Hiôb 1:1-22
1 Mut wada a bé yééne i loñ Us, jôl jé li bé le Hiôb.*+ A bé mut a téé sép, a bak ngi nsohi;+ a konok Nyambe woñi, a keñglege béba.+
2 A bééna bon bôlôm basaambok, ni bon bôda baa.
3 A bééna ki 7 000 di mintômba, 3 000 di kamél, 1 000 hi nyaga,* ni 500 miñin mi magas; a ban-ga ngandak bagwélél, kayéle a yila bañga mut iloo bôt ba Likôl bobasôna.
4 Hiki man wé nu munlôm a bééna yé ngéda i tégbaha ngand i ndap yé.* Ba bé ba naña lôknyañ yap i bôda yo aa i je ni i nyo ni bo.
5 I ngéda ba bé ba mal i mangand ma, Hiôb a bé a sébél bo le a pubus bo. I mbus, a bé a pule telep bikegla, a ti Nyambe bisesema bi ntul i hié+ inyu hiki man wé; inyule a bé kal le: “Bebek, bon bem bôlôm ba mboñ béba, tole ba ntiihe Nyambe mu miñem nwap.” Hiôb a bé boñ hala hiki ngéda.+
6 Kel yada, bon ba Nyambe*+ ba jôp inyu telep i bisu bi Yéhôva,+ yak Satan+ a jôp ipôla yap.+
7 Ha nyen Yéhôva a bi bat Satan le: “U nlôl hee?” Satan a timbhe Yéhôva le: “Me bak me nkiiña mu ’isi, me bedek, me sôhôk.”+
8 Yéhôva a kal ki Satan le: “Baa u nyimbe ngwélél wem Hiôb? Mut numpe a ta bé i nkoñ ’isi kiki nye. A yé mut a téé sép, a bak ngi nsohi,+ a konok Nyambe woñi, a keñglege ki béba.”
9 Ndi Satan a timbhe Yéhôva le: “Baa yañga nyen Hiôb a nkon Nyambe+ woñi?
10 Baa u bi sôñ bé nye*+ i bipes gwobisôna, yak ndap yé, ni gwom gwobisôna a gwé? U mal sayap nson u moo+ mé, yak bilém gwé bi mbôl ndik bôl ni bôl mu loñ.
11 Ndi sambal le woo woñ, u bép gwom gwobisôna a gwé; ibabé pééna, a’ tiihe we i mbombom.”
12 Yéhôva a kal Satan le: “I gwom gwobisôna a gwé bi yé i moo moñ.* Ndi nyemede, u tihba bañ nye!” Ha nyen Satan a bi pam, a nyodi i bisu* bi Yéhôva.+
13 Kel yada, bon bôlôm ni bon bôda ba Hiôb ba bé je, ba nyok wai i ndap i manyañ wap nu munlôm nu mañ,+
14 nlegelnwin wada a lo yak Hiôb, a kal nye le: “Balôm ba nyaga ba salak ’isi, yak miñin mi magas mi jek bikai ha bebee,
15 ha nyen Lôk Séba i nleñ bés gwét, i yoñ bilém, i nol yak bagwélél ni pansoñ. Metama ndik nyen me mpei, le me loo me kal we hala.”
16 A bé a ngi podok i ngéda nlegelnwin numpe a bi lo, a kal le: “Hié hi Nyambe* hi nlôl i ngii, hi ligis mintômba ni bagwélél, hi tjé bo! Metama ndik nyen me mpei, le me loo me kal we hala.”
17 A bé a ngi podok i ngéda nlegelnwin numpe a bi lo, a kal le: “Bôt ba Kaldéa+ ba bi boñ mintôñ maa, ba kwél mu kamél yés, ba yoñ yo; ba nol yak bagwélél ni pansoñ. Metama ndik nyen me mpei, le me loo me kal we hala.”
18 A bé a ngi podok i ngéda nlegelnwin numpe a bi lo, a kal le: “Bon boñ bôlôm ni bon boñ bôda ba bé je, ba nyok wai i ndap i manyañ wap nu munlôm nu mañ.
19 Kunda yada, mbuk mbebi a nlôl i ñoñ, a kumul makas ma ndap mo ma-na, kayéle ndap i kwél boñge ba wanda, ba wo. Metama ndik nyen me mpei, le me loo me kal we hala.”
20 Ha nyen Hiôb a bi telep, a was mbot yé, a kit yak tjôñ tjé. I mbus, a kwo ’isi, a ôôp,
21 a kal le:
“Me bi pam nso i libum li mama yem,m’a témb+ ki nso.
Yéhôva a nti,+ Yéhôva a nyoñ.
Jôl li Yéhôva li kôhna bibégés.”
22 Ndi ikété mam mana momasôna, Hiôb a bi boñ bé béba, a ôm bé to Nyambe nsohi le a mboñ jam libe.*
Ndoñi
^ Hala a nla kobla le “yom ba ñoo.”
^ Ni hop Lôk Héber, “500 nyaga iba-iba.”
^ Tole “i ndap i hiki wada wap yé kel.”
^ I bibuk bini bi nlôl ni lipôdôl li hop Lôk Héber, bi mpôdôl bon ba Nyambe, hala wee biañgel.
^ Tole “Baa u bi kéñ bé nye ni lipénd.”
^ Tole “bi yé we kunde.”
^ Ni hop Lôk Héber, “a nyodi i su.”
^ I nla ki ba, “Mbambat.”
^ Tole “a nkal bé to le Nyambe a mbep boñ.”