Prija 1:1-18
1 Ol tok ya oli blong man blong hivimap ol man.*+ Hem i boe blong Deved, we i king long Jerusalem.+
2 Man blong hivimap ol man i talem se: “!Hemia i blong nating nomo!”*“!Hemia i blong nating nomo! !Evri samting i blong nating nomo!”+
3 ?Man i kasem wanem from ol hadwok blong hemWe hem i stap traehad from aninit long san?+
4 Wan jeneresen i go, mo wan narafala jeneresen i kam,Be wol i stap* blong olwe.+
5 Evri dei, san i girap,* mo san i draon,Nao kwiktaem i gobak long ples we hem i kamaot long hem, blong i girap bakegen.+
6 Win i blu i go long saot, mo i goraon i kasem not,Mo i gohed blong goraon folem sem rod blong hem. Oltaem win i goraon.
7 Olgeta springwota mo reva* oli stap ron i go long solwota, be solwota i no fulap.+
Oltaem oli stap gobak long ples we oli kamaot long hem fastaem, nao oli stap ron i godaon bakegen.+
8 Evri samting oli stap mekem yumi taed tumas,I no gat man i save tokbaot.
Ae i no kam taed blong lukluk,Mo sora i neva taed blong harem.
9 Samting we i bin stap, bambae i stap olsem,Mo samting we oli mekem bifo, bambae oli mekem bakegen.
I no gat wan niufala samting aninit long san.+
10 ?I gat wan samting we man i save tokbaot i se: “Yufala i luk samting ya, hemia i wan niufala samting”?Samting ya i stap bifo finis,Samting ya i stap finis, bifo we yumi bon.
11 I no gat wan man i tingbaot ol man ya bifo,Mo i no gat wan man i save tingbaot ol man we bambae oli kam biaen,Mo ol man we bambae oli bon i kam yet, olgeta tu bambae oli no tingbaot ol man ya.+
12 Mi, man blong hivimap ol man, mi nao mi king blong Isrel long Jerusalem.+
13 Mi mekem tingting blong mi i strong blong stadi, mo mi yusum waes+ blong lukluk gud evri samting we ol man oli bin mekem long wol,+ hemia ol wok we man i harem nogud blong mekem, we God i givim blong mekem man i bisi.
14 Mi luk olgeta wok we ol man oli bin mekem aninit long san,!Be yu luk! Olgeta samting i blong nating nomo, i olsem se man i stap ronem win nomo.+
15 Samting we i kruked, man i no save stretem,Mo ol samting we oli no stap, man i no save kaontem.
16 Nao long hat blong mi, mi talem se: “!Yu luk! Mi mi kasem bigfala waes i bitim olgeta we oli bin stap fastaem long mi long Jerusalem.+ Mo mi traehad gogo hat blong mi i fulap gud long waes mo save.”+
17 Long fulhat blong mi, mi traehad blong faenemaot waes, mo blong faenemaot krangke fasin,* mo blong faenemaot fasin blong no gat gudfala tingting,+ be ol samting ya tu oli olsem we man i stap ronem win nomo.
18 Taem man i kam waes moa, samting ya i stap mekem hem i harem nogud moa,Taswe man we i kasem moa save, hem i safa moa.+
Ol futnot
^ NT: “man ya we i stap singaot ol man oli kam wanples; man we i stap mekem plan.”
^ NT: “westem nomo.”
^ PT: “i stanap.”
^ NT: “san i saen.”
^ NT: “Olgeta wota long krik long koltaem; Olgeta wota long defdefren taem blong yia.”
^ NT: “fasin we i krangke we i krangke.”
