1. Dekrir sagrinasyon Mart e akoz i ti sagren.

MART pa kapab oubliy latonm son frer, en kavern ros ki’n ganny bouse avek en ros. Son sagrinasyon i paret lour parey sa ros. I pa oule krwar ki Lazar son frer ki i vreman kontan in mor. Pandan sa kat zour, i’n ganny bokou viziter ek mesaz kondoleans.

2, 3. (a) Kan Mart ti vwar Zezi, ki lefe sa ti annan lo li? (b) Ki nou aprann lo Mart atraver sa ki i ti dir Zezi?

² Me aprezan, pli bon zanmi Lazar i la o bor Mart. Kan i vwar Zezi, i kapab ki sa i fer li pli sagren ankor, akoz i sa sel dimoun dan sa lemonn ki ti’n kapab sov son frer. Kantmenm sa, Mart i ganny rekonforte kan i avek Zezi an deor lavil Betani ki lo en pti montanny. Parey labitid dan sa pti moman avek li, Mart i ganny rekonforte e ankouraze en kantite ler i vwar konpasyon ek labonte ki touzour dan lizye Zezi. Zezi i demann li bann kestyon ki ed li pour konsantre lo son lafwa ek son krwayans lo rezireksyon. Sa konversasyon i pous Mart pour dir en parol pli enportan ki i pa’n zanmen dir: “Mon krwar ki oumenm Mesi, Garson Bondye, ki devre vin dan lemonn.”​—Zan 11:27.

³ Parey sa parol i montre, Mart ti en madanm ki ti annan en lafwa remarkab. Sa ptigin ki Labib i dir nou lo li i kapab ed nou pour tir en bon pe leson vreman enportan ki fortifye nou lafwa. Pour konnen ki mannyer, annou vwar premye resi lo Mart dan Labib.

4. Dan ki fason fanmir Mart ti diferan e ki relasyon sa fanmir ti annan avek Zezi?

⁴ Plizyer mwan avan sa, Lazar ti byen e vivan. Kot son lakaz Betani, i ti’n pare pour akey sa viziter pli enportan e sa se pa lot ki Zezi Kri. Lazar, Mart ek Mari pa ti parey tou lezot fanmir.  Sa de ser ek zot frer ti aparaman reste dan menm lakaz. Serten spesyalis Labib i panse ki Mart ti pli vye parmi sa trwa, vi ki i ti paret pe pran swen avek bann envite kot lakour e par ler i ti ganny mansyonnen premye. (Zan 11:5) Napa okenn fason pour nou konnen si okenn parmi zot ti’n deza marye. An tou le ka, zot ti bann bon zanmi Zezi. Pandan son minister Zide, kot i ti ganny bokou lopozisyon e dimoun ti ay li, Zezi ti kontan al reste kot zot detanzaot. San dout, i ti apresye sa lape ek sipor ki i ti gannyen laba.

5, 6. (a) Akoz Mart ti okipe pandan vizit Zezi? (b) Ki Mari ti fer kan Zezi ti vin kot zot?

⁵ Mart ti kontan fer son mye pour byen akey zot bann envite e fer zot santi zot byen konfortab. Vi ki i ti en dimoun ki ti travay dir e ki ti byen aktif, i paret ki i ti toultan annan en bon pe pour li fer. Kan i ti envit Zezi, sa pa ti en leksepsyon. Deswit, i ti fer en repa spesyal avek en ta zafer pour son envite spesyal e petet lezot ki ti pe vwayaz avek li. Sa bann letan, lospitalite ti vreman enportan. Kan en envite ti arive, zot ti akey li par anbras li, tir son sandalet, lav son lipye e pas delwil parfimen lo son lipye. (Lir Lik 7:44-47.) Apre sa, zot ti pou fer tou sa ki zot ti kapab pour donn li manze e en landrwa pour li dormi.

⁶ Mart ek Mari ti byen okipe pour resevwar Zezi. Mari ki par ler ti paret sa enn ki pli sansib e ki ti kontan reflesir ant zot trwa ti sirman ed son ser o konmansman. Me kan Zezi ti vini, keksoz ti sanze. Zezi ti vwar sa lokazyon konman en moman pour ansennyen e se sanmenm ki i ti fer. Kontrerman avek bann sef relizye sa letan, Zezi ti respekte bann madanm e i ti pare pour ansenny zot konsernan Rwayonm Bondye ki ti tenm son minister. Mari ti vreman kontan pour ganny sa loportinite, alor i ti asiz lanmenm o bor lipye Zezi e ekout tou parol ki i ti dir.

7, 8. Akoz Mart ti santi li fristre e finalman ki mannyer i ti eksprim sa?

⁷ Nou kapab mazinen ki Mart ti santi li fristre akoz Mari pa ti pe ed li. Avek tou sa manze ki i ti bezwen prepare pour son bann envite, i ti deplizanpli trakase e ganny distrer. Kan i ti pe pas pase, i ti vwar son ser pe asize e ki pa ti pe fer nanryen pour ed li. Eski i ti sanz kouler, get li gro lizye oubyen met lanmin lo son fron? I pa ti pou sirprann nou si i ti fer sa. I pa ti pou kapab fer tou keksoz li tousel!

⁸ Finalman, Mart ti nepli kapab kontrol son fristrasyon. En  sel kou, i ti enteronp konversasyon: “Senyer, ou pa dir nanryen mon ser, i les mwan tousel pour servi? Dir li vin ed mwan.” (Lik 10:40) Sa parol ti ase for. Detrwa tradikter i demann sa kestyon koumsa: “Senyer, ou pa enterese . . . ?” Apre, i ti demann Zezi pour koriz Mari e fer li vin ed li.

9, 10. (a) Ki mannyer Zezi ti reponn Mart? (b) Ki mannyer nou konnen ki Zezi pa ti pe pran pour nanryen ditou travay dir Mart?

⁹ Larepons Zezi ti’n kapab sirprann Mart parey i’n sirprann bokou lekter Labib. Zantiman Zezi ti dir: “Mart, Mart, ou pe trakas ou e trouble ou avek bokou keksoz. En sel keksoz i neseser. Mari in swazir meyer par ki pa pou ganny pran avek li.” (Lik 10:41, 42) Ki Zezi ti oule dir? Eski i ti pe esey dir ki Mart ti kontan keksoz materyel? Eski i ti pe pran pour nanryen ditou son travay dir pour prepar en bon repa?

¹⁰ Non. Zezi ti klerman vwar ki motivasyon Mart ti bon e ranpli avek lanmour. De plis, Zezi pa ti santi ki lospitalite ek zenerozite ti neseserman mal. I ti’n volonterman al en “gran festen” ki Matye ti’n organize pli boner. (Lik 5:29) Pa repa Mart ki ti en problenm sa zour, me sa ki ti pe pli preokip li a sa moman. I ti sitan preokipe avek son repa konplike ki i ti oubliy sa ki ti pli enportan. Kwa ki ti pli enportan?

11, 12. Ki mannyer Zezi ti zantiman koriz Mart?

¹¹ Zezi, sel Garson byenneme Bondye, ti kot Mart pour ansenny laverite. I ti napa nanryen pli enportan ki lansennyman Zezi, menm pa sa bann bon repa Mart ek tou son preparasyon. San dout, Zezi ti sagren ki Mart ti pe mank sa sel loportinite pour fortifye son lafwa me i ti les li fer son prop swa. * Mart ti annan drwa deside kwa ki ti son priyorite me i ti napa drwa demann Zezi pour fors Mari sanz son priyorite.

¹² Alor, i ti koriz Mart an repetan son non zantiman pour kalme li e asir li ki i pa ti bezwen ‘trakase e trouble avek bokou keksoz.’ En repa senp avek enn oubyen de pla ti pou ase espesyalman kan i ti annan en festen spirityel. Zezi pa ti pou kapab pran sa “meyer par” ki Mari ti’n swazir e sa ti pour aprann avek Zezi.

13. Ki leson nou kapab aprann atraver sa ki Zezi ti dir Mart?

 ¹³ Sa pti senn ki ti arive kot lakour i ansenny bann disip Kris bokou keksoz ozordi. Nou pa devret les nanryen vin pli enportan ki nou “bezwen spirityel.” (Mat. 5:3, NW) Menm si nou anvi imit travay dir e zenerozite Mart, ler nou demontre lospitalite, nou pa anvi tro ‘trakase e trouble’ avek bann keksoz ki mwen enportan, ki finalman nou mank sa laspe pli enportan dan lospitalite. Ler nou asosye avek nou bann frer ek ser, premye rezon i pa akoz nou anvi ganny servi oubyen manz bann bon manze, me rezon prensipal se pour ankouraz kanmarad e partaz bann kado spirityel. (Lir Romen 1:11, 12.)  Menm si nou prepar en pti manze senp, sa lokazyon i kapab en moman ankourazan.

14. Akoz nou kapab asire ki Mart in kit en bon legzanp konsernan aksepte konsey?

¹⁴ Eski Mart ti aksepte konsey Zezi e aprann en leson? Nou konnen ki i ti fer li. Ler zapot Zan ti konmans rakont sa resi eksitan lo frer Mart, i ti dir: “Zezi ti kontan Mart, son ser Mari, ek son frer Lazar.” (Zan 11:5) Detrwa mwan ti’n pase depi ki Zezi ti’n vizit Betani parey nou’n vwar pli boner. Klerman, Mart pa ti ankoler e i pa ti’n gard rankin avek Zezi akoz sa konsey ki i ti’n donn li avek lanmour. I ti pran sa konsey aker. Dan sa laspe osi, i’n kit en bon legzanp lafwa, akoz lekel parmi nou ki pa bezwen en pti koreksyon par ler?

15, 16. (a) Ki ti reaksyon Mart kan son frer ti tonm malad? (b) Akoz lespwar Mart ek Mari ti tonm dan delo?

¹⁵ Kan son frer ti tonm malad, sirman Mart ti byen okipe pour pran byen swen avek li. I ti fer tou sa ki i ti kapab pour apez son douler e ed li rekipere. Kantmenm sa, Lazar ti vin pli malad ankor. Lizour konman aswar, son bann ser ti’n bezwen reste la o bor li pour pran swen avek li. Nou kapab mazinen konbyen fwa Mart ti get figir fay fay son frer e mazin tou sa bann lannen ki zot ti pase ansanm dan botan e dan movetan.

¹⁶ Kan i ti paret ki Lazar ti pe al mor, Mart ek Mari ti anvoy en mesaz pour Zezi. I ti pe prese dan en landrwa ki ti apepre de zour marse avek Betani. Zot mesaz ti senp: “Senyer, ou zanmi ki ou kontan i malad.” (Zan 11:1, 3) Zot ti konnen ki Zezi ti kontan zot frer e zot ti annan lafwa ki i ti pou fer tou sa ki i ti kapab pour ed son zanmi. Eski zot ti krwar ki Zezi ti pou arive avan i tro tar? Si wi, zot lespwar ti tonm dan delo ler Lazar ti mor.

17. Kwa ki ti fer Mart konfize e ki i ti fer kan i ti tande ki Zezi ti pros pour arive?

¹⁷ Tou le de, Mart ek Mari ti dan en gran sagrinasyon e dan dey akoz zot frer. Zot ti fer bann preparasyon pour son lanterman e resevwar tou bann viziter ki ti sorti Betani e dan zalantour. Zot pa ti ankor ganny okenn nouvel sorti kot Zezi. Pli letan ti pase, pli Mart ti konfize e pa konnen ki i ti pou fer. Finalman, apre kat zour ki Lazar ti’n mor, Mart ti tande ki Zezi ti pros pour ariv Betani. Menm si i ti dan latristes sa letan, parey son labitid Mart ti pran aksyon. I ti leve e degaze  pour li al zwenn Zezi san dir Mari nanryen.​—Lir Zan 11:18-20.

18, 19. Ki lespwar Mart ti annan e akoz son lafwa ti remarkab?

¹⁸ Kan Mart ti zwenn son Met, i ti dir li tou sa ki ti’n tourmant li ek Mari pandan sa kat zour: “Senyer, si ou ti la, mon frer pa ti a’n mor.” Me Mart ti ankor annan lespwar ek lafwa ki Zezi ti kapab fer en keksoz. I ti dir: “Me mon konnen ki kantmenm sa, Bondye pou akord ou tou sa ki ou pou demann li.” Deswit, Zezi ti dir en keksoz pour ranforsi son lafwa: “Ou frer pou resisite.”​—Zan 11:21-23.

¹⁹ Mart ti krwar ki Zezi ti pe koz lo rezireksyon ki ti pou arive a lavenir, alor i ti reponn: “Mon konnen ki i pou resisite zour larezireksyon.” (Zan 11:24) Son lafwa dan sa lansennyman ti remarkab. Serten sef relizye Zwif ki ti apel bann Sadiseen pa ti krwar dan rezireksyon, menm si sa ti en lansennyman  ki kler dan Parol Bondye. (Dan. 12:13; Mark 12:18) Me Mart ti konnen ki Zezi ti ansennyen ki dimoun ti pou resisite e i ti’n menm resisit dimoun mor menm si zot pa ti’n mor osi lontan ki Lazar. Mart pa ti konnen ki i ti pe al arive.

20. Eksplik sinifikasyon parol inoubliyab Zezi dan Zan 11:25-27 ek larepons Mart.

²⁰ Apre, Zezi ti dir en keksoz inoubliyab: “Mwanmenm, larezireksyon ek lavi.” Annefe, Zeova in donn son Garson lotorite pour resisit bann dimoun mor dan en pli gran lanpler a lavenir. Zezi ti demann Mart: “Eski ou krwar sa?” Apre Mart ti donn sa larepons ki tenm sa sapit. I ti annan lafwa ki Zezi ti Kris oubyen Mesi, Garson Zeova e i ti sa enn ki bann profet ti’n dir i pou vin dan lemonn.​—Zan 5:28, 29; lir Zan 11:25-27.

21, 22. (a) Ki mannyer Zezi ti revel son santiman anver sa bann ki ti dan dey? (b) Dekrir rezireksyon Lazar.

²¹ Eski Bondye ek son Garson Zezi Kri i apresye sa kalite lafwa ki Mart ti annan? Sa ki Mart ti vwar arive apre avek son de lizye, i reponn sa kestyon. I ti degaze pour al sers son ser. I ti vwar ki Zezi ti vreman pran lapenn pour zot ler i ti pe koz avek Mari ek sa ta dimoun ki ti’n vin rekonfort zot. I ti vwar larm pe marse dan lizye Zezi akoz i pa ti per pour eksprim son gran sagrinasyon pour sa douler ki lanmor i anmennen. I ti tann Zezi donn lord ki ros i ganny tire devan latonm son frer.​—Zan 11:28-39.

²² Mart ki ti toultan pare pour fer fas avek larealite ti dir ki lekor son frer ti pou’n bezwen anvoy loder aprezan, vi ki kat zour ti’n pase depi ler i ti’n mor. Zezi ti fer li rapel: “Pa mon’n dir ou, si ou krwar ou pou war laglwar Bondye?” Sanmenm ki i ti fer, i ti krwar e i ti vreman vwar laglwar Zeova. Lanmenm la, sa menm moman, Zeova ti donn son Garson pouvwar pour resisit Lazar. Zis mazin sa moman ki Mart pa ti pou zanmen kapab oubliye ziska son lanmor. I ti tann Zezi pe donn lord Lazar an dizan: “Lazar, sorti!” I ti tann tapaz dan sa kavern ler Lazar ti leve kot i ti ete antoure avek tou son bann bandaz ki ti’n ganny servi pour prepar son lekor. I ti vwar li pe vin pti pa pti pa ver larantre sa kavern kot Zezi ti demann zot pour “tir sa bann bandaz e les li ale.” Nou zis kapab esey imazin sa gran lazwa ki Mart ek Mari ti annan ler zot ti taye e sot dan lebra zot frer. (Lir Zan 11:40-44.) Sa gro ros lour ki ti dan leker Mart ti’n ganny tire en sel kou!

23. Ki Zeova ek Zezi i anvi fer pour ou e ki ou bezwen fer?

 ²³ Sa resi i montre ki rezireksyon bann mor i pa zis en swe ki nou annan, me i en realite e i en lansennyman ki ranpli nou leker avek lapresyasyon pour Zeova. (Zob 14:14, 15) Zeova ek son Garson Zezi i kontan pour rekonpans bann ki demontre lafwa parey Mart, Mari ek Lazar. Pareyman, zot pou rekonpans ou osi si ou devlop en lafwa for.

24. Ki dernyen keksoz Labib i dir nou lo Mart?

²⁴ Labib i mansyonn Mart zis ankor enn fwa. Sa ti o konmansman dernyen semenn dan lavi Zezi lo later. Vi ki Zezi ti konnen ki kalite difikilte i ti pou rankontre, alor i ti deside pour al ankor enn fwa reste Betani kot son bann zanmi. I ti annan trwa kilomet pour li marse ziska Zerizalenm sorti kot zot. Zezi ek Lazar ti pe manze kot Simon en lepre e la i sa dernyen fwa ki Labib i koz lo Mart. I dir ki “Mart ti ede pour servi.”​—Zan 12:2.

25. Akoz i en benediksyon pour annan bann ser parey Mart dan bann kongregasyon ozordi?

²⁵ Nou pa sirprann ki Mart ki ti kontan travay dir ti lanmenm pe servi lezot. Premye fwa ki Labib i koz lo Mart, i ti pe travay e dernyen fwa ki i koz lo li, i pe travay menm pe fer son mye pour pran swen avek bann ki otour li. Kongregasyon bann disip Kris ozordi in ganny beni avek bann madanm parey Mart ki devoue e zenere, ki pe toultan demontre zot lafwa an aksyon par ofer zot lekor pour servi lezot. Eski sanmenm ki Mart ti kontinyen fer? I difisil pour krwar lekontrer. Si i le ka, i ti azir avek lasazes akoz i ti pe al pas atraver difikilte li osi.

26. Ki lafwa Mart ti permet li fer?

²⁶ Dan zis detrwa zour, Mart ti bezwen fer fas avek lanmor kriyel son Met, Zezi. Pli tar, sa bann menm kriminel ipokrit ki ti’n touy Zezi ti determinen pour touy Lazar osi, vi ki rezireksyon Lazar ti fer plis dimoun annan lafwa dan Zezi. (Lir Zan 12:9-11.) Byensir, finalman lanmor ti separ Mart, Mari ek Lazar. Nou pa konnen ki mannyer e kan ki sa ti arive, me nou kapab preski asire ki lafwa presye Mart ti ed li pour andire ziska lafen. Sanmenm i byen pour nou imit lafwa Mart.