Hosea 2:1-23
2 “Nyɛkɛa nyɛnyɛmimɛi hii lɛ akɛ, ‘Mimaŋ ji nyɛ!’*+
Kɛ nyɛnyɛmimɛi yei lɛ hu akɛ, ‘Bo yoo ní ana bo mɔbɔ!’*+
2 Nyɛwiea nyɛshia nyɛmami; nyɛwiea nyɛshia lɛ,Ejaakɛ jeee miŋa ji lɛ,+ ni lɛ hu jeee ewu ji mi.
Hã ekpa eshawofeemɔ* lɛNi ejie egbalafitemɔ lɛ kɛje efufɔi ateŋ,
3 Kɛjeee nakai lɛ, majie ehe nɔ fɛɛ nɔ, ni mahã etsɔ tamɔ gbi nɔ ni afɔ lɛ lɛ,Ebaatsɔ tamɔ ŋa nɔ,Ebaatsɔ shikpɔŋ ni nu bɛ nɔ,Ni mahã kumai agbe lɛ.
4 Ni ebii lɛ, minaŋ amɛ mɔbɔ,Ejaakɛ afɔ amɛ yɛ ashawofeemɔ* mli.
5 Ejaakɛ amɛmami kɛ ehe ewo ashawofeemɔ* mli.+
Mɔ ni ŋɔ amɛ hɔ lɛ efee hiɛgbejianii,+ ejaakɛ ekɛɛ akɛ,‘Manyiɛ mɛi ni sumɔɔ mi waa lɛ asɛɛ,+Mɛi ni hãa mi miniyenii* kɛ minu,Mikooloo hetsɔi kɛ miklala, mimu kɛ midãa lɛ.’
6 No hewɔ lɛ, mikɛ ŋmei tsei baafo afabaŋ kɛtsĩ ogbɛ lɛ;Ni matswa tɛ gbogbo mawo lɛ,Koni ekana enanegbɛi lɛ.
7 Ebaatiu mɛi ni sumɔɔ lɛ waa lɛ, shi eninaŋ amɛ;+Ebaatao amɛ, shi enaŋ amɛ.
Ni ebaakɛɛ akɛ, ‘Maku misɛɛ kɛya miklɛŋklɛŋ wu lɛ ŋɔɔ,+Ejaakɛ nakai beiaŋ lɛ, nibii amli hi hã mi fe amrɔ nɛɛ.’+
8 Eleee akɛ miji mɔ ni hã lɛ ŋmaa*+ kɛ wain hee kɛ mu lɛ,Ni eleee akɛ miji mɔ ni hã lɛ jwiɛtɛi babaooKɛ shika tsuru ní amɛkɛtsu nii yɛ Baal jamɔ mli lɛ.+
9 ‘No hewɔ lɛ, maku misɛɛ ni mashɔ̃ miŋmaa lɛ yɛ ebe lɛ mliKɛ miwain hee lɛ hu, yɛ ebe ni ato lɛ mli,+Ni mashɔ̃ mikooloo hetsɔi kɛ miklala ni ekɛhaa eyayaiaŋ lɛ.
10 Agbɛnɛ, majie eyayaiaŋ kpo faŋŋ yɛ mɛi ni sumɔɔ lɛ waa lɛ ahiɛ,Ni mɔ ko mɔ ko ejieŋ lɛ yɛ midɛŋ.+
11 Mahã emiishɛɛnamɔ lɛ fɛɛ,Egbii juji lɛ+ kɛ enyɔji* hei lɛ kɛ ehejɔɔmɔ gbii lɛ kɛ egbijurɔyelii lɛ fɛɛ sɛɛ afo.
12 Ni mafite ewain tsei kɛ egbami tsei lɛ ní ewie yɛ amɛhe akɛ:
“Enɛɛmɛi ji minyɔmɔwoo ní mɛi ni sumɔɔ mi waa lɛ kɛhã mi” lɛ;Ni mahã amɛtsɔ koo,Ni ŋa mli kooloi baaye.
13 Mahã ebabu ehe akɔntaa ehã mi yɛ gbii ni ekɛshã afɔlei ehã Baal amagai lɛ hewɔ,+Be mli ni ekɛ egai kɛ ehewulamɔ nibii saa ehe, ní etiuɔ mɛi ni sumɔɔ lɛ waa lɛ,Ní mi lɛ, ehiɛ kpa minɔ lɛ,’+ Yehowa kɛɛ.
14 ‘No hewɔ lɛ, makɔne eyiŋ,Manyiɛ ehiɛ kɛya ŋa lɛ nɔ,Ni mawie bɔ ni baata etsuiŋ.
15 Mikɛ ewain ŋmɔji lɛ baaku sɛɛ ahã lɛ kɛjɛ nakai be lɛ nɔ kɛyaa,+Kɛ Akor Jɔɔ+ lɛ hu akɛ shinaa ni atsɔɔ mli kɛnáa hiɛnɔkamɔ;Ebaahere nɔ yɛ jɛmɛ tamɔ efee yɛ eblayeiaŋ gbii lɛ amli lɛ,Tamɔ gbi ni eje Ejipt shikpɔŋ lɛ nɔ eba lɛ.+
16 Ni nakai gbi lɛ nɔ lɛ,’ Yehowa kɛɛ,‘Obaatsɛ mi Miwu, ni otsɛŋ mi Minuŋtsɔ* dɔŋŋ.’
17 ‘Majie Baal amagai lɛ agbɛ́ii lɛ kɛje edaaŋ,+Ni akɛ amɛgbɛ́i kaiŋ amɛ dɔŋŋ.+
18 Nakai gbi lɛ nɔ lɛ, mikɛ ŋa mli kooloi,+Kɛ ŋwɛi loofɔji kɛ shikpɔŋ lɛ nɔ nibii ni wamɔɔ+ lɛ baakpaŋ kpaŋmɔ yɛ amɛhewɔ;Ni majie gãi kɛ klante kɛ tawuu kɛje shikpɔŋ lɛ nɔ,+Ni mahã amɛbumɔ shi* shweshweeshwe.+
19 Mabi oshi* mahã mihe kɛya naanɔ;Ni mabi oshi* mahã mihe yɛ jalɛ kɛ jalɛsaneyeli mli,Yɛ suɔmɔ ni tsakeee kɛ mɔbɔnalɛ mli.+
20 Mabi oshi* mahã mihe yɛ anɔkwayeli mli,Ni bɔ fɛɛ bɔ ni fee lɛ, obaaná ole Yehowa.’+
21 ‘Nakai gbi lɛ nɔ lɛ,’ Yehowa kɛɛ,‘Mahere ŋwɛi nɔ,Ni amɛ hu amɛbaahere shikpɔŋ lɛ nɔ;+
22 Ni shikpɔŋ lɛ baahere ŋmaa kɛ wain hee kɛ mu lɛ nɔ;Ni amɛ hu amɛbaahere Yezreel* nɔ.+
23 Madu lɛ tamɔ dumɔwu yɛ shikpɔŋ lɛ nɔ mahã mihe,+Ni lɛ mɔ ni anaaa lɛ mɔbɔ lɛ, mana lɛ mɔbɔ;*Ni makɛɛ mɛi ni jeee mimaŋ* lɛ akɛ: “Mimaŋ ji nyɛ,”+
Ni amɛ hu amɛbaakɛɛ akɛ: “Mi-Nyɔŋmɔ ji bo.”’”+
Shishigbɛ Niŋmaa
^ Loo “ejeŋba sha; ejeŋba ni ekpɔtɔ.”
^ Loo “jeŋba sha; jeŋba ni ekpɔtɔ.”
^ Loo “jeŋba sha; jeŋba ni ekpɔtɔ.”
^ Hebri sht. ŋm., “miblodo.”
^ Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
^ Loo “enyɔɔŋtserei.”
^ Loo “Mi-Baal.”
^ Loo “amɛhi shi.”
^ Loo “matsɛ ohe baa.”
^ Loo “Matsɛ ohe baa.”
^ Loo “Matsɛ ohe baa.”
^ Eshishi ji, “Nyɔŋmɔ Baadu Dumɔwu.”
