Yakobo Wolo Lɛ 2:1-26
2 Minyɛmimɛi, ani nyɛhiɛ Yesu Kristo ni ji wɔnunyam Nuŋtsɔ lɛ hemɔkɛyeli lɛ mli, ni nakai be lɛ mli nɔŋŋ lɛ nyɛmiikwɛ hiɛiaŋ?+
2 Ejaakɛ kɛ́ nuu ko ni kɛ shika tsuru gai ewo ewaobii, ni ewo atade fɛfɛo ba nyɛkpee lɛ shishi, ni ohiafo ko hu ni wo atade mujimuji ba shishi lɛ,
3 ani nyɛtseɔ nyɛhiɛ nyɛhãa mɔ ni wo atade fɛfɛo lɛ, ni nyɛkɛɔ akɛ, “Bo lɛ baata sɛi nɛɛ nɔ yɛ he kpakpa nɛɛ,” ni nyɛkɛɔ ohiafo lɛ akɛ, “Bo lɛ yaa nɔ odamɔ shi,” loo “Baata sɛi nɛɛ nɔ yɛ minajiashi sɛi lɛ shishigbɛ”?+
4 Kɛ́ nakai ni lɛ, belɛ ani jeee nii amli nyɛjieɔ yɛ nyɛteŋ lɛ,+ ni ani jeee kojolɔi ni kpɛɔ yiŋ fɔji nyɛtsɔmɔ nɛɛ?+
5 Minyɛmimɛi ni misumɔɔ, nyɛboa toi. Ani jeee mɛi ni ji ohiafoi yɛ je lɛ susumɔ naa lɛ Nyɔŋmɔ hala koni amɛtsɔmɔ niiatsɛmɛi yɛ hemɔkɛyeli gbɛfaŋ,+ kɛ Maŋtsɛyeli ni ewo he shi ehã mɛi ni sumɔɔ lɛ lɛ niyelɔi?+
6 Shi nyɛ lɛ, nyɛbuuu ohiafoi lɛ. Ani jeee niiatsɛmɛi lɛ waa nyɛ yi+ ni amɛ nɔŋŋ amɛgbalaa nyɛ kɛyaa saneyelihei lɛ?
7 Ani jeee amɛ nɔŋŋ amɛwieɔ wiemɔi fɔji* amɛshiɔ gbɛ́i kpakpa ni akɛtsɛ nyɛ lɛ?
8 Agbɛnɛ, kɛ́ nyɛyeɔ Maŋtsɛ lɛ mla wulu lɛ nɔ tamɔ bɔ ni ŋmalɛ lɛ tsɔɔ lɛ, akɛ, “Suɔmɔ onyɛmi gbɔmɔ tamɔ bo diɛŋtsɛ ohe” lɛ,+ no lɛ nyɛmiifee jogbaŋŋ.
9 Shi kɛ́ nyɛtee nɔ nyɛkwɛ hiɛiaŋ lɛ,+ no lɛ nyɛmiifee esha, ni mla lɛ ebu nyɛ fɔ* akɛ nyɛji mlatɔlɔi.+
10 Ejaakɛ kɛ́ mɔ ko yeɔ Mla lɛ fɛɛ nɔ, shi etɔ̃ yɛ ekome mli lɛ, etɔ̃ fɛɛ nɔ.+
11 Ejaakɛ mɔ ni kɛɛ akɛ, “Kaafite gbãla”*+ lɛ, ekɛɛ hu akɛ, “Kaagbe gbɔmɔ.”+ Agbɛnɛ, kɛ́ ofiteee gbãla, shi ogbeɔ gbɔmɔ lɛ, no lɛ otsɔ mlatɔlɔ.
12 Nyɛyaa nɔ nyɛwiea ni nyɛfea nyɛnii tamɔ mɛi ni akɛ heyeli mla baakojo amɛ.+
13 Ejaakɛ mɔ ni enaaa mɔbɔ lɛ, abaakojo lɛ ni anaŋ lɛ mɔbɔ.+ Mɔbɔnalɛ yeɔ kojomɔ nɔ kunim.
14 Minyɛmimɛi, kɛ́ mɔ ko kɛɛ eyɛ hemɔkɛyeli shi ebɛ nitsumɔi ni ekɛbaatsɔɔ akɛ eyɛ hemɔkɛyeli lɛ, mɛɛ sɛɛnamɔ yɔɔ he?+ Nakai hemɔkɛyeli lɛ nyɛŋ ahere eyiwala, aloo jeee nakai?+
15 Kɛ́ nyɛmimɛi hii komɛi loo nyɛmimɛi yei komɛi* bɛ atadei* ni amɛbɛ niyenii ni fa bɔ ni sa kɛhã gbi lɛ,
16 shi nyɛteŋ mɔ ko kɛɛ amɛ akɛ, “Nyɛyaa yɛ toiŋjɔlɛ mli; nyɛyawerea la ni nyɛhe adɔa, ni nyɛyayea nii nyɛtɔrɔa,” shi nyɛhãaa amɛ nii ni he hiaa amɛgbɔmɔtso lɛ, mɛɛ sɛɛnamɔ yɔɔ he?+
17 Nakai nɔŋŋ hemɔkɛyeli hu, kɛ nitsumɔi fataaa he lɛ, eji hemɔkɛyeli ni egbo.+
18 Shi mɔ ko baakɛɛ akɛ: “Bo lɛ, oyɛ hemɔkɛyeli, ni mi lɛ, miyɛ nitsumɔi. Tsɔɔmɔ mi ohemɔkɛyeli ni nitsumɔi fataaa he lɛ, ni mi hu matsɔ minitsumɔi lɛ anɔ matsɔɔ bo mihemɔkɛyeli lɛ.”
19 Bo lɛ, oheɔ oyeɔ akɛ Nyɔŋmɔ kome pɛ yɔɔ, aloo jeee nakai? Oobɔ mɔdɛŋ. Shi daimonioi lɛ hu heɔ enɛ amɛyeɔ ni amɛhe kpokpoɔ.+
20 Bo gbɔmɔ ni bɛ yitsoŋ, ani ootao ole akɛ hemɔkɛyeli ni nitsumɔi fataaa he lɛ sɛɛnamɔ ko bɛ he?
21 Wɔtsɛ Abraham lɛ, ani jeee nitsumɔi anɔ atsɔ abu lɛ jalɔ, be ni ekɛ ebi Isak hã yɛ afɔleshaa latɛ lɛ nɔ lɛ?+
22 Oona akɛ ehemɔkɛyeli lɛ kɛ enitsumɔi lɛ nyiɛ, ni atsɔ enitsumɔi lɛ anɔ ahã ehemɔkɛyeli lɛ ye emuu,+
23 ni ŋmalɛ nɛɛ ba mli akɛ: “Abraham he Yehowa* nɔ eye, ni abu no jalɛ ahã lɛ,”+ ni atsɛ lɛ Yehowa* naanyo.+
24 Nyɛmiina akɛ nitsumɔi anɔ abaatsɔ abu mɔ ko jalɔ, shi jeee hemɔkɛyeli pɛ nɔ.
25 Nakai nɔŋŋ Rahab, ashawo yoo lɛ hu, ani jeee nitsumɔi anɔ atsɔ abu lɛ jalɔ be ni ehere mɛi ni atsu lɛ hiɛmɛɛ ni ehã amɛtsɔ gbɛ kroko nɔ kɛtee lɛ?+
26 Anɔkwa, bɔ ni gbɔmɔtso ni mumɔ bɛ mli* lɛ ji gbonyo lɛ,+ nakai nɔŋŋ hu hemɔkɛyeli ni nitsumɔi fataaa he lɛ ji hemɔkɛyeli ni egbo.+
Shishigbɛ Niŋmaa
^ Loo “amɛbɔɔ musu.”
^ Loo “ejaje nyɛ.”
^ Kɛ́ mɔ ko ni ebote gbalashihilɛ mli yabɔ ajwamaŋ lɛ, no ji gbalafitemɔ.
^ Greek sht. ŋm., “Kɛ́ nyɛmi nuu ko loo nyɛmi yoo ko.”
^ Greek sht. ŋm., “hiɛ amɛhe foji.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Loo “gbɔmɔtso ni emuuu.”
