Bakwai woo poan, Yehowa Sɛɛradoma iti ba zamesegɔ la sugumnɔɔren buyi ba Na’am Pu’usegɔ Deto poan. Bem ti to ita bim ge ho wan nyɛ nyuurɔ la wani ho san kena zamesegɔ?

•  Bem ti to ita Na’am Pu’usegɔ Deo poan?

•  Beni n sɔi ti la nara ti ho kena zamesegɔ?

•  Ho tadaandoma n yele sɛla

 Na’am Pu’usegɔ Deo la dela zamesegɔ zɛ’an ti ba pa’ala Baabule la n wan ta’an soŋɛ to se’em. Zamesegɔ la wan ta’an soŋɛ hɔ ti ho:

•   zamesɛ baŋɛ Naayinɛ yelemɛŋɛrɛ yɛla.

•   bɔka yelese’a n iti nananawa la vuurɛ.

•   dɛna nɛra sonkɔ.

•    nyɔɣɛ zɔsontɔ.

 Hon mi? Yehowa Sɛɛradoma n tɔɣeri Naayinɛ Na’am la yɛla zo’e zo’e ba zamesegɔ poan la n sɔi ti ba yi’ira bim Na’am Pu’usegɔ Deo.​—Matu 6:​9, 10; 24:14; Luke 4:​43.

 Zamesegɔ la wan soŋɛ hɔ. Yehowa Sɛɛradoma n sɔseri Baabule naresum yɛla ba zamesegɔ poan la wan soŋɛ hɔ ti ho nyɛ “yam.” (Magaha 4:5) Bala pa’alɛ ti Baabule la wan ta’an soŋɛ hɔ ti ho kɔ’ɛ putɛsonɛ ho vom poan. La me wan soŋɛ hɔ ti ho nyɛ lebesego bo ninmɔ’ɔrɛ sokere n de wuu:

•   Vom vuurɛ?

•   Naayinɛ n basɛ ti namesegɔ bɔna?

•   Nɛra ni ki ana la wani?

 Yetɔɣese’a ti to ni bɔ’ɔra bakwai ba’asegɔ zamesegɔ la poan basɛba zuto dela:

•   Beni N Sɔi La Nara Ti To Nana Baabule Pa’alegɔ?

•   Yeledaaŋɔ San Paɛ Hɔ, Ho Wan Nyɛ Soŋerɛ La Bɛ?

•   Naayinɛ Na’am La N Iti Sɛla Bɔ’ɔra Tɔ Zina.

 “Mam kilaasi tadaana n yuun wa’an zamesegɔ na. Tomam la eŋa n yuun laɣum zi’iri ge ti a laɣum bisɛ to gɔnɔ la poan. Pooren a yuun yele mam ti a puurɛ yuun pee mɛ la nɛreba n yuun bo’ori lebesego se’em la. A me yuun yeti eŋa church la ka tari zamesegɔ gɔnɔ wuu tomam la.”​—Brenda.

 Hon mi? To zamesegɔ la dela yoo, to me ka iti kɔlɛksin.

 Zɔtɔ nyɔka la wan kpemese ho giila. Baabule la yeti sɛla n sɔi ti la nara ti Kristakɔma laɣena taaba dela ba ‘kpɛmesa taaba giila.’ (Hebru 10:24, 25) To san nyɔɣɛ zɔtɔ la nɛresɛba n basɛ ti Naayinɛ la nɛreba yele pakɛ ba, ba wan kpemese to giila la to boi tinsɛka poan ti nɛreba ti’isa bamea ma’a yele la.

 “Saŋa ase’a yelese’a n iti sukuu poan la ni basɛ ti mam suure n ni sa’am ti la daana ma ge mam ni san keŋɛ zamesegɔ, la ni ana mam la buɣa buɣa. Mam ni san yɛ’ɛsa kula n puurɛ ni pee mɛ ti n maasum gura beere.”​—Elisa.

 Hon mi? Tingɔŋɔ wa za’a waabi, Yehowa Sɛɛradoma tansuga n gani 120,000 laɣeni mɛ zɛ’ɛsi n gani 60,000 poan. Yuunɛ woo, ba mɛti la Na’am Pu’usegɔ Deto n paɛ wuu 1,500 ti nɛreba ta’an kena zamesegɔ. a