Mark 1;1-45
1 Ntọn̄ọ eti mbụk emi aban̄ade Jesus Christ:
2 Kpa nte ẹwetde ke n̄wed prọfet Isaiah ẹte: “(Sese! Mmosio isụn̄utom mi ndọn̄ ebem fi iso, emi edidiọn̄de usụn̄ fo;)+
3 ẹkpan̄ utọn̄! owo ke ofiori ke wilderness ete, ‘Mbufo ẹdiọn̄ usụn̄ Jehovah, ẹnen̄ede ọkpọusụn̄ esie,’”+
4 John andinịm owo baptism edi wilderness, ọkwọrọ baptism ke idiọn̄ọ edikabade esịt man ẹfen mme idiọkn̄kpọ.+
5 Mmọdo ofụri ikpehe Judea ye kpukpru mme andidụn̄ Jerusalem ẹka ẹbịne enye, enye onyụn̄ enịm mmọ baptism ke Akpa Jordan, ndien mmọ ẹyarade mme idiọkn̄kpọ mmọ an̄wan̄wa.+
6 Edi John esịne edisịnen̄kpọ idet camel onyụn̄ ọbọbọ mbọbọ ikpa ke isịn,+ ata n̄kukun̄kpọyọriyọ+ onyụn̄ adia aranọkwọk ikọt.+
7 Ndien enye ọkwọrọ, ete: “Owo emi enyenede odudu akan mi ke etiene mi ke edem; ndotke ndinụhọ ntat urụk ikpaukot esie.+
8 Ami n̄kenịm mbufo baptism ke mmọn̄, edi enye eyenịm mbufo baptism ke edisana spirit.”+
9 Ke mme usen oro, Jesus oto Nazareth eke Galilee edi ndien John enịm enye baptism ke Jordan.+
10 Ndien kpa idaha oro enye ọwọrọde ke mmọn̄ enye okụt nte enyọn̄ abaharede ye nte spirit osụhọrede nte ibiom edidoro enye ke idem;+
11 ndien uyo oto ke heaven ọwọrọ, ete: “Afo edi edima Eyen mi; mmenyịme fi.”+
12 Ndien kpa idaha oro spirit anam enye aka wilderness.+
13 Ntre enye odu ke wilderness usen aba,+ Satan onyụn̄ odomo enye,+ ndien enye odu ye mme unam ikọt, edi mme angel ẹsan̄a utom ẹnọ enye.+
14 Edi ke ẹma ẹkemụm John, Jesus odụk Galilee+ ọkọkwọrọ eti mbụk Abasi+
15 onyụn̄ ọdọhọ ete: “Edimek ini emekem,+ obio ubọn̄ Abasi onyụn̄ asan̄a ekpere. Mbufo ẹkabade esịt+ ẹnyụn̄ ẹbuọt idem ke eti mbụk.”
16 Ke adan̄aemi enye asan̄ade ke mbeninyan̄ Galilee, enye okụt Simon+ ye Andrew eyeneka Simon nte ẹduọn̄ọde iyịre mmọ ke inyan̄, koro mmọ ẹdide mme ọkọiyak.+
17 Ntre Jesus ọdọhọ mmọ ete: “Ẹtiene mi, ndien nyanam mbufo ẹdi mme ọkọ owo.”+
18 Ndien kpa idaha oro mmọ ẹdaha ẹkpọn̄ iyịre mmọ ẹtiene enye.+
19 Ndien ke ini enye asan̄ade esisịt aka iso enye okụt James eyen Zebedee ye John eyeneka esie, ke adan̄aemi mmọ ẹtiede ke ubom mmọ ẹdiọn̄ iyịre;+
20 ndien ye unana ubiatini enye okot mmọ. Ndien mmọ ẹdaha ẹkpọn̄ ete mmọ Zebedee ke ubom ye mbon emi ẹkekpede utom ẹtiene enye.
21 Ndien mmọ ẹsan̄a ẹdụk Capernaum.+
Ibịghike ke esịmde sabbath enye odụk synagogue onyụn̄ ọtọn̄ọ ndikpep mme owo n̄kpọ.
22 Ndien idem akpa mmọ aban̄a usụn̄ nte enye ekpepde owo n̄kpọ,+ koro enye ekpepde mmọ n̄kpọ do nte owo emi Abasi ọnọde odudu, inyụn̄ ikpepke nte mme scribe.*+
23 N̄ko, kpa idaha oro owo emi enyenede ndedehe spirit odu ke synagogue mmọ, enye onyụn̄ ofiori,+
24 ete: “Nnyịn isan̄a nso ye afo, Jesus eyen Nazareth?+ Nte afo ekedi ndisobo nnyịn? Mmetịm mfiọk+ owo emi afo edide, afo edi Edisana+ Eyen Abasi.”+
25 Edi Jesus aduari spirit oro, ete: “Kịbi inua, nyụn̄ wọrọ enye ke idem!”+
26 Ndien ndedehe spirit oro, ke ama ekesịn̄ede enye onyụn̄ ofiori ke ọkpọsọn̄ uyo, ọwọrọ enye ke idem.+
27 Edi, idem enen̄ede akpa kpukpru owo tutu mmọ ẹtọn̄ọ ndineme ke otu idemmọ, ẹte: “Nso idi emi? Obufa ukpepn̄kpọ! Enye ada odudu owụk kpa ndedehe spirit, ndien mmọ ẹkop uyo esie.”+
28 Ntre idaha oro etop esie asuana ke kpukpru ebiet ke ofụri n̄kann̄kụk Galilee.+
29 Ndien kpa idaha oro mmọ ẹwọn̄ọ ke synagogue ẹsan̄a ye James ye John ẹdụk ufọk Simon+ ye Andrew.
30 Edi eka an̄wan Simon+ ọkọdọn̄ọ ufiopidem+ onyụn̄ anana, ndien kpa idaha oro mmọ ẹsian enye ẹban̄a n̄wan emi.
31 Ndien enye aka okomụm enye ubọk emenede; ndien ufiopidem oro ọkpọn̄ enye,+ enye onyụn̄ anam n̄kpọ ọnọ mmọ.+
32 Ke mbubreyo, ke ini utịn ama okosop, mme owo ẹda kpukpru mbon udọn̄ọ+ ye mbon emi ẹnyenede demon+ ẹsọk enye;
33 ndien ofụri obio ẹsop idem ke enyịnusụn̄.
34 Ntre enye ọkọk ediwak owo oro ẹdọn̄ọde nsio nsio udọn̄ọ,+ onyụn̄ ebịn ediwak demon, edi enye iyakke mme demon ẹsioro uyo, koro mmọ ẹfiọkde ẹte enye edi Christ.+
35 Ndien ke tụhi-tụhi usenubọk, ke adan̄aemi eyo mîn̄wan̄ake, enye adaha ke enyọn̄ ọwọrọ an̄wa aka ndobo ndobo ebiet,+ ndien enye ọtọn̄ọ ndibọn̄ akam do.+
36 Edi, Simon ye mbon emi ẹdude ye enye ẹnen̄ede ẹyom enye
37 ẹnyụn̄ ẹkụt enye, ndien mmọ ẹdọhọ enye ẹte: “Kpukpru owo ke ẹyom fi.”
38 Edi enye ọdọhọ mmọ ete: “Ẹyak nnyịn ika ebiet en̄wen, ikodụk mme obio oro ẹdude ẹkpere, man n̄kọkwọrọ ikọ+ do n̄ko, koro n̄kọwọrọ ndi kaban̄a uduak emi.”+
39 Ndien enye adaha aka, ọkọkwọrọ ikọ ke mme synagogue mmọ ke ofụri Galilee onyụn̄ ebịn mme demon.+
40 Owo akpamfia n̄ko edi ebịne enye, editọn̄ọ edọn̄ ekpe enye ubọk, ete: “Edieke afo akam amade, emekeme ndinam mi nsana.”+
41 Ndien mbọm anam enye,+ enye onyụn̄ anyanade ubọk otụk enye, onyụn̄ ọdọhọ enye ete: “Mmama. Sana.”+
42 Ndien kpa idaha oro akpamfia okụre enye, enye onyụn̄ akabade asana.+
43 N̄ko-n̄ko, enye ọsọn̄ọ owụk enye onyụn̄ ọnọ enye ọnyọn̄ kpa idaha oro,
44 onyụn̄ ọdọhọ enye ete: “Kụt ete ke utịn̄ke baba n̄kpọ kiet unọ owo ndomokiet, edi ka kowụt oku idemfo+ nyụn̄ nọ mme n̄kpọ oro Moses eketemede kaban̄a edinam fi asana,+ man edi ntiense ọnọ mmọ.”+
45 Edi ke ama akadaha, owo oro ọtọn̄ọ nditan̄a n̄kpọ emi etieti nnyụn̄ nsuan mbụk emi ntatara ntatara, tutu Jesus ikemeke aba ndidụk obio an̄wan̄wa, edi enye aka iso odu ke an̄wa ke ndobo ndobo ebiet. Kpa ye oro mmọ ẹdọdiọn̄ ẹto ke kpukpru ebiet ẹtiene enye.+
Mme Ikọ Idakisọn̄
^ Ke akpa, emi akaban̄a mme andision̄o N̄wed Abasi n̄wet, edi ke eyo Jesus, emi akaban̄a mbon oro ẹfiọkde Ibet ẹnyụn̄ ẹdide mme andikpep Ibet.
