1-3. (1) ¿Jamüsü saaʼin Ester shiʼipaʼaya sürütkaain nünainmüin chi suʼwayuusekai eejachire joyotuin nia? (2) ¿Kasa naaʼinraka chi aluwataaikai süntapa Ester nünainmüin?

TÜNTAʼATSÜ saaʼin Ester shiʼipaʼaya sürütkaain nünainmüin chi aluwataaikai eejachire joyotuin nia. Yüütüshii neʼe napüshuaʼa na yalajanakana nüʼütpaʼa chi aluwataaikai. Shia neʼe aapünaka shipijana suuʼui otta süsheʼin. Nnojotpejeʼe shiain jülüjain saaʼin Ester anain maʼin nipia chi aluwataaikai, anain maʼin tü suuʼuikalüirua jee tü saajuna aainjuushikat süka cedro chejeʼewatka Líbano. Shia neʼe jülüjaka saaʼin Ester anta eemüin chi wayuu joyotokoi sünain aluwatawaa. Chia wayuukai nia aküjainjachikai müleka suʼutunajatüle aaʼin Ester.

² Nünanajüin maʼin shia chi aluwataaikai, niyaletka tü wunuʼu aainjuushikat süka ooro najapuluʼuka. Sükajee naaʼinrüin tia, niiʼiyatüin nülatirüin sooʼopünaa naaʼin süntüin Ester nünainmüin sümaa nnojoluin neenajirüin shia. ¡Akalajaʼa naaʼinrüin tia! Sürütkaaka joo Ester nünainmüin chi aluwataaikai sümaa sütaʼitüin shiʼichi tü wunuʼu najapuluʼukat shiyaawase talatüin shia sutuma nülatirüin tü saainjalakat (Est. 5:1, 2).

³ Jaʼyasü naaʼu Asuero washitshaanain nia sümaa kapülain nia sümüin wayuu. Naashin waneinnua wayuu, kojutusü maʼin nasheʼin na aluwataaliikana saaʼu Persia suʼunnaa tia, kojuyasü miyoone dólar sülia. Mayaapejeʼe müin tü naʼanaayakat chi suʼwayuusekai Ester, shiyaawata aaʼu alin shia nüpüla. Shiajaʼa neʼe nnojoluin niiʼiyatüin maʼin tü saalinkat nüpüla. Nümakalaka Asuero sümüin: «Esteetche, ¿jamüsü piachon? ¿Kasa puchunteeka tamüin?». Naashin Asuero, jaʼitakajeʼe shialejeʼe suchuntuin süpüshi nuwashirüin, naapeerü sümüin (Est. 5:3).

4. ¿Jamüsü kapüleeka sümüin Ester tü saaʼinrajatkat?

⁴ Shiiʼiyatüin Ester kanoulain otta yalayalain shia. Ichaʼasaʼa oʼunuin shia nünainmüin chi aluwataaikai jee aashajaasü napüleerua na judíokana süka noʼutuneein aaʼin. Anakuwaʼipatsü tü saaʼinrakat süka nuuʼulaain shia chi aluwataaikai süntüin nümaʼanamüin. Shiapejeʼe kapüleein sümüin tü saaʼinrajatkat süchikijee tia süka yaletüin naaʼin Asuero. Shimeʼejüinjatü naaʼin süpüla nunoujain sünain mojulaain Hamán, chi wayuu niʼipajanakai. Emeejünüshi nia nutuma Hamán shiiʼiree naapüinjatüin nekii na wayuu supueulosekana Ester süpüla  najaʼlajeʼennüin. ¿Jameetche sukuwaʼipa süpüla shimeʼejüin naaʼin chi suʼwayuusekai? ¿Kasa watüjaka sünainjee sukuwaʼipa sunoula Ester?

5, 6. (1) ¿Kasa saaʼinraka Ester sutuma soonooin sümaa sünüiki Eclesiastés 3:1, 7? (2) ¿Kasa saaʼinraka Ester sutuma kekiin maʼin shia saashajaapa nümaa suʼwayuuse?

⁵ ¿Anasüche saashajaale Ester nümaa Asuero noʼupala na wayuu eejanakana nümaa? Saaʼinrüle tia, eeshijaʼa niʼrüle japülii Asuero sutuma otta eeshi süpüla nusoutuin Hamán naaʼuwaa. ¿Kasaka saaʼinrüin Ester? Kakalia maʼin süpülapünaa tia, nüshajüin chi aluwataaikai Salomón wanee pütchi nutuma Maleiwa, müsü mayaa: «Eesü kaʼi süpüla kasa süpüshuaʼa, [...] eesü kaʼi süpüla koʼutaa otta kaʼi süpüla aashajawaa» (Ecl. 3:1, 7). Ekirajünakajasaʼa Ester nutuma Mardoqueo, chi süshiyaashikai sünain pütchi makalü aka saaʼin tia. Wekirajaajeerü anain sütüjaain aaʼu Ester choʼujaain süneeküinjatüin tü kaʼi anakat süpüla aashajawaa.

⁶ Anuukalaka sünüiki Ester nümüin chi suʼwayuusekai: «Laülaashikalee, analejeʼe pümüin, pünta nümaa Hamán sünain wanee ekawaa eeinjatka tatuma soʼukai püpüla» (Est. 5:4). Nnojotsü mojuluʼuluin tia nümüin Asuero, neenajitkalaka Hamán. Atüjakatche maʼin Ester sümaa  kekiin maʼin shia, ¿aashimüin? Shiiʼiyatüin nujutü chi suʼwayuusekai nümüin otta süneeküin joujain anain süpüla saashajaain nümaa süchiki tü shapaakalü atuma saaʼin (paashajeʼera Proverbios 10:19).

7, 8. ¿Jamüsü sukuwaʼipa tü ekawaa eejatkat sutuma Ester? ¿Jamüsüche nnojotka süküjain nümüin Asuero tü sümüinjatkat nümüin sünain ekawaakat tia?

⁷ Yapakajasaʼa sutuma Ester süpüshuaʼa tü choʼujaakat süpüla tü ekawaakat otta jülüjakajasaʼa saaʼin tü nikaajakat chi suʼwayuusekai. Jee müsia, eesü wiino jemetüsü sutuma süpüla talatüinjatüin naaʼin (Sal. 104:15). Sutuma talatüin naaʼin Asuero sünain tia ekawaakat, nüsakirüin Ester süchikuaʼa kasain suchunteein nümüin. ¿Süküjeetche Ester nümüin?

⁸ Nnojoyülia kettaain sükalia süpüla saaʼinrüin tia. Müshijeseʼe suunejaain nia nüchikuaʼa nümaa Hamán sünain wanee ekawaa waneemüin kaʼi (Est. 5:7, 8). ¿Jamüsüche nnojotka süküjaleein uatuwoʼushi nümüin Asuero tü sümüinjatkat nümüin? Süneeküinjatü Ester joujain anain aküjaa tia nümüin, piʼrüinche süseyaajünüin süka nüsittiijase Asuero tü pütchi süpülajatkat ajaʼlajeʼeraa na judíokana. Shiajaʼa makaʼa eeinjatüin wanee ekawaa sutuma süpüla shiiʼiyatüin nümüin chi suʼwayuusekai sünain kojutuin nia sümüin.

9. ¿Jamüsü anaka maʼin nnojoliire kashapajaaraliin waya? ¿Kasa waaʼinrajatka süpüla washatüin sukuwaʼipa Ester?

⁹ Nnojotsü kashapajaaralüin Ester süpüla aaʼinraa wanee kasa.  Anashaatasü tia akuwaʼipaakat, nnojotsü müin sukuwaʼipa wayuu süpüshuaʼa maaʼulu. Mayaapejeʼe shapaain maʼin saaʼin Ester, saʼatapajüin tü kaʼi anakat süpüla aashajawaa nümaa Asuero. Anasü maʼin washatüle sukuwaʼipa süka weʼrawalin saainjünüin kasa nnojotka anain. Nnojoishii ashapajaainjanain waya waashajaainjanale nümaa chi wayuu eekai süpüla anouteʼerüin tia. Anuu sünüiki tü Wiwüliakat: «Nnojoire kashapajaaralin wanee wayuu, nimeʼejeerü naaʼin wanee shikiipüʼü surulaat otta anale maʼin nünüiki, meerü nüshateʼerakai saaʼin shiipüse wayuu» (Prov. 25:15). Wayaawatüle saaʼu joujain anain aashajawaa süchiki wanee kasa, anamiale jee kamaneere waya maʼaka saaʼin Ester, wemeʼejeerü naaʼin wanee wayuu jaʼitaichi ichein süchiirua tü nümakat. ¿Akaaliinjünüsüche Ester nutuma Jeʼwaa, chi Sümaleiwasekai sutuma kekiin maʼin otta nnojoluin kashapajaaralüin shia?

10, 11. (1) ¿Jamüsü üttaka naaʼin Hamán nuʼunapa süchikijee tü ekawaakat? (2) ¿Kasa anaka süpüla naaʼinrüin Hamán saashin tü nuʼwayuusekat otta na naʼaleewainkana?

¹⁰ Eesü waneirua kasa alataka sutuma nnojoluin süshapajaain Ester  sünain tü saaʼinrajatkat. Soʼu tia, talatüsü maʼin naaʼin Hamán sünain tü ekawaakat, süka jamüin, niiʼiyatünüin amüin ojutü nutuma Asuero otta Ester. Mojushiipejeʼe nümüin niʼrapa Mardoqueo anooipaʼa sünain nnojoluin nüsapainkain nia nümülatuʼu. Wekirajaa anainrü suluʼu ekirajaaya 15, nnojoluin naaʼinrüin Mardoqueo tia süka mojuin noʼuluʼu Jeʼwaa jee süka kojutuin nümüin aleewaa nümaa. Nnojotsü shiain sutuma niʼrülin wayumüin. Üttapejeʼe naaʼin Hamán sutuma tia saashin tü Wiwüliakat (Est. 5:9).

¹¹ Nüküjainjaʼa Hamán sümüin tü nuʼwayuusekat otta na naʼaleewainkana süchiki tü niʼralakat wayumüin Mardoqueo naashin. Nashuukajaka Hamán süpüla naashajaain nümaa Asuero. ¿Kasa apüla? Süpüla nuuʼulaainjachin nükacherüin Mardoqueo sünain wanee wunuʼu eekai 22 meetüro sajaʼapüin. Nüshoʼttiraka Hamán tü wunuʼukot süka anashiin nümüin tü namakat (Est. 5:12-14).

12. ¿Jamüshi nuluwataaka Asuero na aʼyataashiikana nümüin sünain aashajeʼeraa tü karaloʼutairua nüshajitkat? ¿Kasa nütüjaaka aaʼu sutuma tia karaloʼutakat?

¹² Soʼu tia, awatüsü lapü nuulia Asuero saashin tü Wiwüliakat. Nuluwataaka na aʼyataashiikana nümüin sünain aashajeʼeraa sünain emetuluin sünüiki tü karaloʼutairua nüshajitkat paala. Saʼaka tü karaloʼutakalüirua, eejatü wanee ashajuushi nachikimaajatü waneinnua wayuu oʼuteekana naaʼin Asuero. Sotusü naaʼin Asuero nataʼünnüin naya wayuukana sümaa noʼutunüin aaʼin. Nüsakitka sünain kasain aapünüin nümüin Mardoqueo saaʼu nükaaliinjain nia soʼu nuʼutuneein aaʼin. «Nnojotsü kasain aapünüin nümüin», namakalaka na aʼyataashiikana nümüin Asuero (paashajeʼera Ester 6:1-3).

13, 14. (1) ¿Jamüsü mojukuwaʼipatka tü naaʼinrajatkat Hamán? (2) ¿Kasa süküjaka tü nuʼwayuusekat Hamán nümüin otta na naʼaleewainkana?

¹³ Shapaasü naaʼin Asuero otta nütüjawee aaʼu eere noʼutku na niʼipajanakana yala nipialuʼu süpüla nükaaliinjain nia sünain anouteʼeraa tü shapaakalü atuma naaʼin. Niakalaka yalajachin Hamán nüpüla suluʼu süpaatiase tü piichikat. Antatüjüiya nia süka nuchunteein nümüin Asuero nuuʼulaainjachin nuʼutuin naaʼin Mardoqueo. Nnojoluiwaʼaya nusoutuin Hamán, asakinnüshi nutuma Asuero: «¿Kasache anaka süpüla saainjünüin nüpüleerua wanee wayuu eekai kojutuin nümüin chi aluwataaikai?». Niayaa naaʼinruʼu aashajaanaka achiki, müsüjeseʼe anain naashin saʼatünüle nünain chia wayuukai nüsheʼin chi aluwataaikai sümaa nuʼuninnüin suluʼupünaa tü pueulokot Susa saaʼu naʼamain chi aluwataaikai. Ajattünajachi chi amakai naashin nutuma wanee niʼipajana chi aluwataaikai otta nüküjainjatü wayuuin kojutushi chia makai yaa. Jamakajasaʼa naaʼin Hamán nütüjaapa saaʼu niain Mardoqueo eeʼiyatünajachin amüin ojutü. Otta niainjachin Hamán aaʼinrüin tia (Est. 6:4-10).

¹⁴ Naaʼinrüin Hamán mojusheeka tü nuluwataakalü anain nia Asuero otta üttashaatasü naaʼin. Süchikijee naaʼinrüin tia, oʼunamaatüshi nia nipialuʼumüin sümaa shapaain maʼin naaʼin saaʼu tü alatakat.  Süküjakalaka tü nuʼwayuusekat nümüin otta na naʼaleewainkana, nnojoluin kaluʼuin kasa anasü tü alatakat nümüin, ayamülüweechi nia nutuma Mardoqueo (Est. 6:12, 13).

15. (1) ¿Kasa alataka sutuma nnojoluin süshapajaain Ester? (2) ¿Jamüsü anaka waʼatapajüle waneepia tü naaʼinreetkat Jeʼwaa wapüleerua?

¹⁵ Nnojotsü ashapajaain Ester otta saʼatapajüin waneemüin kaʼi süpüla saashajaain nümaa Asuero, sutuma saainjain tia apütaasü kaʼi süpüla niainjachin neʼe Hamán akumajüin sukuwaʼipa süpüla sütüjaanüin aaʼu niain mojulaain. Jee müsia, eeshijaʼa niale Jeʼwaa matunküin atuma Asuero soʼu aikat tia (Prov. 21:1). Shiajaʼa maka süküjain tü Wiwüliakat waʼatapajüinjanain waneepia tü naaʼinreetkat Jeʼwaa wapüleerua (paashajeʼera Miqueas 7:7). Wooʼulaale najapuluʼu Maleiwa tü alatakat wamüin, weʼreerü anaʼleein maʼin tü naaʼinrakat süpüla nunouteʼerüin shia suulialeʼeya tü waaʼinrüinjatkat waküjainruʼu.

16, 17. (1) ¿Joujatü süküjain Ester nümüin Asuero tü shapaakalü atuma saaʼin? (2) ¿Jamüsü naatajatshaanaka sukuwaʼipa Ester suulia Vasti?

¹⁶ Nnojotsü keeʼireein saaʼin Ester jashichijaain chi suʼwayuusekai sümüin, süküjainjeseʼe nümüin tü shapaakalü atuma saaʼin. Saaʼinrüin tia nuʼunapa nüchikuaʼa sünain tü ekawaakat. ¿Jamüsüche sukuwaʼipa süpüla süküjain tia? Mapüleesat sümüin süka nüsakirüin shia chi suʼwayuusekai sünain kasain suchunteein nümüin (Est. 7:2). Kettaajüsü shia süpüla aashajawaa nümaa.

¹⁷ ¿Kasache saaʼinraka Ester süpülapünaa susoutuin nümüin Asuero? Eesüjaʼa suʼuraajüle suluʼu saaʼin. Sümakalaka süchikijee: «Aluwataaikalee, talatüleje paaʼin tamaa otta anale saaʼin pümüin, puuʼulaa katüin toʼu otta puuʼulaa katüin noʼu na wayuu suluʼujeejanakana tapueulose» (Est. 7:3). Saashin Ester, kojuteerü sümüin tü eekat naaʼinrüin Asuero. Nnojoishi saapülijirüin nia maʼaka saaʼinrüin shia Vasti. Naatajatshaana maʼin sukuwaʼipa Ester (Est. 1:10-12). Jamüsüjaʼa shia, nnojotsü mojuin  sünüiki nümüin saaʼu noonooin nümaa Hamán. Shia neʼe suchuntaka nümüin naaʼinmajüin shia süka suʼutuneein aaʼin.

18. ¿Jamüsü sünüiki Ester süküjapa nümüin Asuero süchiki tü alatakat sümüin?

¹⁸ Amülialaasü naaʼin chi aluwataaikai saaʼu tü suchuntakat Ester nümüin jee nnojotsü antapünaain suluʼu nikii tia alatakat sümüin. ¿Jaraiche oʼuteeka saaʼin nuʼwayuuse chi aluwataaikai? Anuu sooʼomüin sünüiki Ester: «Aapüna ekiirü taya namaa na wayuu suluʼujeejanakana tapueulose süpüla woʼutunuin aaʼin jee süpüla wajaʼlajeʼennüin. Woikünüle süpüla achepchieeinjanain neʼe waya, nnojotsüje taküjain süchiki tia pümüin. Tatüjaa aaʼu mojeerüin nümüin chi aluwataaikai tü aainjünajatkat, müsüjeseʼe nnojoluin yüütüin taya» (Est. 7:4). Süküjain Ester süchiki tü aainjünüinjatkat sümüin jee sümüin tü supueulosekat, nnojotsüje süküjain tia saashin noikünüle süpüla achepchieein naya. Nnojotsü shia yüütüin süka sütüjaain saaʼu mojeerüin nümüin chi aluwataaikai tü kasa mojusü aainjünajatkat.

19. ¿Kasa watüjaka sünainjee sukuwaʼipa Ester wemeʼejüinjanale naaʼin wanee wayuu?

¹⁹ Wainma kasa watüjaka sünainjee tü saaʼinrakat Ester süpüla shimeʼejüin naaʼin wanee wayuu. Jamüshiijaʼa waashajaainjanale süchiki wanee kasa kapüleeka nümaa wanee wapüshi jee niale nümaa wanee wayuu laülaakai saaʼu wanee kasa, nnojoishii waya kashapajaaraliinjanain, kojutuinjana naya wamüin otta lotuinjatü wanüiki namüin (Prov. 16:21, 23).

20, 21. (1) ¿Jamüsü sünüiki Ester süküjapa nüchiki Hamán? ¿Kasa naaʼinraka Asuero nütüjaapa saaʼu mojulaain Hamán? (2) ¿Kasa naaʼinraka Hamán sütüjaanapa aaʼu kemeejaralin nia?

²⁰ Anuu nünüiki Asuero shiʼipajee tü sümakat Ester: «¿Jaraika chi eʼrüikai wayumüin maka aainjalaa yaa?». Shiiʼiyatakajasaʼa Ester chia wayuukai sünain maa: «Chia wayuukai, chi waʼünüükai nia Hamán». Moʼooshi neʼe Hamán sutuma tü mmoluukat. Maaʼatsü neʼe aka saaʼin  nüʼlapüin nümüin tia alatakat. Niʼrüin jashichishaatain maʼin Asuero sutuma nimeejüin nia soʼu niseyaajirüin wanee karaloʼuta süpülajatka suʼutunuin aaʼin Ester. Süka poolotuin maʼin nüsha Asuero sutuma tü alatakat, ojuʼitaashi anooipaʼamüin shiiʼiree nüchecherüin naaʼin (Est. 7:5-7).

²¹ Atüjaanüichipa aaʼu kemeejaralin Hamán otta mmotshaanashi nia, nüʼwachiraakalaka sümülatuʼu Ester sünain achuntaa kaaliinwaa sümüin. Shiasaʼa nikerotapa Asuero nüchikuaʼa paülüʼümüin, jashichireeshia süka nüntüin naaʼu Hamán woyotuin saaʼu tü einasee eejatüle Ester; «¿pütaüjaainjatche tü taʼwayuusekat?», nümaka nümüin. Nnojorüleeichipa kasakainjachin Hamán, outajachia neʼe. Amaanüshijaʼa nia sümaa koʼoyooin nuʼupünaa atumawaa. Eeka wanee aʼyataai nümüin chi aluwataaikai aküjakai nümüin sünain nüshoʼttirüin Hamán wanee wunuʼu süpüla nükacherüin Mardoqueo sünain. Nuluwataaka Asuero niainjachin jooluʼu akachennüin Hamán sünain tia wunuʼukot (Est. 7:8-10).

22. ¿Jamüsü watüjaaka saaʼu anain kanourale waya waneepia maʼaka saaʼin Ester otta nnojoluin washapajaain?

²² Eeshii eekai jülüjain naaʼin nnojoleerüin sunoutaain tü kasa mojusü aainjünakat sümüin wayuu maaʼulu. ¿Jülüjaiche paaʼin tia? Kanoulasü Ester waneepia, nnojotsü ashapajaain shia jee nnojotsü üttakuʼu müin saaʼin. Ichaʼasaʼa shia aashajaain süpüla saainjünüin tü kasa anasükat otta suuʼulaain tia najapuluʼu Jeʼwaa. Washata sukuwaʼipa Ester, soto waaʼin nnojoluin suʼwanajaain nukuwaʼipa Maleiwa. Ayatayülia nükaaliinjain na aʼyataakana nümüin noulia na mojulaakana jee na kemeeraliikana maʼaka naaʼin Hamán (paashajeʼera Salmo 7:11-16).

23. (1) ¿Kasa naapaka Asuero nümüin Mardoqueo otta sümüin Ester? (2) ¿Jamüsü shikeraajia tü nümakat Jacob nüchiki Benjamín? (Paashajeʼera « Ekeraajüsü tia pütchikat»).

²³ Nütüjaa aaʼu Asuero niain Mardoqueo aapirüin nia suulia nuʼutunuin aaʼin jee nütüjaaitpa aaʼu niain süshiyaain Ester. Müshijeseʼe nüneeküin nia süpüla niʼipajanain nia niiʼirakaluʼu Hamán. Jee naapüin nipia otta nuwashirüin Hamán sümüin Ester. Shiasaʼa Ester, shiʼitaain tia najapuluʼu Mardoqueo (Est. 8:1, 2).

24, 25. (1) ¿Jamüsü ayataka shapaain saaʼin Ester süchikijee süküjain nüchiki Hamán? (2) ¿Kasa saaʼinraka süchikijee tia?

²⁴ Oʼttaasü Ester jee müshia Mardoqueo suulia oʼutunaa aaʼin.  ¿Nnojoluitpache shapaain saaʼin Ester sutuma tia? Nnojorüleejaʼa, nnojotsü jülüjain saaʼin sukuwaʼipa neʼe sümüiwaʼa. Natüjaaitpa aaʼu napüshuaʼa na wayuu nuluwataakana aaʼu Asuero süchiki tü pütchi süpülajatkat ajaʼlajeʼeraa na judíokana, tü pütchi nuluwataakat Hamán. Ooʼulakitshi Hamán süpülapünaa nüneeküin tü kaʼi anakat süpüla nashutunuin aaʼu na judíokana. Saashin tü Wiwüliakat, Pur sünülia tü naaʼinrakat (Est. 9:24-26). Isasü neʼe piama kashi süpüla tü ashunawaakat jee kawachirasü maʼin tü kaʼikalüirua. ¿Amalajeʼenneetche tia ashunawaakat?

²⁵ Sutuma nnojoluin jülüjain saaʼin Ester sukuwaʼipa neʼe sümüiwaʼa, oʼunusü süchikuaʼa nümaʼanamüin Asuero sümaa nnojoluin neenajirüin shia. Aʼyalajüsü shia naaʼu na judíokana otta suchuntuin nümüin chi suʼwayuusekai süpüla nümalajeʼerüin tü aainjünajatkat naka. Nnojotpejeʼe süpüla suʼwanajaanüin wanee pütchi nümaʼanajeejatka chi aluwataaikai (Dan. 6:12, 15). Naapüinjeseʼe Asuero shikii süpüla nayain aikaleʼerüin wanee pütchi jeketü Ester otta Mardoqueo. Tia pütchikat süpülajatü natkaain na judíokana namaa na ashutakana naaʼu. Oʼunushiijeseʼe waneinnua wayuu sünain aapiraa napüshuaʼa na wayuukana suluʼupünaa tü mma nuluwataakalü aaʼu Asuero. Wainma na talatakana aaʼin sutuma tia pütchikat (Est. 8:3-16). Yapakajasaʼa na judíokana süpüla eejirawaa namaa na naʼünüükana. Nnojotsüjeʼe süpüla naaʼinrüin tia nnojorüle süikaleʼennüin tia pütchikat sutuma Ester nümaa Mardoqueo. ¿Nükaaliinjeenache naya «Jeʼwaa, chi wainmakai asurulaatse»? (1 Sam. 17:45).

26, 27. (1) ¿Kasa naaʼinraka na judíokana naka na naʼünüükana sutuma nükaaliinjain naya Maleiwa? (2) ¿Kasa pütchi ekeraajaka najaʼttinnapa na nüchonniikana Hamán?

 ²⁶ Antüsüjaʼa sükalia tü ashunawaakat jee yapashii na judíokana süpüla eejirawaa namaa na naʼünüükana. Wainma na persa aʼyataakana nümüin Asuero namaakana na judíokana soʼu tia, jama sütüjaain aaʼu wayuu süpüshuaʼa judíoin Mardoqueo, chi niʼipajanakai Asuero. Ayamüluushii napüshuaʼa na naʼünüükana na judíokana. Nia Jeʼwaa aaʼinmajaka naya suʼunnaa tia otta nükaaliinjain naya süpüla najaʼlajeʼerüin naʼünüü (Est. 9:1-6). *

²⁷ Süka noʼutunüin aaʼin na polooshiikana nüchonnii Hamán, nnojotsü wainmajüin naaʼin Mardoqueo sutuma sülaülajanain nia tü nipiapuʼukat Hamán (Est. 9:7-10). Sükajee tia, nikeraajüin Maleiwa nünüiki süchiki najaʼlajeʼerüinjanain na amalequitakana, süka jamüin, süʼünüüin naya tü nupueulosekat Maleiwa (Deut. 25:17-19). Eeshiijaʼa nayale neʼe eejanain na nüchonniikana Hamán nakajee na amalequitakana.

28, 29. (1) ¿Jamüsü keeʼireeka naaʼin Maleiwa natkaainjanain na judíokana sükalioʼu Ester? (2) ¿Jamüsü anaka maʼin watüjaain saaʼu sukuwaʼipa sunoula Ester?

²⁸ Kapüleesü maʼin tü saaʼinrakat Ester, malaaka joo shiain aikaleʼerüin wanee pütchi sünainpünaaka atkawaa jee oʼutaa saaʼin wayuu. Nnojotsü shaitaain tia. Nnojotpejeʼe keeʼireein naaʼin Jeʼwaa sajaʼlajeʼennüin tü nupueulosekat, süka jamüin, nujuʼitajachin chi Mesíaskai naʼakajee. Otta nia nüneekaka Jeʼwaa süpüla anakuwaʼipalüinjatüin wayuu süpüshuaʼa nünainjee (Gén. 22:18). Akalajaʼa nnojoluin watkaainjanain maʼaka naaʼin na judíokana namaiwa. Soʼu yaajachin Jesuu yaa Mmapaʼa nüpülajüin noulia na nikirajüinkana natkaainjanain (Mat. 26:52).

²⁹ Mapajeʼe watkaakai aaʼin maaʼulu süchiirua tü wanoulakat, atkaashii waya nümaa chi waʼünüükai Satanaa. Nüchajaashaatain sukuwaʼipa süpüla nümalajeʼerüin wanoula (paashajeʼera 2 Corinto 10:3, 4, TNM). Wayamüleechipajaʼa chi waʼünüükai washatüle sukuwaʼipa sunoula Ester. Kekii maʼin waya wakumajapa sukuwaʼipa wanee kasa, nnojo kashapajaaraliin waya, kemeʼeria wanüiki, yalayala waya otta wasouta saaʼu nupueulose Maleiwa. ¡Anashaatasü maʼin süka watüjaain saaʼu süchiki sukuwaʼipa sunoula Ester!