Tü nüshajalakat Juan 1:1-51
1 Sümaiwa paala,* süpülapünaa nukumajüin Maleiwa wanee kasa, eetüjüiya chi kanüliakai Pütchi, eetüjüiya nia nümaa Maleiwa. Otta maleiwa chi anii joo kanüliain Pütchi.
2 Eetüjüiya nia nümaa Maleiwa süpülapünaa sukumajünüin wanee kasa.
3 Akumajaasü kasa süpüshuaʼa nükajee otta nnojotsü eein wanee kasa akumajaaka neʼe sümaa nnojoluin nükajeejatüin shia.
Tü kasa eekat nükajee
4 shia katüin soʼu kasa süpüshuaʼa otta müsü chuwatuuikai saaʼu wayuu sünainjee katüin noʼu.
5 Chuwatuuisü tü luusakat pasanain sünain tü piʼyuushikat, nnojotpejeʼe akanaluuin tü luusakat sutuma tü piʼyuushikat.
6 Eejachi wanee wayuu ajütünakai süpüla nünüikimaainjachin nia Maleiwa, Juan nünülia.
7 Antüshi chia wayuukai süpüla nüküjainjatüin süchiki tia luusakat sümüin wayuu maʼleekalia süpüla sunoujainjatüin sünain tü nümakat.
8 Nnojoishi niain Juan tia luusakat, antüshi nia süpüla nüküjainjatüin pütchi süchiki tia luusakat.
9 Chi makai aka saaʼin tü luusa shiimainsükat anakaka wayuu maʼleekalia, alüʼütshi maʼin süpüla antaa saʼakamüin wayuu.
10 Shiimainña maʼin eetüjülin nia saʼaka wayuu.* Akumajaasü wayuu nünainjee, nnojoipejeʼe nia shiʼraajüin wayuu.
11 Antüshi nia nipialuʼumüin, nnojoipejeʼe kasajachin nia sümüin nüpüshi.
12 «Nüchooin Maleiwa» nayapejeʼe münüin amüin na wayuu kamaneekana nümüin süka kanoulain naya nünain.
13 Nnojoishii wayuuin naya sükajee joʼuuin naya sünainjee wayuu, nnojotsü shiain sükajee nachekalain shia na kachonniikana naya jee nnojotsü sükajeein süchekalain shia wayuu, shia nükajee Maleiwa.
14 Wayuu chi kanüliakai Pütchi jee kepiapuʼushi nia waʼaka, kojutushi nia atumawaa woʼupala maʼaka kojutuin nutuma wanee wayuu chi waneeshikai nüchon. Nüküjain tü shiimainkat otta talatüshi chi Maleiwakai nümaa.
15 Ekirajüshi Juan nüchiki sünain maa: «Nia chi taküjakai achiki jümüin paala sünain maa: ‹Antüichipa tapüleerua chi antajachiaakai tachiiruajee süka eetüjülin nia tapülapünaa›».
16 Kamaneeshiaʼaya nia wamüin wapüshuaʼa wayakana, jama miyoʼuin maʼin tü nümaneekat.
17 Tü Pütchi Nümaʼanajeejatkat Maleiwa, aküjünüsü shia wamüin nükajee Moisés. Eekajasaʼa tü nümaneekat Maleiwa sümaʼaleeya tü shiimainkat, atüjaana aaʼu nükajee Jesucristo.
18 Nnojoishi eeichin wanee wayuu eʼrakai chi Maleiwakai. Aküjünapejeʼe wamüin nutuma chi maleiwa eʼirumaakai, chi chakai naʼatoʼu chi Nüshikai, jamüin maʼin nukuwaʼipa.
19 Anuu tü nümakat Juan wanaa sümaa najütünüin natuma na judíokana chejee Jerusalénjee na sacerdotekana otta müshiʼiya na leviitakana sünain maa nümüin: «¿Jarai maʼin pia?».
20 Nnojoipejeʼe nia manülin noulia. «Nnojoishi tayain chi Cristo münakai», müshi namüin.
21 Jee nasakirakalaka nia: «¿Piataaka Elías?». «Nnojo, nnojoishi tayain», nümakalaka Juan namüin. «¿Piataaka chi Nünüikimaajachikai Maleiwa, waʼatapajakai?», namakalaka nümüin. «Nnojo», nümakalaka Juan.
22 Anuujeseʼe nanüiki nümüin: «Püküja pümaala wamüin jaralin maʼin pia, süpüla waküjainjatüin shia namüin na wayuu kajünalakana waya. ¿Jaraikaʼa maʼin pia paashin?».
23 Nusoutakalaka Juan namüin: «Taya chi emetutkai anüiki chaa isashiipaʼa sünain maa: ‹Wule jutuma nüpüna Jehová›,* maʼaka nüküjain shia Isaías, chi nünüikimaajachikai Maleiwa».
24 Ajütüüshi naya wayuukana natuma na fariseokana.
25 Nüsakinnaka Juan natuma: «Nnojoirejeʼe piain Cristo nümaa Elías otta müshia chi Nünüikimaajachikai Maleiwa, ¿jamakaʼa woutiisaka wayuu putuma?».
26 Anuukalaka nünüiki Juan namüin: «Woutiisasü wayuu tatuma shiroku wüin, eepejeʼe wanee wayuu jaʼaka nnojoikai jiʼraajüin.
27 Nieechi antaka tachikumüin. Nnojoikalaka süpüla tasiwatüin saalaja nukoʼusüin».*
28 Alatüsü tia chaa Betania, wane saʼata tü süchikat Jordán, eejatüle woutiisain wayuu nutuma Juan.
29 Waneemüin kaʼi, niʼnnaka Jesús nutuma Juan nüpanapajee otta nümakalaka: «Jiirakaa nümüin chi Anneetchon nümaʼanajeejachikai Maleiwa, nia alaʼajaaka saainjala wayuu suulia.
30 Nia chi taküjakai achiki jümüin sünain maa: ‹Antüichipa tapüleerua chi antajachiaakai tachiiruajee süka eetüjülinña nia tapülapünaa›.
31 Nnojoipuʼushi nia teʼraajüin, woutiisapejeʼe wayuu tatuma shiroku wüin süpüla saapüinjatüin wayuu nüchiki yaa Israel».
32 Anuu joo nünüiki Juan: «Teʼrüin joo tü nüpülainkat Maleiwa ashakatüin sirumatuʼujee suluʼu müin shia maʼaka saaʼin wanee toomasü jee süshaʼwalaakalaka naaʼu.
33 Nnojoipuʼushi nia teʼraajüin, anuupejeʼe nünüiki tamüin chi Kajünalakai taya süpüla woutiisain tatuma wayuu shiroku wüin: ‹Pütüjaajeechi aaʼu jaralin chi aneekakai wayuu sükajee nüpülain Maleiwa piʼrapeena süshakatüin chaa iipünaajee tü nüpülainkat Maleiwa otta makatüin shia naaʼu›.
34 Teʼrüin tia makat jee taküjain süchiki niainña chi Nüchonkai Maleiwa».
35 Waneemüin kaʼi, niitaakalaka Juan nüchikuaʼa namaa piamashii nikirajüin eejachire nia paala.
36 Niirakaaka nüpanapa Jesús, nümakalaka: «Iseeichi chi Anneetchon nümaʼanajeejachikai Maleiwa».
37 Noʼunakalaka nüchiirua Jesús na piamashiikana nikirajüin Juan naapaiwaʼaya tü nümakat.
38 Niirakaaka Jesús namüin jee nümakalaka: «¿Jamüshii jia?». Anuujeseʼe nanüiki nümüin: «Rabí, ¿jalashi pia katunkulein?», («ekirajüikalee» maluʼulu tü pütchikat Rabí).
39 Nusoutakalaka Jesús namüin: «Jooʼuya jiʼraiwa jalain tatunkule». Oʼunushiijeseʼe naya nümaa, neʼrakalaka jalain katunkulein Jesús. Makatakalaka naya nümaa soʼu kaʼikat tia, aliikajatü, maʼaka saaʼin las cuatro.*
40 Andrés chi nuwalakai Simón Pedro, nia nuwalaʼata chi wayuu aapakai nünüiki Juan jee oʼunakai nüchiirua Jesús.
41 Nüntakalaka palajana nümaʼanamüin Simón, chi nuwalakai jee nümakalaka nümüin: «Watüjaaichipa aaʼu jaralin chi Mesíaskai», (Cristo maluʼulu tia pütchikat).
42 Nümaakalaka nia nümaʼanamüin Jesús. Niʼnnaiwaʼaya Simón nutuma Jesús, nümakalaka nümüin: «Pia chi kanüliakai Simón, chi nüchonkai Juan, Cefas münüinjachi jooluʼu pia», (Pedro maluʼulu tia anülieekat).
43 Waneemüin kaʼi, nuʼuneekalaka Jesús Galileamüin. Nüntiraakalaka nümaa Felipe jee nümakalaka nümüin: «Anashi tamaataraire pia».
44 Chejeʼewai Felipe suluʼujee tü mma kanüliakat Betsaida, eejeʼewaire Andrés nümaa Pedro.
45 Nüntiraaka Felipe nümaa Natanael, nümakalaka nümüin: «Watüjaaichipa aaʼu jaralin chi nüshajakai achiki Moisés suluʼu tü Pütchi Naapakat Maleiwa nümüin otta chi nashajakai achiki na Nünüikimaajanakana Maleiwa. Nia Jesús, chi nüchonkai José, chi chejeʼewaikai Nazaret».
46 Asoutapejeʼe Natanael nümüin: «¿Jeʼratuaitkai ojuʼitüin kasa anasü Nazaretjee?». «Jooʼuya piʼraajaiwan», nümakalaka Felipe nümüin.
47 Niirakaapa Jesús nüpanapa Natanael, nümakalaka nümüin: «Iseeichi wanee israelita loto akuwaʼipachi».
48 Nusoutakalaka Natanael: «¿Jamüshi piʼraajaka taya?». Anuujeseʼe nünüiki Jesús nümüin: «Teʼratüjüiya pia suupünaa tü wunuʼu kanüliakat higuera, süpülapünaa nuunejaain pia Felipe».
49 Anuujeseʼe nünüiki Natanael nümüin: «Ekirajüikalee, piaʼaya chi Nüchonkai Maleiwa, pia aluwataakai saaʼu Israel».
50 Nusoutakalaka Jesús nümüin: «¿Anoujashi pia tanain süka taküjain pümüin teʼrüin pia suupünaa tü wunuʼu kanüliakat higuera? Eʼreechi pia tatuma kasa anaʼleeka maʼin suulia tia».
51 Jee anuu sooʼomüin nünüiki Jesús: «Shiimain tanüiki jümüin, jiʼreerü seerulaain tü sirumatuʼukat otta jiʼreena oʼunuin iipünaamüin na aapiee nümaʼanajeejanakana Maleiwa jee ashakateena naya nünainmüin chi Süchonkai Wayuu».*
Noota
^ «Suʼttiajee» maluʼulu tia suluʼu griego.
^ «Mmapaʼakat» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Jee shiale «nüsapaatse».
^ «Maʼaka poloo oora süchikijee nujuʼitaain kaʼikai» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
