1-3. ¿Kasa niʼraka Pedro naainjain Jesuu? ¿Kasa eejiraaka amaa nia soʼu aikat tia?

CHAJAITTAA Pedro sünain oʼuniraa wanee anuwa pasanain sünain tü palaakat Galilea, piyuushisü maʼin jee koʼlotüinsü maʼin tü palaakat, katchinsü maʼin tü joutaikat nüpanapajee. Yalejewaain müsü tü anuwakat sutuma tü joutaikat. Mapüsashi Pedro jee aijashi nia sutuma nuʼunirüin tü anuwakat. Wanaa sümaa tia niʼrakalaka wanee suwarala luusa. ¿Alüʼütsüche süpüla jaʼyuuin?

² Nnojoishi yalajachin Jesuu nümaa Pedro suluʼu tü anuwakat, naya yalajanaka na wane nikirajüinkana Jesuu. Soʼuleʼeya kaʼikat tia, niʼrüin Pedro pülain Jesuu nutuma Maleiwa. Wainmajaasü nutuma Jesuu maʼaka jeʼrashiichen pan otta jime süpüla shiküinjatüin wainma wayuu. Neʼitaweekalaka nia na wayuukana süpüla aluwatawaa naaʼu. Nnojotpejeʼe keeʼireein naaʼin Jesuu tia, nnojoishi sünainpünaain nia poliitika. Otta müinjatia nakuwaʼipa na nikirajüinkana. Nuʼunajaakalaka Jesuu noulia na wayuukana jee nüjütüin na nikirajüinkana waneemüin saʼata tü palaakat. Otta müshia niakai, oʼunushi saaʼumüin wanee uuchi süpüla oʼuraajaa (Mar. 6:35-45; paashajeʼera Juan 6:14-17).

³ Oʼunushii naya sotpaʼajee tü palaakat wanaa sümaa kaʼlein aikat jee chuwatapa maʼin kashikai. Shiasaʼa kamaʼa süchikijee tia, nnojotsü wattain tü anuwakat namaa, eeʼeraasü neʼe maʼaka jeʼra kiloometüro. Jayuuweemateeirü naaʼu sünain oʼuniraa tü anuwakat. Nnojotsü jaʼyain nanüiki sutuma katchin maʼin tü joutaikat jee koʼlotüin maʼin tü palaakat. Eejiraashii  naya sünain oʼuniraa tü anuwakat. Wainmakajasaʼa kasa antaka suluʼu nikii Pedro wanaa sümaa tia.

4. ¿Jamüsü anaka ashataa nukuwaʼipa Pedro?

⁴ Wainma kasa jülüjaka naaʼin Pedro. Alatüirü piama juya süchikijee niʼraajüin Jesuu jee wainma kasa niʼraka soʼu tü piamasükat juya. Wainma kasa nütüjaka nünainjee Jesuu, eepejeʼe tü kasa choʼujaayütkat nüpüleerua soʼu tia. Keeʼireesü naaʼin Pedro niain wanee nikirajüin Jesuu anakai maʼin akuwaʼipa. Anasü maʼin ashataa nukuwaʼipa Pedro süka niain wanee wayuu eejiraakai sümaa tü akuwaʼipaa jookalü apüla nia, wainmajüsü paala naaʼin sünain anoujaa jee eimmolojoʼowaishi nia. Wekirajaainjatü anain jooluʼu süchiki tia nukuwaʼipakat Pedro.

5, 6. ¿Kasa watüjaaka aaʼu nüchiki Pedro?

⁵ Nnojotsü motuin naaʼin Pedro tü kaʼi niʼraajakalü oʼu Jesuu. Nia Andrés chi nimüliakai maka nümüin: «Wantüichipa anain chi Mesíaskai». Nnojotsü antapünaain suluʼu nikii Pedro niʼrüinjatüin wainma kasa sünainjee tia (Juan 1:41).

⁶ Chajachi Pedro kepiain chaa Capernaum, mmakat tia chasü palaamüin saaʼujee tü palaakat Galilea, wüin jemetüsü tia. Pedro nümaa Andrés, aʼyataapuʼushi sünain ejimejaa nümaa Jacobo (Santiago) otta Juan, na nüchonniikana Zebedeo. Kottiraasü tü nimeshukat Pedro nümaa otta müshia Andrés. Na ejimejüliikana, wayuu katsüinshii, tütüshii otta atüjashii süpüleerua tü naʼyataainkat. Chashii naya shiroku palaakat wainma oora sünain ojotoo tü kusukat jee nayuʼla namüsia shia sümaa tü jimekalüirua. Nantapa sotpaʼamüin palaakat wattaʼa maalü, yalashii naya sünain aneekajaa tü jimekalüirua süpüla noiküin shia. Noʼotojuin shiʼyarüla tü kusukat jee naruwentajüin shia sütsajaale.

7. ¿Kasa naapaka achiki Pedro? ¿Jamüsü talataka naaʼin sutuma?

⁷ Süküjain tü Wiwüliakat jamakuwaʼipalin süpüla nikirajünüinjachin Pedro nutuma Jesuu. Andrés, chi nimüliakai, nümaataraipuʼu Juan chi Awoutisaajüikai. Makalaka naapajawalin Pedro süpüshuaʼa tü nüküjakat Andrés nüchiki Juan. Soʼu wanee kaʼi, eesü wanee kasa alataka nuʼupala Andrés. Müshi Juan chi awoutisaajüikai niʼraiwaʼaya Jesuu: «Jiirakaa, ichaaichi chi wayuu aneekünakai nütüma Maleiwa süpüla nuʼutünajachin aaʼin maa akaapüʼü tü anneerü oʼutünapüʼükat aaʼin watüma wayakana judíokana shiiʼiree sülaʼajaanüin waainjala». Oʼunushi Andrés nümaa Jesuu süpüla nikirajünüinjachin nutuma. Jee nüküjaka nümüin Pedro nüntüin nünain chi Mesíaskai (Juan 1:35-41). Maʼaka 4.000 juya süpülapünaa tia, eʼrüijaashi wayumüin Adán sümaa Eva. Soʼu tia, nüküjain Jeʼwaa nuluwataainjachin wanee wayuu oʼtteʼerüinjachikai tü wayuukalüirua (Gén. 3:15). Jee wayuukai chia nia chi Mesíaskai, chi eiwaʼaikai niʼraajaa Andrés. Naapapa Pedro nüchiki, awataashi nia süpüla niʼrüinjachin.

8. ¿Jamaluʼulu tü anüliee niʼitaakat Jesuu nünain Pedro? ¿Jamüsü nnojotka pansaain sümaa nukuwaʼipa Pedro tia anülieekat naashin waneinnua wayuu?

 ⁸ Eʼraajünüshi maʼin Pedro suluʼu Simón nümünüin. Soʼu tü palajatkat sukua niʼrüin nia Jesuu, müshi nümüin: «Simón, pia nüchonkai Jonás, teʼitaainjatü jooluʼu wane anüliee pünain, Cefas müsü. (Tü anüliee «Cefas» süka pütchi Griego, «Pedro» maluʼut)» (Juan 1:42). Eesü tü kasa niʼitaakalü anainjee Jesuu tia anülieekat nünain Pedro. «Ipa», maluʼulu tia anülieekat. Niʼrüin sünain nukuwaʼipa Pedro niain wanee wayuu makai aka saaʼin wanee ipa. Süka jamüin, niain wanee wayuu ichekai anoula otta alaüleʼerakai naaʼin napüleerua na anoujashiikana. ¿Nütüjaa aaʼuche Pedro ichein maʼin nunoula? Nnojo. Jamüsüjaʼa naashajeʼerapa na wayuukana nüchiki Pedro, nnojotsü ichein nunoula saaʼin namüin. Naashin waneinnua wayuu, aashajaasü tü Wiwüliakat süchiki wainmajüin naaʼin Pedro, joʼuweein naaʼin jee matüjain süpüleerua nukuwaʼipa.

9. ¿Kasa niʼraka wanain Jeʼwaa nümaa Jesuu? ¿Kasa jülüjainjatka waaʼin nüchiki Jeʼwaa nümaa Jesuu?

⁹ Nütüjaa aaʼu Jesuu eein tü kasa isakat nüchiki Pedro. Shiapajaʼa jülüjain naaʼin tü kasa anasü eekat nünain maʼaka naainjain shia Jeʼwaa süka tü wayuukalüirua. Niʼrüin Jesuu eein akuwaʼipaa anasü nünain Pedro, müshijeseʼe nükaaliinjeein nia. Maaʼulu yaa, niʼrüin Jeʼwaa nümaa Jesuu tü kasa anasü eekat wanain. ¿Jama jülüjale waaʼin nnojoluin kasain anain apüla waya? Müle shia, jülüja waaʼin nayain atüjaain saaʼu wakuwaʼipa, eesüjaʼa tü kasa neʼrakat wanain. Wooʼulaa nekirajai waya jee nanouteʼerai wakuwaʼipa maʼaka naainjain shia nüka Pedro (paashajeʼera 1 Juan 3:19, 20).

10. ¿Kasa naainjaka Jesuu chaa Caná nuʼupala Pedro? ¿Jalamüinshi aleʼejüin Pedro nüchikuaʼa?

¹⁰ Süchikijee niʼraajünüin Jesuu nutuma Pedro, oʼunushi nia nümaa sünain aküjaa pütchi. Eeshijaʼa yalajachire nia sünain anajaa sukua tü palajatkat kasa pülasü naainjaka Jesuu, wanaa sümaa wiinojaain tü wüinkat nutuma sünain tü ekawaa shikiirakat kasaalüü chaa Caná. Jee naapajüin süpüshuaʼa tü nüküjakat Jesuu süchiki tü Nuluwataayakat Maleiwa. Nüleʼejaka mapa Pedro nüchikuaʼa sünain ejimejaa. Maʼaka jeʼra kashi süchikijee tia, antiraashi Pedro nümaa Jesuu nüchikuaʼa. Nuunejaakalaka nia Jesuu süpüla niainjachin wanee nikirajüin.

11, 12. (1) ¿Jamüsü nukuwaʼipa Pedro sünain ejimejaa soʼu aikat tia? (2) ¿Kasa eeka süpüla nüsakirüin anain Pedro sümaʼinruʼu naapajüin nünüiki Jesuu?

¹¹ Wanee ai süpülapünaa nüntiraain Pedro nümaa Jesuu, masitsai nia. Chajachi nia ejimejüin namaa waneinnua wayuu, nnojotsü kasain nasirüin. Wainmatua nojutuin tü nakusuinkat sümaa nnojoluin kasain nataʼülüin. ¿Jamüsüche aikaʼa shiiʼiree jime? Kakaliaichi Pedro  sünain ejimejaa makalaka nütüjaain saaʼu süpülee tü jimekat. Süka masirüin nia, eeshijaʼa nümüle: «Kasataalejeseʼe tatüjaain saaʼu jalain wainmain tü jimekat tataʼülaiwa shia». Mojukajasaʼa maʼin naaʼin. Ejimejüshi nia süpüleerua nüpüshi, nnojoishi ejimejüin neʼe süka nnojoluin kasain naaʼinrüin. Kasataayaai eein nüpüla Pedro, aleʼejaʼatshi neʼe sotpaʼamüin palaakat, yalajachika nia ayujain shiyarüla tü kusukat. Nüntaka Jesuu wanaa sümaa tia.

¹² Wainma wayuu antaka nüchiirua Jesuu shiiʼiree saapajüin nünüiki. Shiasaʼa sutuma wainmain maʼin shiairua, noʼotooka suluʼu naʼanuwain Pedro jee nuchuntaka nümüin nuʼunirüin shia samüintata. Jaʼyashiisü nünüiki Jesuu sejeechiki sutuma sülüʼüjain shia tü joutaikai. Yalajachijaʼa Pedro sümaa tü wayuukalüirua sünain aapajaa nünüiki Jesuu süchiki nuluwataaya Maleiwa. Nnojotsü akulajaain naaʼin Pedro sünain aapajaa nünüiki Jesuu, kamalainsü nümüin. ¡Oʼuneekajasaʼa naaʼin Pedro nümaa Jesuu sünain eʼikajaa süchiki Nuluwataaya Maleiwa sümüin wayuu! ¿Eesüchejeʼeya süpüla naainjain tia? ¿Kaseerü shikaka aaʼu nüpüshi? Eesüjaʼa sotule naaʼin nnojoluin kasain nüsirüin wanee ai süpülapünaa tia (Luc. 5:1-3).

13, 14. ¿Jarat tü kasa pülasü naainjakat Jesuu nümüin Pedro? ¿Jamaka nünüiki Pedro nümüin Jesuu?

¹³ Kettaapa nikirajüin Jesuu, nümaka nümüin Pedro: «Anashii müleka woʼunule chaʼaya eere oʼttüin tü palaakat süpüla jujutüinjatüin tü jukusüinkat chamüin süpüla olojoo jime». Mayaainjeʼe wainmajüin naaʼin Pedro, nümakalaka nümüin Jesuu: «Ekirajüikalee, olojüshii waya waneepia saʼwaipa. Masitsalii waya [...]. Otta saaʼu piaichipain müin tamüin, wajuteerü tü wakusüinka süchikua». Nnojotsü nujuteein Pedro tü kusukat, malaaka wuleitpain shia nutuma jee alatüitpain soʼoorain suʼlojunüin jime. Nujutapajaʼaya tü kusukat, jee eeshiijaʼa nuunejaale na sulujunakana tü wane anuwakat (Luc. 5:4, 5).

¹⁴ Naaʼütapa Pedro namaa na waneinnua tü kusukat, jawatüsü maʼin namüin. Naaʼütüinjeseʼe shia süka süpüshuaʼa natsüin. Jee wotoshootosü jime tü kusukat. Nounejaaka na sulujunakana tü wane anuwakat süpüla nakaaliinjain naya. Wainmashaata nasirü soʼu tia, epirajaasü tü piamasükat anuwa, emeroteematüsü sutuma saawain tü jimekat. Ponoshootosü naaʼin Pedro wainmajaain nüsirü nutuma Jesuu. Nütüjaapejeʼe saaʼu pülain maʼin Jesuu süka wainmain tü kasa pülasü naaʼinrakat nuʼupala. Mmotkalaka Pedro jee nuʼwachiraaka nümülatuʼu Jesuu sünain nümüin nümüin: «Senyotkalee, wayuu kaainjarai taya. Anashi püpütüle taya tamüiwa». Naashin Pedro, nnojoishi anain nia süpüla nümawaa chi Mesíaskai, wayuu pülashi maʼin chia nutuma Maleiwa (paashajeʼera Lucas 5:6-9).

15. ¿Kasa naainjaka Jesuu süpüla niiʼiyatüin nümüin Pedro sünain nnojolinjachin mmoluin nia jee wainmajüin naaʼin?

 ¹⁵ Nümakalaka Jesuu nümüin Pedro: «Nnojo mmolüin pia teema saaʼu kaainjaralin pia. Maa aka olojülin pia jime, okotchajeechi joo pia wayuu tamüin süpüla saapajüinjatüin tanüiki» (Luc. 5:10, 11). Nnojotsü wainmajüinjatüin naaʼin Pedro jee nnojoluinjachi mmoluin nia. Nuunejaain nia Jesuu sünain wanee aʼyatawaa anashaatasü. Nnojotsü wainmajüinjatüin naaʼin saaʼu tü shiküinjatkat nüpüshi. Mayaainjeʼe eein tü kasa kapüleekat nümüin jee tü isakat nüchiki, nnojotsü wainmajüinjatüin naaʼin. Nunoujainjatü anain Pedro motuin naaʼin Maleiwa tü naainjalakat (Isa. 55:7). Niʼitaainjatü naaʼin sünain naapeerüin Jeʼwaa süpüshuaʼa tü kasa choʼujaakat nümüin jee tü choʼujaakat sümüin nunoula (Mat. 6:33).

16. ¿Kasa naainjaka Pedro, Santiago otta Juan nounejaanapa nutuma Jesuu? ¿Jamüsü anaka maʼin tü naainjakat?

 ¹⁶ Oʼunushi Pedro, Santiago otta Juan nümaa Jesuu. Saashin tü Wiwüliakat, «napütüin süpüshua tü nakorolokot süpüla oʼunaa nümaa Jesús» (Luc. 5:11). Anashaatasü tü naainjakat Pedro: niʼitaain naaʼin nünain Jesuu otta nünain chi Maleiwakai. Maaʼutpünaa eeshii na wawalayuu makana anoula maʼaka naaʼin Pedro. Nnojoishii mmoluin naya jee nnojotsü wainmajüin naaʼin süpüla naʼyataain nümüin Jeʼwaa. Nnojoleena nüpütüin Jeʼwaa namüiwaʼa naya wawalayuukana (Sal. 22:4, 5).

17. ¿Kasa niʼraka Pedro soʼu tü piamakat juya nümaakalü oʼu nia Jesuu?

¹⁷ Soto waaʼin tü waashajaakalü achiki suʼttiajee tü ekirajaayakat. Alatüsü piama juya süchikijee niʼraajünüin Jesuu nutuma Pedro. Chajachi Pedro namaa na nümaajanakana sünain oʼuniraa tü anuwakat. Jashichisü maʼin tü palaakat Galilea wanaa sümaa tia. Nnojotsü watüjaain saaʼu kasain jülüjain naaʼin Pedro, watüjaapejeʼe saaʼu wainmain tü kasa niʼrakat nümaa Jesuu. Niʼrüin anain tü nimeshukat nutuma Jesuu. Akaʼaya nia, naapajüin tü nikirajakalü anain Jesuu suluʼu Mateo kapiitulo 5 sünainmüin 7. Süka niʼrüin Pedro süpüshuaʼa tia, nütüjaa aaʼu niain Jesuu chi Mesías nüjünalakai Jeʼwaa. Nnojoliichipa mmoluin nia jee wainmajüin naaʼin. Nüneeküin nia Jesuu süpüla aluwataaushinjachin nia. Wekirajaainjatü anain jooluʼu ayatüinya mmoluin jee wainmajüin naaʼin Pedro.

18, 19. (1) ¿Kasa niʼiraka Pedro shiroku tü palaakat Galilea? (2) ¿Jamüsü nünüiki Jesuu shiʼipajee tü nuchuntakat Pedro?

¹⁸ Niʼraka Pedro shiyolojo wanee kasa waraitüsü sooʼopünaa tü palaakat, maaliajatü tia. Nütüjawee aaʼu Pedro kasain wayu tia, makalaka nuuʼulaain suulia oʼuniraa tü anuwakat sümaa nüshaʼwalaain süpüla niirakaain sümüin. ¿Kasache wayu shia? ¿Shiache neʼe niʼraka süchimira tü palaakat sutuma chuwatüin chi Kashikai? Nnojo, nia wanee wayuu waraitakai sooʼopünaa tü palaakat jee lotushi maʼin nia nanainmüin. Mmotshii maʼin na nikirajüinkana Jesuu. Müshii naya: «Epeinjaasü kasa wapüla». Nümakalaka namüin: «Nnojo mmolüin jia, jüchechera jaaʼin. Taya tayakalin». Nia Jesuu chi neʼrakai waraitüin sooʼopünaa tü palaakat (Mat. 14:25-28).

¹⁹ Nümakalaka Pedro: «Shiimainreje piain weʼrüin, anakaja peenaküle taya süpüla tantajachin pünainmüin sooʼopünaa tü palaakat». Tütüshi maʼin Pedro jee yalayalashi nia sutuma niʼrüin tia, nuuʼulakeein shia süpüla nüchecherüinjatüin nunoula. Nuunejakalaka nia Jesuu. Nüshakataka Pedro suluʼujee tü anuwakat jee nücholetaka shiroku tü wüinkat. ¿Kasakajasaʼa antüin suluʼu nikii Pedro wanaa sümaa niʼrüin nnojoluin nimerotuuin? Akoyotshi nia nünainmüin Jesuu.  Anashiaajeʼe paala, shiasaʼa sülatalaʼa sümaka wanee kasa nümüin (paashajeʼera Mateo 14:29).

20. (1) ¿Kasa mojuka akuwaʼipa nutuma Pedro? ¿Jamaka nia? (2) ¿Jamüsü nünüiki Jesuu nümüin Pedro?

²⁰ Süka niʼrüin Jesuu nunoula Pedro, naapüin chi naaʼinkai Maleiwa nümüin süpüla nukoyoluinjachin sooʼopünaa tü palaakat. Nia nünanajüinjachika Jesuu, nnojotka naaʼinrüin tia. Mmotkalaka Pedro niʼrapa tü wawaikat saashin tü Wiwüliakat. Shiyoʼujaaka naaʼin sutuma jashichin tü palaakat jee miyoʼuin tü sümünakat. Amalajaapünaasü nunoula Pedro sutuma tia. «Ipa» münüshi paala nia nutuma Jesuu süka anainjatüin maʼin tü nunoulakat. Müichipajasaʼa neʼe aka saaʼin wanee ipa ojutuushi shiroku palaa süka nimerolo nimerolo nümüin. Mayaainjeʼe atüjain nia katünaa shiroku wüin, achuntüshi kaaliinwaa nümüin Jesuu: «Jalia taya Senyotkalee», müshi sünain nuʼwaatüin. Otta müshia Jesuu niyurulamaatüin nütüna sünain naapaain Pedro. Yalapa nia shaʼwatüin nümaa Jesuu, nümakalaka nümüin: «Pia matsüinkai anoula, ¿jamüsü nnojotkaʼa püchecherüin paaʼin sünain anoujaa tanain?» (Mat. 14:30, 31).

21. ¿Jamüsü mojuka wainmajüle waaʼin? ¿Kasa waaʼinrajatka suulia majüin wakuwaʼipa?

²¹ ¿Kasa shikirajaka anain waya tü nümakat Jesuu? Eesü süpüla sumojujaain wakuwaʼipa wainmajüle waaʼin. Eemiajaajeerü wanoula otta eeshii süpüla wooʼulaain suulia anoujaa. ¿Kasa waaʼinrajatka suulia majüin wakuwaʼipa? Nnojotsü waaʼinmaainjatüin tü kasa eekat süpüla eimmolojeʼerüin waya, tü eekat süpüla sumojujeʼerüin waaʼin jee shiale wanee kasa ooʼuleʼereeka waya suulia oʼunaa nüchiirua Jeʼwaa nümaa Jesuu. Nnojoleerü kasain wainmajüin atuma waaʼin niale waaʼinmaain chi Maleiwakai nümaa chi Nüchonkai sümaʼaleʼeya tü kasa naainjakat jee naainjeetkat mapeena.

22. ¿Jamüsü anaka ashataa sukuwaʼipa nunoula Pedro?

²² Oʼotooshi Pedro suluʼumüin tü anuwakat nümaa Jesuu. Nnojorülaʼa müsü tü wawaikat. Eimalaasü tü palaakat. Nümakalaka Pedro namaa na wane nikirajüinkana Jesuu: «Shiimüinja sünain piain chi Nüchonkai Maleiwa» (Mat. 14:33). Eeʼiyalaashi Kaʼikai jee talatüsü naaʼin Pedro. Soʼu tia, niyaawata aaʼu nnojoluinjatüin wainmajüin naaʼin jee nnojoluinjachin mmoluin nia; niʼitaainjatü naaʼin nünain Jeʼwaa nümaa Jesuu. Choʼujaapejeʼe waneirua kasa nüpüleerua süpüla müinjachin nia maʼaka saaʼin wanee ipa. Ayatüinjachi nia eejiraain sümaa tü nukuwaʼipakat. ¿Jama wayakana, meeria wakuwaʼipa? ¡Anashaatasü süpüla washatüin sukuwaʼipa nunoula Pedro!