Nyankopɔn tum hu beebiara, na beebiara so a ɔpɛ no obotum edzi dwuma wɔ hɔ. (Mbɛbusɛm 15:3; Hebrewfo 4:13) Naaso, Bible no nnkyerɛkyerɛ dɛ Nyankopɔn tse dɛ mframa bi a ɔwɔ beebiara anaadɛ ɔhyɛ adze biara mu. Mbom no, Bible no ma yehu dɛ Nyankopɔn wɔ beebi pɔtsee a ɔtse.

•   Mbrɛ Nyankopɔn si tse: Nyankopɔn yɛ sunsum. (John 4:​24) Nyimpa dasanyi runntum mmfa n’enyiwa nnhu no. (John 1:​18) Enyido-adzehu ahorow a ɔwɔ Bible mu a ɔfa Nyankopɔn ho no ma yehu dɛ Nyankopɔn wɔ beebi pɔtsee a ɔtse. Bible no nnkã dɛ Nyankopɔn wɔ beebiara.​—Isaiah 6:1, 2; Nyikyerɛ 4:2, 3, 8.

•   Beebi a Nyankopɔn tse: Beebi a Nyankopɔn tse no, nyimpa runntum mmfa n’enyiwa nnhu. Nyankopɔn ne tsenabea “wɔ ɔsor.” (1 Ahemfo 8:30) Bible no bɔ hɛn amandzɛɛ dɛ mber bi, abɔfo no ‘bae beyii hɔnho edzi wɔ Jehovah a enyim,’ na asɛm yi ma yehu dɛ Nyankopɔn wɔ beebi pɔtsee a ɔtse.​—Job 1:6.

Sɛ Nyankopɔn nnyi beebiara dze a, ana obotum adwen moho ankasa?

 Nyew. Nyankopɔn dwen nyimpa ho dɛ ankorankor. Ɔwɔ mu dɛ ne tsenabew wɔ sor dze, naaso nyimpa a wɔwɔ asaase do a wɔpɛ dɛ wɔsɔ n’enyi no, ɔboa hɔn. (1 Ahemfo 8:39; 2 Mbermunsɛm 16:9) Ɔwodze hwɛ mbrɛ Jehovah si dwen hɔn a wɔsom no wɔ nokwar mu no ho hwɛ:

•   Aber a abɔ no mpaa: Jehovah tum tse no amonmu hɔ ara.​—2 Mbermunsɛm 18:31.

•   Aber a abotow no: ‘Jehovah bɛn hɔn a hɔn akoma abobɔ, na ɔgye hɔn a hɔn sunsum abotow nkwa.’​—Ndwom 34:18.

•   Aber a ihia akwankyerɛ: Jehovah nam N’asɛm Bible no do ‘bɛma esũa na ɔakyerɛkyerɛ wo.’​—Ndwom 32:8.

Ndaadaasɛm a ɔma nkorɔfo nya adwen dɛ Nyankopɔn wɔ beebiara

 Ndaadaasɛm: Nyankopɔn wɔ abɔdze biara mu.

 Nokwasɛm: Nyankopɔn nntse asaase yi do anaa hɛn amansan a hɛn enyi tua yi ne fã biara mu. (1 Ahemfo 8:27) Ɔyɛ nokwar, nworaba na abɔdze afofor “da Nyame n’enyimnyam edzi.” (Ndwom 19:1) Naaso, dɛ mbrɛ obi a ɔdorɔw mfonyin nntse no mfonyin ahorow a ɔadorɔdorɔw no mu no, dɛmara so na Nyankopɔn nntse n’abɔdze biara mu. Dza mfonyin ahorow no yɛ nye dɛ, ɔma yehu birirbi fa nyia ɔdorɔwee no ho. Dɛmara so na ndzɛmba a etwa hɛnho ehyia a yɛdze hɛn enyiwa hu no ma yehu Ɔbɔadze “no ho adze a wonnhu no,” tse dɛ no tum, ne nyansaa nye no dɔ.​—Romefo 1:20.

 Ndaadaasɛm: Sɛ Nyankopɔn botum ayɛ tum nyina wura na oeehu biribiara a ɔrokɔ do a, gyedɛ ɔwɔ beebiara.

 Nokwasɛm: Nyankopɔn no sunsum krɔnkrɔn no yɛ n’adzeyɛ tum, anaadɛ no tum a ɔreyɛ edwuma. Nyankopɔn nam no sunsum krɔnkrɔn no do botum ehu dza ɔrokɔ do wɔ beebiara, na ɔaayɛ dza ɔpɛ biara wɔ beebiara a ɔpɛ, na obotum ayɛ no aber biara a ɔpɛ so; ne nyina mu no, onnhia dɛ nankasa kɔ hɔ ana.​—Ndwom 139:7.

 Ndaadaasɛm: Ndwom 139:8 ma yehu dɛ Nyankopɔn wɔ beebiara osiandɛ ɔkã dɛ: “Sɛ mofow kɔ sor a, ewɔ hɔ: sɛ mekɛsɛw me kɛtɛ wɔ Sheol [anaa adakamaa mu] a, hwɛ, ewɔ hɔ.”

 Nokwasɛm: Dɛm kyerɛwsɛm yi rennkã beebi a Nyankopɔn wɔ ankasa ho asɛm. Mbom ɔyɛ awensɛm bi a ɔma yehu dɛ ɔmmfa ho beebiara a yɛhyɛ no, onnyi ekyirkyir dodoodow mma Nyankopɔn dɛ ɔbɔboa hɛn.