Jôl li Djob le njee? Nyambe nyemede a nkal le: “Men me yé Yéhôva. Lini jon li yé jôl jem.” (Yésaya 42:8) Ba nléba jôl li Nyambe ikété Bibel yom kiki bo 7 000 ngélé. Ndi ngandak ngobol i Bibel i bi nhéñha jôl jé ni mangédi kiki bo “Nwet.” Djob a ngwés le u yila liwanda jé, jon a naña we i ‘sébél jôl jé.’​—Tjémbi 105:1.

Mangédi ma Yéhôva. Bibel i ñunda le Yéhôva a gwé mangédi kiki bo: “Djob,” “Bayemlikok,” “Nhek,” “Tata,” “Nwet,” ni “Nungingii.” Ikété Bibel, di nléba ngandak masoohe i het bagwélél ba Djob ba bi gwélél mangédi mé, ndi yak bañga yé jôl le Yéhôva.​—Daniel 9:4.

 Lelaa Djob a yé? Djob a yé mbuu. (Yôhanes 4:24) Bibel i nkal le “mut nye ki nye a ma tehe bé Nyambe.” (Yôhanes 1:18) Bibel i nyeelene bés i yom a nôgda. Bôt ba nla unbaha nye tole ba nla “kônha nye maséé.”​—Bingéngén 11:20; Tjémbi 78:40, 41.

Bilem bi Djob. Nyambe a ntodol bé mut nye ki nye to litén jo ki jo. (Minson mi Baôma 10:34, 35) A yé yak “Nyambe nu konangoo ni nu karis, nu a mpala bé unup, ndi a nyaaba ni loñgeñem ni maliga.” (Manyodi 34:6, 7) Ndi, Djob a gwé bilem bi-na bi tôbôtôbô.

Ngui. Kiki a yé “Nyambe nu ngui yosôna,” ngui yé i gwé bé minwaa inyu yônôs to limbe jam a mbôn.​—Bibôdle 17:1.

Pék. Pék i Djob i nloo pék yosôna. Inyu hala nyen Bibel i nkal le a yé “Nyambe nyetama nu a gwé pék.”​—Rôma 16:27.

Telepsép. Nyambe a mboñ ndik mam ma téé sép. Minson nwé mi “yôni,” to “liboñok libe li ta bé nyeni.”​—Ndiimba Mbén 32:4.

Gwéha. Bibel i nkal le “Nyambe a yé gwéha.” (1 Yôhanes 4:8) Nyambe a ñunda ndik bé gwéha, ndi nyemede nyen a yé gwéha. Gwéha yé i nene mu mam momasôna a mboñ, i yéne yak bés nseñ ikété ngandak manjel.

Maada ma Djob ni bôt ba binam. Nyambe a yé Tata wés nu a yé ngii. (Matéô 6:9) Ibale di mbôdôl nye ñem, di nla yila liwanda jé. (Tjémbi 25:14) Jon, Yéhôva a naña bé i kôôge nye bebee ni njel masoohe ni i “bééga nye nduña nan yosôna inyule a ntôñ bé.”​—1 Pétrô 5:7; Yakôbô 4:8.

Yésu a ta bé Djob. Yésu nyetama nyen Yéhôva a bi hek ni moo mé. Inyu hala nyen Bibel i nsébél nye le Mpom Man. (Yôhanes 1:14) I mbus le a bi hek Yésu, Yéhôva a bi gwélél mbôkgwéé wé kiki “nwet ngwelson” inyu hek gwom gwobisôna.​—Bingéngén 8:30, 31; Kôlôsé 1:15, 16.

 Kekikel Yésu Kristô a bi kal bé le a yé Djob. Nyemede a ntoñol le: “Inyule me yé nu a nlôl i jôl jé [Djob], a lôlak i nyeni; nye ki nyen a bi ep me.” (Yôhanes 7:29) Ngéda a bé pôdôs nnigil wé wada, a bi sébél Yéhôva le “Tata wem ni Isoñ nan, yak Nyambe wem ni Nyambe nan.” (Yôhanes 20:17) I mbus nyemb Yésu, Yéhôva a bi tugul nye inyu niñ ngii a ti ki nye kunde i énél.​—Matéô 28:18; Minson mi Baôma 2:32,33.

Yésu Kristô a nla hôla we i kôôge Nyambe bebee

Yésu a bi lo hana ’isi inyu niiga bés njee a yé Isañ. Yéhôva nyemede a bi kal inyu Yésu le: “Man wem nunu, man wem nu gwéha, emblana nye.” (Markô 9:7) Yésu a nyi Djob iloo bôt bobasôna. A bi kal le: “Mut nye ki nye a nyi bé njee Man a yé handugi Isañ; mut nye ki nye a nyi bé njee Isañ a yé handugi Man ni hiki mut Man a ngwés yeelene njee Isañ a yé.”​—Lukas 10:22.

Yésu a bi éba bilem bi Djob ikété libak li yôni. Yésu a bi kôna bilem bi Isañ kayéle a bi la kal le: “Nu ni nu a ntehe me, wee a ntehe yak Tata.” (Yôhanes 14:9) Bipôdôl ni bibôñol bi Yésu bi bi hôla bôt i kôôge Djob bebee. A bi kal le: “Men me yé njel, me yé maliga, me yé ki niñ. Mut to wada a nlo bé yak Tata handugi ni njel yem.” (Yôhanes 14:6) A bi kal ki le: “Bañga babégés Tata b’a bégés nye lôñni mbuu ni maliga; ntiik, Tata a nyéñ i mintén mi bôt mi inyu bégés nye.” (Yôhanes 4:23) Hoñol ki! Yéhôva a nyéñ bôt kiki we ba ba nyéñ yi maliga inyu ba mawanda mé.