Amalumbo 103:1-22
Ulwa kwa Davidi.
103 We mweo wandi,+ cindika Yehova,Na conse icaba mu kati kandi, cicindike ishina lyakwe ilya mushilo.+
2 We mweo wandi, cindika Yehova,Kabili wilaba fyonse ifyo aacita,+
3 Uwelela imembu shobe shonse,+Uuposha amalwele yobe yonse,+
4 Uulubula umweo obe ukufuma ku nindi,+Uukufwika icilongwe ca cikuuku ne nkumbu,+
5 Uukupeela ifisuma+ inshita yonse iya mweo obe;Pa kuti ubwaice bobe bulengwe cipya cipya nga filya ciba kuli kapumpe.+
6 Yehova alebomba imilimo ya bulungami+No kupingwilako bonse abafyengwa.+
7 Alengele Mose ukwishiba imibele yakwe,+Alengene na bena Israele ukwishiba imilimo yakwe.+
8 Yehova wa nkumbu kabili wa mutembo,+Alakokola ukukalipa kabili afulisha icikuuku.+
9 Tekalila fye ukufwailisha ifilubo,+Kabili takalifiwa umuyayaya.+
10 Taacita kuli ifwe ukulingana ne membu shesu;+Kabili taatukanda ifyo tufwile ukukandwa ukulingana ne membu shesu.+
11 Pantu filya fine ku muulu kwalepa ukufuma pano isonde,+E fyo ne cikuuku cakwe cakula ku bamutiina.+
12 Filya akabanga kaatalukisha ku masamba,+E fyo na o atalusha kuli ifwe imembu shesu.+
13 Ifyo wishi omfwila abana bakwe uluse,+E fyo Yehova na o omfwila uluse abamutiina.+
14 Pantu umwine alishiba bwino ifyo twapangwa,+Alebukisha ukuti tuli lukungu.+
15 Lelo inshiku sha muntu umwina kufwa, shaba nge nshiku sha mulemfwe;+Abalula kwati liluba lya mu mpanga.+
16 Pantu ilyo umwela fye wapuupapo, lilonaika;+Ne ncende lyalipo tayakalishibe na kabili.+
17 Lelo icikuuku ca kwa Yehova cafuma umuyayaya no kuya umuyayaya+Ku bamutiina,+No bulungami bwakwe buya ku bana ba bana babo,+
18 Ku basunga icipangano cakwe+Na ku bebukisha ifipope fyakwe pa kuti baleficita.+
19 Yehova umwine alipampamika icipuna cakwe ica bufumu mu muulu;+No bufumu bwakwe buteka pali conse.+
20 Cindikeni Yehova, mwe bamalaika+ bakwe, mwe mpalume, mwe bacita ifyo asosa,+Pa kukutika ku cebo cakwe.+
21 Cindikeni Yehova, mwe mabumba yakwe yonse,+Mwe babomfi bakwe, abacita ukufwaya kwakwe.+
22 Cindikeni Yehova, mwe fibumbwa fyakwe fyonse,+Mwe baba mu ncende shonse isha bufumu bwakwe.+We mweo wandi, cindika Yehova.+