Bɔfoi Lɛ Anitsumɔi 24:1-27
24 Gbii enumɔ sɛɛ lɛ, osɔfonukpa Anania+ kɛ maŋ lɛ mli onukpai komɛi kɛ mɔ ko ni damɔɔ maŋ hiɛ ewieɔ* ni atsɛɔ lɛ Tertulo lɛ kpeleke shi kɛba, ni amɛbawie sane ni amɛyɔɔ yɛ Paulo he lɛ amɛtsɔɔ amralo lɛ.+
2 Be ni atsɛ Tertulo lɛ, ekɛ saji bɔi enɔshwiemɔ ekɛɛ:
“Akɛni kɛtsɔ onɔ lɛ wɔná toiŋjɔlɛ babaoo, ni bɔ ni okwɛɔ nii kɛyaa shɔŋŋ lɛ ehã tsakemɔi miiba jeŋmaŋ nɛɛ mli hewɔ lɛ,
3 Anunyamtsɛ Felike, wɔdaa bo shi babaoo be fɛɛ be kɛ yɛ he fɛɛ he hu yɛ enɛɛmɛi fɛɛ ahewɔ.
4 Shi bɔ ni afee ni mikatsĩ onaa be kakadaŋŋ lɛ, miikpa bo fai yɛ omlihilɛ lɛ naa ni obo wɔ toi fioo.
5 Ejaakɛ wɔna akɛ nuu nɛɛ gbaa mɛi anaa,*+ ni ewoɔ Yudafoi fɛɛ ni yɔɔ shikpɔŋ lɛ nɔ fɛɛ lɛ ayiŋ ni amɛtse atua,+ ni eji mɔ otu yɛ Nazaretbii lɛ ajamɔ kuu lɛ mli.+
6 Eka hu akɛ ebaabule sɔlemɔ shĩa lɛ, no hewɔ lɛ, wɔmɔ lɛ.+
7 * ——
8 Kɛ́ bo diɛŋtsɛ obibii lɛ saji lɛ, obaana akɛ saji ni wɔkɛshwieɔ enɔ nɛɛ fɛɛ yɛ mli.”
9 Kɛkɛ ni Yudafoi lɛ hu kɛ amɛnaa wo mli ni amɛma nɔ mi akɛ nibii nɛɛ yɛ mli.
10 Be ni amralo lɛ kɛ eyitso fee okadi etsɔɔ Paulo akɛ ewie lɛ, Paulo here nɔ akɛ:
“Akɛni mile jogbaŋŋ akɛ okojo jeŋmaŋ nɛɛ afii babaoo hewɔ lɛ, miyɛ he miishɛɛ akɛ majie minaa yɛ ohiɛ.+
11 Kɛ́ obi mli lɛ, obaana akɛ be ni mikwɔ kɛtee Yerusalem koni miyajá Nyɔŋmɔ lɛ, aaafee gbii 12 nɛ;+
12 ni amɛnaaa akɛ mikɛ mɔ ko miitaa naa yɛ sɔlemɔ shĩa lɛ, ni amɛnaaa hu akɛ miiwo maŋbii lɛ ayiŋ yɛ kpeehei lɛ loo yɛ maŋ lɛ mli fɛɛ koni amɛfee basabasa.
13 Ni saji ni amɛkɛshwieɔ minɔ amrɔ nɛɛ, amɛnyɛŋ naa amɛtsɔɔ yɛ ohiɛ akɛ anɔkwale ni.
14 Shi mikpɛlɛɔ enɛ nɔ yɛ ohiɛ akɛ mihiɔ shi yɛ shihilɛ gbɛ ni amɛtsɛɔ lɛ jamɔ kuu ko lɛ naa, ni nɛkɛ shihilɛ gbɛ nɛɛ nɔ nɔŋŋ mitsɔɔ miŋɔɔ sɔɔmɔ krɔŋŋ mihãa mitsɛmɛi lɛ a-Nyɔŋmɔ lɛ,+ ni miheɔ nibii fɛɛ ni aŋmala yɛ Mla lɛ kɛ Gbalɔi lɛ amli lɛ miyeɔ.+
15 Ni miyɛ hiɛnɔkamɔ yɛ Nyɔŋmɔ mli, hiɛnɔkamɔ ni mɛnɛɛmɛi hu kwɛɔ gbɛ lɛ, akɛ abaatee jalɔi kɛ mɛi ni ejaaa+ fɛɛ shi.+
16 Enɛ hewɔ lɛ, be fɛɛ be lɛ, mibɔɔ mɔdɛŋ waa akɛ mahiɛ henilee ni he tse* mli yɛ Nyɔŋmɔ kɛ gbɔmɛi fɛɛ ahiɛ.+
17 Agbɛnɛ, afii saŋŋ sɛɛ lɛ, miba koni mikɛ ejurɔfeemɔ nibii+ abahã mimaŋ lɛ, ni mikɛ afɔlei hu ahã.
18 Be ni mitsuɔ nibii nɛɛ ahe nii lɛ, amɛna mi akɛ mifee mihe krɔŋkrɔŋ yɛ kusum naa yɛ sɔlemɔ shĩa lɛ,+ shi amɛnaaa mi kɛ kuu ko, loo akɛ miihã aafee basabasa. Shi Yudafoi komɛi ni jɛ Asia kpokpaa lɛ nɔ yɛ jɛmɛ,
19 mɛi ni kɛ́ amɛyɛ sane ko yɛ mihe lɛɛlɛŋ lɛ, kulɛ esa akɛ amɛbadamɔ ohiɛ ni amɛjaje nɔ ni amɛyɔɔ yɛ mihe lɛ.+
20 Aloo, hã hii ni yɔɔ biɛ lɛ diɛŋtsɛ atsɔɔ nɔ fɔŋ ni amɛna yɛ mihe be ni midamɔ Sanhedrin* lɛ hiɛ lɛ,
21 akɛ ja nɔ kome nɛɛ ni be ni midamɔ amɛteŋ lɛ mibo akɛ: ‘Gbohiiashitee lɛ hewɔ akojoɔ mi yɛ nyɛhiɛ ŋmɛnɛ gbi nɛɛ!’ lɛ kɛkɛ.”+
22 Shi akɛni Felike le anɔkwa saji ni kɔɔ Gbɛ+ nɛɛ he lɛ jogbaŋŋ hewɔ lɛ, etsi amɛ eto ni ekɛɛ: “Be fɛɛ be ni tatsɛ Lisia baakpeleke shi kɛba lɛ, makpɛ yiŋ yɛ nyɛsaji nɛɛ ahe.”
23 Ni ekɛ famɔi hã asraafoiatsɛ lɛ akɛ ewo nuu lɛ tsuŋ, shi ehã ená hejɔlɛ yɛ tsuŋwoohe lɛ, ni akɛ, eŋmɛ Paulo webii lɛ gbɛ koni amɛbasɔmɔ lɛ.
24 Gbii komɛi asɛɛ lɛ, Felike kɛ eŋa Drusila ni ji Yuda yoo lɛ ba, ni ehã ayaŋɔ Paulo kɛba, ni ebo nɔ ni eyɔɔ kɛɛmɔ yɛ Kristo Yesu mli hemɔkɛyeli ni abaaná lɛ he lɛ toi.+
25 Shi be ni Paulo wie jalɛ kɛ henɔyeli kɛ kojomɔ ni baaba lɛ he lɛ,+ Felike she gbeyei ni ekɛɛ lɛ akɛ: “Bo lɛ yaa dã, shi kɛ́ miná hegbɛ lɛ, matsu ni abatsɛ bo ekoŋŋ.”
26 Nakai beiaŋ nɔŋŋ lɛ, eekpa gbɛ akɛ Paulo baahã lɛ shika. No hewɔ lɛ, etsuɔ ni ayatsɛɔ lɛ kɛbaa kpitiokpitio ni ekɛ lɛ gbaa sane.
27 Shi afii enyɔ sɛɛ lɛ, Porkio Festo baye Felike sɛɛ; ni akɛni Felike miisumɔ ni ehiɛ aba nyam yɛ Yudafoi lɛ ahiɛ hewɔ lɛ,+ eshi Paulo yɛ tsuŋwoohe lɛ.
Shishigbɛ Niŋmaa
^ Loo “lɔyafonyo ko.”
^ Loo “haoɔ mɛi.” Greek sht. ŋm., “tsɛŋemɔ hela ni gbeɔ mɔ ji lɛ.”
^ Kwɛmɔ Saji Krokomɛi A3 lɛ.
^ Loo “henilee ni shwamɔ ko bɛ he.”
^ Sanhedrin lɛ ji Yudafoi asaneyelihe wulu lɛ.
