Mme Hebrew 10;1-39
10 Koro sia Ibet edide mbukpọn̄+ nti n̄kpọ eke ẹdidide, edi mîdịghe ata idem n̄kpọ, mme owo ikemeke ndida orụk uwa kiet emi mmọ ẹwade kpukpru ini ke isua ke isua nnam mbon oro ẹsan̄ade ẹkpere ẹfọn ẹma.+
2 Edieke ẹkpekemede, nte owo ikpetreke ndiwa mme uwa, koro mbon oro ẹnamde edisana utom, emi ẹma ẹkenam ẹsana ini kiet kpọt mîkpenyeneke aba ifiọk idiọkn̄kpọ?+
3 Edi ẹda mme uwa oro ẹnam owo ẹti mme idiọkn̄kpọ ke isua ke isua,+
4 koro iyịp nyara enan̄ ye eke ebot mîkemeke ndimen mme idiọkn̄kpọ mfep.+
5 Ntem ke ini enye odụkde ererimbot enye ọdọhọ ete: “‘Afo ukoyomke uwa ye enọ,+ edi ama eben̄e ikpọkidem ọnọ mi.+
6 Afo ukokopke inemesịt ke ofụri edifọp uwa ye uwa idiọkn̄kpọ.’+
7 Ekem ndọhọ nte, ‘Sese! mmedi (ẹwet ẹban̄a mi ke ikpan̄wed)+ ndinam uduak fo, O Abasi.’”+
8 Ke ama ekebem iso ọdọhọ ete: “Afo ukoyomke ukunyụn̄ ukopke inemesịt ke mme uwa ye mme enọ ye ofụri edifọp uwa ye uwa idiọkn̄kpọ”+—mme uwa oro Ibet etemede ete ẹwa+—
9 ekem enye ọdọhọ ete: “Sese! mmedi ndinam uduak fo.”+ Enye emen akpa n̄kpọ efep man enye ọsọn̄ọ udiana n̄kpọ.+
10 Ẹda “uduak”+ oro ẹtịn̄de mi ẹnam nnyịn isana*+ oto ke ediwa+ idem Jesus Christ ini kiet+ kpọt.
11 N̄ko, oku kiet kiet akadada ke itie esie+ ke usen ke usen+ ndinam utom nnọ mme owo nnyụn̄ n̄wa orụk uwa kiet ediwak ini, sia akananam emi mîkemeke ndimen mme idiọkn̄kpọ mfep ofụri ofụri.+
12 Edi owo emi akawa uwa kiet aban̄a mme idiọkn̄kpọ ke nsinsi+ onyụn̄ osụhọde etetie ke ubọk nnasia Abasi,+
13 ọtọn̄ọde ke ini oro enye etetie ebet tutu ẹnịm mme asua esie nte udoriukot esie.+
14 Koro ẹda uwa kiet+ oro enye awade ẹnam mbon oro ẹnamde ẹsana ẹfọn ẹma+ ke nsinsi.
15 Akan oro, edisana spirit+ n̄ko etie ntiense ọnọ nnyịn, koro ke enye ama ọkọdọhọ ete:
16 “‘Emi edi ediomi oro ndidiomide ye mmọ ke mme usen oro ẹbede,’ Jehovah ọdọhọ. ‘Nyesịn mme ibet mi ke esịt mmọ, nyonyụn̄ n̄wet mmọ ke ekikere mmọ,’”+
17 ke oro ebede enye ọdọhọ ete: “Ndinyụn̄ ntịghi aba mme idiọkn̄kpọ mmọ ye mme ukwan̄ido mmọ.”+
18 Edi ke ebiet emi ẹfende mme n̄kpọ+ emi, owo iwaha aba uwa iban̄a idiọkn̄kpọ.+
19 Ke ntre, nditọete, sia nnyịn inyenede uko ndibe ndụk+ edisana ebiet+ oto ke iyịp Jesus,
20 emi enye ọkọtọn̄ọde ọnọ nnyịn nte obufa ye odu-uwem usụn̄, ke ndisan̄a mbe ke ikpehe,+ oro edi, obụkidem esie,+
21 ndien sia nnyịn inyenede akamba oku emi esede aban̄a ufọk Abasi,+
22 ẹyak nnyịn isan̄a ikpere ye esịt akpanikọ ye ọyọhọ nsọn̄ọ oro asan̄ade ye mbuọtidem, sia ẹma ẹkenam esịt nnyịn asana* ọbọhọ idiọk ubieresịt+ ẹnyụn̄ ẹda edisana mmọn̄ ẹyet nnyịn idem.+
23 Ẹyak nnyịn isọn̄ọ itan̄a idotenyịn+ nnyịn an̄wan̄wa, ikûyok,+ koro enye emi ọnọde nnyịn un̄wọn̄ọ edi anam-akpanikọ.+
24 Ẹyak nnyịn inyụn̄ ikere nte ikpedemerede+ kiet eken inọ ima ye nti utom,+
25 ikûsịn ndisop idem ọtọkiet,+ nte ido ndusụk owo edide, edi isịn udọn̄ inọ+ kiet eken, ndien mbufo ẹdọdiọn̄ ẹnam ntem adan̄a nte ẹkụtde ẹte usen oro ke asan̄a ekpere.+
26 Koro edieke nnyịn ikoide-koi+ ika iso inam idiọkn̄kpọ ke ima ikọbọ nnennen ifiọk akpanikọ,+ uwa ndomokiet idụhe aba+ inọ mme idiọkn̄kpọ,
27 edi idotenyịn ubiomikpe+ eke enyenede ndịk odu ye ikan̄-ikan̄ ufụp eke editade mmọ emi ẹbiọn̄ọde Abasi.+
28 Owo ekededi eke okofụmide ibet Moses akakpa ke uyo ntiense iba m̀mê ita,+ owo ikatuaha enye mbọm.
29 Mbufo ẹkere ẹte okpodot ẹbiere ufen+ ọsọn̄ adan̄a didie ẹnọ owo emi edịghide+ Eyen Abasi ke ikpat onyụn̄ abatde iyịp+ ediomi emi ẹkedade ẹnam enye asana ke ekpri n̄kpọ, onyụn̄ omiomde spirit+ mfọnido oro owo mîdotke ata idiọk idiọk?
30 Koro nnyịn imọfiọk enye emi ọdọhọde ete: “Usiene enyene mi; ami nyosio usiene”;+ n̄ko: “Jehovah eyekpe ikpe ikọt esie.”+
31 Edi n̄kpọ ndịk ndiduọ ndụk ubọk odu-uwem Abasi.+
32 Edi, mbufo ẹti mme usen ini oko, emi, ke ẹma ẹkenam enyịn an̄wan̄a mbufo,+ mbufo ẹkeyọde ọkpọsọn̄ en̄wan ke ndutụhọ,+
33 ndusụk ini ẹsuenede mbufo ẹnyụn̄ ẹnamde mbufo ẹkụt ukụt nte n̄kpọ eke ẹdude ke akwa efe ndise,+ ndusụk ini ke adan̄aemi mbufo ẹkabarede ẹdi nsan̄a mbon oro ẹsobode utọ n̄kpọ oro.+
34 Koro mbufo ẹma ẹtua mbon oro ẹdude ke ufọk-n̄kpọkọbi mbọm ẹnyụn̄ ẹnyịme ke idatesịt ẹte ẹbụme+ inyene mbufo, sia ẹfiọkde ẹte mbufo ẹmenyene inyene eke ọfọnde akan oro onyụn̄ ebịghide.+
35 Ke ntre, mbufo ẹkûtop ifụre utịn̄ikọ+ mbufo ẹduọk, koro emi enyenede akwa utịp+ eke ẹdinọde.
36 Koro oyom mbufo ẹyọ,+ man, ke mbufo ẹma ẹkenam uduak Abasi,+ mbufo ẹkpebọ edisu un̄wọn̄ọ oro.+
37 Koro osụk “kan̄a ata esisịt ini,”+ ndien “enye emi edide eyedisịm idinyụn̄ ibịghike.”+
38 “Edi edinen owo mi edidu uwem oto ke mbuọtidem,”+ ndien, “edieke enye edịghede afiak edem, ukpọn̄ mi idikopke inemesịt ye enye.”+
39 Edi nnyịn idịghe orụk mbon oro ẹdịghede ẹfiak edem ẹka nsobo,+ edi idi orụk mbon oro ẹnyenede mbuọtidem tutu ẹsịm edinyan̄a ukpọn̄.+
