¿Baʼax ku yaʼalik le Biblia yoʼolal le pandemiaʼoboʼ?

PAX ICH

Baʼax ku yaʼalik le Bibliaoʼ

Le Bibliaoʼ u yaʼalmeʼ jach yaan u yantal kʼojaʼaniloʼob teʼ tu tsʼook kʼiinoʼob jeʼex le pandemiaʼoboʼ, tsʼoʼoleʼ tuláakal tuʼux kun ilbil (Lucas 21:11). Baʼaleʼ maʼ Dios beetik u yantal le pandemiaʼoboʼ. Letiʼeʼ yaan u usartik u Reino utiaʼal u luʼsik tuláakal le kʼojaʼaniloʼoboʼ, tak le pandemiaʼoboʼ.

¿U yaʼalmaj wa le Biblia yaan u yantal pandemiaʼoboʼ?

Le Bibliaoʼ maʼ u yaʼalmaj wa yaan u yantal pandemiaʼob wa kʼojaʼaniloʼob jeʼex le COVID-19, le sidaoʼ wa le gripe españolaoʼ. Baʼaleʼ u yaʼalmeʼ yaan u yantal «kʼaakʼas kʼojaʼaniloʼob» séeb u kíimskoʼob máak (Lucas 21:11; Apocalipsis 6:8). Le kʼojaʼaniloʼobaʼ ku yeʼesik kuxaʼanoʼon ‹tu tsʼook kʼiinoʼob› le yóokʼol kaabaʼ (2 Timoteo 3:1; Mateo 24:3).

¿Tsʼoʼok wa u meyaj tiʼ Dios le kʼojaʼaniloʼob utiaʼal u castigartik máakoʼ?

Le Bibliaoʼ ku yaʼalikeʼ yaan horaeʼ Dioseʼ tu beetaj u kʼojaʼantal wa máax utiaʼal u castigartik. Por ejemploeʼ tu beetaj u tsaʼayal lepra tiʼ jujuntúul máakoʼob (Números 12:1-16; 2 Reyes 5:20-27; 2 Crónicas 26:16-21). Chéen baʼaleʼ le kʼojaʼanil tsaʼay tiʼ le máakoʼobaʼ maʼ junpʼéel pandemia tu kíimsaj uláakʼ máakoʼobiʼ. Baʼaxeʼ chéen letiʼob kʼojaʼanchajoʼob úuchik u binoʼob tu contra baʼax u yaʼalmaj Diosoʼ.

¿Ku castigarkoʼon wa Dios yéetel le pandemiaʼoboʼ?

Maʼ. Yaan máakoʼob ku yaʼalikoʼobeʼ tiʼ Dioseʼ ku meyaj le pandemiaʼob yéetel uláakʼ kʼojaʼaniloʼob utiaʼal u castigartik máak. Chéen baʼaleʼ leloʼ maʼ letiʼe baʼax ku kaʼansik le Bibliaoʼ. ¿Baʼaxten k-aʼalik leloʼ?

Yaʼab tiʼ le máaxoʼob tu meyajtoʼob Dios úuchjeakiloʼ kʼojaʼanchajoʼob, bey u yúuchul xan teʼ kʼiinoʼobaʼ. Yáax tiʼ Timoteo 5:23 ku yaʼalikeʼ Timoteo, juntúul máax meyajt Dios úuchjeakileʼ, jach suuk u kʼojaʼantal kaʼachi. Chéen baʼaleʼ le Bibliaoʼ maʼ tu yaʼalik wa kʼojaʼanchaj úuchik u beetik baʼax kʼaas tu contra Diosiʼ. Teʼ kʼiinoʼobaʼ, yaʼab máakoʼob beetik baʼax uts tu tʼaan Dioseʼ ku kʼojaʼantaloʼob xan. Maʼ xaneʼ lelaʼ ku yúuchul tumen yaan horaeʼ chéen junsúutuk ku jáan úuchul wa baʼax tiʼ máak (Eclesiastés 9:11).

Le Bibliaoʼ ku kaʼansikeʼ maʼ kʼuchuk u kʼiinil u castigartaʼal le kʼasaʼan máakoʼob tumen Diosoʼ. Teʼ kʼiinoʼobaʼ letiʼeʼ u kʼáat ka náatsʼak máak tu yiknal utiaʼal u salvarkuba (2 Corintios 6:2). Utiaʼal lelaʼ táan u yilik ka kaʼansaʼak tiʼ tuláakal máak «le baʼaloʼob maʼalobtak ken u beet le Reinooʼ» (Mateo 24:14).

¿Yaan wa u xuʼulul u yantal pandemiaʼob?

Yaan. Le Bibliaoʼ ku yaʼalikeʼ yaan u kʼuchul u kʼiinil u luʼsaʼal le kʼojaʼaniloʼoboʼ. Yáanal u Reinoeʼ, Dioseʼ yaan u luʼsik tuláakal le kʼojaʼaniloʼoboʼ (Isaías 33:24; 35:5, 6). Maʼ tun yantal kíimil, okʼol mix kʼiʼinamil (Apocalipsis 21:4). Yaan xan u kaʼa kuxkíintik le máaxoʼob tsʼoʼok u kíimloʼob utiaʼal ka kuxlakoʼob tiʼ junpʼéel paraíso way Luʼumeʼ (Salmo 37:29; Hechos 24:15).

Tekstoʼob tiʼ le Biblia ku tʼaanoʼob yoʼolal le kʼojaʼaniloʼoboʼ

Mateo 4:23: «Jesúseʼ bin tiʼ tuláakal Galilea táan u kaʼansaj teʼ sinagogaʼoboʼ, táan u tʼaan tiʼ le baʼaloʼob maʼalobtak ken u beet u Reino Diosoʼ yéetel táan u tsʼakik tuláakal u jejeláasil kʼojaʼanil bey xan tuláakal le baʼax ku muʼyajtik le máakoʼoboʼ».

Baʼax u kʼáat u yaʼale: Le milagroʼob tu beetaj Jesúsoʼ tu yeʼesaj baʼax ken u beet ichil junpʼíit kʼiin u Reino Dios way Luʼumeʼ.

Lucas 21:11: «Yaan u yantal kʼaakʼas kʼojaʼaniloʼob».

Baʼax u kʼáat u yaʼale: Junpʼéel baʼax eʼesik kuxaʼanoʼon tu tsʼook kʼiinoʼobeʼ letiʼe u sen yantal kʼaakʼas kʼojaʼaniloʼob tuláakal yóokʼol kaaboʼ.

Apocalipsis 6:8: «Tsʼoʼoleʼ paakatnajeneʼ ka tin wilaj juntúul sakpileʼen tsíimin. Le máax natʼmiloʼ u kʼaabaʼeʼ Kíimil. Paachil tiʼ letiʼeʼ naatsʼ u taal le Muknaloʼ. Ka túun tsʼaʼabtiʼob páajtalil [...] utiaʼal ka kiimsajnakoʼob [...] yéetel kʼaakʼas kʼojaʼaniloʼob».

Baʼax u kʼáat u yaʼale: Le profecía ku tʼaan yoʼolal le máaxoʼob natʼmil le kantúul tsíiminoʼoboʼ ku yeʼesikeʼ teʼ tu tsʼook kʼiinoʼobaʼ yaan u yantal pandemiaʼob.