Fluwa nga Pɔlu klɛli Kolɔsufuɛ mun’n 1:1-29
1 Min Pɔlu mɔ Ɲanmiɛn maan n ti Klisi Zezi i akoto’n, min nin e niaan bian Timote+
2 é fá fluwa nga é kó mán Kolɔsu lɔ Ɲanmiɛn i sran nanwlɛfuɛ mɔ be ti e niaan’n, mɔ be nin Klisi b’a yo sran wunmuan’n:
Maan e Si Ɲanmiɛn yo amun ye, yɛ maan ɔ yo naan amun di fɔundi.
3 Blɛ kwlaa nga e srɛ Ɲanmiɛn man amun’n, e la e Min Zezi Klisi i Si Ɲanmiɛn i ase titi.
4 Afin e tili i kɛ amun lafi Klisi Zezi su kpa, yɛ amun klo Ɲanmiɛn i sran mun
5 like nga be fa sieli amun ɲanmiɛn su lɔ+ mɔ amun wla o su’n ti. Ndɛ nanwlɛ’n mɔ yɛle jasin fɛ mɔ be bo kleli amun laa’n yɛ maan amun sili like sɔ’n niɔn.
6 Jasin fɛ sɔ’n toli amun. Sɛ ɔ ti waka’n, nn é sé kɛ ɔ su mma yɛ w’a tru mɛn wunmuan’n nun.+ I wafa kunngba’n, kɛ ɔ fin cɛn mɔ amun tili Ɲanmiɛn i aklunye’n i su ndɛ’n, mɔ amun wunnin kɛ Ɲanmiɛn i aklunye’n ti dan sakpa’n, jasin fɛ’n su mma, yɛ ɔ tru amun afiɛn wie.
7 I sɔ liɛ’n yɛ e niaan kpa Epafrasi m’ɔ ti e wiengu junman difuɛ’n+ kleli amun-ɔn. Aniaan sɔ’n ti Klisi’n i junman difuɛ kpa, yɛ ɔ sin e osu di junman man amun.
8 Ɔ kannin klolɛ mɔ Ɲanmiɛn wawɛ’n maan amun klo sran’n i ndɛ kleli e.
9 I sɔ’n ti’n, kɛ ɔ fin cɛn mɔ e tili ndɛ sɔ’n, e srɛ Ɲanmiɛn man amun titi.+ E srɛ i kɛ ɔ yo maan amun si i klun sa’n kpa+ naan amun si ngwlɛlɛ kpa, yɛ amun wun like nga Ɲanmiɛn wawɛ’n kle’n i wlɛ kpa.+
10 I liɛ’n, amun nzuɛn’n mánmán Zoova,* yɛ i klun jɔ́ amun wun kpa. I wafa kunngba’n amún yó sa kpakpa kɔ́ amun ɲrun, kpɛkun amún sí Ɲanmiɛn kpa trá laa’n.+
11 Asa ekun’n, e srɛ i kɛ ɔ wla amun fanngan i kwlalɛ dan’n ti,+ naan amun jran kekle guɛ i ti nin i bo, naan amun tra amun awlɛn, yɛ amun klun jɔ.
12 Kpɛkun amun la e Si’n i ase. Afin ɔ yoli naan aja like ng’ɔ́ fá mɛ́n i sran+ mɔ be o lika ng’ɔ kpaja’n nun’n, amun ɲan wie.
13 Ɔ deli e aosin’n i min’n i sa nun,+ yɛ ɔ fali e ɔli i awlɛn su Ba’n i famiɛn diwlɛ’n nun.
14 I awlɛn su Ba sɔ’n kpɔli e ti, ɔ maan y’a ɲan e ti, b’a yaci e wun sa’n b’a cɛ e.+
15 Ɔ fa Ɲanmiɛn mɔ be wunmɛn i’n,+ i yɛ ɔ ti ninnge kwlaa nga Ɲanmiɛn yili be’n be nun klikli’n+ niɔn.*
16 Ɲanmiɛn sinnin i lika yili ninnge kwlaa nga be o ɲanmiɛn su lɔ’n nin nga be o asiɛ’n su wa’n. Ninnge nga e wun be mun-o, nga e wunman be mun-o,+ famiɛn diwlɛ mun-o, awa mun-o, kwlafuɛ mun-o, Ɲanmiɛn sinnin i lika yili be kwlaa. I yɛ Ɲanmiɛn sinnin i lika yili ninnge onga’m be kwlaa-ɔ,+ yɛ be ti i liɛ.
17 Asa ekun’n, be yili i ka naan b’a yi ninnge onga’m be kwlaa,+ i yɛ Ɲanmiɛn sinnin i lika yili ninnge onga’m be kwlaa-ɔ.
18 Ɔ ti asɔnun’n m’ɔ ti kɛ wunnɛn sa’n i ti’n.+ Ɔ dun mmua like kwlaa ɲrun, i yɛ ɔ ti sran klikli mɔ Ɲanmiɛn cɛnnin i’n+ niɔn. Ɲanmiɛn yoli sɔ naan ɔ dun mmua like kwlaa ɲrun.
19 Afin Ɲanmiɛn wunnin kɛ ɔ ti kpa kɛ ɔ yo naan like kwlaa trɛn i nun+
20 naan ɔ sin i lika siesie i bɔbɔ nin ninnge onga nga be o ɲanmiɛn su lɔ’n nin nga be o asiɛ’n su wa’n be kwlaa be afiɛn.+ I mmoja’n m’ɔ guɛli i ase+ ɲrɛnnɛn waka’n* su’n ti yɛ be afiɛn kwla sɛli-ɔ.
21 Laa’n, amun nin Ɲanmiɛn amun afiɛn ti nun yɛ amun ti i kpɔfuɛ. Afin ninnge tɛtɛ’m be yolɛ’n i akunndan yɛ amun bu-ɔ.
22 Siɛn’n, w’a siesie amun nin i amun afiɛn sran sɔ’n i wunnɛn’n nin i wie’n ti. Ɔ yoli sɔ naan amun yo sanwun, naan fiɛn kaan sa w’a tranman amun wun, naan b’a saciman amun wun kaan sa i ɲrun.+
23 Sanngɛ ɔ fata kɛ amun lafi Ɲanmiɛn su titi,+ amun jran kekle+ i su mɔ amun lafi’n ti, yɛ nán amun kpɔnzɔ.+ Like nga jasin fɛ mɔ amun tili’n ti’n amun wla o su’n, ɔ fataman kɛ ɔ fi amun sa. Be boli jasin sɔ’n lika kwlaa nun ɲanmiɛn’n bo wa.+ Min bɔbɔ min Pɔlu m’an kaci jasin sɔ’n i bofuɛ.+
24 Siɛn’n, fɛlɛ mɔ n fɛ amun dunman nun’n ti’n,+ min klun jɔ. Yɛ n su wun ɲrɛnnɛn kɛ Klisi’n i liɛ’n sa. Sanngɛ ɔ fata kɛ n wun ɲrɛnnɛn sɔ n guɛ i ti nin i bo i wunnɛn+ mɔ yɛle asɔnun’n+ i ti.
25 M’an kaci asɔnun sɔ’n i junman difuɛ, afin Ɲanmiɛn fɛli i sɔ junman’n+ wlali min sa nun kɛ n di man amun naan n kan Ɲanmiɛn ndɛ’n n guɛ i ti nin i bo.
26 Ndɛ sɔ m’ɔ ti fiawa’n,+ laa blɛ nun’n* sran’m b’a simɛn i,+ kpɛkun lalafuɛ sran’m b’a simɛn i. Sanngɛ siɛn’n, Ɲanmiɛn w’a yi i nglo w’a kle i sran mun.+
27 Ɲanmiɛn i klun klo su’n, ɔ yili ndɛ ɲɛnmɛn sɔ’n m’ɔ fa fiɛli i sran’m be ɲrun’n+ kleli i sran mɔ be o nvlenvle’m be nun’n. Ndɛ sɔ’n yɛle Klisi mɔ amun nin i be o nun’n i su ndɛ’n. Yɛle kɛ amun wla o su kɛ amun nin i bé ɲán ɲrun.+
28 Sran sɔ’n i ndɛ yɛ e kan kle sran mun-ɔn. E tu sran’m be kwlaa be fɔ, yɛ e kle be like ngwlɛlɛ su. I liɛ’n, e kwla fa sran kwlaa nga b’a yo sran mɔ be nin Klisi b’a yo sran wunmuan’n,+ e kle Ɲanmiɛn.
29 I sɔ’n ti’n, n tu min klun n di junman kekle kpa. I wunmiɛn m’ɔ di junman min nun’n yɛ maan n kwla yo sɔ-ɔ.+
Ja ngua lɔ ndɛ mun
^ Glk., “i yɛ ɔ ti ba klikli’n niɔn.”
^ Nian Ndɛ’m be bo tulɛ lika’n nun lɔ.
^ Nian Ndɛ’m be bo tulɛ lika’n nun lɔ.
