Kaalɛ sɛla n yuun paɛ Karina ge makɛ bisɛ ti la yuun paɛ la hon. Hon wan eŋɛ ni la bem yele wa poan?

 Karina: “Mam yuun tukeri mɛ yɛ’ɛsa sukuu ti puliŋa teke mam bo mam ticket, se’ere n sɔi la mam ba’ɛ zɔta loore la mɛ. Mam sunsɔa yuun nyie mɛ! Mam yuun yele la mam Ma, ti a yuun yeti n ta yele n Sɔ. Mam me yuun ka boti n eŋɛ bala.”

  Hon wan eŋɛ ni la bem?

1.  1: Ho mum ho nɔɔrɛ ge zusa ti ho sɔ da baŋɛ.

2.  2: Ho yele ho sɔ sɛla woo n eŋɛ.

 La ta’an ana ho wuu ho loe yia denɛ la. Se’ere n sɔi la, ho ma ta’an ti’isɛ yeti ho puɣum yele ho sɔ sɛla woo n eŋɛ mɛ. Ge yɛm boi bim mɛ ti ho purɛ ho tuure la, la ka pakɛ la, la dela traffic ticket bii yelese’ere deeni.

1.  1. Se’ere n sɔi la, bala n nari ti ho eŋɛ. Baabule la pa’alɛ Kristakɔma n wan tara bamea se’em yele yeti: ‘To boti la to tara yelemɛŋɛrɛ yelese’ere woo poan.’​​—Hebru 13:18.

    “Mam tiregɛ mɛ ti n tara yelemɛŋɛrɛ yelese’ere woo poan ge me sakɛ n tuure.”​—Alexis.

2.  2. Se’ere n sɔi la, nɛreba ni di sugeri bo sɛba n sakɛ ba tuure mɛ. Baabule la yeti: ‘Mina n suɣeri a be’em la kan malum lebege nɛra ge mina n purɛ a be’em ge basɛ dɛ ti Naayinɛ wan zɔ en nimbɔ̃’ɔ.’​​—Magaha 28:13.

    “La dela ho tara sukpe’ene ta’an sakɛ ho tuure ge bala n wan basɛ ti nɛreba tɔresɛ hɔ. Ba mi ti ho tari la yelemɛŋɛrɛ. Ho san ni sakɛ ho tuure, la ni dɛna la yelesonɛ.”​—Richard.

3.  3. Sɛla n gaŋɛ za’a dela, Yehowa Naayinɛ puurɛ ni pee mɛ. Baabule la yeti: ‘Yehowa yaɛ nigum nigumdaana mɛ ge A tari la bɔnsoŋa la tontɔɔdoma la.’​​—Magaha 3:​32.

    “Sansɛka ti mam daa tue la, mam daa baŋɛ ti la nari ti n sakɛ n tuure la. Mam daa san ka tum ni Yehowa n boti sɛla, a kan kã ni bo mam.”​—Rachel.

 Karina yuun eŋɛ la bem, eŋa n yuun tue la? A yuun ziɣeri ti a suɣɛ ticket la mɛ ti a sɔ kan baŋɛ. Ge a yuun kan ta’an suɣɛ dɛ wuusa. Karina yeti, “Yuunɛ pooren, mam sɔ yuun biseri la to insurance gɔnɔ ge nyɛ ticket la. Yele n yuun paɛ mam. Hali mam ma sunsɔa n yuun nyie la mam ka doose a nɔɔrɛ la!”

 Ton zamesɛ sɛla: Karina yeti: “Ho san suɣera ho tuure, la ni basɛ ti yele la gaam la be’ero. Pooren, yele wan kelum paɛ hɔ!”

 Nɛra woo tuuri mɛ. (Arom 3:​23; 1 Yon 1:8) Wuu ton zamesɛ se’em la, ho san ni eŋɛ kalam sakɛ ho tuure, la pa’alɛ ti ho bĩ mɛ ge me siregera homea.

 Sɛla n taɣelɛ dela to nyɔɣɛ yɛm to tuure poan. Nɔyalegerɛ la dela, bunbilipaalesi basɛba ni ka nyɔɣɛ yɛm! La ta’an ana ba wuu la yuun ani bunbilipaalega ayima yu’urɛ n de Priscilla se’em la. A yeti: “Mam yuun san tue, mam giila ni kɔ’ɔsɛ mɛ paa. Mam yuun bisɛ pɔ’ɛ n mea mɛ. Bala la, mam tuure la ni ana wuu zeero n tibegɛ paa ti mam kan ta’an zɛ. Mam suure ni ba’ɛ sa’am mɛ ti mam ti’isa ti mam dela bunbasela.”

 La ni ana hon bala saŋa ase’a? La san dɛna bala, tɛ̃ra yele wa: Ho san ba’ɛ ti’isa ho tuure yɛla, la ani wuu nɛra n tukeri loore ge kɔ’ɔn bisa pooren. Ho san kɔ’ɔn ti’isa yelekɛɣesi, la wan ana ho wuu ho ka tari vuurɛ. Bala me wan basɛ ti ho kan tara paŋa ta’an ŋmibe yelese’a n wan paɛ ho la.

 La tuɣum kan ana soŋa ti ho tara putɛsonɛ yele wa poan?

 “Ni ti’isɛ ho tuure la yele ge nyɔɣɛ yɛm de poan, la wan eŋɛ se’em ti ho kan le tum dɛ. Ge da ba’ɛ ti’isa ho tuure yɛla la zɔ’ɔra. Bala ta’an kɔ’ɔsɛ ho giila.”​​—Elliot.

 “Mam san ni tue, mam ni dekɛ yɔ’ɔ la nyɔɣɛ la yɛm de poan. Bala ni soŋɛ mam mɛ ti n ta’an dɛna nɛresonkɔ ge mina mam wan eŋɛ se’em yele kaŋa taaba san le paɛ mam. Bala n nari ti ho eŋɛ se’ere n sɔi la, la wan basɛ ti ho nyɛ nɛŋa tɔlega.”​—Vera.