UKPEPN̄KPỌ 7
Nso Idi Obio Ubọn̄ Abasi?
1. Nso idi Obio Ubọn̄ Abasi?
Nso inam Jesus edi mfọnn̄kan Edidem?—MARK 1:40-42.
Obio Ubọn̄ Abasi edi ukara emi odude ke heaven. Enye ayada itie kpukpru ukara emi ẹdude idahaemi onyụn̄ okụt ete ke ẹnam uduak Abasi ke heaven ye ke isọn̄. Emi edi eti mbụk. Obio Ubọn̄ Abasi ayanam inyene eti ukara emi iyomde. Enye ayanam kpukpru owo ke isọn̄ emi ẹdiana kiet.—Kot Daniel 2:44; Matthew 6:9, 10; 24:14.
Kpukpru obio ẹnyene edidem. Jehovah emek Jesus Eyen esie ete edi Edidem Obio Ubọn̄ imọ.—Kot Ediyarade 11:15.
Se vidio emi Nso Idi Obio Ubọn̄ Abasi?
2. Nso inam Jesus edi mfọnn̄kan Edidem?
Eyen Abasi edi mfọnn̄kan Edidem sia enye ọfọn ido onyụn̄ ọsọn̄ọ ada ke se inende. (John 1:14) Enye onyụn̄ ekeme ndin̄wam mme owo sia enye editie ke heaven ikara isọn̄ emi. Ke enye ama ekeset ke n̄kpa, enye ama ọdọk aka heaven eketie ke ubọk nnasia Jehovah ebet. (Mme Hebrew 10:12, 13) Ekem Abasi ama ọnọ enye odudu nditọn̄ọ ukara.—Kot Daniel 7:13, 14.
3. Mmanie ẹditiene Jesus ẹkara?
Mbon emi ẹkotde “ndisana ikọt N̄kon̄n̄kan Abasi” ke Abasi ẹmek ete ẹtiene Jesus ẹkara ke heaven. (Daniel 7:27) Akpa mbon emi ẹkemekde ndidi ndisana ikọt Abasi ẹkedi mme anam-akpanikọ apostle Jesus. Jehovah ke osụk ememek mme anam-akpanikọ irenowo ye iban emi ẹdisịnede ke otu ndisana ikọt esie. Mmọ ẹdiset ye idem eke spirit ukem nte Jesus.—Kot John 14:1-3; 1 Corinth 15:42-44.
Owo ifan̄ ẹdika heaven? Jesus okokot mmọ “ekpri otuerọn̄.” (Luke 12:32) Owo 144,000 ẹdika heaven ikada ye Jesus ikara isọn̄ emi.—Kot Ediyarade 14:1.
4. Nso iketịbe ke ini Jesus ọkọtọn̄ọde ndikara?
Obio Ubọn̄ Abasi ọkọtọn̄ọ ndikara ke 1914. * Akpa n̄kpọ emi Jesus, kpa Edidem Obio Ubọn̄ emi, akanamde ekedi ndisio Satan ye mme demon esie nduọn̄ọ ke isọn̄. (Ediyarade 12:7-10, 12) Ọtọn̄ọde ke ini oro ke mfịna ubonowo ekenen̄ede okpon. Ekọn̄, akan̄, ndiọi udọn̄ọ emi ẹkemede ndibe owo, ye mme unyekisọn̄ ẹwụt ke Obio Ubọn̄ Abasi ọmọn̄ ọsọsọp akara ofụri isọn̄ emi.—Kot Luke 21:7, 10, 11, 31.
5. Nso ke Obio Ubọn̄ Abasi anam?
Etop Obio Ubọn̄ Abasi emi Mme Ntiense Jehovah ẹkwọrọde ke ofụri ererimbot ke anam mme owo ke kpukpru idụt ẹdiana kiet. Ata ediwak mbon oro ẹsụhọrede idem ke ẹsụk ibuot ẹnọ Jesus. Jesus emi edide Edidem Obio Ubọn̄ Abasi ayanyan̄a mmọ ke ini enye edisobode idiọk ererimbot emi. Mmọdo, kpukpru mbon oro ẹyomde mme edidiọn̄ Obio Ubọn̄ Abasi ẹkpenyene ndikpep ndisụk ibuot nnọ Jesus.—Kot Ediyarade 7:9, 14, 16, 17.
Obio Ubọn̄ emi ayada tọsịn isua kiet anam ofụri isọn̄ emi edi Paradise ọnọ mme owo ndidụn̄ nte Abasi akaduakde. Ekem, Jesus ọyọkpọn̄ ukara ọnọ Ete esie. (1 Corinth 15:24-26) Ndi enyene owo emi afo akpamade ndikwọrọ eti mbụk Obio Ubọn̄ emi nnọ?—Kot Psalm 37:10, 11, 29.
^ ikp. 6 Edieke oyomde ndinen̄ede mfiọk n̄kpọ mban̄a mme ntịn̄nnịm ikọ Bible emi ẹban̄ade 1914, se page 215 esịm 218 ke n̄wed Nso ke Bible Enen̄ede Ekpep?
