UKPEPN̄KPỌ 4
Anie Edi Jesus Christ?
1. Ini ewe ke ẹkebot Jesus?
Nso ikanam mme owo ẹkeme ndisan̄a n̄kpere Jesus?—MATTHEW 11:29; MARK 10:13-16.
Jesus itiehe nte nnyịn, enye ama ododụn̄ ke heaven nte owo eke spirit mbemiso edide edimana ke isọn̄. (John 8:23) Abasi ekebem iso obot enye mbemiso obotde mme n̄kpọ eken, ndien enye ke Abasi akada obot kpukpru n̄kpọ eken. Enye edi n̄kukụre owo emi Jehovah okobotde ke idemesie, ntak edi oro ẹkotde enye “ikpọn̄-ikpọn̄ edibon” Eyen Abasi. (John 1:14) Jesus okonyụn̄ edi Etịn̄ikọ ke ibuot Abasi, ntak edi oro ẹkotde enye “Ikọ.”—Kot Mme N̄ke 8:22, 23, 30; Colossae 1:15, 16.
2. Ntak emi Jesus ekedide isọn̄?
Abasi akanam Eyen esie edidu ke isọn̄ emi ke ndisio uwem esie ke heaven ndisịn ke idịbi Mary, eyenan̄wan Jew emi mîkọfiọkke erenowo. Ntre Jesus ikenyeneke ete ke isọn̄. (Luke 1:30-35) Jesus ekedi isọn̄ emi (1) man edikpep mme owo akpanikọ aban̄a Abasi, (2) man ediwụt mme owo nte ẹkpenamde uduak Abasi idem ke ini owo osobode ukọbọ, (3) man onyụn̄ ọnọ mfọnmma uwem esie nte “ufak.”—Kot Matthew 20:28.
3. Ntak emi iyomde ufak?
Ufak edi ekọmurua emi ẹnọde man ẹsana owo emi ẹkeyomde ndiwot ẹyak. (Exodus 21:29, 30) Abasi ikoyomke owo ọsọn̄ onyụn̄ akpa. Isan̄a didie idiọn̄ọ? Abasi ama ọdọhọ Adam, akpa owo oro enye okobotde, ete ke edieke enye anamde se Bible okotde idiọkn̄kpọ ke enye ayakpa. Ekpedi Adam ikanamke idiọkn̄kpọ, enye ikpakakpaha. (Genesis 2:16, 17; 5:5) Bible ọdọhọ ke ntem ke n̄kpa ekebe ke Adam “odụk” ererimbot. Ntre, Adam ama ayak idiọkn̄kpọ ye n̄kpa ọnọ kpukpru nditọ esie. Ntak edi oro iyomde ufak.—Kot Rome 5:12; 6:23.
Anie ekeme ndifak nnyịn nsio ke n̄kpa? Owo ekpe utịp idiọkn̄kpọ esie kpọt ke ini enye akpade. Idụhe anana-mfọnmma owo ndomokiet emi ekemede ndifak mbon en̄wen nsio ke idiọkn̄kpọ mmọ.—Kot Psalm 49:7-9.
4. Ntak emi Jesus akakpade?
Nnyịn ikadada idiọkn̄kpọ imana, edi Jesus ekedi mfọnmma owo. Ntre, enye ikakpaha ke ntak idiọkn̄kpọ esie koro akananam enye inamke idiọkn̄kpọ, edi akakpa ke ntak idiọkn̄kpọ nnyịn. Abasi ọkọdọn̄ Eyen esie edikpa ọnọ nnyịn man owụt ke imenen̄ede ima nnyịn. Jesus ama osụk ibuot ọnọ Ete esie onyụn̄ enyịme ndikpa ke ntak idiọkn̄kpọ nnyịn ndiwụt ke imọ n̄ko imama nnyịn.—Kot John 3:16; Rome 5:18, 19.
Se vidio emi Ntak Emi Jesus Akakpade?
5. Nso ke Jesus anam idahaemi?
Jesus ama esinam udọn̄ọ okụre mme owo, anam mme akpan̄kpa ẹset, onyụn̄ an̄wam mbon oro ẹkenyenede mfịna. Enye okowụt se imọ idinamde inọ mbon oro ẹkopde item Abasi ke ini iso. (Matthew 15:30, 31; John 5:28) Ke Jesus ama akakpa, Abasi ama anam enye eset edidu ke heaven. (1 Peter 3:18) Ekem Jesus ama ebet ke ubọk nnasia Abasi tutu Abasi ọnọ enye odudu ndikara ofụri isọn̄. (Mme Hebrew 10:12, 13) Idahaemi Jesus ke akara nte Edidem ke heaven, ndien mme mbet esie ke isọn̄ ke ẹkwọrọ eti mbụk emi ke ofụri ererimbot.—Kot Daniel 7:13, 14; Matthew 24:14.
Ke mîbịghike, Jesus ayada odudu emi ẹnọde enye nte Edidem etre kpukpru ufen oro ibọde onyụn̄ osobo mbon oro ẹnamde ibọ kpukpru ufen emi. Kpukpru mbon emi ẹbuọtde idem ke Jesus ẹnyụn̄ ẹkopde item esie ẹyedu uwem ke nsinsi ke Paradise ke isọn̄.—Kot Psalm 37:9-11.
