab tak tum uddhaar nahin paa sakte.”
2 magar jab is baat par paulus aur baranbas ke saath unki kaafi behas hui aur jhagda hua, to is silsile mein paulus aur baranbas ko saath hi kuch aur bhaaiyon ko, preshiton aur pracheenon ke paas yarooshalem bhejne ka intazam kiya gaya.+
3 mandli ne unhein kuch door tak vida kiya aur fir ye bhaai feeneeke aur saamriya ke ilakon se hote huye gaye aur vahaan ke bhaaiyon ko poora byaura dekar bataya ki gair-yahoodi khud ko badalkar parmeshvar ki taraf ho gaye hain. yah sab sunkar bhaaiyon ko bahot khushi hui.
4 jab woh yarooshalem pahunche to mandli aur preshiton aur pracheenon ne khushi se unka swagat kiya aur paulus aur baranbas ne un sab kaamon ke baare mein unhein bataya jo parmeshvar ne unke zariye kiye the.
5 magar fareesiyon ke gut ke kuch log, jo vishvasi ban gaye the, apni jagah se uth khade huye aur unhonne kaha, “yah behad zaroori hai ki gair-yahoodiyon ka khatna karaya jaaye aur unhein moosa ka kaanoon maanne ki aagya di jaaye.”+
6 tab preshit aur pracheen is maamle par charcha karne ke liye ikattha huye.
7 unhonne is maamle par gehrai se soch-vichar kiya aur unke beech lambee charcha* hui. iske baad patras ne uthkar unse kaha, “bhaaiyo, tum achhi tarah jaante ho ki shuroo mein hi parmeshvar ne tumhare beech mein se mujhe chuna ki mere munh se gair-yahoodi khushkhabri sunein aur vishvas karein.+
8 aur parmeshvar ne, jo dilon ko jaanta hai,+ unhein pavitra shakti dekar gavahi di+ ki usne unhein manzoor kiya hai, theek jaise hamein bhi manzoor kiya tha.
9 usne hamare aur unke beech koi fark nahin kiya,+ magar unke vishvas ki bina par unke dilon ko shuddh kiya.+
10 to ab tum kyon parmeshvar ki pareeksha lene ke liye chelon par aisa bojh laad rahe ho,+ jise na hamare baap-daada utha sake the, na hum?+
11 iske bajay, hamein vishvas hai ki hum prabhu yeeshu ki maha-kripa ki vajah se uddhaar paate hain,+ theek jaise woh bhi uddhaar paate hain.”+
12 yah sunkar poori sabha khaamosh ho gayi aur woh baranbas aur paulus ki sunnae lage ki kaise parmeshvar ne unke zariye gair-yahoodiyon ke beech bahot-se chamatkar aur aashcharya ke kaam kiye.
13 jab woh bol chuke to yakub ne kaha, “bhaaiyo, meri suno.
14 shimaun*+ ne poora byaura dekar bataya ki parmeshvar ne kaise pehali baar gair-yahoodi raashtron ki taraf dhyan diya taaki unke beech se aise logon ko ikattha kare jo parmeshvar ke naam se pehchane jaayen.+
15 aur is baat se bhavishyavaktaon ke vachan bhi mel khaate hain, jaisa ki likha hai:
16 ‘in baaton ke baad main vaapas aaunga aur daavid ka gira hua tamboo* dobara khada karoonga aur uske khandharon ko fir banaunga aur use pehale jaisa kar doonga
17 taaki uske bache huye log, sab raashtron ke saath milkar ji-jaan se yahova* ki khoj karein, jinke baare mein yahova* ne kaha hai ki woh mere naam se pukare jaate hain. parmeshvar ne, jo yah sab kar raha hai+
18 bahot pehale hi aisa karne ki thaan li thi.’+
19 isliye mera faisla* yah hai ki gair-yahoodiyon mein se jo log parmeshvar ki taraf fir rahe hain, unhein hum pareshan na karein,+
20 magar unhein yah likh bhejein ki woh moortipooja se apavitra hui cheezon se,+ naajayaz yaun-sambandh* se,+ gala ghonte huye jaanvaron ke maans se* aur khoon se door rahein.+
21 isliye ki purane zamane se hi aise log rahe hain jo moosa ki kitabon mein likhi in baaton ka har shehar mein prachar karte aaye hain, har sabt ke din sabha-gharon mein uski kitabein padhkar sunate aaye hain.”+
22 fir preshiton aur pracheenon ne poori mandli ke saath milkar faisla kiya ki woh paulus aur baranbas ke saath apne beech se chune huye aadmiyon ko antakiya bhejein, yaani bar-saba kehlanevale yahooda aur seelas ko,+ jo bhaaiyon mein aguve the.
23 unhonne in bhaaiyon ke haath yah chitthi bheji:
“antakiya,+ seeriya aur kilikiya mein rehnevale gair-yahoodi bhaaiyon ko, aapke bhaaiyon yaani preshiton aur pracheenon ka namaskar!
24 hamne suna hai ki hamare yahaan se kuch logon ne aakaar tumse aisi baatein kahin jisse tum pareshan ho gaye+ aur unhonne tumhare vishvas ko mitane ki koshish ki hai, jabki hamne unhein aisi koi hidayat nahin di thi.
25 isliye hum sabne ekmat hokar tay kiya ki hum kuch bhaaiyon ko chunkar unhein hamare pyare baranbas aur paulus ke saath tumhare paas bhejeinge.
26 ye aise aadmi hain jinhonne hamare prabhu yeeshu maseeh ke naam ki khaatir apni jaan tak daanv par laga di.+
27 hum yahooda aur seelas ko bhej rahe hain taaki woh khud bhi tumhein in baaton ki jaankari dein.+
28 hum pavitra shakti+ ki madad se is nateeje par pahunche hain ki in zaroori baaton ko chhod hum tum par aur bojh na laadein
29 ki tum moorton ko bali ki hui cheezon se,+ khoon se,+ gala ghonte huye jaanvaron ke maans se*+ aur naajayaz yaun-sambandh* se+ hamesha door raho. agar tum dhyan rakho ki tum in baaton se hamesha door rahoge, to tumhara bhala hoga. salamat raho!”*
30 fir jab in aadmiyon ko vida kiya gaya, to woh antakiya gaye aur unhonne sab chelon ko ikattha kiya aur unhein woh chitthi saunp di.
31 chitthi padhkar unhein bahot hausla mila aur woh behad khush huye.
32 yahooda aur seelas bhavishyavakta the, isliye unhonne kai bhashan dekar bhaaiyon ki himmat bandhayi aur unhein mazboot kiya.+
33 unhonne vahaan kuch vakt bitaya, fir vahaan ke bhaaiyon ne unhein vida kiya aur woh un bhaaiyon ke paas laut aaye jinhonne unhein bheja tha.
34 * —
35 magar paulus aur baranbas antakiya mein hi rahe aur kai aur logon ke saath milkar yahova* ke vachan ki khushkhabri sunate aur sikhate rahe.
36 fir kuch din baad paulus ne baranbas se kaha, “chalo,* hum un sabhi shehron mein dobara jaayen jahaan hamne yahova* ka vachan sunaya tha aur dekh aayen ki vahaan ke bhaai kaise hain.”+
37 baranbas ne to thaan liya tha ki woh apne saath yuhanna ko bhi le jaayega jo markus kehlata hai.+
38 magar paulus ko use apne saath le jaana theek nahin laga kyonki woh pamfooliya mein unhein chhodkar chala gaya tha aur usne is kaam mein unka saath nahin diya tha.+
39 is baat ko lekar paulus aur baranbas ke beech zabardast takrar hui, isliye woh ek-doosre se alag ho gaye. baranbas+ markus ko lekar jahaz se kuprus ke liye ravana ho gaya.
40 lekin paulus ne seelas ko chuna. bhaaiyon ne paulus ke liye prarthna kee ki us par yahova* ki maha-kripa bani rahe.+ fir woh donon nikaal pade.
41 woh seeriya aur kilikiya ke ilakon se hota hua mandliyon ko mazboot karta gaya.
kai footnote
^ ya “kaafi behas.”
^ ya “patras.”
^ ya “chhappar; gharana.”
^ ya “meri raay.”
^ ya “aise jaanvar ka maans jiska khoon achhi tarah nahin bahaya jaata.”
^ ya “aise jaanvar ka maans jiska khoon achhi tarah nahin bahaya jaata.”
^ ya “alvida.”
^ ya shaayad, “har haal mein.”
