Biblu’n nun’n, kpɛ sunman’n be flɛ Zezi kɛ “Ɲanmiɛn i Wa’n.” (Zan 1:49) Kɛ be se kɛ e ti Ɲanmiɛn i mma mun’n i sɔ’n kle kɛ Ɲanmiɛn ti like kwlaa Yifuɛ naan ninnge’m be kwlaa be nguan’n fin i. Zezi kusu i nguan’n fin i wie. (Jue Mun 36:9; Sa Nglo Yilɛ 4:11) Biblu’n kleman kɛ Ɲanmiɛn wuli ba kɛ klɔ sran’m be fa wu ba’n sa.

 Biblu’n flɛ anzi’m be kɛ ‘Ɲanmiɛn Kpli i mma mun’ wie. (Zɔbu 1:6) Kpɛkun Biblu’n se kɛ sran klikli nga Ɲanmiɛn yili i mɔ yɛle Adan’n, ɔ ti “Ɲanmiɛn wa.” (Liki 3:38) Sanngɛ kɛ mɔ Zezi yɛ Ɲanmiɛn dun mmua yili i mɔ i kunngba yɛ ɔ yili i trele sa’n ti’n, Biblu’n flɛ Zezi kɛ Ɲanmiɛn i Wa kpɛn’n.

•  ?Zezi dun mmua trannin ɲanmiɛn su lɔ ka naan b’a wu i asiɛ’n su wa?

•  ?Ka naan Zezi w’a ba asiɛ’n su wa’n, ngue yɛ ɔ yoli-ɔ?

 Ɛɛn. I nun mɔ Zezi o ɲanmiɛn su lɔ’n, ɔ ti aolia nun sran. I sin yɛ be wuli i asiɛ’n su wa kɛ klɔ sran sa-ɔ. Zezi bɔbɔ seli kɛ: “N fin ɲanmiɛn su lɔ n bali.”—Zan 6:38; 8:23.

 Ɲanmiɛn dun mmua yili Zezi ka naan w’a yi ninnge onga mun. Biblu’n kan Zezi i ndɛ se kɛ:

•   “Ɔ ti ninnge kwlaa nga Ɲanmiɛn yili be’n be nun klikli’n.”—Kolɔsufuɛ Mun 1:15.

•   “Ɔ ti ninnge nga Ɲanmiɛn yili be’n be nun klikli’n.”—Sa Nglo Yilɛ 3:14.

 Zezi yɛ Ɲanmiɛn Ndɛ’n kɛn i ndɛ se kɛ ‘i afinliɛ’n fin lalafuɛ nun, naan ɔ fin laa blɛ’n nun’n’ niɔn.—Mise 5:2; Matie 2:4-6.

 Ɔ le ɲrun kpa ɲanmiɛn su lɔ. Zezi kannin ɲrun ng’ɔ le i’n i ndɛ srɛlɛ kun nun. Ɔ seli kɛ: ‘Min Si, kwlaa naan mɛn’n w’a bo i bo’n, ɲrun nga n le i ɔ wun lɔ’n, yo maan n ɲan ɲrun kunngba sɔ’n ekun.’—Zan 17:5.

 Ɔ ukɛli i Si naan b’a yi ninnge onga mun. Zezi nin Ɲanmiɛn be dili junman likawlɛ. Ɔ yoli “junman difuɛ m’ɔ si junman’n i di kpa-ɔ.” (Ɲanndra Mun 8:30) Biblu’n kan Zezi i ndɛ se kɛ: “Ɲanmiɛn sinnin i lika yili ninnge kwlaa nga be o ɲanmiɛn su lɔ’n nin nga be o asiɛ’n su wa’n.”—Kolɔsufuɛ Mun 1:16.

 Ɲanmiɛn sinnin Zezi i lika yili ninnge onga’m be kwlaa. Ninnge sɔ’m be wie yɛle anzi mun ɔ nin nglo nin asiɛ’n. (Sa Nglo Yilɛ 5:11) Wafa nga Ɲanmiɛn nin Zezi be fa dili junman likawlɛ’n, ɔ ti kɛ fie difuɛ kun nin i sa nun junman difuɛ sa. Fie difuɛ’n yɛ ɔ klekle junman’n niɔn. Kpɛkun junman difuɛ’n yɛ ɔ di junman’n niɔn.

 Ɲanmiɛn sin i lika kle anzi nin sran’m be like. Kɛ Biblu’n kán i nun mɔ Zezi o ɲanmiɛn su lɔ’n i ndɛ’n, ɔ flɛ Zezi kɛ “Ndɛ’n.” (Zan 1:1) I sɔ’n kle kɛ Ɲanmiɛn sinnin i Wa’n i lika kannin ndɛ kleli aolia nun sran onga mun.

 Asa ekun’n, ɔ yo kɛ Ɲanmiɛn sinnin Zezi lika kannin ndɛ kleli klɔ sran mun wie sa. Atrɛkpa’n, Ɲanmiɛn sinnin i lika kannin ndɛ kleli Adan nin Ɛvu fie klanman’n nun. (Bo Bolɛ 2:16, 17) Atrɛkpa kusu’n, anzi ng’ɔ dunnin Izraɛlifuɛ’m be ɲrun mmua aawlɛ flɛnnɛn’n nun lɔ m’ɔ fata kɛ Izraɛlifuɛ’m be fɛ i ndɛ’n su’n yɛle Zezi.—Ezipti Lɔ Tulɛ 23:20-23. a