Kaat Markô 4:1-41
4 A témb a bôdôl niiga i ngwañ tuye, yak limut li bôt likeñi li kodba ipañ yé. Jon a bi bet i môñgô, a yén, a ke haa ndék ni ngwañ tuye, ndi limut jolisôna li bééne i ngwañ tuye.+
2 Ha nyen a bôdôl niiga bo ngandak mam ni njel dihéga;+ kiki a bé niiga bo, a kal bo le:+
3 “Emblana! Mut wada a bi pam i nwes mbôô.+
4 Mu kiki a bé nwes mbôô, ihogi i kwo i nloñ, ndi dinuni di lo di je yosôna.
5 Ipe i kwo i bahoma ba ngok i het biték bi bé bé ngandak, i pala ki o inyule biték bi bé bé ndip.*+
6 Ndi i ngéda hiañgaa hi bi pam, hi ligis yo inyule i bééna bé minkañ.
7 Ipe ki i kwo ipôla biloo, ndi biloo bi o, bi hô yo, i num bé matam.+
8 Ndi ipe i bi kwo i hisi hilam, i nañ, i bôl, i bôdôl num matam 30, 60, ni 100 ngélé.”+
9 I mbus, a kônde le: “Nu a gwé maôô i emble, a emble.”+
10 Ndi i ngéda a bé nyetama, banigil bape ni jôm li baôma ni iba ba bôdôl bat nye mambadga inyu dihéga tjé.+
11 A kal bo le: “Bé bon i bi tina le ni nok jimb lipubi+ li Ane Nyambe, ndi inyu bôt ba yé i mbégdé, me niiga bo mam momasôna ni dihéga,+
12 inyu boñ le to hala kiki ba mbéñge, ba tehe bañ; to hala kiki ba ñemble, ba tibil bañ nok; to hielba, ba hielba bañ inyu kôhna nwéhél.”+
13 I mbus, a kal ki bo le: “Baa ni nok bé hihéga hini? Lelaa ni n’a nok dini dihéga dipe tjodisôna?
14 “I mut a nwes mbôô nyen a yé nu a nwes bañga.+
15 Ngim bôt i yé kiki mbôô i nkwo i nloñ, i ngéda ba ntip ndik nok bañga, Satan a nlo,+ a héya bañga ba nwes ikété yap.+
16 Nlélém jam ki, bôt bape ba yé kiki mbôô i nkwo i bahoma ba ngok; i ngéda ba ntip ndik nok bañga, ba neebe yo ni maséé.+
17 Ndi kiki bañga i yé ngi o minkañ ikété miñem nwap, ba nom ndik inyu ndék ngéda; ndi i ngéda njiiha tole ndééñga i ntip ndik bôdôl inyule ba ñemble bañga, ba mbaage.
18 Ba bi nwes ki mbôô ipe ipôla biloo. I bôt bana bon ba ñemble bañga,+
19 ndi mandutu+ ma niñ munu nkoñ ’isi,* ni ngui malôga i lingwañ,+ lôñni minheña+ inyu mintén mi mam nwominsôna mi njôp bo i miñem, mi nhô bañga kayéle i num bé matam.
20 Sôk i nsôk, mbôô ba bi nwes i hisi hilam i yé bôt ba ñemble bañga, ba nleege yo ni maséé, ba num ki matam 30, 60, ni 100 ngélé.”+
21 A kal ki bo le: “Ba nyoñ bé lambe inyu ha yo isi sel* tole isi nañi, hala bé? Baa ba nyoñ nga yo inyu bii yo i kéhne lambe?+
22 Inyule yom yo ki yo i yé hôk y’a yégle bé le ba hulul bé yo; to yom yo ki yo ba ntibil sôô y’a yégle bé le i pam bé i mbégdé.+
23 Nu ni nu a gwé maôô i emble, a emble.”+
24 A kônde ki kal bo le: “Tiblana sédi maôô inyu nok mam ni yé emble.+ Kiki ni nhégél bape, hala nyen b’a hégél yak bé, ñ, b’a kônde yaga bé.
25 Inyule nu a gwé, b’a kônde ki nye;+ ndi nu a gwé bé, yak i ndék a gwé, b’a yoñ yo.”+
26 I mbus, a kal ki le: “Hala nyen Ane Nyambe i yé kiki i ngéda mut a nwes mbôô ’isi.
27 A nañal juu, a telbak kegla, ndi a nyi bé lelaa mbôô i ño, to lelaa i nañ.
28 Hisi hiomede hi mboñ le mbôô i oo ndék ni ndék: hi nti ndugi man kai, i mbus ntudu u pam; sôk i nsôk, u yila nhôôlak ntudu nyonok ni mis.
29 Ndi i ngéda matam ma nhôlôl ndigi, a ntégbaha nhôdôk kwade inyule ngéda libumbul i nkola.”
30 A kônde ki kal le: “Di nla hégha Ane Nyambe ni kii? Tole di nla yoñ himbe hihéga inyu toñol yo?
31 I yé kiki hisiina hi mbôô, i ngéda ba bi bel hio, hi bé loo mbôô yosôna bititigi hana ’isi.+
32 Ndi i ngéda ba mal bel yo, i nañ, i loo mbônji yosôna bikeñi, i ti mintjep minkeñi kayéle dinuni di ngii di nla léba liyééne isi yiye yé.”
33 Ni i nya ngandak dihéga+ i nyen a bé añle bo bañga i Nyambe, inoñnaga ni kiki ba bé la nok yo.
34 Ni maliga, a bé pôdôs bé bo ibabé i yoñ hihéga, ndi a bé toñle banigil bé mam momasôna i ngéda ba bé botama.+
35 I nlélém kel, i ngéda kôkôa i bi kwo, a kal bo le: “Loga, di yap uu ngwañ tuye.”+
36 Kiki ba mal huuha limut, ba yoñ nye ikété môñgô,* yak môñgô mimpe mi noñ nye.+
37 Ndi soso mbuk mbebi a bôdôl hôñ ni ngui, yak mangudga ma kahal kôba ikété môñgô kayéle môñgô u bé bebee ni yon ni malép.+
38 Ndi Yésu a bé nyoo i mbus môñgô, a kenek ’ilo i ngii mbôñga. Jon ba tôdôl nye, ba kal nye le: “A Lét, hala a nkal bé we to jam le di yé bebee ni wo?”
39 Ha nyen a telep, a bam mbuk mbebi, a kal ki tuye le: “Hogbe! Mom nwee!”+ Ha nyen mbuk mbebi a mal, homa nyensôna a mom yaga nwee.
40 Ndi a kal bo le: “Inyuki ni nkon woñi hala?* Baa ni yé ngi bana hémle?”
41 Ndi ba bé kon woñi iloo hihéga, ba kalnaga bo ni bo le: “Njee mut yaga nunu? Ngo yak mbebi ni tuye bi nôgôl nye.”+
Ndoñi
^ Tole “biték bi bé bé ikétékété.”
^ Tole “munu hiai hini.” Béñge Ndoñi bibuk.
^ Tole “sel ba nhégél.”
^ Ni hop Lôk Héber, “ikété môñgô kiki a bé.”
^ Tole “inyuki ñem u ntelep bé hala?”