Yesaia 42:1-25
42 Naa! Mitsulɔ,+ mɔ ni miyeɔ mibuaa lɛ lɛ!
Mɔ ni mihala,+ mɔ ni miyɔɔ* ehe miishɛɛ lɛ!+
Mikɛ mimumɔ lɛ ewo emli;+Ebaahã jeŋmaji lɛ ana nɔ ni jalɛsaneyeli ji.+
2 Ebolɔŋ ni ewoŋ egbee nɔ,Ni ehãŋ anu egbee yɛ gbɛjegbɛ lɛ nɔ.+
3 Ekuŋ gãlã ni mli edɔ lɛ,Ni egbeŋ kane mli kpãa ni tsoɔ sulii lɛ.+
Bɔ fɛɛ bɔ ni fee lɛ, ebaaye jalɛ sane.+
4 Etsoŋ sulii ni emli edɔŋ hu kɛyashi ebaato jalɛsaneyeli shishi yɛ shikpɔŋ lɛ nɔ;+Ni ŋshɔkpɔi lɛ miiya nɔ amɛmiimɛ emla* lɛ.
5 Nɔ ni anɔkwa Nyɔŋmɔ lɛ, Yehowa, kɛɛ nɛ,Mɔ ni bɔ ŋwɛi lɛ kɛ mɔ kpele ni kpã amɛmli lɛ,+Mɔ ni kɛ shikpɔŋ lɛ kɛ enɔ nibaa nii lɛ fɛɛ lɛɛ shi,+Mɔ ni hãa mɛi ni yɔɔ nɔ lɛ mumɔ amɛmuɔ,+Ni ehãa mɛi ni nyiɛɔ nɔ lɛ mumɔ lɛ:+
6 “Mi Yehowa, mi mitsɛ bo yɛ jalɛ hewɔ;Mimɔ onineshi.
Makwɛ onɔ ni mahã otsɔ kpaŋmɔ ohã maji lɛ,+Kɛ la hu kɛhã jeŋmaji lɛ,+
7 Koni ogbele shwilafoi lɛ ahiŋmɛii,+Koni ojie mɔ ni awo lɛ tsuŋ lɛ kɛje gboklɛfoi abu lɛ mliKɛ mɛi ni ta duŋ mli lɛ kɛje tsuŋwoohe lɛ.+
8 Miji Yehowa. Migbɛ́i ji no;Mikɛ minunyam lɛ hãaa mɔ kroko,*Ni mikɛ miyijiemɔ lɛ hu hãaa amagai.+
9 Naa, klɛŋklɛŋ nibii lɛ eba mli;Agbɛnɛ, miijaje nibii hei.
Miikɛɛ nyɛ dani amɛba mli.”+
10 Nyɛ mɛi ni nyɛnyiɛɔ ŋshɔ hiɛ kɛ nibii fɛɛ ni yɔɔ mli,Nyɛ ŋshɔkpɔi kɛ mɛi ni yɔɔ nɔ,+Nyɛláa lala hee nyɛhãa Yehowa,+Nyɛláa eyijiemɔ lala lɛ kɛjɛa shikpɔŋ lɛ naagbeehei lɛ.+
11 Ŋa lɛ kɛ emli maji lɛ awó amɛgbee nɔ,+Shihilɛhei ni Kedar+ hiɔ lɛ.
Mɛi ni yɔɔ tɛsaa nɔ lɛ alá nyamɔ lala;Amɛbolɔ kɛjɛ gɔji lɛ ayiteŋ.
12 Amɛkɛ anunyam ahã YehowaNi amɛjaje eyijiemɔ lɛ yɛ ŋshɔkpɔi lɛ anɔ.+
13 Yehowa baaje kpo kɛya tamɔ nuu kãkãlɔ.+
Ebaatee ehiɛdɔɔ lɛ shi tamɔ tawulɔ.+
Ebaabolɔ, lɛɛlɛŋ, ebaabɔ oshe;Ebaahã ana akɛ ehe wa fe ehenyɛlɔi lɛ.+
14 “Mifee diŋŋ aahu.
Mifee diŋŋ ni miye mihe nɔ.
Shi agbɛnɛ, makɛ̃mɔ, mitsui baasu, ni mamu hɛɛhɛɛ yɛ be kome too mli,Tamɔ yoo ni miifɔ.
15 Makpãtã gɔji kɛ gɔŋkpɔi lɛ ahiɛNi mahã amɛnɔ jwɛi lɛ fɛɛ agbi.
Mahã fai atsɔ ŋshɔkpɔi*Ni mahã kpaakpoi agbi.+
16 Manyiɛ shwilafoi lɛ ahiɛ kɛtsɔ gbɛ ni amɛtsɔko nɔ dã lɛ nɔ+Ni mahã amɛnyiɛ nanegbɛi ni amɛleee lɛ anɔ.+
Mahã amɛhiɛ duŋ lɛ atsɔ la+Ni mahã gbɛi ni nɔ yɔɔ gɔŋ kɛ jɔɔ gɔŋ kɛ jɔɔ lɛ afee trɛnɛɛ.+
Enɛ ji nɔ ni mafee mahã amɛ, ni mikwaŋ amɛ.”
17 Mɛi ni kɛ amɛhiɛ fɔ̃ɔ amagai ni agbɔ* anɔ,Mɛi ni kɛɔ dade amagai akɛ: “Nyɛji wɔnyɔŋmɔi” lɛ,+Amɛbaaku amɛsɛɛ ni amɛhiɛ baagboi kpɔtɔɔ.
18 Nyɛ toimulɔi, nyɛboa toi;Nyɛ shwilafoi, nyɛkwɛa ni nyɛnaa.+
19 Namɔ eshwila tamɔ mitsulɔ lɛ?Namɔ emu toi tamɔ mɔ ni mitsu lɛ?
Namɔ eshwila tamɔ mɔ ni ajwere lɛ lɛ?Namɔ eshwila tamɔ Yehowa tsulɔ lɛ?+
20 Onaa nibii pii, shi oyooo.*
Ogbeleɔ otoiiaŋ, shi obooo toi.+
21 Yehowa jalɛ nifeemɔ lɛ hewɔ lɛ,Eesumɔ akɛ ehã ana akɛ mla* lɛ da ni eyɛ nyam.
22 Shi maŋ ni aloo amɛnibii ni ashɔ̃ amɛnibii ji maŋ nɛɛ;+Akɛ amɛ fɛɛ ewo bui amli ni akɛ amɛ eteetee yɛ tsuŋwoohei amli.+
Aloo amɛnibii fɛɛ ni mɔ ko bɛ ni baahere amɛ,+Ni ashɔ̃ amɛnibii ni mɔ ko bɛ ni baakɛɛ akɛ: “Nyɛkɛkua nyɛsɛɛ kɛbaa!”
23 Nyɛteŋ namɔ baanu enɛ?
Namɔ baaka etoi ni ebo toi jogbaŋŋ ni enu nɔ ni baaba lɛ?
24 Namɔ kɛ Yakob hã koni ashɔ̃ enibiiKɛ Israel hu koni aloo enibii?
Ani jeee Yehowa, mɔ ni wɔfee esha wɔshi lɛ?
Amɛnyiɛɛɛ egbɛi lɛ anɔ,Ni amɛbooo emla* lɛ toi.+
25 No hewɔ lɛ, etee* nɔ efɔse emlila lɛ eshwie enɔ,Emlifu kɛ eta ni naa wa lɛ.+
Eshã nɔ fɛɛ nɔ ni ebɔle lɛ lɛ, shi ekwɛɛɛ po.+
Etso kɛbɔle lɛ, shi ekɛwooo etsui mli po.+
Shishigbɛ Niŋmaa
^ Loo “misusuma yɔɔ.”
^ Loo “egbɛtsɔɔmɔ.”
^ Loo “Mikɛ mɔ ko kwraa ejaaa minunyam lɛ.”
^ Loo “ŋshɔnaa shikpɔji.”
^ Loo “akpɛ́.”
^ Loo “okɛ ojwɛŋmɔ eyaaa nɔ.”
^ Loo “gbɛtsɔɔmɔ.”
^ Loo “egbɛtsɔɔmɔ.”
^ Ni ji, Nyɔŋmɔ.
