INGXENYE 2
Thembekani Komunye Nomunye
“Lokho uNkulunkulu akuhlanganisile makungahlukaniswa muntu.”—Marku 10:9
UJehova ufuna “sithande umusa [sazise ukwethembeka].” (Mika 6:8) Lokhu kubaluleke ngokukhethekile emshadweni wakho, ngoba ngaphandle kokwethembeka akukho ukwethembana. Kanti ukwethembana kubalulekile ukuze uthando lukhule.
Namuhla, ukwethembeka emshadweni kuya kuphela. Ukuze uvikele umshado wakho, kumelwe uzimisele ukwenza izinto ezimbili.
1 YENZA UMSHADO WAKHO UZE KUQALA
OKUSHIWO YIBHAYIBHELI: ‘Qiniseka ngezinto ezibaluleke kakhulu.’ (Filipi 1:10) Umshado wakho uphakathi kwezinto ezibaluleke kakhulu ekuphileni kwakho. Kuyafaneleka ukuba uze kuqala.
UJehova ufuna ukuba unake umuntu oshade naye futhi ‘ujabulele ukuphila’ naye. (UmShumayeli 9:9) Ukwenza kucace ukuthi akufanele nanini ungamnaki, kodwa kunalokho nobabili kufanele nifune izindlela zokujabulisana. (1 Korinte 10:24) Yenza umyeni wakho noma umkakho azizwe ethandwa futhi ekhethekile.
ONGAKWENZA:
-
Qiniseka ukuthi njalo nichitha isikhathi nindawonye, leso sikhathi ungasixubi nezinye izinto.
-
Cabanga “ngani” kunokuba ucabange “ngawe”
2 QAPHA INHLIZIYO YAKHO
OKUSHIWO YIBHAYIBHELI: “Wonke umuntu oqhubeka ebuka owesifazane aze amkhanuke, usephingile naye kakade enhliziyweni yakhe.” (Mathewu 5:28) Uma umuntu eqhubeka ecabanga ngezinto ezonakele, ngomqondo othile usuke engathembeki kwashade naye.
UJehova uthi kufanele ‘uqaphe inhliziyo yakho.’ (IzAga 4:23; Jeremiya 17:9) Ukuze wenze kanjalo, kumelwe uqaphe amehlo akho. (Mathewu 5:29, 30) Landela isibonelo senzalamizi uJobe, owenza isivumelwano namehlo akhe sokuba angambuki omunye umuntu wesifazane ngokumkhanuka. (Jobe 31:1) Zimisele ukuba ungazibuki nanini izithombe zobulili ezingcolile. Zimisele nokugwema ukuthandana nomunye umuntu ongashadile naye.
ONGAKWENZA:
-
Kwenze kucace kwabanye ukuthi uzibophezele ngokuphelele kumuntu oshade naye
-
Cabangela imizwa yomngane wakho womshado, futhi ubuqede ngokushesha noma yibuphi ubudlelwano obungamenza angajabuli