Mateo 20:1-34
20 “Upévare, pe Rréino yvagapegua ojogua peteĩ karai orekóvape peteĩ parralty ha osẽva pyharevete oheka personál ombaʼapo vaʼerã chupe iparraltýpe.+
2 Ha oñemoĩ rire peteĩ ñeʼẽme opaga hag̃ua chupekuéra 1 denario* por día, omondo chupekuéra iparraltýpe.
3 Upéi las 9 rupi* osẽ jey ha ohecha ótro kuimbaʼekuéra ndaitraváhoiva oñemboʼýva hína pe merkádope,*
4 ha heʼi chupekuéra: ‘Pejúna avei peẽ pembaʼapo che parraltýpe ha apagáta peẽme la okorrespondéva’.
5 Upémarõ oho hikuái ombaʼapo. Upéi pe karai osẽ jey oheka personál las 12 rupi,* ha las 3 rupi* avei.
6 Ipahápe, kaʼaru las 5 rupi* osẽ, ha otopa jey ótro kuimbaʼekuéra ndaitraváhoiva ha heʼi chupekuéra: ‘¿Mbaʼére piko peẽ peime rei raʼe un diaite koʼápe?’.
7 Haʼekuéra heʼi: ‘Avave ningo nomeʼẽi oréve traváho’. Haʼe heʼi: ‘Tapeho peẽ avei pe parraltýpe pembaʼapo hag̃ua’.
8 Pytũvo ohóvo, pe parralty jára heʼi pe iñenkargádope: ‘Ehenói umi personálpe ha epaga chupekuéra.+ Eñepyrũ umi último og̃uahẽ vaʼekuégui, ha upéi epaga umi primeroite ou vaʼekuépe’.
9 Upéi ou umi kuimbaʼe oñepyrũ vaʼekue ombaʼapo las 5 rupi, ha oñemeʼẽ káda únope 1 denario.
10 Upévare oúrõ guare umi primeroite oñepyrũ vaʼekue ombaʼapo, oimoʼã oñemeʼẽvetaha chupekuéra, péro 1 denárionte avei ojepaga chupekuéra.
11 Upémarõ haʼekuéra oñepyrũ oñeʼẽ vai pe parralty járare,
12 ha heʼi chupe hikuái: ‘Koʼã último ou vaʼekue ningo una órante ombaʼapo, ha nde repagánte avei chupekuéra oréve repaga haguéicha. ¡Ore katu un diaite rombaʼapo pe kuarahy akúpe!’.
13 Péro pe parralty jára heʼi peteĩvape: ‘Chamígo, che ndajapói nderehe mbaʼeve ivaíva. Japytángo kuri apagataha ndéve 1 denario, ¿ajépa?+
14 Ejagarra katu la okorrespondéva ndéve ha tereho. Che ameʼẽse koʼã último og̃uahẽ vaʼekuépe ndéve ameʼẽháicha avei.
15 ¿Ndaikatúi piko ajapo ajaposéva che plátagui? ¿Térã piko neenvidióso* hína chembaʼeporã haguére hendivekuéra?’.+
16 Upéicha avei umi oĩva tenondete opytáta tapykuépe, ha umi itapykuéva opytáta tenondete”.+
17 Upéi ohokuévo Jerusalénpe, Jesús ohenói umi 12 disípulope haʼeñoháme, ha heʼi chupekuéra tapére:+
18 “Jaha hína Jerusalénpe, ha pe Yvypóra Raʼýpe oñentregáta umi saserdóte prinsipálpe ha mboʼehára leipeguápe. Haʼekuéra ohusgáta chupe ha heʼíta omano vaʼerãha.+
19 Ontregáta chupe hikuái umi ndahaʼéivape judío, ombyepoti ha oñembohory hag̃ua hese. Upéi ojeklaváta chupe yvyráre,+ péro 3 día haguépe oñemopuʼã jeýta chupe”.+
20 Upéi oñemboja Jesús rendápe Zebedeo rembireko,+ umi mokõi imembýndi. Haʼe oñepyrũ omombaʼe* Jesúspe ha ojerure chupe peteĩ mbaʼe.+
21 Jesús heʼi pe kuñakaraípe: “¿Mbaʼépa reipota?”. Haʼe heʼi: “Ajerurese ndéve koʼã mokõi che memby oguapy hag̃ua nde ykére ne Rréinope, peteĩva nde deréchape ha pe ótro nde iskiérdape”.+
22 Jesús okontesta: “Peẽ ndapeikuaái mbaʼépa la pejeruréva. ¿Peẽ piko ikatúta peʼu pe kópa che haʼu potávagui?”.+ Haʼekuéra heʼi: “Si, ikatúta”.
23 Jesús heʼi chupekuéra: “Peẽ añetehápe peʼúta avei che kópagui.+ Péro che ndaikatúi adesidi mávapa oguapýta che derécha térã che iskiérdape. Che Túamante odesidíta mávapepa opermitíta oguapy upépe”.+
24 Umi ótro 10 disípulo ohendúvo la oikóva, ipochy umi mokõi ndive.+
25 Jesús katu ohenói chupekuéra ha heʼi: “Peẽngo peikuaa mbaʼéichapa umi governánte omanda umi héntere oñantohaháicha chupekuéra, ha umi orekóva autorida oipuru ipodér oreko hag̃ua la héntepe ipoguýpe.+
26 Péro peẽ ndaupéichai vaʼerã.+ Pe iñimportanteséva pende apytépe, oiko vaʼerã pene sirviénteramo.+
27 Ha pe oipotáva pe primer lugár, pendeservi vaʼerã peteĩ esklávoicha.+
28 Che, pe Yvypóra Raʼy, ajapoháicha, che ndajúi ótro cheservi hag̃ua, síno aservi hag̃ua ótrope.+ Aju ameʼẽ hag̃ua che rekove,* ha péicha apaga pe rreskáte aguenohẽ hag̃ua heta héntepe pekádo poguýgui”.+
29 Upéi, osẽvo hikuái Jericógui, hetaiterei hénte oho hendive.
30 Mokõi siégo katu oguapy hína pe tape kóstape, ha ohendúvo Jesús ohasaha upérupi, osapukái hikuái: “¡Ore Ruvicha, David Raʼy, oreporiahuverekomína!”.+
31 Umi hénte ojaʼo ha heʼi chupekuéra okirirĩ hag̃ua, péro haʼekuéra hatãvéntema osapukái: “¡Ore Ruvicha, David Raʼy, oreporiahuverekomína!”.
32 Upémarõ Jesús opyta, ohenói chupekuéra, ha heʼi: “¿Mbaʼépa peipota ajapo penderehe?”.
33 Haʼekuéra heʼi: “Ore Ruvicha, rohechase jey ningo”.
34 Jesús oiporiahuverekoiterei umi siégope ha opoko hesakuérare,+ upepete ohecha jey hikuái ha omoirũ chupe.
Nóta
^ Griégope: “pe óra tercérarupi”.
^ Térã: “plásape”.
^ Griégope: “pe óra séxtarupi”.
^ Griégope: “pe óra novénarupi”.
^ Griégope: “pe óra undécimarupi”.
^ Griégope: “nde resa iñaña”.
^ Térã: “oñesũ”.
^ Térã: “che álma”.
