Hon mi bunbilipaalega n ka malum tara imma’asum? Hon dela bã’ara, ti ho bã’a la ka basɛ ti ho ta’an ita yelese’a ti ho taaba ita la bii?

 La san dɛna bala, saŋa zo’e zo’e ho giila ta’an kɔ’ɔsɛ. Ho wan nyɛ yɛla ayi n wan ta’an buɣelɛ ho suure Baabule la poan.

•   Yehowa Naayinɛ n de ho Naaŋɔdaana la mi ho bɔŋa la n ani se’em mɛ. Sɛla n gani bala la, ‘a fabeli ya yele mɛ.’​—1 Peter 5:7.

•   Yehowa Naayinɛ puti’irɛ dela, a wan basɛ ti bã’asi kan le bɔna! Ho wan ta’an kaalɛ yele wa Baabule la poan ti la bɔna, Isaiah 33:24 la Liligere 21:1-4.

 Bunbilipaalesi zo’e zo’e n bɛ̃’ɛri baŋɛ ti ban tari sakerɛ Naayinɛ pu’ulumbiŋa la poan la soŋeri ba mɛ. Geele mabiisi banaasi wa yele la bisɛ.

•  YEIMY

•  MATTEO

•  BRUNA

•  ANDRÉ

 Mam yuun dela yuun pia la ayima ti la nara ti n nyɛ kɔɔrenɔ keekee ta’an ɛɛra. Mam ka ta’an ita sɛsɛla, hali mam kan ta’an ɔ̃begɛ lɔɣɔpika.

 Mam n yuun de yuuma anuu la, dɔgeta yuun bisɛ mam baŋɛ ti mam tari la inbãlegerɛ bã’a. Bã’a wa ni basɛ ti mam inya la ni kɔ’ɔn bãlegera la kalam kalam ti n ka ta’an ita sɛsɛla. Saŋa ase’a, mam giila ni kɔ’ɔsɛ mɛ se’ere n sɔi la, mam ka ta’an ita yelese’a ti mam tadaandoma ita la. Ge mam dɔɣereba la tansugere la poan nɛreba n soŋeri mam inganɛ la vo’osum poan ge me buɣela n suure. Mam dela sore ŋmɛ’adaana. Mabiisi la ni doose mam mɛ ti n ta eŋɛ Baabule zamesegɔ.

 Yezu yuun yeti, dabeserɛ woo tari de yɛla mɛ. (Matu 6:34) Mam iti yɛla maɣesa mɛ ge ni loe tuunse’a ti n wan ta’an tum. Mam guri la Naayinɛ tinpaalega la, se’em ma’a ti n wan ta tara ‘vom somɔ,’ ti n bã’a wa kan le bɔna.​—1 Timoti 6:19.

 Ti’isɛ yele wa bisɛ: Yeimy baŋɛ ti eŋa n ni ‘loe yelese’a ti a wan ta’an tum’ la, soŋeri en mɛ. Ho me wan eŋɛ la wani ta’an eŋɛ bala?​—1 Korint 9:26.

 Mam n yuun de yuuma ayoobe la, ti mam poore yuun pɔsɛ duna. Pɔsega la, dɔgetadoma la yuun ti’isɛ ti mam n zo’ori la n sɔi ti la duna. Yuunɛ pooren ti ba yuun baŋɛ ti, mam pogũuleŋa la tari la daaŋɔ.

 Mam yuun eŋɛ la ɔperesa ge dɔgeta la yuun ka nyaŋɛ yese bã’a la za’a n poan. Bala, ŋmaresi siyi ma’a poan la, bã’a wa yuun le malum kãregɛ mɛ paɛ lan daa zuni ni se’em la! Bala pooren, dɔgetadoma zo’e zo’e bisɛ mam mɛ, bo mam titɔ zo’e zo’e ge la ka ze’ele.

 Saŋa ase’a, bã’a wa ni basɛ ti mam inya za’a duna mɛ wuu ba tari la sua luta n zɛ’an woo la. Saŋa zo’e zo’e, la ni kɔ’ɔn bɔna la mam pooren la mam nyu’ɔ poan. Ge la bala za’a, mam ka boti n dekɛ bã’a wa yele kɔ’ɔn to n zuo. Mam ni tiɛ n mea yeti, nɛreba basɛba me tari bã’asi n gani mam bã’a wa ge ba kelum tara pupeelum mɛ. Sɛla n basɛ ti mam tara putɛsonɛ dela, mam tari suure lua ti dabeserɛ keni na, Yehowa Naayinɛ n pu’ulumbiŋe ti namesegɔ za’a kan le bɔna la wan tum.​—Liligere 21:4.

 Ti’isɛ yele wa bisɛ: To san ti’isa Naayinɛ n pu’ulumbiŋe ti namesegɔ kan le bɔna yele, la wan ta’an soŋɛ to la wani ti to ŋmibera wuu lan yuun soŋɛ Matteo se’em la?​—Isaiah 65:17.

 Ho san nyɛ mam, ho kan baŋɛ ti mam bɛ̃’ɛri mɛ. Bala ni basɛ ti nɛreba basɛba ti’isɛ ti mam dela zinyaka. Yelemɛŋɛrɛ la dela, sɛla woo ta’an ni kpe’em bo mam mɛ ti n eŋɛ. Makerɛ, la ni kpe’em mɛ ti n tum yire tuuma, n zamesɛ bii hali, n isige n gɔregɔ zuo.

 Mam n yuun de yuun pia la ayoobe la, dɔgetadoma yuun bisɛ baŋɛ ti mam tari la zuo bã’a n ni basɛ ti mam taregɛ ka ta’an tuna n tuuma, hali ka ta’an tuna Yehowa tuuma wuu mam boti ni n tum de se’em la. Mam yuun ni kaala la 1 Peter 5:7 taɣesa. La yeti: ‘Dekɛ ya putɛyiila bo en, se’ere n sɔi la a fabeli ya yele mɛ.’ Mam n mi ti Yehowa fabeli mam yele mɛ la, basɛ ti mam kelum tara la paŋa.

 Ti’isɛ yele wa bisɛ: Ho san dekɛ ho putɛyiila bo Yehowa wuu Bruna la, la wan soŋɛ ho la wani?​—Yooma 55:22.

 Nɛreba basɛba iti mam wuu mam dela yuun pia bia la. Ge la daɣɛ ba yele; bã’a la basɛ ti mam ana wuu n dela bia la.

 Mam n yuun de yuuma ayi la, ba yuun bisɛ baŋɛ ti mam tari la ɔberega bã’a n boi de to’ore ti la bɔna mam pogũuleŋa la poan, kɔ’ɔn dita yɛ’ɛsa mam zuputo la poan. Dɔgetadoma yuun mɔ mɛ ti bã’a la ka le tara paŋa ge ban tibɛ mam se’em la yuun basɛ ti mam ka le zɔ’ɔra soŋa. Nananawa, mam wɔɣɛ se’em dela mita 1.37 (4 ft 6 in.) ma’a. Mam san yeti mam dela yuun pia la anii, nɛreba zo’e zo’e ni ti’isɛ ti mam pareni mɛ!

 Tansugere la poan, nɛreba bo’ori mam gilema mɛ paa. Ba ka iti mam sia sia wuu mam sukuu tadaandoma n iti mam se’em la. Mam kɔ’ɔn tiregera mɛ ti n kan basɛ ti mam n ani se’em wa dɛna daaŋɔ bɔ’ɔra mam. Yelemɛŋɛrɛ, asaala n nari ti a nyɛ yelesonɛ sɛka la, mam nyɛ de mɛ; mam baŋɛ Yehowa mɛ! Yelese’ere woo ti mam ŋmibera de poan la, mam nyɛ soŋa soŋa ti Yehowa kɔ’ɔn bisera mam mɛ. Mam san ti’isa tinpaalega la ti Yehowa Naayinɛ pu’ulumbiŋe la yele, la ni soŋɛ mam mɛ ti n tara putɛsonɛ.​—Isaiah 33:24.

 Ti’isɛ yele wa bisɛ: Beni n sɔi ti ho san baŋɛ Yehowa wuu André n yele se’em la, dɛna ‘yelesonɛ n nari ti asaala woo ta’an nyɛ’?​—Yon 17:3.