BUNBILIPAALESI SOKE YETI
Mam Wan Eŋɛ La Wani Kan Ti’isa Putɛbe’ero?
Hon geele homea la wan?
Nɛra n ti’iseri som yɛla ma’a
“Mam ni kɔ’ɔn bɔta la n puurɛ pɛɛra ge ti n sunsɔa da nyiira. Mam ni bɔta la n la’ara mɔsi ge tara pupeelum daarewoo.”—Valerie.
Nɛra n kɔ’ɔn ti’isa putɛbe’ero
“Yelesonɛ san eŋɛ, mam n ni ti’isɛ sɛla yia dela, sɛla n eŋɛ la kan ta’an dɛna yelemɛŋɛrɛ.”—Rebecca.
Nɛra n ti’iseri yɛla makera
“Nɛra n ti’iseri som yɛla ma’a wan nyɛ susa’aŋɔ. Nɛra me san ti’isa putɛbe’ero, a vom kan ana soŋa. Mam n ti’iseri yɛla ti la makera la soŋeri mam mɛ ti n gɛɛla yɛla soŋa soŋa.”—Anna.
Beni n sɔi ti la yele pakɛ?
Baabule la yeti ‘susonɛdaana tari la nyɛɛma daarewoo.’ (Magaha 15:15) La niɛ peelumi ti, sɛba n ka ti’iseri putɛbe’ero saŋa woo ni tara la pupeelum. Ba me ta’an ni nyɔɣɛ zɔdoma zo’e zo’e. Ani n wan bɔta ti a naɛ la nɛra suure n ni kɔ’ɔn sa’am bɔna?
Ge nɛra san nɔŋɛ a ti’isa som la se’em me, yelese’a n paari nɛra woo la wan kelum paɛ en. Makerɛ dela:
Ho ta’an wuna lasebaarɛ n tɔɣeri zaberɛ yɛla bii tuunfɛ̃’ɛsadoma n kuuri nɛreba ge sa’ana lɔɣɔrɔ se’em. Yele aŋa wa ta’an daam hɔ.
Yeledaaŋɔ me ta’an paara hɔ, ho yizuo poan.
Ho me ka di mi’a.
Ho zɔ ta’an eŋɛ ho sɛla ti la daam hɔ.
Da eŋɛ wuu yele aŋa ka boi me la. La me ka nari ti ho kɔ’ɔn ti’isa yele aŋa ma’a yele. La tuɣum nara la ho ti’isa yɛla ti la makɛ ma’a. Ho san ita bala, la wan soŋɛ hɔ ti ho kan ti’isa putɛbe’ero. La me wan soŋɛ hɔ ti ho bɔkɛ yɛla n ani se’em ge kan basɛ ti ho suure ba’ɛ sa’am.
Ho ta’an ŋmibe ho yeledaaŋɔ la poan ge tara puti’irɛ ti ho bɔŋa la wan tee ana soŋa
Ho wan ta’an eŋɛ la bem?
Da ba’ɛ ti’isa ho tuure yɛla.
Baabule la yeti: ‘Tontɔɔ nɛra ka boi tingɔŋɔ wa zuo n kɔ’ɔn tuna som ma’a ge ka makɛ tuna be’em.’ (Pa’ala 7:20) Ho san tue, bala pa’alɛ ti ho dela asaala ge la ka pa’alɛ ti ho dela bunbasela.
Hon wan eŋɛ se’em ta’an ti’isa yɛla makera: Maalɛ yelese’a ti ho eŋɛ tue la ge da ti’isa ti la nari ti ho di mi’a. Burasa’arɛ ayima yu’urɛ n de Caleb yeti, “Mam kɔ’ɔn tiregera mɛ ti n da ti’isa n tuure yɛla ge mam ni zamesɛ la yɛm n tuure la poan ge bisɛ mam n wan eŋɛ se’em ta’an tee.”
Da tara homea makera nɛreba.
Baabule la yeti: ‘Da basɛ ya ti to yeti tomam n gani bii to paɣera la taaba bii to nini tɛ̃ta la taaba.’ (Galatia 5:26) Ho zɔdoma san ka beem ho ge keŋɛ zɛ’an ta eŋɛ sɛla ge ŋma fɔɔra eŋɛ social media poan ti ho nyɛ, la ta’an daam hɔ. Bala ta’an basɛ ti ho ti’isa ti ho zɔdoma la ka nɔŋɛ ho yele.
Hon wan eŋɛ se’em ta’an ti’isa yɛla makera: La nari ti ho bɔkɛ ti ho zɔdoma kan ta’an bɛɛna hɔ saŋa woo. Leyɛ’ɛsa, fɔɔra se’a ti ba ni dekɛ eŋɛ social media poan la ni ka pa’alɛ sɛla woo n eŋɛ. Bunbilipaalega ayima yu’urɛ n de Alexis yeti, “Yelese’a n ni basɛ ti nɛreba puurɛ pee paa la ti ba ni dekɛ eŋɛ Social media poan ge ba ka ŋmati yelese’a ti nɛra woo puɣum mina la.”
Ɛɛra suma’asum yele yele wuu ho yizuo poan.
Baabule la yeti: “San dɛna yamam tɔka de, tiregɛ ya la ya paŋa za’a, ta’an tara suma’asum.” (Arom 12:18) Ho kan ta’an pɛ̃regɛ nɛreba ti ba ita hon boti sɛla ge ho ta’an gu homea n wan eŋɛ se’em. Ho ta’an kɔ’ɛ ho puti’irɛ ti ho ɛɛra suma’asum.
Hon wan eŋɛ se’em ta’an ti’isa yɛla makera: Lu ho suure ti ho ɛɛra suma’asum ge da basɛ ti zaberɛ bɔna ho yizuo la poan. Ho me san bɔna la ho zɔdoma, la nari ti la ana la bala. Bunbilipaalega ayima yu’urɛ n de Melinda yeti, “Nɛnɛra ka boi n ani kasi. Bala zuo la, to wan tuusena taaba. La nari ti to loe nyaa to wan ɛɛra sum’a’asum bii to kan ɛɛra.”
Tara pupeelum la sɛla ti nɛra eŋɛ bo ho.
Baabule la yeti: ‘Eŋɛ ya pa’alɛ ti ya puurɛ pee mɛ.’ (Kolose 3:15) Nɛra puurɛ san pee la eŋa n tari sɛla, saŋa woo a ni ti’isa la som se’a ti a nyɛta a vom poan ge daɣɛ yelese’a n ta’an dɛna daaŋɔ yɛla.
Hon wan eŋɛ se’em ta’an ti’isa yɛla makera: Tɛ̃ra ti ho tari yeledaaŋɔ ge da tamɛ yelesoma se’a n iti ho vom poan la. Pɔɣesa’arɛ ayima yu’urɛ n de Rebecca yeti, “Dabeserɛ woo, mam ni gulesɛ la yelesonɛ n eŋɛ n vom poan biŋe. Mam ni bɔta la n tĩɛ n mea ti, la boi bim ti yeledaaŋɔ paari mam mɛ ge n tari yelesoma zo’e zo’e ti n wan ta’an ti’isa de yele.”
Bisɛ ho zɔdoma n de nɛresɛba.
Baabule la yeti: ‘Zɔtɔ be’ero sa’ani la halesoma.’ (1 Korint 15:33) Ho zɔdoma san zɛregera nɛreba, kɛsera nɛreba bii ita sunsɔa, ba halebe’ero la ta’an taɛ hɔ.
Hon wan eŋɛ se’em ta’an ti’isa yɛla makera: Yeledaaŋɔ ta’an paɛ ho zɔdoma. Bala ta’an basɛ ti ba tara putɛbe’ero la ba vom n ani se’em la. Ho ta’an soŋɛ ba ge da basɛ ti ba yeledaaŋɔ la ba’ɛ sa’am ho suure. Pɔɣesa’arɛ ayima yu’urɛ n de Michelle yeti, “La ka nari ti ho zɔdoma dɛna nɛresɛba n kɔ’ɔn ti’isa putɛbe’ero. Ho san dekɛ nɛra ayima putɛbe’ero pa’asɛ homea putɛbe’ero poan, la wan zo’e pa’asɛ.”
Kaalɛ yɛla pa’asɛ
Baabule la pa’alɛ ti, tomam n boi sansɛka wa dela ‘biɣi biɣi saŋa.’ (2 Timoti 3:1) Yelebe’ero n ba’ɛ zo’e se’em tingɔŋɔ wa poan la ni basɛ ti la kpe’em bo ho mɛ ti ho tara putɛsonɛ yoi? Kaalɛ zaseŋɔ yele la zuo n de, “Why So Much Suffering?” (Beni N Sɔi Ti Namesegɔ Bɔna?)
