Gudfala Advaes: Yu Save Trastem Baebol

PLEI

Taem yumi mekem ol desisen folem tingting blong yumi o tingting blong ol narafala, yumi no sua sipos ol desisen ya oli stret. Baebol i eksplenem from wanem i olsem. Mo tu, Baebol i givim ol gudfala advaes we oltaem oli wok gud, mo oli mekem yumi glad long laef blong yumi.

YUMI NIDIM ADVAES BLONG GOD

Long Baebol, Jehova a God i eksplenem se ol man oli nidim hem blong i lidim olgeta, from we oli no naf blong jusum prapa rod blong olgeta. (Jeremaea 10:23) Taswe hem i givim Baebol blong lidim yumi. God i lavem yumi, mo i no wantem se yumi mekem ol desisen we i save spolem yumi. (Dutronome 5:29; 1 Jon 4:8) Antap long hemia, from we hem nao i wokem yumi mo i waes we i waes, hem i save ol stret advaes we yumi nidim. (Ol Sam 100:3; 104:24) Be God i neva fosem ol man blong oli folem ol advaes blong hem.

Taem Jehova i wokem faswan man mo woman, Adam mo Iv, hem i givim evri samting we tufala i nidim blong glad long laef blong tufala. (Jenesis 1:28, 29; 2:8, 15) Mo tu, hem i givim sam loa long tufala. Be hem i letem tufala blong tufala i jus sipos tufala i folem ol loa ya o nogat. (Jenesis 2:9, 16, 17) Sore tumas, Adam mo Iv i jus blong folem prapa tingting blong tufala nomo, mo no obei long God. (Jenesis 3:6) ?Wanem samting i kamaot from? ?Yu luk se ol man oli glad taem oli folem prapa tingting blong olgeta long samting we i stret mo i no stret? Nogat. Ol samting we oli hapen long wol oli soemaot se ol man we oli sakemaot advaes blong God, oli no gat pis mo oli no glad long laef blong olgeta.—Prija 8:9.

Baebol i givim ol stret advaes we yumi nidim blong mekem ol waes desisen, nomata weples yumi stap long hem. (2 Timoti 3:16, 17; yu luk bokis ya “ Wan Buk Blong Evri Man.”) ?Baebol i save givhan long yumi olsem wanem?

Faenemaot from wanem yumi save talem se Baebol i “tok blong God.”—1 Tesalonaeka 2:13. Wajem video ya ?Baebol i Kamaot Long Hu? we i stap long jw.org.

?FROM WANEM SAM MAN OLI NO TRASTEM BAEBOL?

Sam man oli talem se ol advaes blong Baebol oli no save givhan long ol man. Hemia tingting we samfala oli gat:

Tingting blong sam man: “Sam haf blong Baebol i no laenap wetem ol narafala haf.”

Trutok: I gat sam smosmol haf blong Baebol nomo we maet i luk olsem se i no laenap wetem ol nara haf. Be taem yu jekem gud ol vas raonabaot, histri, kastom blong ol man long taem ya, tingting blong man we i raetem stori ya, mo ol narafala samting, bambae yu luksave se evri haf blong Baebol oli joen gud.

Blong luk sam eksampol, yu ridim atikol ya “?I Gat Sam Tok Long Baebol We Oli Agensem Olgeta?” we i stap long jw.org.

Tingting blong sam man: “Ol man we oli talem se oli stap folem ol tok blong Baebol, oli stap mekem ol nogud samting. Taswe ol advaes blong Baebol oli no save givhan long man.”

Trutok: Yumi no mas blemem Baebol from ol nogud samting we ol man oli stap mekem. Baebol i bin talemaot finis se plante man mo ol lida blong skul tu bambae oli talem se oli stap folem ol tijing blong Baebol, be laef blong olgeta i no laenap wetem Baebol. Mo fasin blong olgeta i pulum ol narafala blong “tok nogud” long Baebol.—2 Pita 2:1, 2.

Blong luk olsem wanem ol lida blong skul oli no stap folem ol tijing blong Baebol, ridim atikol ya “?Ol Jos Oli Ol Bigfala Bisnes Nomo?” we i stap long jw.org.

Tingting blong sam man: “Baebol i pulum ol man blong oli no laekem ol narafala we oli defren long olgeta.”

Trutok: Baebol i talem se yumi mas mekem i gud long olgeta man. Baebol i tijim yumi se:

yumi no mas ting se yumi gud moa long ol narafala.—Filipae 2:3.
yumi mas respektem ol man we tingting mo fasin blong olgeta i defren long yumi.—1 Pita 2:17.
yumi no mas fosem ol narafala blong folem tingting blong yumi.—Matiu 10:14.

Baebol i soemaot se oltaem God i kaen mo i mekem i sem mak long olgeta man, mo Hem i wantem se yumi folem fasin blong hem.—Rom 9:14.

Blong save moa, ridim atikol ya “Respektem Tingting Blong Narafala—?Olsem Wanem Baebol i Save Givhan?” we i stap long jw.org.

ADVAES BLONG GOD I STAP LONG BAEBOL

Baebol i tokbaot stori blong ol samting we God i mekem long ol man. Ol stori ya oli givhan long yumi blong kasem save tingting we God i gat long samting we i stret mo samting we i no stret. (Ol Sam 19:7, 11) Ol advaes blong Baebol oli save givhan long yumi blong mekem ol waes desisen long laef blong yumi evri dei.

Traem tingbaot advaes ya we i stap long Ol Proveb 13:20: “Man we i stap wokbaot wetem man we i waes, bambae hem i kam waes, be man we i stap joen wetem man we i stupid, bambae hem i kasem trabol nomo.” Advaes ya i save givhan long yumi tede, sem mak olsem we i bin givhan long ol man long taem bifo. Baebol i fulap long ol gudfala advaes olsem.—Yu luk bokis ya “ Advaes Blong Baebol i Stret Yet Tede.”

Be maet yu stap tingting se: ‘?I tru se ol advaes blong Baebol oli save wok gud long taem blong yumi?’ Nekis haf blong magasin ya bambae i tokbaot sam eksampol.

a Jehova i prapa nem blong God.—Ol Sam 83:18.

ADVAES BLONG BAEBOL I STRET YET TEDE

Nating se wok blong raetem Baebol i finis klosap 2,000 yia bifo, be ol advaes blong hem oli stret yet tede. Hemia from we ol man tede oli wantem sem samting we ol man bifo oli wantem, hemia blong gat wan gudfala laef mo glad. (Prija 1:9) Yumi save kasem ol samting ya sipos yumi folem ol advaes blong Baebol.

Tok Tru Mo No Giaman

“Mifala i wantem tumas we oltaem mifala i stap mekem i stret nomo long olgeta samting.”—Hibru 13:18.
“Man we i stap stil, hem i mas lego fasin ya. Hem i mas wok had.”—Efesas 4:28.

Fren Gud Wetem Narafala

“I nogud man i stap lukaot rod we i save givhan long hem nomo. Hem i mas lukaot rod blong givhan long ol narafala man.”—1 Korin 10:24.
“Yufala i no mas hariap blong kros long yufala, mo yufala i mas glad blong fofogivim yufala.”—Kolosi 3:13.

Mekem Ol Waes Desisen

“Man we i no save samting, i bilif long evri toktok, be man we i tingting gud, hem i skelem gud wanwan step blong hem.”—Ol Proveb 14:15.
“Man we i tingting gud i luksave we trabol i stap kam, nao i go haed, be man we i no gat ekspiriens, hem i gohed nomo, i no wantem save, mo biaen i safa from.”—Ol Proveb 22:3.

WAJTAOA