Sarensoŋɔ wan ta’an soŋɛ hɔ sarɔtɔ totã wa poan:

1.   Nɛreba n geele ho se’em. Hon iti nɛreba se’em la ta’an pa’alɛ ti ho sareŋɔ ani soŋa bii la ka ani soŋa. Ho sareŋɔ san ana soŋa, nɛreba wan geele ho ti ho kumesɛ mɛ ge wan ta’an dekɛ bamea delum ho. Ba me wan bɔ’ɔra ho gilema! Ge ho sareŋɔ san ka ana soŋa, nɛreba wan geele ho ti ho ti’iseri la ho ma’a yele. Bala ta’an basɛ ti ho kan nyɛ tuuma bii yɔ’ɔ ase’a. Baabule la yeti, ‘putodaana pɔɣɔleni la amea.’​​—Magaha 11:17.

2.   Ho zɔdoma. Baabule la yeti: ‘Dekɛ ya nɔŋerɛ yɛ wuu fuo la, se’ere n sɔi la, la wan basɛ ti ya tara nɔyinɛ n di mi’a.’ (Kolose 3:​14) Nɔŋerɛ yele pakɛ mɛ zɔtɔ nyɔka poan. Nɛreba nɔŋɛ la sɛba sareŋɔ n ani soŋa ge ita som bɔ’ɔra ba. Ani n wan bɔta ti a bɔna la nɛra n ka tari halɛ?

3.   Nɛreba n iti ho se’em. Pɔɣesa’arɛ ayima yu’urɛ n de Jennifer yeti, “ho san tara halesoma saŋa woo, fii fii la, hali sɛba sareŋɔ n ka ani soŋa wan bɔ’ɔra ho gilema.” Yelemɛŋɛrɛ, ho sareŋɔ san ka ana soŋa nɛreba kan bɔ’ɔra ho gilema. Baabule la yeti: ‘Hon iti nɛreba se’em la, ba me wan eŋɛ ho la bala.’​​—Matu 7:2.

 Yelekpine: Nɛreba wan bɔna la hɔ saŋa woo. Hon iti ba se’em la n wan pa’alɛ bamam me n wan ita ho se’em. Yelemɛŋɛrɛ, ho sareŋɔ yele pakɛ mɛ!

1.   ‘Viisɛ’ homea bisɛ. Soke homea yeti: ‘Mam tɔɣeri gilema poan bɔ’ɔra bunkureba? Sugumnɔɔrɛ bulɛ ti mam ni yeti “soso,” “n pu’usɛ ya,” bii “gaafara”? Mam la nɛreba san sɔsa, mam puti’irɛ ni bɔna la zɛ’an, daanse’ere n bisera n fon poan? Mam tari gilema bɔ’ɔra n dɔɣereba la n suurɔ bii mam iti la mam boti se’em bamam n de “mam yizuo” la zuo?’

    Baabule la yeti: ‘Nɛra woo deŋɛ nɛŋa tara na’asegɔ bɔ’ɔra a tadaana.’​​—Arom 12:10.

2.   Loe sɛla eŋɛ. Gulesɛ yɛla atã ti ho wan ta’an tee a poan. Makerɛ, Allison n de yuun 15 yeti la nari ti “a dɛna se’em n wan kɛlesa soŋa soŋa gana a tɔɣera zɔ’ɔra.” David, n de yuun 19 yeti, eŋa la a deodoma bii a zɔdoma san sɔsa, la nari ti a tiregɛ ge kan bisa fon poan. A yeti, “bala pa’alɛ ti n ka nani nɛreba. La me wan pa’alɛ ti n boti n sɔsa bɔ’ɔra la nɛresɛba n boi fon la poan la ge daɣɛ bamam.” Edward n de yuun 17 yeti, la ka nari ti nɛreba san tɔɣera a ŋmata ba nɔɔrɛ. Jennifer ti to puɣum tɔɣɛ a yele la yeti la nari ti a nana bunkureba. “Mam yuun ni san seke bunkureba, mam ni pu’usɛ ba la kalam ge lebe n taaba zɛ’an. Ge nananawa, mam ni tiregɛ mɛ ti n baŋɛ ba. Wana soŋɛ mam mɛ ti n sareŋɔ ana soŋa!”

    Baabule la yeti: ‘Da bisera ya yamea ma’a n boti sɛla ge me biseri ya basɛba me n boti sɛla.’​​—Filipi 2:4.

3.   Geele hon nyaŋɛ tee se’em. Dekɛ ŋmarega geele hon boti ho tee ho itigɔ la ho yetɔɣum poan se’em. Ŋmarega la pooren soke homea yeti: ‘Mam n tari halesoma la basɛ ti n dɛna nɛresonkɔ la wani? Yele ani poan ti la wan nara ti n tee?’ Nyaa tiregɛ tum hon nyɛ sɛla la.

    Baabule la yeti: ‘Yamam n boti nɛreba ita sɛla bɔ’ɔra ya la, yamam me ita bala mea nɔɔ bɔ’ɔra ba.’​​—Luke 6:31.