Petro Klɛŋklɛŋ Wolo Lɛ 2:1-25
2 No hewɔ lɛ, nyɛjiea nibii gbohii+ kɛ lakamɔ kɛ osatofeemɔ kɛ hetsɛ̃ fɛɛ, kɛ agbɛnɛ hu, mɔfitemɔ fɛɛ yɛ nyɛhe nyɛshɛrɛa nyɛshwiea.
2 Akɛ abifabii ni afɔ amɛ ehee lɛ,+ nyɛhãa wiemɔ lɛ mli mliki ni afutuko mli* lɛ abaa nyɛtsine, koni nyɛtsɔ no nɔ nyɛdara kɛná yiwalaheremɔ,+
3 kɛ́ nyɛsa nyɛnaa* ni nyɛna akɛ Nuŋtsɔ lɛ mli hi lɛ.
4 Be mli ni nyɛbaa eŋɔɔ, akɛ tɛ ni hiɛ kã ni gbɔmɛi ekpoo,+ shi Nyɔŋmɔ ehala lɛ, ni ejara wa yɛ ehiɛ lɛ,+
5 nyɛ hu, akɛ tɛi ni hiɛ kamɔ lɛ, aatswa nyɛ aama shi akɛ mumɔŋ tsũ+ koni nyɛtsɔmɔ osɔfoi aweku krɔŋkrɔŋ, bɔ ni afee ni nyɛtsɔ Yesu Kristo nɔ nyɛkɛ mumɔŋ afɔlei+ ni Nyɔŋmɔ náa he miishɛɛ ahã.+
6 Ejaakɛ eyɛ Ŋmalɛ lɛ mli akɛ: “Naa! Mikɛ tɛ ni ahala, faneshi koŋtɛ ni jara wa, miiŋmɛ shi yɛ Zion, ni mɔ fɛɛ mɔ ni heɔ enɔ eyeɔ lɛ nine enyɛŋ shi* kɔkɔɔkɔ.”+
7 No hewɔ lɛ, akɛni nyɛhe Nuŋtsɔ lɛ nɔ nyɛye hewɔ lɛ, ejara wa hã nyɛ; shi mɛi ni heee yeee lɛ, “tɛ lɛ ni tsumalɔi lɛ shɛ amɛfɔ̃ lɛ,+ no nɔŋŋ etsɔ koŋtɛ ni he hiaa fe fɛɛ* lɛ”+
8 kɛ “tɛmɔ tɛ kɛ nanetɔ̃tɔmɔ tɛsaa lɛ.”+ Amɛnane miitɔ̃tɔ, ejaakɛ amɛbooo wiemɔ lɛ toi. Enɛ nɔŋŋ ato amɛ ahã.
9 Shi nyɛ lɛ, nyɛji “weku ni ahala, osɔfoi ni ji maŋtsɛmɛi, jeŋmaŋ krɔŋkrɔŋ,+ mɛi ni ekɛfee enii ni eshwɛɛɛ he,+ koni nyɛjaje” mɔ ni tsɛ nyɛ kɛjɛ duŋ mli kɛba lɛ diɛŋtsɛ enaakpɛɛ la+ lɛ he lɛ “agbojei*+ lɛ nyɛtsɔɔ yɛ he fɛɛ he.”
10 Ejaakɛ be ko ni eho lɛ, nyɛjeee Nyɔŋmɔ maŋ, shi amrɔ nɛɛ, nyɛji Nyɔŋmɔ maŋ;+ be ko ni eho lɛ, anaaa nyɛ mɔbɔ, shi amrɔ nɛɛ, ana nyɛ mɔbɔ.+
11 Mɛi ni asumɔɔ, akɛ maŋsɛɛbii kɛ gbɔi lɛ,+ miiwo nyɛ hewalɛ koni nyɛya nɔ nyɛtsi nyɛhe kɛje nibii ni heloo lɛ shweɔ+ ni wuɔ ta eshiɔ nyɛ lɛ*+ ahe.
12 Nyɛyaa nɔ nyɛbaa nyɛjeŋ jogbaŋŋ yɛ jeŋmajiaŋbii lɛ ateŋ,+ koni be mli ni amɛkɛ sane fɔ̃ɔ nyɛnɔ akɛ nyɛji efɔŋfeelɔi lɛ, amɛ diɛŋtsɛ amɛna nyɛnitsumɔi kpakpai lɛ,+ ni no ahã amɛwo Nyɔŋmɔ hiɛ nyam yɛ gbi ni ebaaba ebakwɛ bɔ ni nibii yɔɔ hã lɛ nɔ.
13 Nuŋtsɔ lɛ hewɔ lɛ, nyɛbaa nyɛhe shi nyɛwoa nibii fɛɛ ni gbɔmɛi efee* lɛ ashishi,+ kɛ́ eji maŋtsɛ+ ni nɔ kwɔ fe nyɛ jio,
14 amralofoi ni etsu amɛ koni amɛyagbala efɔŋfeelɔi atoi ni amɛjie mɛi ni feɔ ekpakpa lɛ ayi jio.+
15 Ejaakɛ eji Nyɔŋmɔ suɔmɔnaa nii akɛ nyɛtsɔ ekpakpa ni nyɛfeɔ lɛ nɔ nyɛhã gbɔmɛi ni bɛ jwɛŋmɔ ni wieɔ kwashiai awiemɔ lɛ afee dioo.*+
16 Nyɛfea nyɛnii akɛ mɛi ni jeee nyɔji,+ ni nyɛkɛ nyɛheyeli lɛ atsu nii akɛ Nyɔŋmɔ nyɔji,+ shi jeee akɛ nɔhaanɔ* kɛhã efɔŋfeemɔ.+
17 Nyɛkɛ woo ahãa gbɔmɛi srɔtoi fɛɛ,+ nyɛsumɔa nyɛmimɛi asafo muu lɛ fɛɛ,*+ nyɛshea Nyɔŋmɔ gbeyei,+ nyɛkɛ woo ahãa maŋtsɛ lɛ.+
18 Tsuji lɛ, amɛba amɛhe shi amɛwo amɛnuŋtsɔmɛi ashishi kɛ gbeyeishemɔ ni sa fɛɛ,+ jeee nuŋtsɔmɛi ni hi ni nuɔ nii ashishi lɛ pɛ amɛfee enɛ amɛhã, shi moŋ mɛi ni ewa akɛ abaasa amɛhiɛ lɛ hu.
19 Ejaakɛ kɛ́ henilee yɛ Nyɔŋmɔ hiɛ hewɔ lɛ, mɔ ko miifi shi yɛ shihilɛ ni mli wa mli* ni eena amanehulu bɔ ni ejaaa gbɛ lɛ, enɛ sa jogbaŋŋ yɛ Nyɔŋmɔ hiɛ.+
20 Ejaakɛ kɛ́ nyɛfee esha ni ayi nyɛ ni nyɛdamɔ naa lɛ, mɛɛ sɛɛnamɔ yɔɔ he?+ Shi kɛ́ ekpakpa ni nyɛfeɔ lɛ hewɔ nyɛnaa nɔ, ni nyɛdamɔ naa lɛ, enɛ sa Nyɔŋmɔ hiɛ jogbaŋŋ.+
21 Anɔkwa, gbɛ nɛɛ nɔŋŋ hewɔ atsɛ nyɛ, ejaakɛ Kristo po na nɔ yɛ nyɛhewɔ,+ ni efee nɔkwɛmɔnɔ efɔ̃ shi ehã nyɛ koni nyɛnyiɛ enanemaahei lɛ asɛɛ kpaakpa.+
22 Efeee esha ko,+ ni anaaa amale ko yɛ edaaŋ hu.+
23 Be ni ajɛɔ lɛ lɛ,+ ejɛɛɛ mɔ ko etooo najiaŋ.+ Be ni enaa nɔ lɛ,+ ewieee akɛ ebaafee mɔ ko nɔ ko, shi moŋ etu ehe ewo mɔ ni kojoɔ+ yɛ jalɛ naa lɛ dɛŋ.
24 Lɛ nɔŋŋ etere wɔhe eshai+ lɛ yɛ lɛ diɛŋtsɛ egbɔmɔtso lɛ mli yɛ tso jaŋŋ lɛ nɔ,+ koni wɔgboi wɔhã eshai* ni wɔhi shi wɔhã jalɛ. Ni “atsɔ ehe faji lɛ anɔ atsa nyɛ.”+
25 Ejaakɛ kulɛ nyɛtamɔ gwantɛŋi ni edu gbɛ,+ shi amrɔ nɛɛ, nyɛku nyɛsɛɛ kɛba tookwɛlɔ+ kɛ nɔkwɛlɔ ni kwɛɔ nyɛsusumai anɔ* lɛ ŋɔɔ.
Shishigbɛ Niŋmaa
^ Loo “fufɔ krɔŋŋ.”
^ Loo “nyɛkpa shi.”
^ Greek sht. ŋm., “hiɛ eshwieŋ shi.”
^ Greek sht. ŋm., “koŋ lɛ yitso.”
^ Greek sht. ŋm., “jeŋbai lɛ,” ni ji, esui kɛ enifeemɔi ni sa yijiemɔ.
^ Loo “susuma lɛ.”
^ Loo “gbɔmɛi agbɛjianɔtoo fɛɛ gbɛjianɔtoo.”
^ Greek sht. ŋm., “nyɛwo” gbɔmɛi ni bɛ jwɛŋmɔ ni wieɔ kwashiai awiemɔ lɛ “anaabu kotoku.”
^ Loo “naajiemɔ.”
^ Greek sht. ŋm., “nyɛmifeemɔ lɛ.”
^ Loo “yɛ awerɛhoyeli mli; yɛ piŋmɔ mli.”
^ Loo “wɔkɛ eshai afo tako mli.”
^ Loo “nyɛwala nɔ.”
