Wolo Ni Akɛmaje Efesobii Lɛ 4:1-32
4 No hewɔ lɛ, mi ni awo mi tsuŋ+ yɛ Nuŋtsɔ lɛ hewɔ lɛ, miikpa nyɛ fai ni nyɛnyiɛ bɔ ni sa+ tsɛmɔ ni akɛtsɛ nyɛ lɛ,
2 yɛ heshibaa*+ kɛ mlijɔlɛ fɛɛ mli, yɛ tsuishitoo mli,+ ni nyɛná tsui nyɛhãhãa nyɛhe yɛ suɔmɔ mli,+
3 ni nyɛbɔa mɔdɛŋ waa nyɛhiɛa ekomefeemɔ ni nyɛtsɔ mumɔ lɛ nɔ nyɛná lɛ mli, yɛ toiŋjɔlɛ ni tamɔ kpãa ni fiɔ nyɛ efeɔ nyɛ ekome lɛ mli.+
4 Gbɔmɔtso kome yɔɔ,+ kɛ mumɔ kome,+ tamɔ bɔ nɔŋŋ ni hiɛnɔkamɔ kome+ ji nɔ ni yɔɔ tsɛmɔ ni akɛtsɛ nyɛ lɛ mli lɛ;
5 Nuŋtsɔ kome,+ hemɔkɛyeli kome, baptisimɔ kome;
6 Nyɔŋmɔ kome kɛ mɛi fɛɛ a-Tsɛ kome, mɔ ni ta nii fɛɛ nɔ, ni etsɔɔ mɛi fɛɛ anɔ etsuɔ nii, ni etsuɔ nii yɛ mɛi fɛɛ amli lɛ.
7 Agbɛnɛ, wɔteŋ mɔ fɛɛ mɔ lɛ, akɛ dromɔ ehã lɛ yɛ bɔ ni Kristo lɛ susu dromɔ nikeenii lɛ ehã lɛ lɛ naa.+
8 Ejaakɛ ekɛɔ akɛ: “Be ni ekwɔ kɛtee ŋwɛi lɛ, eŋɔ mɛi nom kɛtee; ekɛ hii hã akɛ nikeenii.”+
9 Agbɛnɛ, mɛni wiemɔ ni ji “ekwɔ” lɛ tsɔɔ? Ani jeee nɔ ni etsɔɔ nɔŋŋ ji akɛ, ekpeleke shi hu kɛba shishi, ni ji shikpɔŋ lɛ nɔ lɛ?
10 Mɔ ni kpeleke shi lɛ, lɛ nɔŋŋ ji mɔ ni kwɔ kɛtee+ he ko ni kwɔ kwraa fe ŋwɛii fɛɛ lɛ,+ koni ewo nibii fɛɛ obɔ lɛ.
11 Ekɛ mɛi komɛi hã akɛ bɔfoi,+ mɛi komɛi akɛ gbalɔi,+ mɛi komɛi akɛ sane kpakpa shiɛlɔi,*+ mɛi komɛi akɛ tookwɛlɔi kɛ tsɔɔlɔi,+
12 kɛhã mɛi krɔŋkrɔŋi lɛ ajajemɔ,* kɛhã sɔɔmɔ nitsumɔ, kɛ agbɛnɛ hu, koni akɛtswa Kristo lɛ gbɔmɔtso lɛ ama shi,+
13 kɛyashi be ni wɔ fɛɛ wɔbaafee ekome yɛ hemɔkɛyeli lɛ kɛ Nyɔŋmɔ Bi lɛ he nilee krɔŋŋ lɛ mli, ni wɔtsɔ nuu ni eda+ kɛshɛ Kristo lɛ dalɛ lɛ he.
14 No hewɔ lɛ, esaaa akɛ wɔyaa nɔ wɔfeɔ wɔnii tamɔ gbekɛbii dɔŋŋ, mɛi ni hãa tsɔɔmɔ fɛɛ tsɔɔmɔ ni tamɔ kɔɔyɔɔ lɛ tswaa amɛ kɛyaa kɛbaa oookɛɛ ŋshɔkei miitswa amɛ ni eeloo amɛ kɛmiiya kɛmiiba lɛ,+ tsɔɔmɔi ni damɔ ŋaa fɔŋ ni gbɔmɛi toɔ kɛ amalei ni asɔ̃ɔ yɛ ŋaa mli ni akɛlakaa mɛi lɛ anɔ lɛ.
15 Shi moŋ, be mli ni wɔwieɔ anɔkwale lɛ, nyɛhãa wɔtsɔa suɔmɔ nɔ wɔdaraa yɛ nibii fɛɛ amli kɛbotea mɔ ni ji yitso lɛ, ni ji Kristo lɛ mli.+
16 Lɛ emli gbɔmɔtso lɛ henii lɛ fɛɛ+ tsɔɔ talɔ fɛɛ talɔ nɔ ekɛ nɔ ni he hiaa hãa, ni amɛtsaratsaraa amɛhe jogbaŋŋ, ni amɛfeɔ ekome kɛtsuɔ nii. Kɛ́ gbɔmɔtso lɛ henii lɛ eko fɛɛ eko miitsu nii jogbaŋŋ lɛ, ehãa gbɔmɔtso lɛ daa, be mli ni gbɔmɔtso lɛ tswaa ehe emaa shi yɛ suɔmɔ mli lɛ.+
17 No hewɔ lɛ, nɔ ni miwieɔ ni miyeɔ he odase yɛ Nuŋtsɔ lɛ mli nɛ, akɛ nyɛkayaa nɔ nyɛnyiɛa tamɔ bɔ ni jeŋmaji lɛ hu nyiɛɔ+ yɛ amɛjwɛŋmɔi ni wooo yibii*+ lɛ amli lɛ dɔŋŋ.
18 Amɛjwɛŋmɔ mli ewo duŋ, ni amɛtse amɛhe kɛje Nyɔŋmɔ wala lɛ he, ejaakɛ amɛbɛ nilee yɛ amɛmli, ni amɛtsui hu wa.*
19 Akɛni nɔ ko nɔ ko efeee amɛ hiɛgbele dɔŋŋ hewɔ lɛ, amɛkɛ amɛhe woɔ jeŋba gbonyo ni efeee mɔ hiɛgbele* mli,+ koni amɛkɛ amimyeli atsu muji nii srɔtoi fɛɛ.
20 Shi nyɛ lɛ, jeee nɛkɛ nyɛkase akɛ Kristo lɛ ji,
21 kɛ́ nyɛnu ehe, ni atsɔ enɔ atsɔɔ nyɛ nii lɛɛlɛŋ, yɛ anɔkwale lɛ ni Yesu tsɔɔ lɛ naa lɛ.
22 Atsɔɔ nyɛ ni nyɛjie subaŋ* momo+ lɛ ni kɛ nyɛtsutsu jeŋba lɛ kpãa gbee, ni aafite lɛ yɛ nibii ni eshweɔ ni lakaa nyɛ lɛ anaa lɛ nyɛshɛ nyɛfɔ̃.+
23 Ni nyɛyaa nɔ nyɛtsakea nyɛjwɛŋmɔ koni etsɔ ehee be fɛɛ be,*+
24 koni nyɛwo subaŋ* hee+ ni abɔ yɛ Nyɔŋmɔ suɔmɔ naa yɛ anɔkwa jalɛ kɛ anɔkwayeli krɔŋŋ mli lɛ.
25 No hewɔ lɛ, amrɔ nɛɛ ni nyɛjie lakamɔ nyɛshɛ nyɛfɔ̃ lɛ, nyɛteŋ mɔ fɛɛ mɔ kɛ enyɛmi gbɔmɔ awie anɔkwale,+ ejaakɛ wɔji gbɔmɔtso kome henii ni wɔteŋ mɔ fɛɛ mɔ yeɔ ebuaa mɔ kroko lɛ.+
26 Nyɛmli afua, shi nyɛkafea esha;+ nyɛkahãa hulu nyɔa shi be mli ni nyɛmli efu lolo;+
27 nyɛkahãa Abonsam gbɛ.*+
28 Julɔ lɛ ekaju dɔŋŋ; shi moŋ, etsu nii waa, ekɛ eniji atsu nitsumɔ kpakpa,+ koni ená nɔ ko ni ehã mɔ ni ehia lɛ lɛ eko.+
29 Wiemɔ ni ehiii* ko akaje nyɛnaa,+ shi moŋ nɔ ni hi ni tswaa mɔ emaa shi, yɛ hiamɔ ni yɔɔ lɛ naa, koni mɛi ni nuɔ lɛ aná nɔ ko ni sɛɛnamɔ yɔɔ he.+
30 Agbɛnɛ hu, nyɛkahãa Nyɔŋmɔ mumɔ krɔŋkrɔŋ lɛ werɛ hoa ehe,*+ nɔ ni akɛsɔo nyɛnaa+ kɛhã gbi ni abaatsɔ kpɔmɔnɔ lɛ nɔ ajie nyɛ lɛ.+
31 Nyɛjiea mlijoomɔ,+ kɛ mlila, kɛ mlifu, kɛ bolɔmɔ, kɛ wiemɔ fɔŋ fɛɛ,+ kɛ nɔ fɛɛ nɔ ni yeɔ mɔ awui+ lɛ yɛ nyɛhe nyɛshɛrɛa nyɛshwiea.
32 Shi moŋ nyɛmli ahia ahãa nyɛhe, nyɛmusuŋ atsɔa nyɛ yɛ nyɛhe,+ nyɛkɛkea nyɛhe tswaa, tamɔ bɔ ni Nyɔŋmɔ hu tsɔ Kristo nɔ ekɛke nyɛ tswaa lɛ.+
Shishigbɛ Niŋmaa
^ Loo “heshibaa jwɛŋmɔ.”
^ Loo “sane kpakpa jajelɔi.”
^ Loo “atsɔsemɔ.”
^ Loo “amɛjwɛŋmɔi foji.”
^ Greek sht. ŋm., “egbo.”
^ Loo “nyɛnyɛŋtswibɔɔ.” Greek, a·selʹgei·a. Kwɛmɔ Wiemɔi Titrii Amligbalamɔ lɛ.
^ Greek sht. ŋm., “gbɔmɔ.”
^ Loo “nyɛyaa nɔ nyɛhãa hewalɛ ni kudɔɔ nyɛjwɛŋmɔ lɛ atsɔa ehee.” Greek sht. ŋm., “nyɛyaa nɔ nyɛhãa nyɛjwɛŋmɔ mumɔ lɛ atsɔa ehee.”
^ Greek sht. ŋm., “gbɔmɔ.”
^ Loo “ni nyɛkaŋmɛa Abonsam gbɛ.”
^ Loo “Wiemɔ kpɔtɔi.”
^ Loo “nyɛkafea nɔ ko ni baahã Nyɔŋmɔ mumɔ krɔŋkrɔŋ lɛ aye awerɛho.”
