•   Ho san wum nɛreba n tɔɣeri yetɔɣepɔ̃’ɔsa, la ni ana hon la wani?

  •  Mam ni ka ti’isɛ ti la tari daaŋɔ​—mam ni bisɛ ti la dela sɔsega.

  •  La ni daana mam mɛ fii​—ge mam me ni yeen dekɛ de la bala.

  •  La ni daana mam mɛ​—mam kan ta’an malum dɛ.

•   Sugumnɔɔrɛ bulɛ ti hon tɔɣera yetɔɣepɔ̃’ɔsa?

  •  Mam ka makɛ tɔɣɛ de kurum

  •  Saŋa ase’a ti mam ni tɔɣɛ de

  •  Mam tɔɣeri yetɔɣepɔ̃’ɔsa la saŋa woo

•   Hon ti’isɛ ti yetɔɣepɔ̃’ɔsa dela yeledaaŋɔ, ti la yele pakɛ ti to sɔsɛ de yele?

  •  La yele ka pakɛ

  •  La yele pakɛ mɛ

 Hon ti’isɛ ti yetɔɣepɔ̃’ɔsa dela be’em? Ho ta’an yeti ‘la ka ba’ɛ dɛna be’em sa. Se’ere n sɔi la, yeledaaŋɔ kãra boi mɛ n nari ti to ti’isa de yele gana yetɔɣepɔ̃’ɔsa la ma’a. Leyɛ’ɛsa nɛrawoo tɔɣeri yetɔɣepɔ̃’ɔsa mɛ!’ Bala sirum dela yelemɛŋɛrɛ?

 Yelemɛŋɛrɛ la dela, nɛreba zo’e zo’e boi mɛ ka tɔɣera yetɔɣepɔ̃’ɔsa. Ba me mi la yɛla ase’a ti nɛreba basɛba ka mina. Makerɛ:

•  Yetɔɣepɔ̃’ɔsa yeen daɣɛ la hon tɔɣɛ sɛla la ma’a yele. Hon tɔɣeri sɛla la pa’ali la hon ti’iseri se’em. Bala la, ho san tɔɣera yetɔɣepɔ̃’ɔsa, la ta’an pa’alɛ ti ho ka ti’iseri nɛreba yele. Hon sirum dela mina n ka ti’iseri nɛreba yele?

   Baabule la yeti: “Ge sɛla n ze’ele nɛra nɔɔren yɛsera na ze’ele la a suuren na.”​—Matu 15:18.

•  Hon san tɔɣera yetɔɣepɔ̃’ɔsa, la wan basɛ ti nɛreba ti’isa ti ho ka tari halisonɛ. Cuss Control gɔŋɔ la yeti: “To tɔɣeri se’em la n wan pa’alɛ to zɔdoma n wan dɛna nɛresɛba, to deodoma la to tuuntuneba tadaandoma n wan bɔ’ɔra tɔ gilema se’em, tomam la nɛreba tiŋasuka n wan ana se’em, tomam n wan ta’an soŋɛ nɛreba se’em, to wan ta’an nyɛ tuuma bii yɔɔrɛ pa’asɛ se’em la saama n wan naɛ la to sɔsa se’em.” Gɔŋɔ la le yeti: “Soke homea yeti, ho san ka tɔɣeri ni yetɔɣepɔ̃’ɔsa, hon la nɛreba bɔŋa wan ana soŋa.”

   Baabule la yeti: “Yese ya, ya poan . . . yetɔɣepɔ̃’ɔsa.”​—Epesus 4:31.

•  Yetɔɣepɔ̃’ɔsa ka pa’alɛ ti ho mi yetɔɣum mɛ. Dr. Alex Packer gulesɛ a gɔŋɔ la n de How Rude! la poan ti: “Nɛresɛba n tɔɣeri yetɔɣepɔ̃’ɔsa saŋa woo la ni basɛ ti nɛreba sunsɔa nyiira mɛ.” A le yeti, yetɔɣepɔ̃’ɔsa san zo’e ho yetɔɣum poan, la “ka basɛ ti bɔkerɛ, mi’ilum, yɛm la mama bɔna bim. Ho yetɣum san ana bo’olegɔ, ka niɛra ge me pa’alɛ ti ho ka ti’iseri ge tɔɣera, ho puti’irɛ mɛ wan ana la bala.”

   Baabule la yeti: “Da basɛ ya ti yetɔɣepɔ̃’ɔsa ze’ele ya nɔɔren na.”​—Epesus 4:29.

•  Loe hon wan ta’an eŋɛ sɛla. Tiregɛ basɛ yetɔɣepɔ̃’ɔsa dabesa pitã poan bii la da paɛ bala. Ho ta’an dekɛ kalanda bii gɔŋɔ gulesa biŋera hon mɔ’ɔri se’em. Ho san kɔ’ɔn lu ho suure ti ho basɛ yetɔɣepɔ̃’ɔsa, la nari ti ho eŋɛ yɛla ase’a pa’asɛ. Makerɛ:

•  Basɛ de’eŋo seto n wan basɛ ti ho zamesɛ yetɔɣepɔ̃’ɔsa. Baabule la yeti: “Zɔtɔ be’ero sa’ani la halisoma.” (1 Korint 15:33) Daɣɛ nɛreba ma’a n wan ta’an dɛna “zɔtɔ” be’ero ge de’eŋo me pa’asɛ bim mɛ. Sinii sɛka ti ho bisera, vidiyo de’eŋo ti ho ŋmɛ’ɛra la yuun seto ti ho kɛlesa ta’an dɛna zɔtɔ be’ero bɔ’ɔra hɔ. Kenneth n de yuun pia la ayopɔi yeti: “La ka tɔi ti ho yuuna yuunɛ ti yetɔɣepɔ̃’ɔsa bɔna bim ge ti la ka daana hɔ, yuunɛ la n ani soŋa la zo’e.”

•  Basɛ ti la niɛ peelum ti ho kasegɛ mɛ. Nɛreba basɛba tɔɣeri la yetɔɣepɔ̃’ɔsa se’ere n sɔi la ba ti’isɛ ti bala n pa’alɛ ti ho dela bunkutɛ. Ge bala daɣɛ yelemɛŋɛrɛ. Baabule la yeti: Nɛreba n kasegɛ dela “sɛba n tari ba puti’irɛ la tuna ta’an kumesɛ bamesi mina sɛla n ani soŋa la sɛla n de be’em. (Hebru 5:14) Ba ka tɔɣeri sɛla n ka nari ti ba yeen basɛ ti nɛreba “puurɛ pee.”

 Yetɔɣepɔ̃’ɔsa sa’ani la ho puti’irɛ ge me sa’ana nɛreba puti’ira. Yetɔɣepɔ̃’ɔsa ba’ɛ zo’e mɛ tingɔŋɔ wa zuo! Cuss Control gɔŋɔ la yeti, “Da pa’asɛ ba poan. Tiregɛ basɛ ti ho yetɔɣum tara gilema, homea puurɛ wan pee ge ti nɛreba me bɔ’ɔra ho gilema.”